വിഎസ് എന്ന ചതിയന്‍

മാതൃകാദമ്പതികള്‍ തമ്മില്‍ സൗന്ദര്യപ്പിണക്കമുണ്ടാകുമ്പോള്‍ അത് സോള്‍വ് ചെയ്യുന്നതിനായി സന്നദ്ധപ്രവര്‍ത്തനം നടത്തുന്നത് നാട്ടുകാരുടെ ഒരു ഹോബിയാണ്. ഈ ദമ്പതികളുടെ വീട്ടില്‍ കയറി നിരങ്ങി, പ്രശ്‌നം സോള്‍വ് ചെയ്യാനെന്ന മട്ടില്‍ ദാമ്പത്യജീവിതത്തിന്റെ വിശദാംശങ്ങള്‍ വരെ ചികഞ്ഞെടുത്ത് നാട്ടില്‍ പാട്ടാക്കുകയും ഇവരുടെ സൗന്ദര്യപ്പിണക്കത്തെ ഡൈവോഴ്‌സിന്റെ വക്കോളമെത്തിക്കുകയും ചെയ്യുന്നതാണ് ഈ സന്നദ്ധപ്രവര്‍ത്തകരുടെ ഒരു ശൈലി. ഒടുവില്‍ പരസ്പരം തെറിവിളിച്ചു പിരിയുന്നതിനു പകരം സന്നദ്ധപ്രവര്‍ത്തകരുടെ മാധ്യസ്ഥമില്ലാതെ തന്നെ ദമ്പതികള്‍ വീട്ടിനുള്ളില്‍ പ്രശ്‌നം സോള്‍വ് ചെയ്യുകയും സന്തോഷത്തോടെ ഒരുമിച്ചു പോകാന്‍ തീരുമാനിക്കുകയും ചെയ്യുമ്പോള്‍ സന്നദ്ധപ്രവര്‍ത്തകര്‍ക്ക് കൂട്ടത്തോടെ ഉണ്ടാകുന്ന ഞെട്ടലും അമ്പരപ്പും രോഷവും പ്രതിഷേധവുമാണ് ഇപ്പോള്‍ വിഎസ് അച്യുതാനന്ദന്റെ നിലപാടു മാറ്റത്തില്‍ കേരളത്തിലെ സിപിഎം ഒഴികെയുള്ള രാഷ്ട്രീയപ്രസ്ഥാനങ്ങളിലെ നേതാക്കന്‍മാരും രാഷ്ട്രീയനിരീക്ഷകരും മാധ്യമപ്രവര്‍ത്തകരും പ്രകടിപ്പിച്ചുകൊണ്ടിരിക്കുന്നത്.

വിഎസിന്റെ നിലപാടുമാറ്റം സമകാലികരാഷ്ട്രീയത്തിലുണ്ടായിട്ടുള്ള ഏറ്റവും വലിയ ദുരന്തമാണെന്ന മട്ടിലാണ് പലരും പ്രതികരിക്കുന്നത്. വിഎസ് ആരെയൊക്കെയോ ചതിച്ചു എന്നും വിഎസിനു ഇവിടുത്തെ ജനങ്ങള്‍ മറുപടി നല്‍കും എന്നുമൊക്കെയാണ് പ്രതികരണത്തൊഴിലാളികളുടെ പ്രഖ്യാപനങ്ങള്‍. വിഎസ് അച്യുതാനന്ദന്‍ സിപിഎം വിട്ടു കോണ്‍ഗ്രസില്‍ ചേരുകയോ കോണ്‍ഗ്രസ് വിട്ടു ബിജെപിയില്‍ ചേരുകയോ ഇന്നലെ വരെയുണ്ടായിരുന്ന രാഷ്ട്രീയം തള്ളിപ്പറയുകയോ ചെയ്തിട്ടില്ല. നാളിന്നു വരെ സിപിഎമ്മുകാരനായി ജീവിച്ച വിഎസിന്റെ രാഷ്ട്രീയത്തില്‍ ഒരു മാറ്റവും വന്നിട്ടില്ല. പാര്‍ട്ടിയെ സമ്മര്‍ദ്ദത്തിലാക്കുന്ന തരത്തിലുള്ള പരസ്യനിലപാടുകള്‍ ഉപേക്ഷിച്ച് പാര്‍ട്ടിയുമായി ചര്‍ന്നു നിന്നുകൊണ്ട് പ്രവര്‍ത്തിക്കാനുള്ള അദ്ദേഹത്തിന്റെ തീരുമാനത്തെ ചതിയെന്നും വഞ്ചനയെന്നും വിശേഷിപ്പിക്കുന്ന പ്രബുദ്ധരാഷ്ട്രീയമീമാംസകര്‍ കുടിലബുദ്ധിക്കാരായ അട്ടകളാണ് എന്നു മനസ്സിലാക്കാന്‍ പൊളിറ്റിക്‌സ് എംഎയും ജേണലിസം ഡിപ്ലോമയും ആവശ്യമില്ല.

സീറ്റ് കിട്ടുന്നതും കസേര കിട്ടുന്നതുമനുസരിച്ച് നൂറുവട്ടം പാര്‍ട്ടി മാറുകയും മുന്നണി മാറുകയും സ്വന്തം രാഷ്ട്രീയത്തെ തള്ളിപ്പറയുകയും ചെയ്തിട്ടുള്ള നിലവാരമില്ലാത്ത നാലാംകിട രാഷ്ട്രീയക്കാരും അവരുടെ അനുയായികളും, ഏറെനളായുള്ള അസ്വാരസ്യങ്ങള്‍ മറന്ന് പാര്‍ട്ടിയോടൊപ്പം നില്‍ക്കാന്‍ തീരുമാനിച്ച വിഎസിനെ ചതിയനെന്നും കാലുവാരിയെന്നും വിശേഷിപ്പിക്കുന്നത് കൗതുകകരമായ കാഴ്ചയാണ്. വിഎസിനെ ആരാണ് ഏറ്റവുമധികം മുതലെടുത്തിട്ടുള്ളത് എന്നതറിയണമെങ്കില്‍ വിഎസിന്റെ നിലപാടുമാറ്റത്തില്‍ പ്രതിഷേധിക്കുന്ന നേതാക്കന്‍മാര്‍ ആരൊക്കെയാണെന്നു നോക്കിയാല്‍ മതി.

സിപിഎമ്മിന്റെ ഔദ്യോഗികപക്ഷത്തെ എതിര്‍ത്തുകൊണ്ട് സംസാരിക്കുമ്പോള്‍ വിഎസ് മഹാനായ നേതാവും ഔദ്യോഗികപക്ഷത്തോടൊപ്പം നില്‍ക്കുമ്പോള്‍ വിഎസ് ചതിയനായ രാഷ്ട്രീയപ്രവര്‍ത്തകനായും ചിത്രീകരിക്കുന്നസമൂഹം ഷക്കീല എ പടത്തിലഭിനയിക്കുമ്പോള്‍ കയ്യടിക്കുകയും അവാര്‍ഡ് പടത്തിലഭിനയിക്കുമ്പോള്‍ കൂവുകയും ചെയ്യുന്നവരില്‍ നിന്നും വ്യത്യസ്തമല്ല. വിഎസ് സിപിഎം നേതൃത്വത്തിനെതിരെ നില്‍ക്കുന്നതാണ് ഞങ്ങള്‍ക്കു ഹരം എന്നു തുറന്നുപറയാതെ രാഷ്ട്രീയത്തിലെ വിശുദ്ധിയെപ്പറ്റിയും ധാര്‍മിതകയെപ്പറ്റിയുമൊക്കെ വര്‍ണിച്ച് ആളുകളെ തെറ്റിദ്ധരിപ്പിക്കാന്‍ ശ്രമിക്കുന്നതാണ് സത്യത്തില്‍ യഥാര്‍ഥതട്ടിപ്പ്.

ടിപി ചന്ദ്രശേഖരന്‍ വധക്കേസില്‍ വിഎസ് എടുത്ത നിലപാടുകള്‍ ഉദ്ധരിച്ചാണ് പലരും വിഎസിനെ വിമര്‍ശിക്കുന്നത്. ടിപിയുടെ മരണത്തിന്റെ ഉത്തരവാദി വിഎസാണ് എന്നുവരെയാണ് പ്രതികരണങ്ങള്‍. ടിപിയെ കൊന്നതു നന്നായെന്നോ പാര്‍ട്ടിക്ക് അതുമായി പങ്കില്ലെന്നോ വിഎസ് പറഞ്ഞിട്ടില്ല. ആര്‍എംപി കോണ്‍ഗ്രസിന്റെ വാലായി മാറി എന്ന നിരീക്ഷണം ടിപിയെ ഏതെങ്കിലും തരത്തില്‍ അധിക്ഷേപിക്കുന്നതാണെന്നു തോന്നുന്നില്ല. സിപിഎം അന്വേഷണ കമ്മിഷന്‍ ഒരു പാര്‍ട്ടി അംഗത്തെ ടിവി വധത്തില്‍ കുറ്റക്കാരനായി കണ്ടെത്തി പുറത്താക്കിയത് വിഎസിന്റെ വിജയമാണ് എന്നതില്‍ തര്‍ക്കമില്ല. പൊലീസിന്റെ കയ്യില്‍ പോലും വേണ്ടത്ര തെളിവുകളില്ലാതിരിക്കെ വിചാരണ കഴിഞ്ഞു ശിക്ഷയും വിധിച്ച കേസില്‍ പിണറായി വിജയനെ ജയിലിലിടാന്‍ വേണ്ടി വിഎസ് പോരാടണമായിരുന്നു എന്നു പറയുന്നത് സിപിഎമ്മിനെയും വിഎസിനെയും ഒരുപോലെ നശിപ്പിക്കാമെന്നു വ്യാമോഹിക്കുന്നവരാണ്.

സിപിഎമ്മിനൊപ്പം നില്‍ക്കാന്‍ വിഎസ് തീരുമാനിച്ചത് അടുത്ത കാലത്ത് കേരള രാഷ്ട്രീയത്തിലുണ്ടായിട്ടുള്ള ഏറ്റവും പോസിറ്റീവായ തീരുമാനമാണ്. വിഎസിനെ ഉള്‍ക്കൊള്ളാന്‍ മാത്രം പാര്‍ട്ടിയും പാര്‍ട്ടിയോടൊപ്പം നില്‍ക്കാന്‍ വിഎസും വളര്‍ന്നു എന്നതില്‍ ലജ്ജാകരമായി ഒന്നുമില്ല. ഈ മാറ്റം കൊണ്ടു ഗുണമുണ്ടാകുന്നത് പാര്‍ട്ടിക്കും വിഎസിനും സിപിഎമ്മിനെ ഇപ്പോഴും സ്‌നേഹിക്കുന്ന സാധാരണ പ്രവര്‍ത്തകര്‍ക്കുമാണ്. ഒരു വാര്‍ത്തയുമില്ലെങ്കില്‍ വിഎസിനെ വച്ചൊരു കീറുകീറാം എന്നു വിചാരിച്ചിരുന്ന ചാനലുകാര്‍ക്കും പത്രക്കാര്‍ക്കും രാഷ്ട്രീയനിരീക്ഷകര്‍ക്കും മാത്രമാണ് ഒരു നഷ്ടം സംഭവിച്ചിരിക്കുന്നത്. അത് ഒരിക്കലും കേരളസമൂഹത്തിന്റെ നഷ്ടമല്ല.

കുറിപ്പ്:

ദിലീപും മഞ്ജു വാര്യരും വിവാഹമോചനം നേടാത്തതാണ് നമ്മുടെ ദുഖം.
മമ്മൂട്ടിയും മോഹന്‍ലാലും തമ്മില്‍ ശത്രുത ഉണ്ടെന്നു കേള്‍ക്കാനാണ് നമുക്കിഷ്ടം.
മോദിയും അ്ഡ്വാനിയും തെരുവില്‍ കിടന്ന് അടികൂടുന്ന ഒരു ദിനം വരുമെന്നു നമ്മള്‍ പ്രതീക്ഷിക്കുന്നു.
നമ്മുടേതൊഴികെ ബാക്കിയെല്ലാവരുടെയും വീട്ടിലെ സംഘര്‍ഷങ്ങള്‍ നമുക്ക് ഒരാവേശമാണ്.
ബികോസ് വി ഓള്‍ ആര്‍ ബ്ലഡി ഫക്കിങ് മല്ലൂസ്…. തിളയ്ക്കണം ചോര നമുക്ക് ഞരമ്പുകളില്‍.

ഇന്നസെന്റ് ചേട്ടന് ഒരു തുറന്ന കത്ത്

പ്രിയപ്പെട്ട ഇന്നസെന്റേട്ടന്,

ആഗതമായിക്കൊണ്ടിരിക്കുന്ന ലോക്‌സഭാ തിരഞ്ഞെടുപ്പില്‍ ചാലക്കുടി മണ്ഡലത്തില്‍ നിന്നും അങ്ങു മല്‍സരിക്കുന്നതായി പത്രമാധ്യമങ്ങളില്‍ നിന്നും അറിയാന്‍ കഴിഞ്ഞു. അങ്ങയുടെ ഒരു കടുത്ത ആരാധകനെന്ന നിലയ്ക്ക് അങ്ങേയ്ക്ക് എല്ലാ ഭാവുകങ്ങളും നേരുന്നു. കേരളത്തിലെ രാഷ്ട്രീയചരിത്രവും മലയാളികളുടെ വോട്ടിങ് ശൈലിയുമൊക്കെ വച്ചുനോക്കിയാല്‍ ഒരു കാര്യം വളരെ വ്യക്തമായി ഞാന്‍ പറയാനാഗ്രഹിക്കുന്നു- അങ്ങ് എട്ടു നിലയില്‍ പൊട്ടും. ഇടതിന്റെ കൂടെയോ വലതിന്റെ കൂടെയോ ബിജെപിയുടെ കൂടെയോ നിന്നാലും അങ്ങു പൊട്ടും. തോറ്റാലും വേണ്ടില്ല, മല്‍സരിച്ചേ അടങ്ങൂ എന്നാണെങ്കില്‍ അങ്ങേയ്ക്ക് ആം ആദ്മി പാര്‍ട്ടിയുടെ സ്ഥാനാര്‍ഥിയാകാമായിരുന്നു. ഞാനും സാറാ ജോസഫും അനിത പ്രതാപുമൊക്കെ ഇന്ത്യയെ അഴിമതിമുക്തമാക്കാന്‍ വേണ്ടി തിരഞ്ഞെടുപ്പില്‍ നിന്നു തോറ്റവരാണ് എന്നു പിന്നീടു പറയാന്‍ കഴിയുന്നത് തന്നെ ഒരു അഭിമാനമാണ്. ഇത്ര മൃഗീയമായി അഭിപ്രായം പറയുന്ന ഞാനൊരു മൃഗമാണെന്ന് അങ്ങേയ്ക്കു തോന്നാം. എന്നാല്‍, അങ്ങനെയല്ല. ടെക്‌നോളജി റിപ്പോര്‍ട്ടറായ ഞാന്‍ ഹാര്‍ഡ് വെയറും സോഫ്റ്റ്‌വെയറും ഓപ്പറേറ്റിങ് സിസ്റ്റവുമൊക്കെ കൈകാര്യം ചെയ്ത് അടുത്തകാലത്തായി ഹാര്‍ഡ്‌കോര്‍ ആയിപ്പോയതാണ്.

അല്ലെങ്കിലും അങ്ങു തിരഞ്ഞെടുപ്പില്‍ ജയിച്ചിട്ട് ആര്‍ക്ക് എന്തു പ്രയോജനമാണ് ഉണ്ടാകാന്‍ പോകുന്നത് എന്ന് എനിക്കു മനസ്സിലാവുന്നില്ല. പാര്‍ലമെന്റ് ഒക്കെ ഒന്നു ചുറ്റി നടന്നു കാണാനാണെങ്കില്‍ തന്നെ അതിന് തിരഞ്ഞെടുപ്പില്‍ മല്‍സരിച്ചു ജയിക്കേണ്ട ആവശ്യമുണ്ടോ ? അമ്മയുടെ ഓഫിസ് പോലെയല്ല പാര്‍ലമെന്റ്. ഇന്ത്യയുടെ നാനാഭാഗത്തു നിന്നും അവിടെയെത്തുന്ന എംപിമാര്‍ മമ്മൂട്ടിയെയോ മോഹന്‍ലാലിനെയോ ദിലീപിനെയോ ഒന്നും പോലെയുള്ളവരായിരിക്കില്ല. ജഗദീഷിനെയും ഇടവേള ബാബുവിനെയുമൊക്കെ കൈകാര്യം ചെയ്തിട്ടുള്ള അങ്ങേയ്ക്ക് ഏതു കൊലകൊമ്പനെയും കൈകാര്യം ചെയ്യാമെന്നുള്ള ആത്മവിശ്വാസം ഉണ്ടായിരിക്കാം. എന്നാല്‍, അവിടെയെത്തുന്നവരില്‍ ചെറിയൊരു ശതമാനം മാത്രമേ അങ്ങയെ കാണുമ്പോള്‍ മാന്നാര്‍ മത്തായി സ്പീക്കിങ്ങും കിലുക്കവും കാബൂളിവാലയുമൊക്കെ ഓര്‍ക്കുകയുള്ളൂ എന്നത് മറന്നു പോകരുത്. ആളുകള്‍ പെപ്പര്‍ സ്‌പ്രേയൊക്കെയായി വരുന്ന സ്ഥലമാണ്, സൂക്ഷിക്കണം.

ഇനിയുള്ള ജീവിതം ജനങ്ങള്‍ക്കു വേണ്ടി നല്ല കാര്യം ചെയ്യാന്‍ വിനിയോഗിക്കും എന്ന് അങ്ങു പറഞ്ഞതായി പത്രത്തില്‍ വായിച്ചു. ജനങ്ങള്‍ക്കു നല്ല കാര്യം ചെയ്യണമെങ്കില്‍ പാര്‍ലമെന്റില്‍ പോകണം എന്നതൊരു മിഥ്യാധാരണയാണ്. മഹാത്മാഗാന്ധിയും മദര്‍ തെരേസയുമൊന്നും നല്ല കാര്യം ചെയ്തതും മാതാ അമൃതാനന്ദമയിയും മറ്റും ഇപ്പോള്‍ നല്ല കാര്യങ്ങള്‍ ചെയ്തുകൊണ്ടിരിക്കുന്നതും പാര്‍ലമെന്റില്‍ പോയിട്ടല്ല എന്ന് അങ്ങു മനസ്സിലാക്കണം. ജോണ്‍ ബ്രിട്ടാസിനെപ്പോലെയുള്ള മഹാരഥന്‍മാര്‍ പോലും നല്ല കാര്യം ചെയ്യാന്‍ പാര്‍ലമെന്റിലേക്കല്ല, ന്യൂയോര്‍ക്കിലേക്കാണ് പോയത് എന്നത് അങ്ങു മറന്നുപോകരുത്. തിരഞ്ഞെടുപ്പില്‍ ജയിച്ചിട്ടേ ജനങ്ങള്‍ക്കു വേണ്ടി നല്ല കാര്യങ്ങള്‍ ചെയ്യൂ എന്ന് അങ്ങേയ്ക്ക് വാശിയുണ്ടെങ്കില്‍ അങ്ങ് അടുത്ത തദ്ദേശഭരണ തിരഞ്ഞെടുപ്പില്‍ ഇരിഞ്ഞാലക്കുട നഗരസഭയിലേക്കു മല്‍സരിക്കുക. ഇരിഞ്ഞാലക്കുടയിലെ ജനങ്ങള്‍ക്ക് നല്ല കാര്യം ചെയ്യാന്‍ അങ്ങേയ്ക്ക് സ്വാതന്ത്ര്യവും മനോധര്‍മവും സര്‍ഗബോധവും വേണ്ടുവോളം പ്രയോജനപ്പെടുത്താം.

രാഷ്ട്രീയത്തെക്കുറിച്ച് വലിയ അറിവൊന്നും അങ്ങേയ്ക്കില്ല എന്നു പറയുന്ന അങ്ങു തന്നെ എന്നെ വോട്ടു ചെയ്ത് വിജയിപ്പിക്കണം എന്നു പറയുന്നത് വിരോധാഭാസമാണ് എന്നാണെന്റെ അഭിപ്രായം. അഭിനയമറിയാത്ത നടിയെ സിനിമയില്‍ അഭിനയിപ്പിക്കുന്നതുപോലെ ഈസിയല്ല ചേട്ടാ, രാഷ്ട്രീയമറിയാത്ത സിനിമാ നടനെ നിയമനിര്‍മാണം പഠിപ്പിക്കുന്നത്. ചുറ്റും ആരാധന നിറഞ്ഞ മുഖങ്ങള്‍ കാണുമ്പോള്‍ അതൊക്കെ വോട്ടായി മാറുമെന്നുള്ള സിനിമാക്കാരുടെ വിശ്വാസം വെറും അന്ധവിശ്വാസമാണെന്ന് കാലാകാലങ്ങളില്‍ കേരളത്തിലെ വോട്ടര്‍മാര്‍ തെളിയിച്ചിട്ടുള്ളതാണ്. ജനങ്ങള്‍ക്കു നല്ല കാര്യങ്ങള്‍ ചെയ്യാന്‍, നല്ല സന്ദേശങ്ങള്‍ നല്‍കാന്‍ ഏറ്റവും ശക്തമായ മാധ്യമം സിനിമയാണ്. ആ സിനിമയില്‍ പ്രവര്‍ത്തിക്കുന്ന അങ്ങ് പിണറായി വിജയന്റെയും കോടിയേരി ബാലകൃഷ്ണന്റെയും ജയരാജന്‍മാരുടെയുമൊക്കെ കീഴില്‍ ജനസേവനത്തിന്റെ പുതിയ പാഠങ്ങള്‍ പഠിക്കുന്നത് അബദ്ധമാണ് എന്നാണെന്റെ അഭിപ്രായം. ഇനിയും വൈകിയിട്ടില്ല. വീണ്ടും വീണ്ടും ആലോചിക്കുക. സര്‍വേശ്വരന്‍ അങ്ങേയ്ക്ക് ശരിയായ വഴി തിരഞ്ഞെടുക്കാനുള്ള വിവേകം നല്‍കട്ടെ എന്നാശംസിക്കുന്നു. രാഹുല്‍ഗാന്ധി പ്രധാനമന്ത്രിയും അങ്ങു ചാലക്കുടി എംപിയും ആയിത്തീരട്ടെ എന്നു പ്രാര്‍ഥിച്ചുകൊണ്ട് നിര്‍ത്തുന്നു.

ഒരു ആരാധകന്‍.

കസ്തൂരിരംഗന്‍ ടെക്‌നോളജി

ആത്മഹത്യ ചെയ്യുമെന്നു ഭീഷണിമുഴക്കി മൊബൈല്‍ ഫോണ്‍ ടവറിനു മുകളില്‍ കയറുന്ന പാലായിലെ പാവപ്പെട്ട കള്ളുകുടിയനെപ്പോലെയാണ് മാണിസാര്‍. കസ്തൂരിരംഗന്‍ റിപ്പോര്‍ട്ടില്‍ കരടു വിജ്ഞാപനം ഇന്നു വൈകുന്നേരത്തിനകം വന്നിട്ടില്ലെങ്കില്‍ രണ്ടിലൊന്നു തീരുമാനിക്കും എന്നാണ് അദ്ദേഹം പറഞ്ഞിരിക്കുന്നത്. ഇന്നു വൈകുന്നേരത്തിനകം കരടു വിജ്ഞാപനം വന്നിട്ടില്ലെങ്കില്‍ മാണിസാര്‍ രാജിവച്ച് സിപിഎം പാളയത്തില്‍ പോയി ചേക്കേറുമെന്നു കരുതുന്നവരോട് പറയട്ടെ- മാണിസാറിനെ ആര്‍ക്കും തോല്‍പിക്കാന്‍ പറ്റില്ല. മാണിസാറിനെ എന്നല്ല, കേരളാ കോണ്‍ഗ്രസിലെ ഒരുത്തനെയും കുടിച്ച വെള്ളത്തില്‍ വിശ്വസിക്കരുത് എന്നാണ് ഒരു പഴയ കേരളാ കോണ്‍ഗ്രസ് പ്രവര്‍ത്തകന്‍ എന്ന നിലയ്ക്ക് എനിക്കു പറയാനുള്ളത്.

രാഷ്ട്രീയപരമായി കാര്യമായി ഉദ്ധാരണശേഷി ഒന്നുമില്ലാതിരിക്കെ കര്‍ഷകരെ മൊത്തത്തോടെ ഉദ്ധരിക്കും എന്ന മോഹനവാദ്ഗാനമാണ് കേരള കോണ്‍ഗ്രസ് രാഷ്ട്രീയത്തിന്റെ അടിത്തറ. മലയോര കര്‍ഷകന്‍ എന്ന തുറുപ്പുചീട്ട് വച്ചു കളിച്ചുകൊണ്ടിരുന്ന മാണിസാറിനെയും സംഘത്തെയും വലിയ വിവരമൊന്നുമില്ലാത്ത പള്ളീലച്ചന്‍മാരുടെ നേതൃത്വത്തിലുള്ള മലയോര കര്‍ഷകര്‍ കസ്തൂരി രംഗന്‍ റിപ്പോര്‍ട്ട് എന്ന തുറുപ്പുചീട്ട് കയ്യില്‍ വച്ച് കശക്കിമറിച്ചുകൊണ്ടിരിക്കുകയാണ്.

ഇടയലേഖനം എഴുതുന്ന അത്ര ഈസിയായി തയ്യാറാക്കാവുന്ന ഒന്നല്ല, പരിസ്ഥിതി ആഘാതവും പ്രത്യാഘാതവുമൊക്കെ ഉണ്ടാക്കാന്‍ പര്യാപ്തമായ ഇത്തരം റിപ്പോര്‍ട്ടുകള്‍. പോരെങ്കില്‍ ലോകപൈതൃകപട്ടികയില്‍ ഉള്‍പ്പെടുത്തിയിട്ടുള്ള പശ്ചിമഘട്ടമലനിരകളില്‍ കുടിയേറ്റവും കയ്യേറ്റവും പാറപൊട്ടിക്കലുമൊക്കെ കഴിഞ്ഞിട്ടു മതി പ്രകൃതിസ്‌നേഹം എന്നു പറയുമ്പോള്‍ ഏരിയല്‍ വ്യൂവില്‍ അതൊരു മാടമ്പി നയമായി തോന്നാം. പരിസ്ഥിതി സംരക്ഷിക്കണമെന്നും പ്രകൃതിയെ നശിപ്പിക്കരുതെന്നുമൊക്കെ മാര്‍പ്പാപ്പ പറയുമ്പോള്‍ പ്രകൃതിസ്‌നേഹം പറഞ്ഞോണ്ടു വന്നാല്‍ ചോരപ്പുഴയൊഴുകുമെന്നു മെത്രാനച്ചന്‍ പറയുന്നത് പോക്രിത്തരമാണ്. ഇടുക്കിയിലും വയനാട്ടിലും താമരശ്ശേരിയിലുമൊക്കെ വനമുണ്ടെങ്കിലേ റോമില്‍ മഴ പെയ്യൂ എന്നു മാര്‍പ്പാപ്പയ്ക്കറിയാം. പാറ പൊട്ടിക്കുന്നതും റിയല്‍ എസ്‌റ്റേറ്റ് ബിസിനസ് നടത്തുന്നതുമാണ് പരിസ്ഥിതി പ്രവര്‍ത്തനം എന്നു വിശ്വസിച്ചിരിക്കുന്ന മുട്ടനാടുകളോട് വേദമോതുന്നതില്‍ കാര്യമില്ല.

പറഞ്ഞു തുടങ്ങിയത് കേരളാ കോണ്‍ഗ്രസിന്റെ കാര്യമാണ്. ജോസ് കെ. മാണിയുടെ ഭാവിയും മാണിസാറിന്റെ മുഖ്യമന്ത്രി സ്വപ്നങ്ങളും എന്നതാണ് മൊത്തത്തില്‍ മാണിസാറിനെ ചുറ്റിപ്പറ്റി നില്‍ക്കുന്ന കേരളാ കോണ്‍ഗ്രസ് രാഷ്ട്രീയത്തിന്റെ ഒരു പാചകക്കുറിപ്പ് എന്നു പറയാം. അതങ്ങനെ സുഗമമായി മുന്നോട്ടു വരുമ്പോള്‍ ഇടിച്ചുകയറി വന്ന മലയോരകര്‍ഷക കുഞ്ഞാടുളെ എന്തു ചെയ്യണമെന്നറിയാതെ കുഴങ്ങുകയാണ് മാണിസാറും സംഘവും. പറയുന്നതുപോലെ രാജിവച്ചു മുന്നണി വിട്ടാല്‍ ജോസ് കെ.മാണി കോട്ടയത്ത് ഏതു പാനലില്‍ മല്‍സരിക്കും ? ഒരു മുന്നണിയിലുമില്ലാതെ ചുമ്മാ കൊണ്ടുപോയി നിര്‍ത്തിയാല്‍ ജയിച്ചുവരാന്‍ മാത്രം ആം ആദ്മിയല്ല ജോസ്‌മോന്‍. അപ്പോള്‍ ജോസ്‌മോന്‍ ജയിക്കണമെങ്കില്‍ യുഎഡിഎഫില്‍ നില്‍ക്കണം എന്നത് പാഠം ഒന്ന്.

രണ്ട്, കസ്തൂരിരംഗന്‍ റിപ്പോര്‍ട്ടിനെ എങ്ങനെ മയപ്പെടുത്താം എന്നതാണ്. മെത്രാനച്ചന്‍മാരോ മാണി സാറോ ഉമ്മന്‍ ചാണ്ടി സാറോ ഒന്നും വിചാരിച്ചാല്‍ മയപ്പെടുത്താന്‍ പറ്റുന്ന ഒന്നല്ല ഈ വക റിപ്പോര്‍ട്ടുകള്‍ എന്നു പറഞ്ഞു കഴിഞ്ഞു. ഏപ്രില്‍ 10ന് ശാന്തിമുഹൂര്‍ത്തം വരുന്നതുവരെ എങ്ങനെ മലയോര കര്‍ഷകരെ പറഞ്ഞു പറ്റിക്കാം എന്നതേ ആലോചിക്കേണ്ടതുള്ളൂ എന്നു ചുരുക്കം. ജോസ്‌മോനെയും മലയോരകര്‍ഷകരെയും എങ്ങനെ ഒരേപോലെ രക്ഷിച്ചെടുക്കാം എന്നതാണ് മാണിസാര്‍ നേരിടുന്ന വെല്ലുവിളി എന്നു പറഞ്ഞാലും തെറ്റില്ല.

ഇതിനിടയ്ക്ക് പി.സി.ജോര്‍ജ് എന്നൊരു മലയോര കര്‍ഷകനുണ്ട്. ഇന്നു രാജി വയ്ക്കും നാളെ രാജി വയ്ക്കും എന്നു പറഞ്ഞു നടന്ന ജോര്‍ജേട്ടനോട് എന്നാല്‍ താന്‍ പോയി രാജി വയ്‌ക്കെടോ എന്നു നേതാക്കന്‍മാര്‍ പറഞ്ഞപ്പോള്‍ പണി പാളുമെന്നു തോന്നി പുള്ളി പ്ലേറ്റ് മാറ്റി- നിങ്ങളെയൊന്നും വിഷമിപ്പിച്ചിട്ട് എനിക്കു രാജി വയ്‌ക്കേണ്ട എന്നു പറഞ്ഞ് മൂക്കും പിഴിഞ്ഞ് പോയതാണ്. ഇപ്പോള്‍ വീണ്ടും പൊങ്ങിയിട്ടുണ്ട്. കര്‍ഷകരെ സംരക്ഷിക്കാന്‍ പറ്റുന്നില്ലെങ്കില്‍ കേരളാ കോണ്‍ഗ്രസ് പിരിച്ചുവിടണം എന്നാണ് ജോര്‍ജേട്ടന്റെ ഇപ്പോഴത്തെ ആവശ്യം. ആത്മാര്‍ഥത കൂടി വട്ടായതാണ് എന്നൊക്കെ പറയാവുന്ന ഒരു സ്ഥിതിയിലാണെന്നു തോന്നുന്നു.

കേരളാ കോണ്‍ഗ്രസ് പിരിച്ചുവിട്ടാല്‍ മലയോര കര്‍ഷകര്‍ ചത്തുപോവാനൊന്നും പോകുന്നില്ല. കോണ്‍ഗ്രസിലും സിപിഎമ്മിലും ബിജെപിയിലുമൊക്കെയായി അവര്‍ രാഷ്ട്രീയപ്രവര്‍ത്തനം നടത്തിക്കൊള്ളൂം. അങ്ങനെ കുറച്ചുകൂടി വിശാലകാഴ്ചപ്പാടുള്ള പാര്‍ട്ടികളുടെ സ്വാധീനം ഉണ്ടായിരുന്നെങ്കില്‍ കസ്തൂരി രംഗന്‍ പ്രശ്‌നം ഇത്തരത്തില്‍ പള്ളീലച്ചന്‍മാരുടെ ലോ ക്ലാസ് രാഷ്ട്രീയത്തില്‍ കുടുങ്ങി ഇത്തരത്തില്‍ വര്‍ഗീയവല്‍ക്കരിക്കപ്പെട്ടു പോകില്ലായിരുന്നു.

ചുരുക്കിപ്പറഞ്ഞാല്‍ കസ്തൂരിരംഗന്‍ പ്രശ്‌നം ചക്ക കുഴയുന്നതുപോലെ കുഴഞ്ഞ് പണ്ടാരമടങ്ങിയിരിക്കുകയാണ്. റിപ്പോര്‍ട്ട്, ഓഫിസ് മെമ്മോറാണ്ടം, കരട് വിജ്ഞാപനം എന്നൊക്കെ പറഞ്ഞ് ആര്‍ക്കും ഒന്നും പിടിയില്ലാതായി. കസ്തൂരിരംഗന്‍ എന്നു പറയുന്ന ഭീകരന്‍ മലയോരത്ത് വന്നു കൊലയും കൊള്ളിവയ്പും നടത്തുകയും കുടിയേറ്റക്കാരെ ഒഴിപ്പിച്ച് അവിടം ഇടിച്ചു നിരപ്പാക്കി കടുവയെയും സിംഹത്തെയുമൊക്കെ വളര്‍ത്താനുള്ള പദ്ധതിയാണ് കസ്തൂരി രംഗന്‍ റിപ്പോര്‍ട്ട് എന്നാണ് സമരം ചെയ്യാന്‍ പോലും സമയം കിട്ടാത്ത യഥാര്‍ഥ പാവപ്പെട്ട മലയോര കര്‍ഷകര്‍ ഭയപ്പെടുന്നത്. ഇന്ത്യാമഹാരാജ്യത്ത് ഒരിക്കലും അങ്ങനെയൊന്നും സംഭവിക്കില്ല എന്നത് ആര് അവരെ പറഞ്ഞു മനസ്സിലാക്കും. അഥവാ അങ്ങനെ സംഭവിച്ചാല്‍ തന്നെ അതിനു മുന്‍പ് മുല്ലപ്പെരിയാര്‍ ഡാം പൊട്ടി 35 ലക്ഷം ആളുകള്‍ അറബിക്കടലില്‍ പോവുകയും കൊച്ചി നഗരത്തിനു മുകളില്‍ 60 അടി ഉയരത്തില്‍ വെള്ളം തങ്ങിനില്‍ക്കുകയും ചെയ്യും. നാലു ജില്ല പോയിക്കഴിഞ്ഞാല്‍ പിന്നെ കേരളാ കോണ്‍ഗ്രസ് ഉണ്ടോ ? കസ്തൂരിരംഗനുണ്ടോ ? ഇടയന്‍മാരുണ്ടോ ?

[കുറിപ്പ്] ടെക്‌നോളജി സംബന്ധമായ പോസ്റ്റുകള്‍ മാത്രമേ ഇടൂ എന്നു പറഞ്ഞതിനു ശേഷം കസ്തൂരി രംഗന്‍ റിപ്പോര്‍ട്ടിനെപ്പറ്റി എഴുതുന്നത് ശരിയാണോ എന്നു ചിലരെങ്കിലും ചോദിക്കാന്‍ ആഗ്രഹിക്കുന്നുണ്ടാവും. ഈ കസ്തൂരി രംഗന്‍ എന്നു പറഞ്ഞാല്‍ ആരാ ? ഇന്ത്യ കണ്ട ഏറ്റവും പ്രഗല്‍ഭന്‍മാരായ ബഹിരാകാശശാസ്ത്രജ്ഞന്‍മാരിലൊരാള്‍. ഒരു ടെക്‌നോളജി എഴുത്തുകാരന്‍ അത്തരത്തിലൊരു ശാത്രജ്ഞന്‍ തയ്യാറാക്കിയ റിപ്പോര്‍ട്ടിന്റെ പ്രത്യാഘാതങ്ങള്‍ ചര്‍ച്ച ചെയ്യുന്നത് ടെക്‌നോളജി വിരുദ്ധമാകുമോ ?

പരിസ്ഥിതിസ്‌നേഹത്തിനും കര്‍ഷകസ്‌നേഹത്തിനുമിടയില്‍

കുഞ്ഞാടുകളെ വച്ച് ഇടയന്‍മാര്‍ രാഷ്ട്രീയനാടകം കളിക്കാന്‍ പോയാല്‍ എന്തു സംഭവിക്കും എന്നതിന്റെ ഉദാഹരണമാണ് കഴിഞ്ഞ ദിവസം കോഴിക്കോട്ട് നടന്നത്. കസ്തൂരി രംഗന്റെ പേരില്‍ മലയോരകര്‍ഷകര്‍ നാട്ടില്‍ അഴിഞ്ഞാടിയപ്പോള്‍ ടിപ്പര്‍ ലോറിയില്‍ ഗുണ്ടകളും മാഫിയക്കാരും നുഴഞ്ഞുകയറി അവര്‍ക്കാവശ്യമുള്ള കാര്യങ്ങള്‍ ചെയ്തു- അതും കുഞ്ഞാടുകളുടെ ക്രെഡിറ്റില്‍. പണി പാളി എന്നു പിടികിട്ടിയ പിതാവ് പൊടുന്നനെ പ്ലേറ്റ് മാറ്റി. കസ്തൂരിരംഗന്‍ റിപ്പോര്‍ട്ടിന്‍മേലുള്ള പരാതികള്‍ പരിശോധിക്കാമെന്നു സോണിയാ ഗാന്ധി ഉറപ്പു നല്‍കിയതിന്റെ അടിസ്ഥാനത്തില്‍ നാളെ നടക്കുന്ന ഹര്‍ത്താലില്‍ നിന്നു പോലും പിന്‍വാങ്ങുകയാണെന്നാണ് ബിഷപ് പറഞ്ഞിരിക്കുന്നത്. വളരെ രസകരമായിരിക്കുന്നു.

സുപ്രീംകോടതിക്കും കേന്ദ്ര-സംസ്ഥാനസര്‍ക്കാരുകള്‍ക്കും മേലേ കോണ്‍ഗ്രസ് അധ്യക്ഷയും ബിഷപും കൂടിയൊരു ഷേക്ക് ഹാന്‍ഡ് കൊടുത്താല്‍ തീരുന്ന പ്രശ്‌നത്തിനു വേണ്ടിയാണല്ലോ ഇതിനും മാത്രം അലമ്പുണ്ടാക്കിയതെന്നോര്‍ക്കുമ്പോള്‍ കഷ്ടം തോന്നുന്നു. രൂപതയിലെ വോട്ടുകളൊന്നടങ്കം പെട്ടിയിലാക്കാമെന്നു കരുതി ജില്ലാതലത്തിലും പഞ്ചായത്ത് തലത്തിലും ഒടുവില്‍ സംസ്ഥാനതലത്തിലും ഹര്‍ത്താല്‍ പരമ്പരകള്‍ നടത്തിവരുന്ന സിപിഎം നികൃഷ്ടജീവികളുടെ ആക്രമണത്തില്‍ നശിച്ചുപോകാതിരിക്കട്ടെ എന്നാശംസിക്കുന്നു.

കസ്തൂരിരംഗന്‍ റിപ്പോര്‍ട്ട് കര്‍ഷകര്‍ക്കു ദോഷകരമോ പ്രകൃതിക്കു ഗുണകരമോ തുടങ്ങിയ ചര്‍ച്ചകളൊക്കെ അപ്രസക്തമായി. പരിസ്ഥിതിയെക്കാള്‍ വലുത് മനുഷ്യരാണെന്ന കണ്‍കഌഷനില്‍ ഏതാണ്ട് എല്ലാവരുമെത്തിച്ചേര്‍ന്നു. പരിസ്ഥിതിവാദികളെ കല്ലെറിഞ്ഞു കൊല്ലുകയാണു വേണ്ടതെന്നും പൊതുവേ അഭിപ്രായമുയര്‍ന്നിട്ടുണ്ട്. കേരളത്തില്‍ ഇപ്പോള്‍ തന്നെ വനം കൂടുതലാണെന്നും ഇനിയും അത് കൂടിയാല്‍ കാട്ടുമൃഗങ്ങള്‍ കേരളത്തിലെ ജനങ്ങളെ തിന്നൊടുക്കുമെന്നും വനം നിലനിര്‍ത്തുന്നതിനെക്കാള്‍ പരിസ്ഥിതിക്ക് ഗുണകരമാകുന്നത് വനമേഖയില്‍ കര്‍ഷകര്‍ കൃഷി ചെയ്യുമ്പോഴാണെന്നുമൊക്കെ ഈ ദിവസങ്ങളില്‍ അറിവും വിവരവും അനുഭവവുമുള്ള വിവേകജ്ഞാനികള്‍ വ്യക്തമാക്കിയിട്ടുണ്ട്. അതിനെയൊന്നും വിമര്‍ശിക്കാനോ ചോദ്യം ചെയ്യാനോ ഉള്ള യോഗ്യത എനിക്കില്ലാത്തതിനാല്‍ അതിലേക്കൊന്നും കടക്കുന്നില്ല.

കസ്തൂരി രംഗന്‍ റിപ്പോര്‍ട്ടിന്റെ പേരില്‍ മൊത്തത്തില്‍ നടക്കുന്നത് ആളുകളെ ഭയപ്പെടുത്തിയും തെറ്റിദ്ധരിപ്പിച്ചും രാഷ്ട്രീയനേട്ടങ്ങള്‍ക്കായി നാട്ടില്‍ അക്രമവും അരാജകത്വവും സൃഷ്ടിക്കുന്ന രാജ്യദ്രോഹപ്രവൃത്തിയാണ് എന്നത് പറയുന്നതില്‍ ഇടുക്കി-വയനാട്-താമരശേരി-പൂഞ്ഞാര്‍ ബെല്‍റ്റിലുള്ള മലയോരകര്‍ഷകരും സഹപ്രവര്‍ത്തകരും കോപിക്കരുത്. എന്താണ് കസ്തൂരിരംഗന്‍ റിപ്പോര്‍ട്ടെന്നും ആ റിപ്പോര്‍ട്ട് നടപ്പിലായാല്‍ എന്തു സംഭവിക്കുമെന്നും ഒരുത്തനും അറിയില്ല എന്നതാണ് യാഥാര്‍ഥ്യം. അച്ചനും കപ്യാരും പള്ളിക്കമ്മിറ്റിക്കാരും കൂടി ആളുകളെ പറഞ്ഞുധരിപ്പിച്ചിരിക്കുന്നത് പ്രകാരം റിപ്പോര്‍ട്ട് നടപ്പായാല്‍ നല്ലൊരു ശതമാനം ആളുകളെയും സര്‍ക്കാര്‍ കുടിയൊഴിപ്പിച്ച് തെരുവിലിറക്കും. കുടിയൊഴിപ്പിക്കപ്പെടാത്തവര്‍ക്ക് അവരുടെ ഭൂമിയില്‍ കൃഷി ചെയ്യാനോ പശുക്കളെ മേയ്ക്കാനോ വിളവെടുക്കാനോ അവകാശമുണ്ടായിരിക്കില്ല. റിപ്പോര്‍ട്ട് നടപ്പായതിനു ശേഷം പറമ്പ് വില്‍ക്കാന്‍ ശ്രമിക്കുകയോ പറമ്പിലെ തടി വെട്ടി വില്‍ക്കാന്‍ ശ്രമിക്കുകയോ ചെയ്യുന്നവര്‍ ജയിലില്‍ പോകും. മൊത്തത്തില്‍ നാടെല്ലാം കാടാക്കി മാറ്റാനുള്ള ഗുഢപദ്ധതിയാണ് കസ്തൂരി രംഗന്‍ റിപ്പോര്‍ട്ട്. ഇത്തരത്തില്‍ കിംവദന്തികള്‍ കൊണ്ടു മെഴുത്തുരുണ്ട കാള പ്രസവിക്കുമ്പോള്‍ പാവപ്പെട്ട കര്‍ഷകര്‍ കയറുമെടുത്തിറങ്ങുന്നതില്‍ തെറ്റ് പറയാനൊക്കില്ല.

ഇവിടെ കസ്തൂരി രംഗന്‍ റിപ്പോര്‍ട്ട് നടപ്പാകുന്ന 123 വില്ലേജുകള്‍ക്ക് എന്തു സംഭവിക്കും എന്നു പറയാനാവാതെ കസ്തൂരിരംഗനെയും സര്‍ക്കാരിനെയും വെല്ലുവിളിച്ച് ഇടയലേഖനങ്ങളിറക്കുന്ന ബിഷപുമാരും അടിക്കടി ഹര്‍ത്താലുകള്‍ നടത്തി എരിതീയില്‍ എണ്ണയൊഴിച്ച് കസ്തൂരിരംഗനെ കോണ്‍ഗ്രസ് വിരുദ്ധ വോട്ട് ബാങ്കാക്കി അത് തങ്ങള്‍ക്ക് അനുകൂലമാക്കി മാറ്റുന്നതെങ്ങനെയെന്നാലോചിക്കുന്ന എല്‍ഡിഎഫും സംഗതി എന്താണെന്ന് ഒരുപിടിയും കിട്ടാതെ നില്‍ക്കുന്ന കോണ്‍ഗ്രസും കേരള കോണ്‍ഗ്രസും ഈ പ്രദേശത്തെ ജനപ്രതിനിധികളുമാണ് മൊത്തത്തില്‍ ഈ പ്രശ്‌നങ്ങളുടെ ഉത്തരവാദികള്‍ എന്നു നിസ്സംശയം പറയാം. വോട്ടുകള്‍ ഞങ്ങള്‍ക്കു തന്നെ കിട്ടണമെന്ന വാശിയില്‍ നേതാക്കന്‍മാരും വോട്ടുകള്‍ എവിടേക്കു പോകണമെന്നു ഞങ്ങള്‍ തീരുമാനിക്കുമെന്ന മട്ടില്‍ ബീഷപുമാരും നില്‍ക്കുമ്പോള്‍ കഴുതകളാവുന്നത് സ്ഥിരം കക്ഷികള്‍ തന്നെയായിരിക്കും.

കര്‍ഷസമരം എന്നു വിശേഷിപ്പിക്കുമ്പോള്‍ തന്നെ മതമേലധ്യക്ഷന്‍മാര്‍ സമരം പ്രഖ്യാപിക്കുകയും അത് പിന്‍വലിക്കുകയുമൊക്കെ ചെയ്യുന്നത് തന്നെ അത് കര്‍ഷകസമരമല്ലെന്നതിന്റെ തെളിവാണ്. മുകളില്‍ പറഞ്ഞതുപോലെ ഭരണസംവിധാനത്തെ മൊത്തത്തില്‍ അസാധുവാക്കിക്കൊണ്ട് ബിഷപിനു സോണിയാ ഗാന്ധി ഉറപ്പു കൊടുത്തതിന്റെ അടിസ്ഥാനത്തില്‍ എല്ലാം കോംപ്ലിമെന്റ്‌സ് ആയി എന്നു ബിഷപ് പറയുമ്പോള്‍ ഇക്കണ്ടതെല്ലാം ജനകീയസമരമായിരുന്നു എന്നു പറയുന്നതിന്‍െ അടിസ്ഥാനം തന്നെ ചോദ്യം ചെയ്യപ്പെടുകയാണ്. സമരത്തില്‍ നിന്നു പിന്‍വാങ്ങി എന്നു ബിഷപ് പറയുമ്പോള്‍ തന്നെ സമരം ശക്തമായി തുടരുമെന്നു പറയുന്ന ഇടയലേഖനം പള്ളികളില്‍ വായിക്കുകയാണ്. ഇടുക്കിയിലെ ബിഷപ് പി.ടിതോമസിന് വോട്ടു ചെയ്യരുതെന്ന സന്ദേശം വളരെ വ്യക്തമായി വിശ്വാസികള്‍ക്കു നല്‍കുമ്പോള്‍ നിസ്സഹായനായ പി.ടി.തോമസ് പറയുന്നത് ഇടുക്കി ബിഷപിനു ഗൂഢ അജന്‍ഡയുണ്ടെന്നാണ്.

കസ്തൂരിരംഗന്‍ റിപ്പോര്‍ട്ട് കര്‍ഷകരെ ഉപദ്രവിക്കാനുള്ളതല്ല പരിസ്ഥിതിയെ സംരക്ഷിക്കാനുള്ളതാണ് എന്ന സത്യം അംഗീകരിച്ചാല്‍ തന്നെ അടിസ്ഥാനപരമായുള്ള വിദ്വേഷവും ശത്രുതാ മനോഭാവവും അവസാനിപ്പിക്കാം. മലയോരമേഖലയില്‍ ഖനനം നടത്തുന്നതും പാറമട നടത്തുന്നതും താപവൈദ്യുതനിലയങ്ങള്‍ സ്ഥാപിക്കുന്നതും 20,000 ചതുരശ്ര അടിയില്‍ കവിഞ്ഞ കെട്ടിടങ്ങളും 50 ഹെട്കറിലധികം വിസ്താരമുള്ള ടൗണ്‍ഷിപ്പുകളും നിര്‍മിക്കുന്നവരെ മലയോരകര്‍ഷകരെന്നു വിളിക്കുന്നത് അതിവിനയമാണ്. മലയോരകര്‍ഷകര്‍ ഇതൊന്നും ചെയ്യുന്നില്ലെങ്കില്‍ ഇവിടെ നടന്ന പ്രതിഷേധങ്ങളും അക്രമങ്ങളും അഴിഞ്ഞാട്ടങ്ങളുമെല്ലാം അര്‍ഥശൂന്യവുമാണ്. ആവേശം കൊള്ളിക്കുന്ന ഇടയ-കുഞ്ഞാട് ലേഖനങ്ങള്‍ ചമയ്ക്കുന്ന അത്ര എളുപ്പമല്ലെങ്കിലും കസ്തൂരിരംഗന്‍ റിപ്പോര്‍ട്ട് എന്താണെന്നു വായിച്ചുമനസ്സിലാക്കുന്നത് അത്ര ക്ലേശകരമായ കാര്യമല്ല.

കുറിപ്പ്: ഐസ്‌ലാന്‍ഡില്‍ ഞണ്ടുകള്‍ പാലായനം ചെയ്യുന്ന സീസണില്‍ ദേശീയപാത തന്നെ അടച്ച് അവയുടെ പരിസ്ഥിതി സംരക്ഷിക്കുന്ന അവിടുത്തെ സര്‍ക്കാരിന്റെ കാലുകഴുകിയ വെള്ളം കുടിക്കാനുള്ള യോഗ്യത ഇന്ത്യയിലെ ഭരണാധികാരികള്‍ക്കില്ല എന്നു പണ്ട് ആവേശപൂര്‍വം പറഞ്ഞ ഒരച്ചായന്‍ പശ്ചിമഘട്ടം ഉള്‍പ്പെടെ ഭൂമിയിലെ ഓരോ കോണും മനുഷ്യനുവേണ്ടി സൃഷ്ടിച്ചതാണെന്നും എല്ലാത്തിലും വലുത് മനുഷ്യനാണെന്നും പറഞ്ഞ് കസ്തൂരി രംഗന്റെ തന്തയ്ക്കു വിളിക്കുന്നത് കഴിഞ്ഞ ദിവസം കേള്‍ക്കാനിടയായി. ഒരു കുളിര്, അത്രേയുള്ളൂ.

പിന്നേം കുറിപ്പ്: കസ്തൂരിരംഗന്‍ റിപ്പോര്‍ട്ടിനിരയാവുന്ന 123 വില്ലേജുകളിലൊന്നില്‍ സകലസ്ഥാവരജംഗമ വസ്തുക്കളും ഉള്‍പ്പെടുന്നവനാണ് ഞാനും. ഇടുക്കിയിലും വയനാട്ടിലും ജീവിക്കാത്തവരും നഗരങ്ങളില്‍ താമസിക്കുന്നവരും ഫ്രോഡുകളാണ് എന്ന വാദത്തിന് അടിസ്ഥാനമില്ല. നമുക്കും വരുംതലമുറകള്‍ക്കും വെള്ളവും വായുവും ലഭിക്കുന്നതിനു വേണ്ടി ഇപ്പോള്‍ അല്‍പം പരിസ്ഥിതിസ്‌നേഹമാകാം എന്നു പറയുന്നവരെ കര്‍ഷകവിരോധികളെന്നു വിളിക്കുന്നവരാണ് യഥാര്‍ഥഫ്രോഡുകള്‍. നന്ദി, നമസ്‌കാരം.

ബിന്ദു കൃഷ്ണ ചേച്ചിക്ക് ഒരു തുറന്ന കത്ത്

പ്രിയപ്പെട്ട ബിന്ദു ചേച്ചിക്ക്,

മഹിളാ കോണ്‍ഗ്രസ് സംസ്ഥാന പ്രസിഡന്റ് പദം അലങ്കരിക്കുന്ന ചേച്ചിക്ക് എന്റെ വന്ദനം. സമൂഹത്തില്‍ സ്ത്രീകളുടെ ശത്രു സ്്ത്രീകള്‍ തന്നെയാണ് എന്നാരോ പറഞ്ഞിട്ടുള്ളത് ശരിയാണ് എന്നു തോന്നിയത് ചേച്ചിയുടെ ഇന്നലത്തെ പ്രസ്താവന കേട്ടപ്പോഴാണ്. കോണ്‍ഗ്രസിന്റെ പോഷകസംഘടന എന്നതിനെക്കാള്‍ ഒരു വനിതാരാഷ്ട്രീയസംഘടന എന്നതാണ് മഹിളാ കോണ്‍ഗ്രസിന്റെ നിലനില്‍പിന്റെ അടിത്തറ എന്നാണ് ഞാന്‍ മനസ്സിലാക്കുന്നത്. അതായത്, കോണ്‍ഗ്രസില്‍ സ്ത്രീപക്ഷ നിലപാടുകള്‍ ഉറപ്പിക്കുന്നതിനും സ്ത്രീപ്രാതിനിധ്യം ഉറപ്പാക്കുന്നതിനും സ്ത്രീകള്‍ക്കു വേണ്ടി നിലയുറപ്പിക്കുന്നതിനുമൊക്കെ സാധിക്കുമ്പോഴാണ് മഹിളാ കോണ്‍ഗ്രസിന്റെ രാഷ്ട്രീയത്തിന് വിലയുണ്ടാവുന്നത് എന്ന്.

പീതാംബരക്കുറുപ്പ്- ശ്വേത മേനോന്‍ വിവാദത്തില്‍ ശ്വേത മേനോന് പരാതിയില്ലാതായതോടെ ആ പ്രശ്‌നം അവസാനിച്ചതാണ്. പക്ഷെ, ബിന്ദു ചേച്ചിയുള്‍പ്പെടെയുള്ള ആളുകള്‍ ശ്വേത മേനോനെ കുറ്റപ്പെടുത്തിയും ഒറ്റപ്പെടുത്തിയും രാഷ്ട്രീയലക്ഷ്യങ്ങള്‍ക്കു വേണ്ടി അക്ഷരാര്‍ത്ഥത്തില്‍ തറവേല കാണിക്കുമ്പോള്‍ ചേച്ചിയും ഒരു സ്ത്രീയല്ലേ എന്നു വിസ്മയത്തോടെ ചോദിക്കാനാഗ്രഹിക്കുകയാണ്. പീതാംബരക്കുറുപ്പും പി.ജെ.കുര്യനുമൊക്കെ പരമപരിശുദ്ധന്‍മാര്‍ തന്നെയാണെന്നു ബിന്ദു ചേച്ചി പറഞ്ഞു നടക്കുന്നത് ഗതികേടുകൊണ്ടാവാം എന്നതിനാല്‍ അത് മുറയ്ക്ക് നടക്കട്ടെ. പക്ഷെ, അതോടൊപ്പം ചേച്ചിയുടെ വിശുദ്ധന്‍മാരുടെ വീഴ്ചകള്‍ മറ്റുള്ളവരുടെ മേല്‍ കെട്ടിവയ്ക്കാന്‍ ശ്രമിക്കുന്നത് ഒരുതരം സാമൂഹികവിരുദ്ധ പ്രവര്‍ത്തനമല്ലേ എന്നു വളരെ സഹോദരസഹജമായി ഞാന്‍ ചോദിക്കുകയാണ്.

പീതാംബരക്കുറുപ്പ്-ശ്വേതാ വിവാദത്തോടെ കേരളസമൂഹത്തില്‍ പിതൃ-സഹോദര ബന്ധങ്ങള്‍ മൊത്തത്തില്‍ പ്രതിസന്ധിയിലായിരിക്കുകയാണ് എന്നു ചേച്ചി പറഞ്ഞത് ചേച്ചിക്കു വിവരമില്ലാഞ്ഞിട്ടാണോ അതോ രാഷ്ട്രീയത്തില്‍ വളരാന്‍ വേണ്ടി എത്ര തറയാവാനും തയ്യാറാണ് എന്നുള്ള തുറന്ന പ്രഖ്യാപനമണോ എന്ന് എനിക്കറിയില്ല. രണ്ടായാലും ചേച്ചിയുടെ പ്രസ്താവന കേരളസമൂഹത്തില്‍ കൂടുതലും മന്ദബുദ്ധികളാണെന്ന മുന്‍വിധിയോടെയുള്ളതായിപ്പോയി എന്നാണ് അത് കേട്ടപ്പോള്‍ എനിക്കു തോന്നിയത്. കാലം മാറിക്കൊണ്ടിരിക്കുകയാണ് ചേച്ചി. നേതാക്കന്‍മാര്‍ പത്രസമ്മേളനങ്ങളില്‍ പറയുന്നതു കേട്ട് ജനം കാര്യങ്ങള്‍ മനസ്സിലാക്കിക്കൊണ്ടിരുന്ന കാലത്തില്‍ നിന്ന് പത്രസമ്മേളനങ്ങളില്‍ വിളമ്പുന്ന വിവരക്കേടുകളിലൂടെ നേതാക്കന്‍മാരുടെ യഥാര്‍ഥമുഖം ജനങ്ങള്‍ മനസ്സിലാക്കുന്ന കാലത്തെത്തി നില്‍ക്കുകയാണ്. പീതാംബരക്കുറുപ്പു സാറും പി.ജെ.കുര്യന്‍ സാറും ദൈവതുല്യരായ വിശുദ്ധജന്മങ്ങള്‍ തന്നെയാണെന്നു ഞങ്ങള്‍ വിശ്വസിച്ചോളാം. ദയവു ചെയ്ത് ഓവറാക്കി ചളമാക്കരുത്.

ശ്വേതയോട് പീതാംബരക്കുറുപ്പ് എന്തെങ്കിലും ചെയ്തതായി ശ്വേതയ്ക്ക് തോന്നിയിട്ടുണ്ടെങ്കില്‍ അത് പിതൃസഹജമായ വാല്‍സല്യത്തെ ശ്വേത തെറ്റിദ്ധരിച്ചതാണെന്നും ഇതോടെ മൊത്തം കേരളത്തില്‍ പിതൃ-സഹോദര ബന്ധങ്ങള്‍ പ്രതിസന്ധിയിലാണെന്നും ഒരു മഹിളാസംഘടനയുടെ പ്രസിഡന്റായ ചേച്ചി തന്നെ പറയുന്നത് അങ്ങേയറ്റം നിരുത്തരവാദപരവും നികൃഷ്ടവും നിന്ദ്യവുമാണ് എന്നു പറയാനാഗ്രഹിക്കുന്നു. കേരളത്തിലെ പ്രതിസന്ധി സത്യത്തില്‍ ചേച്ചി തെറ്റിദ്ധരിച്ചിരിക്കുന്നതുപോലെ പിതൃസഹജവും സഹോദരസഹജവുമായുള്ള ബന്ധങ്ങളെ സ്ത്രീകള്‍ തെറ്റിദ്ധരിക്കുന്നതല്ല. മറിച്ച് അത്തരം സഹജവാസനകളെ ചൂഷണം ചെയ്തുകൊണ്ട് നടത്തുന്ന പീഡനങ്ങളാണ്. അന്യനൊരുത്തന്‍ ദേഹത്തു തൊടുമ്പോള്‍ ശ്രദ്ധിക്കണം എന്നു അമ്മമാര്‍ പെണ്‍മക്കളെ പറഞ്ഞു പഠിപ്പിക്കുമ്പോള്‍ ചേച്ചി ഇങ്ങനെ തിരിച്ചു പറയുന്നത് അമ്മമാരെയും പെണ്‍മക്കളെയും കണ്‍ഫ്യൂഷനിലാക്കില്ലേ ?

കോണ്‍ഗ്രസ് നേതാക്കന്‍മാരുടെ വീരകഥകളും വിശേഷങ്ങളും കേട്ടും പറഞ്ഞും ജീവിക്കുന്നതിനിടയില്‍ പൊതുസമൂഹത്തില്‍ നടക്കുന്ന കാര്യങ്ങളെപ്പറ്റി ചേച്ചി അറിയാതെ പോയതുകൊണ്ട് അതാണ് പ്രതിസന്ധി എന്നു കരുതിയതാവാം. കോണ്‍ഗ്രസിനു പുറത്തും ഒരു ലോകമുണ്ട് ചേച്ചീ. അവിടെയും പിതാക്കന്‍മാരും സഹോദരന്‍മാരും അമ്മ പെങ്ങന്‍മാരുമുണ്ട്. പിതാക്കന്‍മാര്‍ കൊച്ചുപെണ്‍കുഞ്ഞുങ്ങളെ പീഡിപ്പിച്ചു കൊല്ലുകയും കൂട്ടിക്കൊടുക്കുകയും സഹോദരന്‍മാര്‍ ചേര്‍ന്ന് സഹോദരരിയെ ബലാല്‍സംഗം ചെയ്യുകയും ഇറച്ചിവിലയ്ക്ക് വില്‍ക്കുകയുമൊക്കെ ചെയ്യുന്ന സംഭവങ്ങള്‍ ദൈനംദിനം റിപ്പോര്‍ട്ട് ചെയ്യപ്പെടുമ്പോള്‍ നിശബ്ദത പാലിക്കുന്ന ചേച്ചി പിതാംബരക്കുറുപ്പ് പ്രശ്‌നം വന്നപ്പോള്‍ അപരിചിതരായ ആളുകളുടെ സ്പര്‍ശനങ്ങളെ സ്ത്രീകള്‍ പിതൃ-സഹോദര സ്പിരിറ്റിലെടുക്കാത്തതാണ് സമൂഹത്തിലെ ഏറ്റവും വലിയ പ്രശ്‌നം എന്നു പറയുന്നത് തികഞ്ഞ അശ്ലീലമാണ് എന്ന് സഹോദരസഹജമായി ചൂണ്ടിക്കാണിക്കാന്‍ ഞാനാഗ്രഹിക്കുന്നു.

സൂര്യനെല്ലി കേസില്‍ ആരോപണവിധേയനായ പി.ജെ.കുര്യനെയും ശ്വേതയുടെ പരാതിക്കിരയായ പീതാംബരക്കുറുപ്പിനെയും വെള്ള പൂശുന്ന ചേച്ചി എല്‍ഡിഎഫുകാരനായ ജോസ് തെറ്റയിലിന്റെ കാര്യത്തില്‍ മറ്റൊരു നിലപാട് സ്വീകരിച്ചിരിക്കുന്നത് ചേച്ചിയുടെ നിഷ്‌കളങ്കത കൊണ്ടായിരിക്കാം. എല്ലാവരും സഹോദരീ സഹോദരന്‍മാരായിട്ടുള്ള ഒരു നാട്ടില്‍ ഞാന്‍ ഒരനിയന്റെ സ്ഥാനത്തു നിന്ന് ഇക്കാര്യങ്ങള്‍ പറഞ്ഞു എന്നു മാത്രം. ചേച്ചി എന്തായാലും പിതൃസഹോദര ബന്ധങ്ങളെ അങ്ങനെ തന്നെ ഉള്‍ക്കൊള്ളുകയും ആസ്വദിക്കുകയും വേണം. മഹിളാകോണ്‍ഗ്രസ് സംസ്ഥാന പ്രസിഡന്റ് സ്ഥാനത്തു നിന്ന് ഇപ്പോള്‍ ദേശീയ വൈസ് പ്രസിഡന്റായി തിരഞ്ഞെടുക്കപ്പെട്ടതുപോലെ ഭാവിയില്‍ ദേശീയ പ്രസിഡന്റ് സ്ഥാനവും പില്‍ക്കാലത്ത് കോണ്‍ഗ്രസ് പ്രസിഡന്റ് സ്ഥാനവും നേടാന്‍ ചേച്ചിക്കു കഴിയട്ടെ എന്നാശംസിച്ചു കൊണ്ടു നിര്‍ത്തുന്നു.

എന്ന് സഹോദരസഹജന്‍.

സത്യം വിജയന്‍

ഉത്തരം മുട്ടുമ്പോള്‍ കൊഞ്ഞനം കുത്തുന്നതിനു മുഖ്യധാരാ മാധ്യങ്ങള്‍ ഇടയ്ക്കിടെ എടുത്തുപയോഗിച്ചിരുന്ന ലാവ്‌ലിന്‍ കേസില്‍ നിന്ന് പിണറായി വിജയന്‍ ഒഴിവാകുന്നതോടെ ആ കേസിന്റെ ഗ്ലാമര്‍ അവസാനിക്കുകയാണ്. ലാവ്‌ലിന്‍ കേസിലെ പ്രതിപ്പട്ടികയില്‍ നിന്ന് പാര്‍ട്ടി സെക്രട്ടറി ഒഴിവാക്കപ്പെട്ടതോടെ ആ കേസ് മൊത്തത്തില്‍ കെട്ടിച്ചമച്ചതാണെന്നൊരു ലൈനിലാണ് പല സഖാക്കളും. പിണറായി വിജയനെ പ്രതിപ്പട്ടികയില്‍ നിന്നൊഴിവാക്കിയത് ജീവകണം കണ്ടെത്തിയതു പോലെയോ പരമാണുകോശത്തെ വിഘടിച്ചതുപോലെയോ എന്തോ നിഗൂഢസംഭവമാണെന്ന തോന്നലുളവാക്കി വിധി വിശദമായി പഠിച്ചതിനു ശേഷം പ്രതികരിക്കാം എന്നു പറഞ്ഞ് ഉമ്മന്‍ ചാണ്ടിയും രമേശ് ചെന്നിത്തലയും മുങ്ങിയിരിക്കുകയാണ്. രസികന്‍ വ്യാഖ്യാനങ്ങളുമായി വൈകിട്ടു പൊങ്ങുമായിരിക്കും.

വിധി പലകുറി വിശകലനം ചെയ്തും വിധി വന്ന ശേഷമുള്ള പിണറായി വിജയന്റെ മൗനങ്ങളെയും വാക്കുകളിലെ ഊന്നലുകളെയും ശരീരഭാഷയെയും നിശ്വാസങ്ങളെയും വരെ വിഎസ് വിരുദ്ധമായി വ്യാഖ്യാനിച്ചും പുതിയ ചാലുകള്‍ തീര്‍ത്തുകയാണ് മാധ്യമങ്ങള്‍. ലാവ്‌ലിന്‍ കേസ് എന്നത് പിണറായി വിജയനെ കുടുക്കുന്നതിനു വേണ്ടി വിഎസ് അച്യുതാനന്ദന്‍ കെട്ടിച്ചമച്ച കള്ളക്കഥ മാത്രമാണെന്ന ഉപസംഹാരത്തിനുള്ള സൂചനകള്‍ സമാഹരിക്കുകയാണ് രാഷ്ട്രീയനീരീക്ഷകന്‍മാര്‍. എന്തായാലും, ശ്വേതാ മേനോന്‍ പരാതി പിന്‍വലിച്ചതുകൊണ്ടുണ്ടായ നികത്താനാവാത്ത വാര്‍ത്താനഷ്ടത്തെ പിണറായി വിജയനെ പ്രതിപ്പട്ടികയില്‍ നിന്നൊഴിവാക്കിയതിലൂടെ നികത്തിക്കൊടുത്ത സിബിഐ കോടതിയോട് കേരളത്തിലെ മാധ്യമങ്ങള്‍ കടപ്പെട്ടിരിക്കുന്നു.

ലാവ്‌ലിന്‍ കേസില്‍ സത്യം വിജയിക്കുമെന്ന വിശ്വാസമാണ് തന്നെ മുന്നോട്ടുനയിച്ചതെന്നാണ് പിണറായി വിജയന്‍ പറഞ്ഞിരിക്കുന്നത്. ആദ്യം മുതലേ തന്നെ തകര്‍ക്കുന്ന വിധത്തില്‍ വളഞ്ഞുവെച്ചുള്ള ആക്രമണമാണ് നടന്നുവന്നത്. മഞ്ഞപത്രങ്ങള്‍ മുതല്‍ മഹാ നേതാക്കള്‍ വരെയും മുന്‍ കമ്മ്യുണിസ്റ്റുകള്‍ മുതല്‍ കമ്മ്യുണിസ്റ്റ് വിരുദ്ധര്‍ വരെയും തന്നെ ആക്രമിച്ചു. അച്ചടി, ദൃശ്യമാധ്യമങ്ങളും തന്നെ ആക്രമിച്ചുവെന്നും പിണറായി പറഞ്ഞു.

സത്യം എന്നത് ലാവ്‌ലിന്‍ കേസില്‍ മാത്രം വിജയിക്കുന്ന ഒന്നാണെന്ന ധാരണ അസ്ഥാനത്താണ്. ലാവ്‌ലിന്‍ കേസില്‍ വിജയിക്കുന്ന സത്യം കേരളം ചര്‍ച്ച ചെയ്ത മറ്റു കേസുകളില്‍ വിജയിക്കുമ്പോള്‍ കോടതി പക്ഷപാതപരമായി പെരുമാറിയെന്നും അന്വേഷണം വഴിമാറിപ്പോയെന്നുമൊക്കെ പറഞ്ഞ് ഇവിടെ പ്രക്ഷോഭങ്ങള്‍ നടക്കാതിരിക്കട്ടെ എന്നാഗ്രഹിക്കുന്നു. ചില സത്യങ്ങള്‍ വിജയിക്കുമ്പോള്‍ കയ്യടിക്കുകയും മറ്റു ചില സത്യങ്ങള്‍ വിജയിക്കുമ്പോള്‍ അതേ ആളുകള്‍ കല്ലെറിയുകയും ചെയ്യുമ്പോള്‍ സത്യത്തിനു തന്നെ ഒരു സ്വത്വപ്രതിസന്ധിയുണ്ടാവും. അതില്‍ നിന്നു സ്വത്വരാഷ്ട്രീയസിദ്ധാന്തങ്ങളും കുലംകുത്തികളും ജനിക്കും.

കേസില്‍ നിന്നു പിണറായി വിജയന്‍ ഒഴിവാക്കപ്പെടുന്നതോടെ കേരളരാഷ്ട്രീയത്തിലെ മൊത്തത്തിലുള്ള ബലാബലം മാറിമറിയുമെന്നത് ഉറപ്പിക്കാം. കോടതി വിധി സിപിഎം രാഷ്ട്രീയത്തിലും കേരള രാഷ്ടീയത്തിലും വലിയ പ്രത്യാഘാതങ്ങള്‍ ഉണ്ടാക്കുമെന്ന പി.കെ.കുഞ്ഞാലിക്കുട്ടിയുടെ പ്രസ്താവന തന്നെയാണ് പ്രതീക്ഷിക്കാവുന്ന സംഭവങ്ങളുടെ ആകെത്തുക. പിണറായി വിജയന്‍ എന്ന നേതാവിന്റെ കരുത്തും ജനപ്രീതിയും വര്‍ധിക്കുമ്പോള്‍ നിലവിലുള്ള കരുത്തന്‍മാരുടെ ജനപ്രീതിയ്ക്കും ഉടവുതട്ടും.

യുഎഡിഎഫിനുള്ളില്‍ തന്നെ പിണറായി വിജയനെക്കാള്‍ വിധിയില്‍ സന്തോഷിക്കുന്നവരുണ്ട് എന്നതാണ് ഏറെ രസകരം. പിണറായി വിജയനെ കുറ്റവിമുക്തനാക്കിയതില്‍ പിണറായിയെക്കാള്‍ സന്തോഷമുള്ളവനാണ് താനെന്നു തുറന്നു പറഞ്ഞ ആര്‍.ബാലകൃഷ്ണപിള്ള വിധി വിഎസ് എന്ന ദുഷ്ടനേറ്റ തിരിച്ചടിയാണെന്നാണ് പറഞ്ഞിരിക്കുന്നത്. പിണറായി വിജയനെ ക്രൂശിച്ചത് സ്വന്തം പാര്‍ട്ടിയില്‍ തന്നെയുള്ളവരാണെന്ന് വയലാര്‍ രവിയും പറഞ്ഞിട്ടുണ്ട്. ചുരുക്കിപ്പറഞ്ഞാല്‍ ലാവ്‌ലിന്‍ കേസില്‍ പിണറായി വിജയന്‍ ഒരു തെറ്റും ചെയ്തിട്ടില്ല എന്ന കാര്യത്തില്‍ സിപിഎമ്മിന്റെ നിലപാട് തന്നെയാണ് പല യുഡിഎഫ് നേതാക്കള്‍ക്കും. അങ്ങനെയെങ്കില്‍ ഇത്രകാലം വിവിധ രാഷ്ട്രീയയോഗങ്ങളില്‍ ഇവര്‍ ലാവ്‌ലിന്‍ കേസിന്റെ കാര്യം പറഞ്ഞ് അദ്ദേഹത്തെ ഒറ്റപ്പെടുത്തി എന്നത് ഒരു രാഷ്ട്രീയചോദ്യമാണ്.

അതിക്രൂരം ബഹുമോശം

ആശയപരമായും രാഷ്ട്രീയപരവുമായുള്ള എതിര്‍പ്പുകള്‍ അതേ മാര്‍ഗങ്ങളിലൂടെ പ്രകടിപ്പിക്കുന്നതിനെയാണ് രാഷ്ട്രീയമര്യാദ എന്നു വിളിക്കുന്നത്. സംസ്ഥാന മുഖ്യമന്ത്രി രാജിവച്ചൊഴിയണം എന്നു പ്രതിപക്ഷത്തിന് നിരന്തരം ആവശ്യപ്പെടാം. അദ്ദേഹം അതു ചെയ്യുന്നില്ലെങ്കില്‍ കല്ലെറിഞ്ഞോടിക്കാനോ ആക്രമിച്ചു ഭയപ്പെടുത്താനോ ശ്രമിക്കുന്നത് ഭയാനകമാണ്. ഈ അക്രമത്തെ പിണറായി വിജയന്‍ ഉള്‍പ്പെടെയുള്ള നേതാക്കള്‍ തള്ളിപ്പറയുകയും സിപിഎം നേതാക്കള്‍ കൂട്ടത്തോടെ കേസില്‍ പ്രതിയാവുകയും ചെയ്യുമ്പോഴാണ് കണ്ണൂരിന്റെ മണ്ണിലെ തിണ്ണമിടുക്കിന് ആണത്തമില്ലാതായിപ്പോകുന്നത്.

ഏറെ നാളായി പാര്‍ട്ടി കഷ്ടപ്പെട്ട് പണിതുയര്‍ത്തി വന്ന ബില്‍ഡ് അപ്പുകളെല്ലാം തകര്‍ന്നു നാശമായിരിക്കുന്നു. സോളാര്‍ കേസും സലീം രാജുമുള്‍പ്പെടെയുള്ള സകല വിവാദങ്ങളില്‍ നിന്നും മുക്തനായി, ഇമേജ് ഡബിളാക്കി ഉമ്മന്‍ ചാണ്ടി രാഷ്ട്രീയകേരളത്തിലെ തന്റെ കരുത്ത് കാണിച്ചു തന്നിരിക്കുന്നു. മുഖ്യമന്ത്രിയെ കല്ലെറിഞ്ഞു കൊല്ലാന്‍ നോക്കുന്ന രാഷ്ട്രീയത്തിന് ഒരാളുടെയും അംഗീകാരം ലഭിക്കില്ല എന്നതിനാല്‍ കല്ലെറിഞ്ഞു കയ്യടി വാങ്ങാമെന്നു കരുതിയ ആവേശഭരിതരായ അണികളെ തള്ളിപ്പറഞ്ഞ് സഖാക്കള്‍ക്കു തല്‍ക്കാലം തലയില്‍ ഉടുമുണ്ട് പുതയ്ക്കാം.

സിപിഎം പ്രതിഷേധം നടക്കുമ്പോള്‍ മുഖ്യമന്ത്രിക്കു നേരെ കല്ലെറിഞ്ഞത് കോണ്‍ഗ്രസുകാരായിരിക്കുമെന്നാണ് സഖാവ് എം.വി.ജയരാജന്‍ പറയുന്നത്. വിവരക്കേട് പറയാന്‍ തുടങ്ങിയാല്‍ എല്ലാവരും കൂട്ടത്തോടെ എന്നതാണല്ലോ പാര്‍ട്ടിയുടെ ഒരു ലൈന്‍. മുഖ്യമന്ത്രിയെ ആക്രമിച്ചതിന്റെ പങ്ക് ആര്‍ക്കാണെന്നു പറയാനുള്ള ബാധ്യത പാര്‍ട്ടിക്കില്ലെന്നും ആക്രമണത്തിനു കാരണം കോണ്‍ഗ്രസ് ഗ്രൂപ്പ് വഴക്കാണെന്നുമൊക്കെയാണ് സോ കോള്‍ഡ് ജയരാജന്‍മാരുടെ വാദം. തിരുവനന്തപുരത്ത് രാപകല്‍ സമരത്തിനുള്ളില്‍ ജയില്‍ചാടിയ റിപ്പര്‍ കൂളായി ഒളിച്ചിരുന്നതുപോലെ സിപിഎം പ്രതിഷേധസമരക്കാര്‍ക്കിടയില്‍ കോണ്‍ഗ്രസ് പ്രവര്‍ത്തകര്‍ തിരുകിക്കയറി മുഖ്യമന്ത്രിയുടെ കാര്‍ എറിഞ്ഞു തകര്‍ക്കുകയായിരുന്നു എങ്കില്‍ അത് പ്രതിഷേധത്തിനിറങ്ങിയ പാര്‍ട്ടിയുടെ പരാജയമാണ്.

അക്രമങ്ങളും രാഷ്ട്രീയകൊലപാതകങ്ങളും നാട്ടിലെ സംഭവവികാസങ്ങളുടെ പരിണിതഫലങ്ങളാണ് എന്ന മട്ടിലുള്ള വാദങ്ങളില്‍ നിന്നും പിന്മാറാനും അക്രമങ്ങളെ തള്ളിപ്പറയാനും തക്കവിധം നേതാക്കന്‍മാര്‍ ജനങ്ങളെ ഭയന്നു തുടങ്ങിയിട്ടുണ്ടെങ്കില്‍ അത് വളരെ നല്ല മാറ്റമാണ്. മുഖ്യമന്ത്രിയെ കല്ലെറിഞ്ഞത് സിപിഎമ്മുകാരോടൊപ്പം നിന്ന കോണ്‍ഗ്രസുകാരാണെന്ന വിഡ്ഢിത്തങ്ങള്‍ ജനങ്ങള്‍ വിശ്വസിച്ചില്ലെങ്കിലും അക്രമസമരങ്ങള്‍ പാര്‍ട്ടിയുടെ അന്ത്യം കുറിക്കുമെന്നു നേതാക്കന്‍മാര്‍ തിരിച്ചറിയുന്നു എന്നത് മുഖ്യമന്ത്രിയുടെ ഭാഷയില്‍ പറഞ്ഞാല്‍ വളരെ പോസിറ്റീവായ മാറ്റമാണ്. ഈ മാറ്റത്തിനു കാരണമായിട്ടുള്ളത് രക്തസാക്ഷിയായ ടി.പി.ചന്ദ്രശേഖരനാണെന്നും പറയാതെ വയ്യ.

ടിപി ചന്ദ്രശേഖരന്‍ വധത്തില്‍ അകാരണമായി പാര്‍ട്ടി പ്രവര്‍ത്തകരെ പൊലീസ് കുടുക്കിയതു പോലെ ഈ കേസിലും അകാരണമായി പൊലീസ് അതു ചെയ്യുമെന്നുറപ്പാണ്. കേസില്‍ 22 പേരെ അറസ്റ്റ് ചെയ്യുകയും സിപിഎം നേതാക്കന്‍മാരടക്കം അനേകം പേര്‍ക്കെതിരെ കേസെടുക്കുകയും ചെയ്തിട്ടുണ്ട്. യഥാര്‍ഥ പ്രതികളെ അറസ്റ്റ് ചെയ്യുക എന്ന ഉഡായ്പ് മുദ്രാവാക്യമുയര്‍ത്തിയും നിഷകളങ്കരായ സിപിഎം പ്രവര്‍ത്തകരെ പൊലീസ് പീഡിപ്പിക്കുന്നു എന്നാരോപിച്ചും അടുത്ത സമരമുറകള്‍ ഉടനെ ആരംഭിച്ചേക്കാം. മുഖ്യമന്ത്രിയുടെ ചോരയ്ക്കു പകരം ചോദിക്കുമെന്നു പ്രഖ്യാപിച്ച് കണ്ണൂര്‍ സിംഹം (അതോ കടുവയോ ?) കെ.സുധാകരനും രംഗത്തിറങ്ങിയിട്ടുണ്ട്. ശാന്തമായിരുന്ന കടത്തനാടന്‍ മണ്ണില്‍ ഇനി അങ്കക്കലിയുടെ കാലമായിരിക്കുമെന്നത് ആശങ്കാജനകമാണ്.

തനിക്കെതിരായ അക്രമത്തെ 101 ശതമാനം പോസിറ്റീവായി കൈകാര്യം ചെയ്ത മുഖ്യമന്ത്രിയെ അക്കാര്യത്തില്‍ അഭിനന്ദിക്കാതെ തരമില്ല. ഇതിന്റെ പേരില്‍ ഇന്നു കേരളത്തില്‍ ഹര്‍ത്താല്‍ നടത്തരുത് എന്നു കര്‍ശനനിര്‍ദേശം നല്‍കിയ നിശ്ചയദാര്‍ഢ്യത്തിന് അഭിവാദ്യങ്ങള്‍ അര്‍പ്പിക്കാതെയും വയ്യ. ഇന്നൊരു ഹര്‍ത്താല്‍ നടത്തിയിരുന്നെങ്കില്‍ മുഖ്യമന്ത്രിയുടെ ചോരയ്ക്കു പകരം ചോദിക്കാനിറങ്ങുന്നവരും അവരെ പ്രതിരോധിക്കുന്നവരുമെല്ലാം ചേര്‍ന്ന് കണ്ണൂരില്‍ ചോര ചൊരിഞ്ഞേനെ എന്നതില്‍ സംശയമില്ല.

മുഖ്യമന്ത്രിയുടെ നെറ്റിയില്‍ നിന്നും രണ്ടുതുള്ളി ചോര വന്നതിനാണോ ഈ ബഹളം, ഞങ്ങടെ എത്രയോ സഖാക്കന്‍മാരെ പൊലീസ് തല്ലിച്ചതച്ചിരിക്കുന്നു എന്നു ചിലര്‍ ചോദിക്കുന്നുണ്ട്. പൊലീസ് അക്രമത്തിനുള്ള മറുപടി മുഖ്യമന്ത്രിയെ അപായപ്പെടുത്തുന്നതാണ് എന്നു വിശ്വസിക്കുന്നവര്‍ നാടിനാപത്താണ്. മുഖ്യമന്ത്രിയുടെ ജീവന്‍ പോലും സുരക്ഷിതമല്ലാത്ത നാട്ടില്‍ സാധാരണക്കാരന്റെ അവസ്ഥ എന്തായിരിക്കും എന്ന ചോദ്യമാണ് അദ്ദേഹത്തിന്റെ രണ്ടുതുള്ളി ചോരയുയര്‍ത്തുന്നത്. അതിന് മറുപടി പറയേണ്ടത് ഉത്തരവാദപ്പെട്ട രാഷ്ട്രീയനേതാക്കന്‍മാരാണ്. ടിപി ചന്ദ്രശേഖരന്‍ സ്വയം വെട്ടി മരിച്ചു എന്നു പറയുന്നതുപോലെ മുഖ്യമന്ത്രി തന്നെ നേരത്തെ ആളെ നിര്‍ത്തി കല്ലെറിയിച്ചു രാഷ്ട്രീയമുതലെടുപ്പു നടത്തുന്നതാണ് എന്നൊക്കെ വാദിച്ച് ഓടിരക്ഷപെടുന്നവരല്ല നല്ല നേതാക്കന്‍മാര്‍. അക്രമത്തെക്കുറിച്ച് അന്വേഷിക്കുമെന്നും പാര്‍ട്ടി പ്രവര്‍ത്തകര്‍ക്കു പങ്കുണ്ടെങ്കില്‍ നടപടിയെടുക്കും എന്ന് ഉറപ്പോടെ പറഞ്ഞിരുന്നെങ്കില്‍ അതിനൊരു മൂല്യമുണ്ടായിരുന്നു. പിണറായി വിജയനെപ്പോലെയുള്ള ഒരു നേതാവില്‍ നിന്നും പ്രതീക്ഷിക്കുന്നത് അതാണ്.

എല്ലാറ്റിനുമുപരിയായി ഈ ബഹളത്തില്‍ നിശബ്ദരായി തടിയൂരുന്ന ഒരു വിഭാഗമുണ്ട്- കേരളാ പൊലീസ്. തിരുവനന്തപുരത്തെ സമരത്തില്‍ സമരക്കാരന്റെ വൃഷണമുടച്ച അതേ പൊലീസ് തന്നെ. പൊലീസ് അസോസിയേഷന്‍ കായികമേളയില്‍ പങ്കെടുക്കാന്‍ വന്ന മുഖ്യമന്ത്രിയെയാണ് സമരക്കാര്‍ കായികമായി നേരിട്ടത് എന്നത് കേരളാ പൊലീസിന്റെ ചരിത്രത്തിലെ എക്കാലത്തെയും വലിയ നാണക്കേടുകളിലൊന്നായിരിക്കും എന്നതില്‍ സംശയമില്ല. അക്രമത്തിനു സാധ്യതയുണ്ട് എന്നു റിപ്പോര്‍ട്ട് ഉണ്ടായിട്ടുപോലും ഇതു സംഭവിച്ചു എങ്കില്‍ അടിസ്ഥാനപരമായി ഇതു പൊലീസിന്റെ വീഴ്ചയാണ് എന്നു പറയാതെ വയ്യ.

എന്നെയൊന്നു പുറത്താക്കൂ പ്ലീസ്

അയല്‍പക്കത്തെ ചെറുപ്പക്കാരന്റെ കൂടെ ഒളിച്ചോടാന്‍ വേണ്ടി സ്വന്തം ഭര്‍ത്താവിനാല്‍ ഉപേക്ഷിക്കപ്പെടാനാഗ്രഹിക്കുന്ന ഇമ്മോറല്‍ ട്രാഫിക്കുകാരിയെപ്പോലെയാണ് പി.സി.ജോര്‍ജ്. എന്നെയൊന്നു പുറത്താക്കൂ പ്ലീസ്, ഞാന്‍ പോയി എല്‍ഡിഎഫില്‍ ചേക്കേറട്ടെ എന്നപേക്ഷിക്കുന്ന മാതിരി അദ്ദേഹം കോണ്‍ഗ്രസ് നേതാക്കന്‍മാര്‍ക്കെതിരേ നടത്തുന്ന ആക്രമണങ്ങള്‍ക്കു പിന്നില്‍ ജൂനിയര്‍ മാന്‍ഡ്രേക്ക് എന്ന സിനിമയില്‍ റോഡിനു നടുവില്‍ പായ്‌വിരിച്ചു കിടക്കുന്ന ജഗതി ശ്രീകുമാറിന്റെ ചേതോവികാരമേയുള്ളൂ. പി.സി.ജോര്‍ജും ജഗതി ശ്രീകുമാറും പറഞ്ഞു വരുമ്പോള്‍ ബന്ധുക്കളുമാണ്.

ഒരു പൂഞ്ഞാറുകാരനെ മറ്റൊരു പൂഞ്ഞാറുകാരനേ പൂര്‍ണമായി മനസ്സിലാക്കാന്‍ സാധിക്കൂ എന്നാണ് പ്രമാണം. അങ്ങനെ നോക്കുമ്പോള്‍ മൊത്തത്തിലുള്ള പ്രവര്‍ത്തനങ്ങളെയും പ്രതികരണങ്ങളെയും വിലയിരുത്തുമ്പോള്‍ പി.സി.ജോര്‍ജ് സ്വയം ഒരു പൊളിറ്റിക്കല്‍ ഏലിയന്‍ അസാന്‍ജായി മാറുന്നതിന്റെ ലക്ഷ്യങ്ങള്‍ വളരെ വ്യക്തമാണ്. എല്‍ഡിഎഫില്‍ നിന്നും മാണികോണ്‍ഗ്രസില്‍ വന്നു ലയിച്ചിട്ട് അധികകാലമായില്ല. അതുവരെ മാണിസാറിനെ വിളിച്ച തെറിയെല്ലാം മറന്ന് ഒരു അല്‍ഷിമേഴ്‌സ് രോഗിയെപ്പോലെ മാണിസാറെന്റെ ദൈവമാണ് എന്ന ലൈന്‍ പിടിച്ച് ചീഫ് വിപ്പായതിനു ശേഷമാണ് പി.സി.ജോര്‍ജിന് ശുക്രനും അതിനുമേല്‍ ശനിയുടെ അപഹാരവുമുണ്ടാകുന്നത്. ചീഫ് വിപ്പ് സ്ഥാനം ചുരുങ്ങിയ കാലം കൊണ്ട് ന്യൂജനറേഷന്‍ സിനിമ പോലെയാക്കി എന്നതാണ് പി.സി.ജോര്‍ജിന്റെ ഏറ്റവും വലിയ സംഭാവന. മാറ്റം നല്ലതാണോ ചീത്തയാണോ എന്നു വേര്‍തിരിച്ചറിയാനാവാത്ത അവസ്ഥ.

രാഷ്ട്രീയക്കാര്‍ പൊതുവേ കൊള്ളരുതാത്തവന്‍മാരാണെന്ന് അവര്‍ക്കു വോട്ടു ചെയ്യാറുള്ള ജനത്തിനു നന്നായറിയാം. കോണ്‍ഗ്രസുകാരായും സിപിഎമ്മുകാരായാലും അടിസ്ഥാനപരമായുള്ള ദുര്‍ഗുണങ്ങള്‍ക്കു പാര്‍ട്ടി വ്യത്യാസമില്ല. എല്ലാവരും മലയാളികളാണ് എന്നതുകൊണ്ടും അവര്‍ ഡീല്‍ ചെയ്യുന്നത് മലയാളികളോടാണ് എന്നതുകൊണ്ടുമൊക്കെയാവാം അത്. അതിനിടയില്‍ കേരള രാഷ്ട്രീയരംഗത്തെ ശുദ്ധീകരിക്കാന്‍ വന്ന പാര്‍ട്ടിയാണ് കേരള കോണ്‍ഗ്രസുകള്‍ എന്നൊന്നും എനിക്കഭിപ്രായമില്ല. എല്ലാവരും കണക്കു തന്നെ. അപ്പോള്‍ സ്വയം ഇതില്‍ നിന്നെല്ലാം അകന്നു നില്‍ക്കുന്നവനെപ്പോലെ മറ്റുള്ളവരെ വിലയിരുത്തുകയും വിധിക്കുകയും ചെയ്യുന്നത് വലിയ ധീരതയൊന്നുമല്ല.

എല്‍ഡിഎഫ് വിട്ടു വന്നിട്ട് വീണ്ടും അവിടേക്കു തന്നെ മടങ്ങിയാല്‍ കേന്ദ്രമന്ത്രി വരെ ആയതിനു ശേഷം അസ്തമിച്ചു പോയ പി.സി.തോമസിന്റെ അവസ്ഥ തന്നെയായിരിക്കും പി.സി.ജോര്‍ജിനും ഉണ്ടാവുക എന്നത് ഊഹിക്കാവുന്നതേയുള്ളൂ. സത്യത്തിനും നീതിക്കും വേണ്ടി രാഷ്ട്രീയരക്തസാക്ഷിയായാല്‍ തീര്‍ച്ചയായും അദ്ദേഹത്തിന് അടുത്ത തിരഞ്ഞെടുപ്പില്‍ സീറ്റ് ലഭിക്കുകയും രക്തസാക്ഷിത്വം ചൂണ്ടിക്കാട്ടി വോട്ടു പിടിക്കുകയും വീണ്ടും നിയമസഭയിലെത്തുകയും ചെയ്യാം. പക്്‌ഷെ, അതിന് കോണ്‍ഗ്രസുകാര്‍ അദ്ദേഹത്തെ ആക്രമിച്ചു പുറത്താക്കണം. അതിനു വേണ്ടിയുള്ള നായ്ക്കുരണപ്പൊടി പ്രയോഗമാണ് ഇപ്പോഴത്തെ ആരോപണങ്ങള്‍ എന്ന് മനസ്സിലാക്കാന്‍ വലിയ പ്രയാസമില്ല.

മുഖ്യമന്ത്രി ഉമ്മന്‍ ചാണ്ടിക്കു വേണ്ടി ഒരു തേരാളിയെപ്പോലെ ഉള്ളതും ഇല്ലാത്തതുമായ ശത്രുക്കള്‍ക്കെതിരേ ആഞ്ഞടിച്ച് മാധ്യമശ്രദ്ധ നേടിയ ശേഷമാണ് അദ്ദേഹം ഉള്‍പ്പാര്‍ട്ടി ജനാധിപത്യത്തിന്റെ സാധ്യതകള്‍ ഉപയോഗിച്ച് മുന്നണിയെയും കോണ്‍ഗ്രസിനെ തന്നെയും വിമര്‍ശിച്ചു തുടങ്ങിയത്. പൊതുചടങ്ങില്‍ വച്ച് വിഎസിന്റെ കൈ ചുംബിച്ചതോടെ സംഗതി ഗിയര്‍ മാറി. ഇന്നലെ പിണറായി വിജയനെ പുകഴ്ത്തി. കോണ്‍ഗ്രസുകാരെ ഒന്നടങ്കം ആക്ഷേപിച്ചുകൊണ്ടിരിക്കുകയാണ്. 100 രൂപ കിട്ടിയില്‍ 80 രൂപ പോക്കറ്റിലിടുന്നവരാണെന്നായിരുന്നു ഇന്നലത്തെ പ്രസ്താവന. അണ്ടനും അടകോടനുമൊക്കെ കോണ്‍ഗ്രസിലുണ്ടെന്നും രഹസ്യം ചോര്‍ത്തുന്ന വൃത്തികെട്ടവന്‍മാര്‍ മന്ത്രിസഭയിലുണ്ടെന്നുമൊക്കെയാണ് മറ്റുള്ള ആരോപണങ്ങള്‍.

ഇത്രയൊക്കെ പറഞ്ഞിട്ടും കോണ്‍ഗ്രസ് അദ്ദേഹത്തെ പുറത്താക്കാന്‍ കൂട്ടാക്കുന്നില്ല. രമേശ് ചെന്നിത്തലയും കെ.മുരളീധരനും മുതല്‍ കൊച്ചു കുട്ടിയായ ഡീന്‍ കുര്യാക്കോസ് വരെ പ്രതികരിച്ചു. അതുകൊണ്ടൊന്നും കാര്യമില്ല. ചീഫ് വിപ്പ് സ്ഥാനത്തു നിന്നു നീക്കണം. അപ്പോള്‍ ജോര്‍ജ് സയലന്റാവും. യഥാര്‍ഥ ഹീറോ രംഗപ്രവേശം ചെയ്യും- സാക്ഷാല്‍ കെ.എം.മാണി എന്ന മാണിസാര്‍. പി.സി.ജോര്‍ജിനു കിട്ടേണ്ട സഹതാപതരംഗം കൂടി നേടിക്കൊണ്ട് വിതുമ്പിക്കരഞ്ഞുകൊണ്ട് അദ്ദേഹം ഒരു പോക്കങ്ങോട്ടു പോകും. അതൊരു കൂറുമാറ്റമാണ് എന്നത് ആരും ശ്രദ്ധിക്കില്ല. വഴിതെറ്റിയ ഒരു കുഞ്ഞാടിനെ വീണ്ടെടുക്കാന്‍ ബാക്കി 99 എണ്ണത്തിനെയും വിട്ടിട്ടു പോയ ബൈബിളിലെ നല്ല ഇടയനെപ്പോലെ പി.സി.ജോര്‍ജെന്ന കുഞ്ഞാടിനെയുമെടുത്ത് അദ്ദേഹം ഇടതുപാളയത്തിലേക്കു പോകുമ്പോള്‍ പാലാക്കാര്‍ കണ്ണുതുടച്ചു കൂടെ നില്‍ക്കും. അത്ര തന്നെ.

സത്യത്തെ ഭയക്കുന്നവര്‍ക്ക് ഒരു കരിങ്കൊടി

കാളയെ ചുവപ്പുനിറം കാണിക്കുന്നതും മുഖ്യമന്ത്രിയെ കരിങ്കൊടി കാണിക്കുന്നതും ഒരുപോലെ അപകടരമായി വന്നു കൊണ്ടിരിക്കുകയാണ്. കാള കുത്തും പക്ഷെ, മുഖ്യമന്ത്രി കുത്തില്ല. എന്നാല്‍, അദ്ദേഹത്തിന്റെ അനുയായികള്‍ കരിങ്കൊടിക്കാരെ എതിര്‍ക്കുകയും തങ്ങള്‍ എതിര്‍ക്കുന്നവരെ കരിങ്കൊടി കാണിക്കുകയും ചെയ്യുമ്പോള്‍ മുഖ്യമന്ത്രിയുടെ ഫാന്‍സിനു കണ്‍നിറയെ കാണാന്‍ നല്ലൊരു കരിങ്കൊടി ഞാനിവിടെ സമര്‍പ്പിക്കുകയാണ്. കരിങ്കൊടി ഒരു അശ്ലീലമോ ദേശദ്രോഹമോ അല്ലെന്നും കരിങ്കൊടി കാണുന്നതു കൊണ്ട് ആര്‍ക്കും ഒന്നും സംഭവിക്കില്ലെന്നും തെളിയിക്കുന്നതിനു വേണ്ടിക്കൂടിയാണ് ഇത് പ്രദര്‍ശിപ്പിച്ചിരിക്കുന്നത്.

ഇന്ത്യയുടെ മറ്റു ഭാഗങ്ങളിലെന്ന പോലെ കേരളത്തിലും നിലവിലുള്ള ഭരണസംവിധാനം നിര്‍ഭാഗ്യവശാല്‍ ജനാധിപത്യമാണ്. ആ ജനാധിപത്യത്തില്‍ മുഖ്യമന്ത്രിക്ക് ഭരിക്കാനുള്ളതുപോലെ തന്നെ മൂപ്പരുടെ ഭരണം ഇഷ്ടപ്പെടാത്തവര്‍ക്ക് പ്രതിഷേധിക്കാനുമുള്ള അവകാശമുണ്ട്. എങ്ങനെ പ്രതിഷേധിക്കണം എന്നത് പ്രതിഷേധിക്കുന്നവരുടെ ക്രിയേറ്റിവിറ്റി അുസരിച്ചിരിക്കും. സോളാര്‍ കേസില്‍ മുഖ്യമന്ത്രിയുടെ ഓഫിസിനുണ്ടായ പങ്ക് വിവാദമായതോടെ സമരപരിപാടികളിലേക്കു നീങ്ങിയ ഇടതു പ്രവര്‍ത്തകര്‍ മുഖ്യമന്ത്രിയെ കരിങ്കൊടി കാണിക്കുന്ന പ്രതിഷേധ പരിപാടിയാണ് സ്വീകരിച്ചിരിക്കുന്നത്.

ഇന്നലെ, മലപ്പുറം താനൂരില്‍ ഗവ. ആര്‍ട്‌സ് ആന്റ് സയന്‍സ് കോളേജിലെത്തിയ മുഖ്യമന്ത്രിയെയും ആചാരപ്രകാരം ഇടതു പ്രവര്‍ത്തകര്‍ കരിങ്കൊടി കാണിച്ചു. അദ്ദേഹം അതു നേരെ ചൊവ്വേ കണ്ടോ എന്നറിയില്ല. എന്തായാലും പൊലീസ് വലയം ഭേദിച്ച് കരിങ്കൊടി കാണിച്ച ഇടതു പ്രവര്‍ത്തകരും വലയമുണ്ടാക്കിയ പൊലീസുകാരും തമ്മില്‍ സംഘര്‍ഷമുണ്ടായി, സ്വാഭാവികം. മറ്റ് ജില്ലകളില്‍ മുഖ്യമന്ത്രിയെ തടയുന്നതുപോലെ മലപ്പുറത്ത് തടയാനാകില്ലെന്നും ഇടത് പ്രവര്‍ത്തകര്‍ക്ക് കരിങ്കൊടി കാണിക്കാനാകില്ലെന്നും യൂത്ത് ലീഗ് പ്രഖ്യാപിച്ചിരുന്നത്രേ. എന്തായാലും ആ പ്രഖ്യാപനം നടപ്പായില്ല. എല്‍ഡിഎഫുകാര്‍ കരിങ്കൊടി കാണിക്കുകയും സംഗതി അടിയില്‍ കലാശിക്കുകയും ചെയ്തു.

ഇതൊന്നുമല്ല ഇപ്പോഴത്തെ വിഷയം. മലപ്പുറത്ത് മുഖ്യമന്ത്രിയെ ഇടതു പ്രവര്‍ത്തകര്‍ കരിങ്കൊടി കാണിച്ചു എന്ന വാര്‍ത്ത റിപ്പോര്‍ട്ട് ചെയ്ത റിപ്പോര്‍ട്ടര്‍ ചാനലിനു നേരെ അക്രമം നടത്തുന്ന യുഡിഎഫ് പ്രവര്‍ത്തകരുടെ രോഗാതുരമായ ജനാധിപത്യബോധമാണ്. മുഖ്യമന്ത്രിക്കെതിരെ കരിങ്കൊടി കാണിച്ചിട്ടില്ലെന്ന് പറഞ്ഞ് ഒരു സംഘം യു.ഡി.എഫ് പ്രവര്‍ത്തകര്‍ റിപ്പോര്‍ട്ടര്‍ ചാനലിന്റെ വാഹനം തടഞ്ഞു. ക്യാമറ പിടിച്ചു വാങ്ങാനും ക്യാമറാമാനെ കയ്യേറ്റം ചെയ്യാനും ശ്രമിച്ചെന്നു റിപ്പോര്‍ട്ടര്‍ ചാനല്‍ തന്നെ റിപ്പോര്‍ട്ട് ചെയ്യുന്നുണ്ട്. കരിങ്കൊടി കാണിക്കുന്ന ദൃശ്യം കയ്യിലുള്ള ചാനലുകാരോട് അത് കാണിച്ചിട്ടില്ല എന്നു പറയാന്‍ മാത്രമുള്ള വിവരമേ തടഞ്ഞവര്‍ക്കുണ്ടാിരുന്നുള്ളോ എന്നു ചോദിക്കരുത്. വിവരമെന്നൊക്കെ പറയുന്നത് ആപേക്ഷികമാണ്. എല്ലാ യുഡിഎഫുകാര്‍ക്കും മുഖ്യമന്ത്രിയുടെ അത്ര വിവരമുണ്ടായിരുന്നെങ്കില്‍ ഇവിടെ ഉമ്മന്‍ ചാണ്ടി ഭരിക്കില്ലായിരുന്നു എന്നാരോ പറഞ്ഞിട്ടുണ്ട്.

നമ്മുടെ മുഖ്യമന്ത്രി വളരെ വ്യത്യസ്തനായ ഒരു മുഖ്യമന്ത്രിയാണ്. സ്വന്തം ഓഫിസ് മുറിയില്‍ ക്യാമറ വച്ച് ന്യൂയോര്‍ക്ക് ടൈംസില്‍ വരെ വാര്‍ത്തയായ അദ്ദേഹം ഇപ്പോള്‍ അതേ ഓഫിസ് മുറിയില്‍ വച്ചു സരിതയുമായി കൂടിക്കാഴ്ച നടത്തി എന്ന വിവാദത്തിലാണ് വട്ടം കറങ്ങുന്നത്. മാധ്യമസ്വാതന്ത്ര്യം ഹനിക്കുന്ന ഒരു നടപടിയും വച്ചു പൊറുപ്പിക്കില്ല എന്നു പലവട്ടം പറഞ്ഞിട്ടുള്ള മുഖ്യമന്ത്രിയെ കരിങ്കൊടി കാണിച്ച വാര്‍ത്ത കൊടുത്തതിനാണ് യുഡിഎഫുകാര്‍ മാധ്യമപ്രവര്‍ത്തകരെ തടയുകയും അവരെ കയ്യേറ്റം ചെയ്യുകയുമൊക്കെ ചെയ്യുന്നത്. യൂത്ത് കോണ്‍ഗ്രസുകാര്‍ പി.സി.ജോര്‍ജിനെ കരിങ്കൊടി കാണിക്കുകയും വഴി തടയുകയും ചെയ്തപ്പോള്‍ അതൊന്നും അതിരുവിട്ടതാണെന്നു തോന്നുന്നില്ല എന്നു പറഞ്ഞ യൂത്ത് ലീഗാണ് മലപ്പുറത്ത് വച്ച് മുഖ്യമന്ത്രിയെ കരിങ്കൊടി കാണിക്കാന്‍ അനുവദിക്കില്ല എന്നു പ്രഖ്യാപിച്ചത്.

കരിങ്കൊടി പി.സി.ജോര്‍ജ് കണ്ടാലും ഉമ്മന്‍ ചാണ്ടി കണ്ടാലും ഒന്നും സംഭവിക്കാന്‍ പോകുന്നില്ല എന്നാണെന്റെ അഭിപ്രായം. പ്രതിഷേധക്കാരുടെ കരിങ്കൊടി കൂടി കാണാന്‍ ബാധ്യസ്ഥനാണ് ജനാധിപത്യത്തിലെ മുഖ്യമന്ത്രി. ഇനി അതൊക്കെ ആശയപരമാണെന്നുണ്ടെങ്കില്‍ ആളുകളെക്കൊണ്ടു പറയിപ്പിക്കാത്ത, ആരും കരിങ്കൊടി കാണിക്കാത്ത ഭരണം കാഴ്ച വയ്ക്കുകയാണ് വേണ്ടത്. പിന്നെ, ഇവിടെ ആവേശപൂര്‍വം കരിങ്കൊടി കാണിക്കുന്ന ഇടതു പ്രവര്‍ത്തകര്‍ കഴിഞ്ഞ ഭരണകാലത്ത് വിഎസിനെ കരിങ്കൊടി കാണിക്കാനിറങ്ങിയ യൂത്ത് കോണ്‍ഗ്രസുകാരെ തല്ലിച്ചതച്ചത് ഓര്‍മിപ്പിക്കുകയാണ്. ഒന്നുകില്‍ ആരും ആരെയും കരിങ്കൊടി കാണിക്കരുത്. അല്ലെങ്കില്‍ ചെങ്കൊടിയും പച്ചക്കൊടിയും പോലെ കരിങ്കൊടിയും സ്വീകാര്യമായ ഒന്നായി രാഷ്ട്രീയക്കാര്‍ പ്രഖ്യാപിക്കുക.

സെന്റ് ജോര്‍ജ് ഓഫ് പൂഞ്ഞാര്‍

വെറുക്കപ്പെട്ടവന്റെ മുഖവും ശബ്ദവും ശരീരഭാഷയും മാറ്റി വച്ചാല്‍ പി.സി.ജോര്‍ജിന്റെ ഉള്ളിലും ഒരാത്മാവുണ്ട്. കാലം മായ്ക്കാത്ത മുറിവുകളില്ല എന്നാണ് പറയുന്നതെങ്കിലും രണ്ടായിരം വര്‍ഷം മുമ്പ് ക്രിസ്തുവിനെ കുരിശില്‍ തറച്ചു കൊന്ന ദുഖസത്യത്തില്‍ വേദനിച്ചും ഈസ്റ്ററിന്റെ അരൂപിയില്‍ പ്രാര്‍ഥനകളില്‍ മുഴുകിയും കഴിയുന്ന ഒരു കുഞ്ഞാടാണ് ചീഫ് വിപ്പ്. മാണി സാറിന്റെ ഇടയോന്മുഖമായ രാഷ്ട്രീയത്തില്‍ പറ്റിച്ചേര്‍ന്നു നില്‍ക്കുമ്പോള്‍ ജോര്‍ജിയന്‍ മറുഭാഷ കാലഘട്ടത്തിന്റെ വിപ്ലവജ്വാലയായി അഖ്യാനം ചെയ്യപ്പട്ടേക്കാം. അപ്പോള്‍ കേരളരാഷ്ട്രീയത്തിലെ സെന്റ് ജോര്‍ജ് പുണ്യാളനായ ആ ധീരയോദ്ധാവിന്റെ കട്ടത്തെറികള്‍ ചരിത്രം തങ്കമ്മയുടെ ലിപികളില്‍ ആലേഖനം ചെയ്തു വച്ചേക്കാം.

ഞാനും പി.സി.ജോര്‍ജും ഒരേ നാട്ടുകാരാണ്. പന്നപ്പൊ@#@&*മോനേ എന്നു വിളിച്ചാല്‍ കേള്‍ക്കാവുന്നത്ര ദൂരമേയുള്ളൂ. പിന്നെ നമ്മള്‍ ക്രിസ്ത്യാനികള്‍ ഒന്നിച്ചു നില്‍ക്കണം എന്നു പണ്ട് ചില കേരളാ കോണ്‍ഗ്രസുകാര്‍ പറഞ്ഞിട്ടുള്ളതനുസരിച്ചാണെങ്കില്‍ ഞങ്ങള്‍ ഒന്നിച്ചു നില്‍ക്കേണ്ടവരുമാണ്. പി.സി.ജോര്‍ജിനെ പൊതുവേ ആര്‍ക്കും ഇഷ്ടമില്ലാത്ത ഈ പെസഹാക്കാലത്ത് ജനങ്ങള്‍ക്കു വേണ്ടി, സത്യത്തിനും നീതിക്കും വേണ്ടി സ്വയം കുരിശിലേറാന്‍ സന്മനസ്സായ അദ്ദേഹത്തിന്റെ കാര്യത്തില്‍ പീലാത്തോസിനെക്കാള്‍ തന്ത്രശാലിയായ മാണിസാര്‍ കൈകഴുകുമെന്നും സീസര്‍ ചാണ്ടി മുദ്രണം ചെയ്ത് ക്രൂശിക്കാന്‍ കൊടുക്കുമെന്നും കരുതിയത് വെറുതെയായി.

പി.സി.ജോര്‍ജിനെ ചീഫ് വിപ്പ് സ്ഥാനത്തു നിന്നു മാറ്റുന്ന പ്രശ്‌നമില്ല എന്നാണ് മാണിസാര്‍ പ്രഖ്യാപിച്ചത്. ജോര്‍ജിനെ മാറ്റണമെന്നു പാര്‍ട്ടിയില്‍ നിന്ന് ആരും ഇതുവരെ ആവശ്യപ്പെട്ടിട്ടില്ല. പാര്‍ട്ടിക്കകത്ത് ഇക്കാര്യം ചര്‍ച്ച ചെയ്തിട്ടുമില്ല- മാണിസാര്‍ പറഞ്ഞു. ഫ്രാന്‍സിസ് ജോര്‍ജും മറ്റും പലതും പ്രതീക്ഷിച്ചു കാണണം. അല്ലെങ്കിലും പാലാ-പൂഞ്ഞാര്‍ ബെല്‍റ്റില്‍ തൊടുപുഴയുടെ ആശങ്കകള്‍ക്ക് എന്താണ് സ്ഥാനം ?

മാണിസാര്‍ പറഞ്ഞത് പോട്ടേന്നു വയ്ക്കാം. മാണി സാറാണ്. അതുപോലാണോ യൂത്ത്ഫ്രണ്ടുകാര്‍ ? പി.സി.ജോര്‍ജിനെതിരായി അസത്യം പറഞ്ഞ കെ.ആര്‍.ഗൗരിയമ്മ പൊതുസമൂഹത്തോട് മാപ്പു പറയണമെന്നാണ് യൂത്ത്ഫ്രണ്ട് (എം) നോതാക്കന്‍മാര്‍ ആവശ്യപ്പെടുന്നത്. ഗൗരിയമ്മയെക്കുറിച്ച് അദ്ദേഹം ബീപിയ കാര്യങ്ങള്‍ കേട്ട് ഞെട്ടിയിരിക്കുന്ന പൊതുസമൂഹം ഗൗരിയമ്മ ജോര്‍ജിനോടു മാപ്പു ചോദിക്കുന്നത് കേട്ട് കുഴഞ്ഞുവീഴാതിരുന്നാല്‍ ഭാഗ്യം. ഈസ്റ്ററിന്റെ അരൂപിയില്‍ ഉപവാസവും പ്രാര്‍ഥനയും പള്ളില്‍പ്പോക്കുമൊക്കെയായി കഴിയുന്ന പി.സി.ജോര്‍ജ് എന്തായാലും ഒന്നും പറയുന്നില്ല. ഈസ്റ്റര്‍ കഴിഞ്ഞ് അദ്ദേഹം മൂര്‍ച്ചയേറിയ തെറികളുമായി ഉയിര്‍ത്തെഴുന്നേല്‍ക്കുമെന്ന് നമ്മള്‍ ഭയപ്പെടേണ്ടിയിരിക്കുന്നു.

പി.സി.ജോര്‍ജ് കാലഘട്ടത്തിന്റെ പുണ്യാളനാണ് എന്നു സമര്‍ഥിക്കാന്‍ ശ്രമിക്കുന്നത് കെ.സി.ഉമേഷ് ബാബു ആണ്. മംഗളം പത്രത്തിലെ അദ്ദേഹത്തിന്റെ കോളത്തിലാണ് വിടുവായന്റെ സുവിശേഷത്തിന്റെ പരിപ്രേക്ഷ്യങ്ങള്‍ വിശകലനം ചെയ്യപ്പെടുന്നത് (മംഗളവും പി.സി.ജോര്‍ജുമായുള്ള ബന്ധം ഇന്നോ ഇന്നലെയോ തുടങ്ങിയതല്ല എന്നാണ് പറയുന്നത്). ഉമേഷ് ബാബുവിന്റെ കോളത്തില്‍ ഇങ്ങനെ പറയുന്നു.

”വിടുവായന്മാര്‍ പലപ്പോഴും സത്യം പറയും. സത്യം പറയുന്ന പ്രവര്‍ത്തനം, പക്ഷേ, കേരളത്തില്‍ എല്‍.ഡി.എഫും, യു.ഡി.എഫും നിഷിദ്ധമാക്കിയിരിക്കുന്ന ഒന്നാണ്. പാര്‍ട്ടി അടിമത്തമല്ലാത്തതൊന്നും ഈ രണ്ടിനം പ്രഭുക്കന്‍മാര്‍ക്കും ഇപ്പോള്‍ പഥ്യമല്ല. അതുകൊണ്ട്, പി.സി. ജോര്‍ജ് എന്ന യു.ഡി.എഫ് നേതാവിനെ കുരിശേറ്റാന്‍ എല്‍.ഡി.എഫും യു.ഡി.എഫും ഒന്നിച്ചു പൊരുതുന്ന വിചിത്രാവസ്ഥയ്ക്ക് ഇപ്പോള്‍ കേരളം സാക്ഷ്യംവഹിക്കുന്നു. ഈ കാപട്യത്തിലെ ഹരിതവാദം എന്തു ഹരിതവാദമാണ്?.”

കേരളസമൂഹത്തിന്റെ മാനസിക അടിമത്തത്തെക്കുറിച്ചു പറഞ്ഞ ശേഷം പി.സി.ജോര്‍ജിനെപ്പറ്റി പറയാതെ അദ്ദേഹം ഇങ്ങനെ കൂടി സൂചിപ്പിക്കുന്നു: ” ധീരമായി മുഴങ്ങുന്ന സത്യത്തിന്റെ വേറിട്ട ശബ്ദം ഇപ്പോള്‍ ഇവിടെങ്ങുമില്ല. ഒന്നുകില്‍ പാര്‍ട്ടി നേതാക്കന്മാരുടേയുംഅവരുടെ വിനീതദാസന്മാരുടേയും വകയായുള്ള കുത്സിതമായ പാര്‍ട്ടി സ്വാര്‍ത്ഥതയും തന്‍കാര്യവും ലക്ഷ്യം വെക്കുന്ന അര്‍ത്ഥശൂന്യമായ ഒച്ച വെപ്പുകള്‍, അല്ലെങ്കില്‍ വെവ്വേറെ പാര്‍ട്ടിയടിമകളായ സാംസ്‌കാരിക പ്രമാണിമാരുടെ ഗീര്‍വാണങ്ങള്‍, അതുമല്ലെങ്കില്‍ ആരെയും വെറുപ്പിക്കാതെ എല്ലാവരുടേയും ഓമനയായി നിലകൊള്ളണമെന്ന് തീരുമാനിച്ചിട്ടുള്ള എത്രയോ കലാ സാഹിത്യകാരന്മാരുടെ കൃത്രിമരോഷങ്ങള്‍.” ”ഇതിനിടയിലും ഇടയ്ക്ക് ഉയര്‍ന്നു കേള്‍ക്കുന്ന സത്യത്തിന്റെ ചില ഒറ്റയൊറ്റ ശബ്ദങ്ങള്‍ക്ക് മുഖ്യധാരയില്‍ പ്രമാണികത്വം ലഭിക്കുന്ന അവസ്ഥ സമകാലിക കേരളത്തില്‍ വളരെ കുറവാണ്. പാര്‍ട്ടികളും പാര്‍ട്ടിയടിമകളുംചേരുന്ന ശബ്ദ കലവിയില്‍ അത്തരം പ്രതിരോധങ്ങള്‍ പെട്ടെന്ന് വിസ്മൃതിയിലാവുന്നു.”

ഇത് ക്ഷമിക്കാവുന്നതേയുള്ളൂ. എന്നാല്‍ എം.എന്‍.വിജയനെയും പി.സി.ജോര്‍ജിനെയും ഒരേ വണ്ടിയില്‍ കെട്ടാനുള്ള ചില ശ്രമങ്ങള്‍ കൂടി ഉമേഷ് ബാബുവിന്റെ ലേഖനത്തില്‍ കണ്ട് സത്യത്തില്‍ പകച്ചുപോയി. എം.എന്‍.വിജയന്‍ വിശുദ്ധനായ നേതാവായിരുന്നു എന്നൊന്നും എനിക്കഭിപ്രായമില്ല. എന്നാല്‍ അദ്ദേഹം പി.സി.ജോര്‍ജിനെപ്പോലെ ആയിരുന്നു എന്നു പറയാന്‍ മാത്രം ജേര്‍ജേറിയനിസം എനിക്കില്ല. ഉമേഷ് ബാബു പറയുന്നതനുസരിച്ച് ” 2007 ല്‍ വിജയന്‍ മാഷ് മരിച്ചു. അന്ന് അധികാരത്തിലുണ്ടായിരുന്ന സി.പി.എം മാഷിന്റെ മരണത്തോടുപോലും പകയോടെ പെരുമാറി.” ”യഥാര്‍ത്ഥമായ സ്വതന്ത്രചിന്ത അശരണമായി തെമ്മാടിക്കുഴിയിലൊതുങ്ങണമെന്നും, പാര്‍ട്ടിയടിമത്തം മാത്രം തഴച്ചു വളരണമെന്നുള്ള, ജനാധിപത്യ വിരുദ്ധ രാഷ്ട്രീയഭാവനയുടെ കാര്യത്തില്‍, സമകാലിക കേരളത്തില്‍ സംഭവിച്ചു കൊണ്ടിരിക്കുന്ന എല്‍.ഡി.എഫ് യു.ഡി.എഫ് ഐക്യത്തിന്റെ വലിയ ഉദാഹരണമാണിത്.” ”പി.സി. ജോര്‍ജിന്റെ പ്രശ്‌നം ഇവിടെയാണ് വരുന്നത്. സ്വന്തം മന്ത്രി സ്ത്രീലമ്പടനാണെങ്കിലും അതു തുറന്നു പറയുന്നതില്‍ പാര്‍ട്ടിയടിമത്തത്തിന്റെ ലംഘനമുണ്ട്. വിടുവായന്മാര്‍ പലപ്പോഴും സത്യം പറയും. സത്യം പറയുന്ന പ്രവര്‍ത്തനം, പക്ഷേ, കേരളത്തില്‍ എല്‍.ഡി.എഫും, യു.ഡി.എഫും നിഷിദ്ധമാക്കിയിരിക്കുന്ന ഒന്നാണ്.”

മന്ത്രിമാരുടെ ലൈംഗികജീവിതത്തിനു വിപ്പ് കൊടുക്കുന്ന പ്രവര്‍ത്തനത്തെ സത്യം തുറന്നു പറയലായി മഹത്വവല്‍ക്കരിക്കുന്നത് സാസ്‌കാരികകേരളത്തിനു നല്ലതല്ല. സ്ത്രീലമ്പടന്‍ എന്ന വാക്കു പോലും പലപ്പോഴും ആപേക്ഷികമാണ്. ആരോഗ്യമുള്ളപ്പോള്‍ പെണ്ണുപിടിക്കുകയും പിക്കപ്പ് പോയ ശേഷം സദാചാരത്തിന്റെ കാവല്‍മാലാഖയായിത്തീരുകയും ചെയ്യുന്നത് ധീരതയല്ല, ഗതികേടാണ്.

ഈസ്റ്ററിന്റെ അരൂപിയില്‍ കഴിയുന്ന എല്ലാ ക്രിസ്ത്യാനികള്‍ക്കും എന്റെ ആശംസകള്‍.