എം.വി.നികേഷ് കുമാറിനോട് പത്തു ചോദ്യങ്ങള്‍

ഉടുക്കു കൊട്ടി പേടിപ്പിക്കല്ലേ എന്ന തലക്കെട്ടില്‍ റിപ്പോര്‍ട്ടര്‍ ചാനല്‍ വെബ്‌സൈറ്റില്‍ ശ്രീ. എം.വി.നികേഷ് കുമാര്‍ എഴുതിയ ഒരു ലേഖനം വായിക്കാനിടയായി. വാര്‍ത്ത അവതരിപ്പിക്കുന്ന അതേ ശൈലിയില്‍ അബദ്ധങ്ങളും വിവരക്കേടുകളും വളരെ ആധികാരികമായി അവതരിപ്പിക്കാനുള്ള അദ്ദേഹത്തിന്റെ ധാര്‍ഷ്ട്യത്തെ ഞാനഭിനന്ദിക്കുന്നു. മുഖ്യമന്ത്രിയുള്‍പ്പെടെയുള്ള ജനപ്രതിനിധികളെയും രാഷ്ട്രീയപ്രവര്‍ത്തകരെയും തല്‍സമയ വാര്‍ത്താപരിപാടികളിലൂടെ പരസ്യവിചാരണ നടത്താറുള്ള നികേഷ് ഒരു സര്‍ക്കാര്‍ വകുപ്പിന്റെ പ്രവര്‍ത്തനത്തെ ഉടുക്കുകൊട്ടി പേടിപ്പിക്കലായി ചിത്രീകരിക്കുന്നത് ഖേദകരമാണ്.

ഒരിക്കലും പിരിഞ്ഞ് കിട്ടില്ല എന്നുറപ്പുള്ള തുകയ്ക്ക് സര്‍വീസ് ടാക്‌സ് ഈടാക്കരുതെന്നും അതിന്‍മേല്‍ സര്‍ക്കാര്‍ പലിശ ഈടാക്കിയത് തന്റെ ചാനലിനോടുള്ള ക്രൂരതയാണെന്നും നികേഷ് പറയുന്നു. പരസ്യത്തിന്റെ കാശ് പിരിച്ചെടുക്കാന്‍ കഴിയാത്തത് ചാനലിന്റെ പരാജയമാണ്. അതിന്റെ ഭാരം ഏറ്റെടുക്കേണ്ടത് സര്‍ക്കാരും ജനങ്ങളുമല്ല. മിസ്മാനേജ്‌ന്റെിനെ ബുദ്ധിജീവിനാട്യങ്ങള്‍ കൊണ്ടു മഹത്വവല്‍ക്കരിക്കാന്‍ ശ്രമിക്കുന്നത് പഴയ നമ്പരാണ്. നികുതി അടയ്ക്കാത്തതിന്റെ പേരില്‍ അദ്ദേഹത്തെ അറസ്റ്റ് ചെയ്ത സംഭവത്തെക്കുറിച്ചുള്ള ലേഖനത്തില്‍ നിന്നും എനിക്കു തോന്നിയ ചില സംശയങ്ങളാണ് ഇവിടെ ചോദിക്കുന്നത്. സ്വന്തമായി ചാനലൊന്നും ഇല്ലാത്തതുകൊണ്ടാണ് അതൊക്കെ ബ്ലോഗിലൂടെ ചോദിക്കുന്നത്.

1. പരസ്യക്കാര്‍ തരാനുള്ള ആറു കോടി രൂപ പിരിഞ്ഞു കിട്ടാതെ ഒന്നരക്കോടി രൂപ നികുതി അടയ്ക്കാന്‍ നിവൃത്തിയില്ല എന്നു കോടതിയില്‍ വാദിച്ച താങ്കള്‍, മാര്‍ച്ച് 23ന് സ്റ്റുഡിയോയിലെത്തിയ സെന്‍ട്രല്‍ എക്‌സൈസ് ഉദ്യോഗസ്ഥരോട് എല്ലാ ഡിസ്പ്യൂട്ടും മാറ്റിവച്ച് മുഴുവന്‍ പണവും അടയ്ക്കാം അറസ്റ്റ് ഒഴിവാക്കാമോ എന്നു ചോദിച്ചതായി പറയുന്നു. ആറുകോടി കിട്ടിയാലേ നികുതി അടയ്ക്കാന്‍ കഴിയൂ എന്ന വാദം അവിടെ പൊളിയുകയല്ലേ മിസ്റ്റര്‍ നികേഷ് ? കയ്യില്‍ പണമില്ലെങ്കില്‍ എങ്ങനെ അപ്പോള്‍ മുഴുവന്‍ തുകയും അടയ്ക്കുമായിരുന്നു ?

2. സെന്‍ട്രല്‍ എക്‌സൈസ് കമ്മിഷണറുടെ ഓഫിസിലേക്കു പോകുന്നതിനു പകരം അതുമായി ബന്ധമില്ലാത്ത മറ്റൊരു ഓഫിസിലെത്തിച്ചു എന്നു പറയുന്നു. കമ്മിഷണര്‍ ശ്രീ.നികേഷിനെ കാണണം എന്നാവശ്യപ്പെട്ടതുപ്രകാരം കൂട്ടിക്കൊണ്ടുപോകാന്‍ വന്നവരായിരുന്നില്ല ആ ഉദ്യോഗസ്ഥര്‍ എന്നാണ് മനസ്സിലാവുന്നത്. താങ്കള്‍ക്ക് സമന്‍സുമായി വന്നവരോട് എന്നെ കമ്മിഷണറുടെ അടുത്തേക്ക് കൊണ്ടുപോകൂ എന്ന താങ്കളുടെ ആവശ്യം അവര്‍ അനുസരിച്ചില്ല എന്നത് അവര്‍ സ്വാധീനങ്ങള്‍ക്കു വഴങ്ങാത്ത സത്യസന്ധരായ ഉദ്യോഗസ്ഥരാണ് എന്നതിനു തെളിവല്ലേ മിസ്റ്റര്‍ നികേഷ് ? അവരെ അഭിനന്ദിക്കുകയായിരുന്നില്ലേ ചെയ്യേണ്ടത് ?

3. താങ്കള്‍ ആവശ്യപ്പെട്ടതു പ്രകാരം കമ്മിഷണറുടെ ഓഫിസിലെത്തിച്ചില്ല എന്നു മനസ്സിലായപ്പോള്‍ മുന്‍ കമ്മിഷണറായ ഡോ.രാഘവനോട് സഹായമഭ്യര്‍ഥിച്ചു എന്നു താങ്കള്‍ പറയുന്നു. താന്‍ നിസ്സഹായനാണെന്നു പറഞ്ഞ രാഘവന്‍ നിയമപ്രകാരമുള്ള അവകാശങ്ങള്‍ നികേഷിനു ലഭിക്കും എന്നും പറഞ്ഞു. നിയമനടപടികളെ നേരിട്ടുകൊണ്ടിരിക്കുന്ന ഒരാള്‍ ഇത്തരത്തില്‍ ഉന്നത ഉദ്യോഗസ്ഥരെ വിളിച്ച് സഹായമഭ്യര്‍ഥിക്കുന്നത് ശരിയാണ് എന്ന് താങ്കള്‍ വിശ്വസിക്കുന്നുണ്ടോ ? ഉന്നതങ്ങളിലുള്ള സ്വാധീനം ഉപയോഗിച്ച് നിയമനടപടികളില്‍ നിന്നു രക്ഷപെടാന്‍ ശ്രമിക്കുന്നവരെ മോശക്കാരായി ചിത്രീകരിച്ചു വാര്‍ത്ത കൊടുക്കുന്ന താങ്കള്‍ അതിനു തന്നെയല്ലേ അപ്പോള്‍ ശ്രമിച്ചത് ?

4. ഡോ.രഘവന്‍ കൈവിട്ടതോടെ ‘തുടര്‍ന്നു ഞാന്‍ വിളിക്കേണ്ടത് കേന്ദ്രം ഭരിക്കുന്ന ബിജെപി നേതാക്കളെയും സംസ്ഥാനം ഭരിക്കുന്ന മന്ത്രിമാരെയുമാണ്. അതിനെക്കാള്‍ ഭേദം ജയിലാണല്ലോ…’- എന്നെഴുതിയിരിക്കുന്നത് വായിച്ചു. എന്താണ് താങ്കള്‍ അതുകൊണ്ടുദ്ദേശിച്ചത് എന്നു വ്യക്തമായില്ല. കേന്ദ്രം ഭരിക്കുന്ന ബിജെപി നേതാക്കളും സംസ്ഥാനം ഭരിക്കുന്ന നേതാക്കളും താങ്കള്‍ക്കു സഹായം ചെയ്യാന്‍ മാത്രം യോഗ്യതയുള്ളവരല്ല എന്നാണോ ? അതോ അവരും താങ്കളുടെ കാര്യത്തില്‍ നിഷ്പക്ഷത പുലര്‍ത്തുമോ എന്ന ഭീതിയായിരുന്നോ ? എന്തൊക്കെ കുറവുകളുണ്ടെങ്കിലും ജനാധിപത്യത്തില്‍ ജനങ്ങള്‍ തിരഞ്ഞെടുത്ത ജനപ്രതിനിധികള്‍ ഒരു സ്റ്റാന്‍ഡ് എലോണ്‍ ചാനല്‍ മുതലാളിയെക്കാള്‍ ആയിരം മടങ്ങു മുകളിലാണ് എന്നതു മനസിലാക്കുമല്ലോ ?

5. താങ്കളെ അറസ്റ്റ് ചെയ്ത വാര്‍ത്ത നവമാധ്യമങ്ങളില്‍ വന്നു തുടങ്ങിയതോടെ ലോകത്തിന്റെ വിവിധ ഭാഗങ്ങളില്‍ നിന്നു താങ്കളുടെ സുഹൃത്തുക്കള്‍ താങ്കളുടെ അക്കൗണ്ടിലേക്ക് സ്വമേധയാ പണം അയച്ചുകൊണ്ടിരുന്നു എന്നതാണ് ലേഖനത്തില്‍ എന്നെ കരയിച്ചുകളഞ്ഞ ഭാഗം. ശ്രീ.നികേഷ് കുമാറിനെ അറിയുന്നവര്‍ കടം വാങ്ങിയും സ്വര്‍ണം പണയം വച്ചുമായി വളരെ ചുരുങ്ങിയ സമയത്തിനുള്ളില്‍ ഒരു കോടി 20 ലക്ഷം രൂപ താങ്കളുടെ അക്കൗണ്ടിലെത്തിച്ചു എന്നത് എന്നെ സംബന്ധിച്ച് അവിശ്വസനീയവും അമ്പരപ്പിക്കുന്നതുമാണ്. സ്വര്‍ണം ഊരിക്കൊണ്ടുപോയി പണയം വച്ച് കാശാക്കിയെടുക്കാനൊക്കെ കുറച്ചു സമയം വേണ്ടെ ? അതിനും പുറമേ അക്കൗണ്ടിലേക്ക് പണം ട്രാന്‍സ്ഫര്‍ ചെയ്യണമെങ്കിലും കുറച്ചു സമയം ആവശ്യമാണ്. അതിനും പുറമേ, എങ്ങനെ ഇത്രയധികം ആളുകളുടെ പക്കല്‍ താങ്കളുടെ അക്കൗണ്ട് നമ്പര്‍ എത്തിപ്പെട്ടു ? മേക്കപ്പിനൊക്കെ ഒരു പരിധിയില്ലേ രാജപ്പാ ?

6. തുടര്‍ന്നങ്ങോട്ട് ലേഖനത്തിലുടനീളം താങ്കള്‍ താങ്കളുടെ തന്നെ മാഹാത്മ്യം വര്‍ണിക്കുകയാണ്. വായിച്ചപ്പോള്‍ പാവം തോന്നി. താങ്കള്‍ സ്വന്തമായി ചാനല്‍ തുടങ്ങിയത് ഈ നാട്ടില്‍ ഒരു സ്വതന്ത്രമാധ്യമം ഉണ്ടാക്കേണ്ടതിന്റെ ആവശ്യകത മനസ്സിലാക്കിക്കൊണ്ടായിരുന്നു എന്നതും എന്നെ ഞെട്ടിച്ചു. ഏഷ്യാനെറ്റില്‍ നിന്നും പുറത്തുചാടി ഇന്ത്യാവിഷന്‍ ഉണ്ടാക്കിയപ്പോഴും അങ്ങ് അതു തന്നെയല്ലേ ചെയ്തത് ? ഇന്ത്യാവിഷന്‍ മുങ്ങിത്തുടങ്ങിയ സമയത്തല്ലേ അങ്ങ് റിപ്പോര്‍ട്ടര്‍ ഉണ്ടാക്കിയത് ? അപ്പോള്‍ ഇന്ത്യാവിഷന്‍ കുത്തക ചാനലായി മാറിക്കഴിഞ്ഞിരുന്നോ ? എങ്കില്‍ എന്തുകൊണ്ടാണ് ഇപ്പോള്‍ ഇന്ത്യാവിഷന്‍ പ്രവര്‍ത്തിക്കാത്തത് ?

7. താങ്കള്‍ താങ്കളെ തന്നെ വാഴ്ത്തുന്ന ഭാഗത്ത് താങ്കള്‍ ‘തുടക്കമിട്ടത് വാഴപ്പിണ്ടി എടുത്തു കളഞ്ഞ് പകരം നട്ടെല്ലു വച്ച മാധ്യമപ്രവര്‍ത്തനം’ ആണെന്നു വിശേഷിപ്പിക്കുന്നുണ്ട്. കേരളത്തിലെ മാധ്യമപ്രവര്‍ത്തനത്തിന്റെ ചരിത്രം അറിയാത്ത ഏതോ ന്യൂജന്‍ ട്രെയിനിയെപ്പോലെ താങ്കള്‍ എന്തോ പുലമ്പുന്നു എന്നാണ് തോന്നിയത്. താങ്കളെപ്പോലെ ഒച്ചയും ബഹളും അലമ്പും ഉണ്ടാക്കിയിട്ടില്ലെങ്കിലും താങ്കളെക്കാള്‍ ആത്മാര്‍ഥമായി, താങ്കളെക്കാള്‍ നീതിക്കു വേണ്ടിയുള്ള ദാഹത്തോടെ മാധ്യമപ്രവര്‍ത്തനം നടത്തിയ ആയിരക്കണക്കിനാളുകള്‍ ജീവിച്ചിരുന്ന, ജീവിച്ചിരിക്കുന്ന നാടാണ് കേരളം. അവിടെ താങ്കള്‍ക്കൊപ്പമല്ലാത്ത എല്ലാവരുടെയും നട്ടെല്ല് വാഴപ്പിണ്ടിയാണ് എന്ന വിശ്വാസം ചപലമാണ്. നാര്‍സിസത്തിന്റെ കണ്ണഞ്ചിപ്പിക്കുന്ന വെളിച്ചത്തില്‍ നിന്ന് പുറത്തുവരുമ്പോള്‍ ചുറ്റുപാടും നോക്കിയാല്‍ താങ്കള്‍ക്ക് അവരെ കാണാന്‍ സാധിക്കും.

8. താങ്കളെ അറസ്റ്റ് ചെയ്തപ്പോള്‍ മാത്രമാണ് താങ്കള്‍ നീതി കിട്ടിയില്ല, കരുണ കാട്ടിയില്ല തുടങ്ങിയ പരാമര്‍ശങ്ങള്‍ നടത്തുന്നത് എന്നത് ശ്രദ്ധേയമാണ്. കേരളത്തില്‍ ഇതിനെക്കാള്‍ ചെറിയ കുറ്റങ്ങള്‍ക്ക് ആളുകള്‍ അറസ്റ്റ് ചെയ്യപ്പെടുമ്പോള്‍ അത് ബ്രേക്കിങ് ന്യൂസ് ആക്കുന്നയാളല്ലേ താങ്കള്‍ ? ചെറിയ ആരോപണങ്ങളുടെ പേരില്‍ ആളുകളെ സ്റ്റുഡിയോയില്‍ വിളിച്ചു വരുത്തി നാലാംകിട ചോദ്യങ്ങള്‍ ചോദിച്ച് വെറുപ്പിക്കുമ്പോള്‍ നീതി, കരുണ തുടങ്ങിയ വാക്കുകള്‍ താങ്കളുടെ നിഘണ്ടുവില്‍ ഇല്ലായിരുന്നോ ?

9. മൊത്തത്തില്‍ താങ്കളുടെ ലേഖനത്തില്‍ നിന്നും താങ്കളും താങ്കളുടെ ചാനലും എന്തോ വിശുദ്ധ കര്‍മമാണ് ചെയ്യുന്നതെന്നും അതിനാല്‍ മറ്റു ചാനലുകളെ കാണുന്നതുപോലെ കാണാന്‍ പാടില്ലെന്നും ഒരു സൂചനയുള്ളതുപോലെ തോന്നി. തീര്‍ച്ചയായും അങ്ങനെയായിരിക്കാം. എന്നാല്‍, റിമോട്ടെടുത്ത് ചാനലുകള്‍ മാറ്റുന്ന സാധാരണക്കാരെ സംബന്ധിച്ച് അത്തരം മാറ്റങ്ങള്‍ ഫീല്‍ ചെയ്യുകയില്ല. സമത്വവും സ്വാതന്ത്ര്യവും പുലര്‍ന്നുകാണാനാഗ്രഹിച്ച ധീരന്‍മാരായ മാധ്യമപ്രവര്‍ത്തകരുടെ പാത പിന്‍തുടരുന്ന താങ്കള്‍ ജനാധിപത്യവ്യവസ്ഥിതിയില്‍ സ്വയം മഹത്വവല്‍ക്കരിക്കാന്‍ ശ്രമിക്കുന്നത് ശരിയാണോ ?

10. താങ്കള്‍ക്കു നട്ടെല്ലുണ്ടെന്നു കരുതി ബാക്കി എല്ലാവരും അത് മാറ്റി വാഴപ്പിണ്ടി വയ്ക്കണം എന്നില്ലല്ലോ അല്ലേ  ?  ഉണ്ടോ ? ഇല്ലേ ? ഉവ്വോ ?

ഫ്രാന്ദനോ അതോ ഫീകരനോ ?

ഭൂതംപ്രേതപിശാചുക്കളും അന്യഗ്രഹജീവികളുമൊക്കെ ഏതു രൂപത്തിലും വരും. നമ്മുടെ ചെറിയ ബുദ്ധികൊണ്ട് മനസ്സിലാക്കാന്‍ പറ്റാത്ത വിധം സങ്കീര്‍ണമായ രഹസ്യങ്ങള്‍ അനാവരണം ചെയ്തിട്ട് അവരങ്ങു പോവുകയും ചെയ്യും. രഹസ്യങ്ങള്‍ ഇവിടെ കിടക്കും, നമുക്കൊരു ചുക്കും മനസ്സിലാവുകയുമില്ല. പഴയതുപോലെ പറക്കും തളികയിലൊക്കെ വന്നിറങ്ങുന്നതും പച്ച ഹെഡ്‌ലൈറ്റിട്ടു നടക്കുന്നതുമൊക്കെ ക്ലീഷേയാണ്. പുതിയ കാലത്തിന്റെ മാധ്യമങ്ങളെ അവരും ഉപയോഗിച്ചാല്‍ കുറ്റം പറയാനൊക്കില്ല.

ദുരൂഹതകളുടെ ന്യൂ ജനറേഷന്‍ കലവറയുമായി അജ്ഞാതന്‍ അക്കൗണ്ട് തുറന്നിരിക്കുന്നത് യു ട്യൂബിലാണ്. എട്ടു മാസം മുന്‍പ് തുടങ്ങിയ യൂ ട്യൂബിലെ കൈവിട്ട കളി തുടരുകയാണ്. ഇന്റര്‍നെറ്റിനെ കിടുകിടാ വിറപ്പിച്ചുകൊണ്ടിരിക്കുന്ന വെബ് ഡ്രൈവര്‍ ടോര്‍സോ (ബസ് ഡ്രൈവര്‍ ജോസ് എന്നു വിളിച്ചാല്‍ പേടി കുറയും) എന്ന യൂസര്‍ ആണ് അന്യഗ്രഹജീവിയാണോ അതോ നാടന്‍ പ്രാന്തനാണോ എന്ന കാര്യത്തില്‍ കണ്‍ഫ്യൂഷന്‍ ബാക്കി നില്‍ക്കുന്നത്. 2013 സെപ്റ്റംബര്‍ 23നാണ് വെബ്‌ഡ്രൈവര്‍ ടോര്‍സോ യു ട്യൂബിലെ ആദ്യ വിഡിയോ അപ്‌ലോഡ് ചെയ്യുന്നത്. തുടര്‍ന്ന് 28 മിനിറ്റ് കഴിഞ്ഞപ്പോള്‍ അടുത്ത വിഡിയോ. വീണ്ടും അര മണിക്കൂറിനുള്ളില്‍ അടുത്ത വിഡിയോ. ഇങ്ങനെ ഓരോ അരമണിക്കൂറിലും ഓരോ 11 സെക്കന്‍ഡ് വിഡിയോ എന്ന കണക്കില്‍ ഏഴു മാസം കൊണ്ട് വെബ് ഡ്രൈവര്‍ ടോര്‍സോ യു ട്യൂബില്‍ അപ് ലോഡ് ചെയ്തിരിക്കുന്നത് 80,000 വിഡിയോകളാണ്. ഇപ്പോഴും പണി തുടരുന്നു.

സാംപിളിനൊരെണ്ണം താഴെ.

11 സെക്കന്‍ഡ് മാത്രം ദൈര്‍ഘ്യമുള്ള വിഡിയോയില്‍ ചുവപ്പ് നീല ചതുരങ്ങള്‍ മാത്രമേയുള്ളൂ. ഈ ചതുരങ്ങളുള്ള പത്തു സ്ലൈഡുകളേ ഒരു വിഡിയോയിലുണ്ടാവൂ. ചതുരങ്ങള്‍ മാറി വരുന്നതനുസരിച്ച് കംപ്യൂട്ടര്‍ ജനറേറ്റഡ് ടോണുകളും കേള്‍ക്കാം. ചതുരങ്ങളുടെ അര്‍ഥമോ അവ നല്‍കുന്ന സന്ദേശമോ ആര്‍ക്കും അറിയില്ല. എല്ലാ വിഡിയോകളിലും ചുവപ്പ് നീല ചതുരങ്ങളും അവയെ പ്രതിനിധാനം ചെയ്യുന്ന ശബ്ദങ്ങളും മാത്രം. ദുരുഹതയുടെ കേന്ദ്രമായി വെബ്‌ഡ്രൈവര്‍ ടോര്‍സോ മാറിയതോടെ ഓണ്‍ലൈന്‍ മാധ്യമങ്ങളും സോഷ്യല്‍ മീഡിയയും തിയറികള്‍ ആവിഷ്‌കരിച്ചു തുടങ്ങി.

ബിബിസി ഉള്‍പ്പെടെയുള്ള മാധ്യമങ്ങള്‍ യൂ ട്യൂബ് ഡേറ്റ വിശകലനം ചെയ്ത് ഈ വിഡിയോകളെ അപഗ്രഥിച്ചു. ഒരു ദിവസം ഏകദേശം 400 വിഡോയകള്‍ വരെ ഈ അക്കൗണ്ടില്‍ അപ്‌ലോഡ് ചെയ്തിട്ടുണ്ട്. ക്രിസ്മസ് ദിവസമാകട്ടെ 2 മിനിറ്റ് ഇടവിട്ട് ഓരോ വിഡിയോകളും. ചാര ഏജന്‍സികളുടെ രഹസ്യ സന്ദേശമാണെന്നതു മുതല്‍ അന്യഗ്രഹജീവികളുടെ യു ട്യൂബ് അക്കൗണ്ട് ആണെന്നു വരെ തിയറികളുണ്ട്.

ഏതോ ഓട്ടമേറ്റഡ് സോഫ്റ്റ്‌വെയറിന്റെ പിരിവെട്ടിയതിനെ തുടര്‍ന്നുണ്ടായ ഏനക്കേടുകളാണ് അര മണിക്കൂര്‍ കൂടുമ്പോഴുള്ള വിഡിയോകള്‍ എന്നായിരുന്നു ഒടുവിലുള്ള വിലയിരുത്തല്‍. എന്നാല്‍, മാസങ്ങളോളം ഊണും ഉറക്കവുമില്ലാതെ കോപ്പ് ഉണ്ടാക്കി അപ്‌ലോഡ് ചെയ്തുകൊണ്ടിരുന്നവന്‍ പെട്ടെന്ന് അതു നിര്‍ത്തി. ഏപ്രില്‍ ആദ്യവാരത്തോടെ പണി നിര്‍ത്തിവച്ച വെബ്‌ഡ്രൈവര്‍ ടോര്‍സോ മൂന്നാഴ്ചത്തെ നിശബ്ദതയ്ക്കു ശേഷം മെയ് രണ്ടിനു വീണ്ടും അപ്‌ലോഡിങ് പുനരാരംഭിച്ചു.

വെബ്‌ഡ്രൈവര്‍ ടോര്‍സോ ഫ്രാന്‍സുകാരനാണെന്നാണ് ഇതുവരെയുള്ള നിഗമനം. ഫ്രാന്‍സില്‍ മാത്രം കാണാന്‍ സാധിക്കുന്ന തരത്തില്‍ ലോക്കേഷന്‍ അധിഷ്ഠമായി അപ്‌ലോഡ് ചെയ്തിരിക്കുന്ന അനിമേഷന്‍ വിഡിയോയും വര്‍ണവെളിച്ചത്തില്‍ മുങ്ങി നില്‍ക്കുന്ന ഈഫല്‍ ടവറിന്റെ മറ്റൊരു വിഡിയോയുമാണ് ഇതിനെ സാധൂകരിക്കുന്ന തെളിവ്. വീടിന്റെ അടുക്കളയിലോ മറ്റോ നിന്ന് പ്രാന്തന്‍ മൊബൈല്‍ ഫോണിലെടുത്തതാണെന്നു തോന്നും ആ വിഡിയോ. നീല ചുവപ്പ് ചതുരങ്ങളല്ലാതെ ഒരു വിഡിയോ കണ്ടതോടെ മഞ്ജു വാര്യര്‍ വീണ്ടും അഭിനയിച്ച സിനിമ കണ്ടതുപോലെയുള്ള സന്തോഷമായിരുന്നു ഡ്രൈവറുടെ ഫോളോവേഴ്‌സിന്. രണ്ടായിരത്തഞ്ഞൂറോളം കമന്റുകളുള്ള വെറും ആറു സെക്കന്‍ഡ് ദൈര്‍ഘ്യമുള്ള ഈഫല്‍ ടവര്‍ വിഡിയോ ഇതാണ്.

ആരായിരിക്കും ഇവന്‍ ? എന്തായിരിക്കും ഇവന്റെ ഉദ്ദേശം എന്നീ ചോദ്യങ്ങള്‍ക്ക് ഉത്തരമില്ല. ഇലൂമിനേഷലുള്ള ഈഫല്‍ ടവര്‍ കാണിച്ചത് ഡ്രൈവര്‍ പഴയകാല നിഗൂഢപ്രസ്ഥാനമായ ഇല്ലുമിനാറ്റിയുടെ (ഡാന്‍ ബ്രൗണിന്റെ ഏഞ്ചല്‍സ് ആന്‍ഡ് ഡെമണ്‍സ് വായിക്കുക) ആളായതുകൊണ്ടാണ് എന്നാണ് ഭൂരിഭാഗവും വിശ്വസിക്കുന്നത്. മറ്റൊരു ഗ്രഹത്തില്‍ നിന്ന് ഇവിടെ വന്ന് യു ട്യൂബില്‍ ഇമ്മാതിരി വിഡിയോകള്‍ പബ്ലിക്കായി ഇടാന്‍ മാത്രം തലയ്ക്ക് ഓളമുള്ള ഏലിയന്‍സ് ഉണ്ടാകുമെന്നു വിശ്വസിക്കാന്‍ പ്രയാസമാണ്. എന്‍ക്രിപ്റ്റഡ് കമ്യൂണിക്കേഷനൊക്കെ ഇത്രയും വികസിച്ച ഇക്കാലത്ത് ഇതൊക്കെ രഹസ്യസന്ദേശങ്ങളും കോഡുകളും ആണെന്നും വിശ്വസിക്കാന്‍ പ്രയാസം. നാടന്‍ ഭ്രാന്തനാണെന്നു വിചാരിച്ചാലും ഇത്ര ചിട്ടയോടെ, അച്ചടക്കത്തോടെ ഊണും ഉറക്കവും ഉപേക്ഷിച്ച് വിഡിയോകള്‍ അപ്‌ലോഡ് ചെയ്യാനുള്ള സാധ്യത വിരളമാണ്.

ഇനി അവശേഷിക്കുന്ന സാധ്യത ഒന്നേയുള്ളൂ- വെബ് ഡ്രൈവര്‍ ടോര്‍സേയെ ദൈവമായി പ്രഖ്യാപിക്കുക. ഈ വിഡിയോകള്‍ ഓരോന്നും അവന്റെ തിരുവചനങ്ങളായി വ്യാഖ്യാനിക്കുക. എല്ലാ ഡ്രൈവര്‍മാരും ഈ മതത്തില്‍ ചേരണമെന്നു പറഞ്ഞ് പ്രചാരണം നടത്തുകയും ചെയ്യാം. നീലയും ചുവപ്പും വിശുദ്ധ ചിഹ്നങ്ങളായി കരുതുകയും കീ-കൂ എന്നുള്ള ശബ്ദം ഭക്തിഗാനമായി രേഖപ്പെടുത്തുകയും ചെയ്യാം. ഈ പോക്കു പോവുകയാണെങ്കില്‍ അത് സംഭവിക്കുക തന്നെ ചെയ്യും. സൂക്ഷിച്ചു വീക്ഷിക്കുവിന്‍: Webdriver Torso

ബ്ലൂഫിലിം ഡെമോക്രസി

ഈ അടുത്ത കാലത്ത് കേട്ടത്തില്‍ വച്ച് ഏറ്റവും അബദ്ധം നിറഞ്ഞതും അടിസ്ഥാനരഹിതവുമായ ഒരു വിശദീകരണമാണ് കഴിഞ്ഞ ദിവസം സര്‍ക്കാര്‍ വക്കീല്‍ സുപ്രീം കോടതിയില്‍ സമര്‍പ്പിച്ചതായി റിപ്പോര്‍ട്ട് ചെയ്തു കണ്ടത്. കോടതിനടപടികള്‍ റിപ്പോര്‍ട്ട് ചെയ്ത മാധ്യമങ്ങളൊന്നും സര്‍ക്കാര്‍ നിലപാടിന്റെ സുതാര്യതയോ യാഥാര്‍ഥ്യമോ പരിശോധിച്ചതായി കണ്ടില്ല. സിപിഎം നേതാവിന്റെ അവിഹിതബന്ധം പോലും ഘോരമായ സദാചാരധ്വംസനമായി കാണുന്നവര്‍ രാജ്യത്തെ ഏറ്റവും വലിയ സാമൂഹികദുരന്തങ്ങളിലൊന്നിനോട് കേന്ദ്രസര്‍ക്കാര്‍ പുലര്‍ത്തിയ മൃദുസമീപനത്തില്‍ ഞെട്ടിയില്ല എന്നത് ആശ്ചര്യജനകമാണ്.

പറഞ്ഞു വരുന്നത് ഇന്റര്‍നെറ്റിലെ അശ്ലീല വെബ്‌സൈറ്റുകള്‍ക്കു (Internet Pornography) രാജ്യത്ത് നിരോധനം ഏര്‍പ്പെടുത്തുന്നതിനെ സംബന്ധിച്ച് കേന്ദ്രസര്‍ക്കാര്‍ കഴിഞ്ഞ ദിവസം സുപ്രീം കോടതിയില്‍ നല്‍കിയ വിശദീകരണമാണ്. അതു സംബന്ധിച്ച വാര്‍ത്ത ഇങ്ങനെ.

അശ്ലീല വെബ്‌സൈറ്റുകള്‍ എല്ലാം നിരോധിക്കാനാവില്ലെന്ന് കേന്ദ്രം. ഇത്തരം സൈറ്റുകള്‍ നിരോധിക്കുമ്പോള്‍ അശ്ലീല വാക്കുകളോട് സാമ്യമുള്ള മറ്റു ഉള്ളടക്കങ്ങള്‍ ഇന്റര്‍നെറ്റില്‍ ലഭ്യമാകില്ല. അങ്ങനെ വന്നാല്‍ സാഹിത്യ ഉള്ളടക്കങ്ങളെ ഇത് സാരമായി ബാധിക്കുമെന്നും കേന്ദ്രം അറിയിച്ചു. പോണോഗ്രാഫിക് വെബ്‌സൈറ്റുകള്‍ ബ്ലോക്ക് ചെയ്യാവുന്ന സോഫ്റ്റ് വെയര്‍ എല്ലാ കംപ്യൂട്ടറുകളിലും ഉള്‍പ്പെടുത്തണമെന്നും കംപ്യൂട്ടര്‍ നിര്‍മാതാക്കള്‍ക്ക് ഇത് സംബന്ധിച്ച നിര്‍ദേശം നല്‍കണമെന്നും കേന്ദ്ര സര്‍ക്കാര്‍ സുപ്രീംകോടതിയെ അറിയിച്ചു.

സ്ത്രീകള്‍ക്കെതിരായ അതിക്രമം തടയാന്‍ അശ്ലീല സൈറ്റുകള്‍ നിരോധിക്കണമെന്നാവശ്യപ്പെട്ട് ഇന്‍ഡോറിലെ അഭിഭാഷകന്‍ കമലേഷ് വശ്വനി സമര്‍പ്പിച്ച ഹര്‍ജിയിലാണ് കേന്ദ്രത്തിന്റെ വിശദീകരണം. ഇന്റര്‍നെറ്റ് ഉപയോഗത്തിന് വേണ്ടത്ര നിയന്ത്രണങ്ങളില്ലാത്തതിനാല്‍ ജനങ്ങളെ അശ്ലീല സൈറ്റുളിലേക്ക് അടുപ്പിക്കുന്നതായും ഏകദേളം 20 കോടിയിലേറെ പോണോഗ്രാഫിക് സൈറ്റുകള്‍ സൗജന്യമായി ഇന്റര്‍നെറ്റില്‍ ലഭ്യമാണെന്നും ഹര്‍ജിക്കാരന്‍ ചൂണ്ടിക്കാട്ടി. കുട്ടികളടക്കമുള്ളവര്‍ ഇത് കാണുന്നത് സമൂഹത്തിനും നാടിന്റെ ക്രമസമാധാനത്തിനും ഭീഷണിയാണെന്നും ഹര്‍ജിയില്‍ പറയുന്നു. സ്ത്രീകള്‍ക്കും കുട്ടികള്‍ക്കുമെതിരായ അതിക്രമങ്ങള്‍ക്കെല്ലാം പിന്നില്‍ അശ്ലീല സൈറ്റുകള്‍ക്ക് പങ്കുണ്ടെന്നും ചെറിയ കുട്ടികള്‍ വരെ പീഡനത്തിനിരയാകുന്നത് ഉത്കണ്ഠ ജനിപ്പിക്കുന്നതായും ഹര്‍ജിക്കാരന്‍ ചൂണ്ടിക്കാട്ടി.

ഇതേ കേസില്‍ ഒരാഴ്ച മുമ്പ് ഇന്റര്‍നെറ്റ് സേവനദാതാക്കള്‍ കോടതിയല്‍ നല്‍കിയ വിശദീകരണം ഇങ്ങനെയാണ്:

കേന്ദ്രസര്‍ക്കാറിന്റെയോ കോടതിയുടെയോ നിര്‍ദേശമില്ലാതെ അശ്ലീലസൈറ്റുകള്‍ തടയാന്‍ കഴിയില്ലെന്ന് ഇന്റര്‍നെറ്റ് സേവനദാതാക്കള്‍ സുപ്രീംകോടതിയെ അറിയിച്ചു. ടെലികോം മന്ത്രാലയം നല്‍കിയ ലൈസന്‍സുകള്‍ പ്രകാരം വെബ്‌സൈറ്റുകളിലെ ഉള്ളടക്കം നിയന്ത്രിക്കാന്‍ സേവനദാതാക്കള്‍ക്ക് അനുമതിയില്ല. മന്ത്രാലയത്തിന്റെയോ കോടതിയുടെയോ വ്യക്തമായ നിര്‍ദേശത്തിന്റെ അടിസ്ഥാനത്തില്‍ മാത്രമേ സൈറ്റുകള്‍ തടയാവൂവെന്ന് നിലവിലെ ചട്ടങ്ങളില്‍ പറയുന്നുണ്ട്.

എന്താണ് അശ്ലീലമെന്നും സൈറ്റില്‍ അനുവദിക്കാവുന്നത് ഏതാണെന്നും തീരുമാനിക്കാനുള്ള നിയമപരവും സ്ഥാപനപരവുമായ കഴിവ് ഇന്റര്‍നെറ്റ് സേവനദാതാക്കള്‍ക്കില്ലെന്ന് മറുപടിയില്‍ ചൂണ്ടിക്കാട്ടുന്നു. ഒരാള്‍ക്ക് അശ്ലീലമെന്ന് തോന്നുന്നത് മറ്റൊരാള്‍ക്ക് കലയായിരിക്കും. ടെലികോം മന്ത്രാലയമോ കോടതിയോ നിര്‍ദേശിക്കുന്ന എല്ലാ സൈറ്റുകളും തടയാന്‍ സേവനദാതാക്കളെന്ന നിലയില്‍ തയ്യാറാണെന്നും സേവനദാതാക്കള്‍ സുപ്രീംകോടതിയെ അറിയിച്ചു.

പോര്‍ണോഗ്രഫിക്ക് ഒരു തരത്തിലും നിയന്ത്രണം ഏര്‍പ്പെടുത്താനാവില്ലെന്ന നിലപാട് സോഷ്യല്‍ മീഡിയ സ്വീകരിച്ചത് ആഹ്ലാദാരവങ്ങളോടെയാണ്. എവിടെയും ആര്‍ക്കും ഒരു ഞെട്ടലും കണ്ടില്ല. പോര്‍ണോഗ്രഫി നിരോധിക്കണം എന്നു പറയുന്നവര്‍ പഴഞ്ചനും സദാചാരവാദികളുമാണെന്നു മുദ്രകുത്തപ്പെടു ഭയന്നാവാം നിരോധനം വേണമെന്നഭിപ്രായമുള്ളവരും മിണ്ടിയില്ല. അശ്ലീല വെബ്‌സൈറ്റുകള്‍ നിരോധിക്കാനാവില്ലെന്ന കേന്ദ്രസര്‍ക്കാര്‍ നിലപാട് ശുദ്ധ തട്ടിപ്പും പച്ചക്കള്ളവുമാണെന്നാണ് എന്റെ വ്യക്തിപരമായ അഭിപ്രായം.

പോര്‍ണോഗ്രഫി നിരോധിച്ചാല്‍ ശുദ്ധസാഹിത്യത്തിന് ഉടവുതട്ടുമെന്നും അക്കാദമിക് ഉള്ളടക്കമുള്ളവ നഷ്ടമാകുമെന്നുള്ള വാദമാണ് ഇതില്‍ ഏറ്റവും രസകരം. പോണ്‍, സെക്‌സ് തുടങ്ങിയ ടാഗുകള്‍ അടിസ്ഥാനമാക്കി മൊത്തം ഇന്റര്‍നെറ്റ് ട്രാഫിക്കിനെ തന്നെ നിയന്ത്രിക്കാന്‍ ശ്രമിച്ചാല്‍ സര്‍ക്കാര്‍ വക്കീല്‍ പറഞ്ഞതുപോലെ അതുമായി ബന്ധപ്പെട്ട സാഹിത്യവും കോപ്പുമൊക്കെ ബ്ലോക്ക് ചെയ്യപ്പെടും. ഒരു സാധാരണ ഫയര്‍വോള്‍ ചെയ്യുന്നതും അതു തന്നെയാണ്. എന്നാല്‍, ഹര്‍ജിക്കാരന്‍ ആവശ്യപ്പെട്ടതും പ്രായോഗികമായി നടപ്പാവുന്നതും അശ്ലീലവെബ്‌സൈറ്റുകള്‍ അവയുടെ ഐപി അഡ്രസ് അടിസ്ഥാനമാക്കി ബ്ലോക്ക് ചെയ്യുക എന്നതാണ്. അങ്ങനെ ബ്ലോക്ക് ചെയ്യുമ്പോള്‍ ആ വെബ്‌സൈറ്റുകളല്ലാതെ മറ്റൊന്നും ബ്ലോക്ക് ചെയ്യപ്പെടില്ല എന്നത് സാധാരണ ഇന്റര്‍നെറ്റ് കഫേക്കാരനു പോലും അറിയാം. ഇത്തരം വെബ്‌സൈറ്റുകള്‍ ലക്ഷക്കണക്കിനുണ്ടെങ്കിലും 90 ശതമാനം ആളുകളും സന്ദര്‍ശിക്കുന്നത് പത്തോ ഇരുപതോ പ്രമുഖ സൈറ്റുകളാണ്. സൗജന്യമായി കാണുകയും എത്രവോണമെങ്കിലും ഡൗണ്‍ലോഡ് ചെയ്യുകയും ചെയ്യാമെന്നതു തന്നെയാണ് ഇവയുടെ ആകര്‍ഷണം.

അപ്പോള്‍, പ്രായോഗിക ബുദ്ധിമുട്ട് ചൂണ്ടിക്കാട്ടി പോര്‍ണോഗ്രഫിക്ക് വിലക്കേര്‍പ്പെടുത്താന്‍ സര്‍ക്കാര്‍ മടിക്കുന്നതിന്റെ കാരണം എന്തായിരിക്കും ? ആശ്ലീല വെബ്‌സൈറ്റുകളും ഫെയ്‌സ്ബുക്കും യു ട്യൂബും ഗൂഗിളും ചേര്‍ന്നാല്‍ ഇന്ത്യയെ സംബന്ധിച്ച് ഇന്റര്‍നെറ്റായി എന്നു പറയാം. പോര്‍ണോഗ്രഫിക്ക് നിയന്ത്രണം വന്നാല്‍ ഇന്ത്യയിലെ മൊത്തം ഇന്റര്‍നെറ്റ് ട്രാഫിക്കിലും ഗണ്യമായ കുറവുണ്ടാകും എന്നു ചുരുക്കം. സര്‍ക്കാരും ഇന്റര്‍നെറ്റ് സര്‍വീസ് പ്രൊവൈഡര്‍മാരും കൂടി കുറവനും കുറത്തീം കളിക്കുമ്പോള്‍ പോര്‍ണോഗ്രഫിയെ ആവിഷ്‌കാരസ്വാതന്ത്യത്തിന്റെ മകുടോദാഹരണമായി ചൂണ്ടിക്കാണിക്കാനും വിഡ്ഡികളുണ്ട്.

ഇവിടെ പ്രശ്‌നം ബ്ലൂഫിലിം ജനങ്ങള്‍ കാണണോ വേണ്ടയോ എന്നതല്ല. അതിന്റെ ലഭ്യതയിലും നിലവാരത്തിലും ചില മാനദണ്ഡങ്ങള്‍ ഏര്‍പ്പെടുത്തണോ വേണ്ടയോ എന്നതാണ്. നിലവില്‍ ഇന്റര്‍നെറ്റ് ഉപയോഗിക്കുന്ന ഏതൊരാള്‍ക്കും കൊച്ചുകുട്ടികള്‍ ഉള്‍പ്പെടെ ഒറ്റ ക്ലിക്കിനപ്പുറം പോര്‍ണോഗ്രഫി ലഭ്യമാണ്. പലര്‍ക്കും ആസ്വാദ്യകരമായി തോന്നുന്ന ദൃശ്യങ്ങള്‍ ആദ്യമായി കാണുന്ന ഒരു കുട്ടിയെ സംബന്ധിച്ച് അതിന്റെ ട്രോമ ഏറെക്കാലം നിലനില്‍ക്കും. ആദ്യത്തെ ഞെട്ടല്‍ കൗതുകവും കൗതുകം വിസ്മയവും വിസ്മയം അഡിക്ഷനുമായി മാറാന്‍ അധികകാലം വേണ്ട. പ്രായപൂര്‍ത്തിയായ ആളുകള്‍ എന്തു കുന്തം വേണമെങ്കിലും കാണട്ടെ. കുട്ടികളിലേക്ക് ഇത്തരം സൈറ്റുകള്‍ എത്തുന്നതിന് ഒരു നിയന്ത്രണവും ഏര്‍പ്പെടുത്താന്‍ കഴിയില്ലെങ്കില്‍ അഞ്ചാം ക്ലാസ്സുകാരന്‍ ഒന്നാം ക്ലാസ്സുകാരിയെ ബലാല്‍സംഗം ചെയ്യുമ്പോഴും 12 വയസ്സുകാരന്‍ 80 വയസ്സുകാരിലെ ബലാല്‍സംഗം ചെയ്യുമ്പോഴും ഞെട്ടേണ്ട കാര്യമില്ല.

മദ്യവും മയക്കുമരുന്നും സൃഷ്ടിക്കുന്നതിനെക്കാള്‍ ഗുരുതരവും ദൂരവ്യാപകവുമായ പ്രത്യാഘാതകങ്ങളും സാമൂഹികജീര്‍ണതയും വരുത്തി വയ്ക്കുന്നതാണ് പോര്‍ണോഗ്രഫി. നിരോധിക്കണമെന്നല്ല, അതിന്റെ അനര്‍ഗളമായ ലഭ്യതയില്‍ എന്തെങ്കിലും നിയന്ത്രണം ഏര്‍പ്പെടുത്തിയില്ലെങ്കില്‍ കാര്യങ്ങള്‍ കൈവിട്ടുപോകും. എല്ലാ മാതാപിതാക്കളും ഫയര്‍വോള്‍ സ്ഥാപിക്കുന്നതും കുട്ടികളുടെ ഇന്റര്‍നെറ്റ് ഉപയോഗം നിരീക്ഷിക്കുകയും ചെയ്യുകയാണ് പരിഹാരമെന്നൊക്കെ പറയാമെന്നേയുള്ളൂ. മൊബൈല്‍ ഫോണ്‍ മുതലങ്ങോട്ട് ഇന്റര്‍നെറ്റ് കണക്ടിവിറ്റിയുള്ള എന്തിലും പോര്‍ണോഗ്രഫിയും സുലഭമാണ് എന്നിരിക്കെ അതൊന്നും പ്രായോഗികപരിഹാരമല്ല.

കുട്ടികള്‍ക്ക് അടിസ്ഥാന ലൈംഗികവിദ്യാഭ്യാസം നല്‍കുന്നത് പോലും ആര്‍ഷഭാരത സംസ്‌കാരത്തിനു ചേര്‍ന്നതല്ല എന്നു കരുതുന്നവര്‍ ആശ്ലീലവെബ്‌സൈറ്റുകള്‍ക്കു ഒരു നിയന്ത്രണവും ഏര്‍പ്പെടുത്താനാവില്ലെന്നു പറയുന്നതിനെക്കാള്‍ വലിയ വിരോധാഭാസമില്ല. സ്വന്തം ലൈഗിക വ്യക്തിത്വം എന്താണെന്നു മനസ്സിലാക്കുന്നതിനു മുന്‍പേ കുട്ടികള്‍ ബ്ലോജോബും റിംജോബും പരിശീലിക്കുകയും പെണ്ണായി പിറന്നവരെല്ലാം സദാ സെക്‌സിനായി ദാഹിച്ചു നടക്കുകയാണെന്നു ധരിക്കുകയും ചെയ്തിട്ടുണ്ടെങ്കില്‍ അതിന്റെ ക്രെഡിറ്റ് നാട്ടുകാരുടെ പ്രിയപ്പെട്ട കമ്പി സൈറ്റുകള്‍ക്കാണ്. മദ്യവിരുദ്ധ പ്രസ്ഥാനങ്ങളും മദ്യലോബിക്കെതിരെ പോരാടുന്ന സൂപ്പര്‍ സ്റ്റാറുകളുമുള്ള നാട്ടില്‍ ഒരു പോര്‍ണോഗ്രഫി വിരുദ്ധ സംഘനയോ ആന്റി പോര്‍ണോ മൂവ്‌മെന്റോ ഇല്ല എന്നത് കഷ്ടമാണ്. കുട്ടികള്‍ക്ക് എങ്കിലും ലൈഗികത എന്താണെന്നു ശരിയായ രീതിയില്‍ മനസ്സിലാക്കാന്‍ ഇനിയെങ്കിലും അവസരമൊരുക്കണം.

ഗുണപാഠം- ബ്ലൂഫിലിം കണ്ടിട്ട് സെക്‌സ് എന്താണെന്നു പഠിക്കുന്നതും മലയാളം മെഗാസീരിയല്‍ കണ്ട് കുടുംബബന്ധങ്ങളെക്കുറിച്ച് പഠിക്കുന്നതും ഒരുപോലെയാണ്.

റോയല്‍ എന്‍ഫീല്‍ഡ് ദൈവം !

ഈശ്വരന്‍ തൂണിലും തുരുമ്പിലുമുണ്ട് എന്നു ഭഗവാന്‍ യുഗയുഗാന്തരങ്ങള്‍ക്കു മുമ്പേ വെളിപ്പെടുത്തിയിട്ടുള്ളതുകൊണ്ട് ഈശ്വരന്‍ റോയല്‍ എന്‍ഫീല്‍ഡ് ബുള്ളറ്റിലും ഉണ്ടോ എന്നു പ്രത്യേകം ചോദിക്കുന്നതില്‍ വലിയ കഥയില്ല. ബുള്ളറ്റില്‍ ഇരുമ്പും തുരുമ്പുമെല്ലാമുണ്ട് അതുകൊണ്ട് ഈശ്വരസാന്നിധ്യവുമുണ്ടാവും. എന്നാല്‍ ഭഗവാന്‍ ഉദ്ദേശിച്ച ആ ജനറലൈസേഷനപ്പുറം ഒരേയൊരു ബുള്ളറ്റിനു മാത്രമേ സൂപ്പര്‍ പവര്‍ ഉള്ളൂ എന്നു പറയുമ്പോള്‍ അതില്‍ അല്‍പം വ്യത്യസ്തയുണ്ട്.

സിനിമാനടിമാരുടെയും രാഷ്ട്രീയക്കാരുടെയും പേരില്‍ ക്ഷേത്രം പണിയുന്ന ട്രെന്‍ഡ് വരുന്നതിനു മുന്‍പ് 26 വര്‍ഷം മുന്‍പാണ് രാജസ്ഥാനിലെ ജോധ്പൂരിനടുത്ത് നാട്ടുകാര്‍ 350 സിസി റോയല്‍ എന്‍ഫീല്‍ഡ് ബുള്ളറ്റിനെ ദൈവമായി പ്രതിഷ്ഠിച്ച് ആരാധിച്ചു തുടങ്ങിയത്. ന്യൂസ് 18 റിപ്പോര്‍ട്ടിന്റെ അടിസ്ഥാനത്തില്‍ കഴിഞ്ഞ ദിവസം ബിബിസി റിപ്പോര്‍ട്ട് ചെയ്തതോടെയാണ് രാജസ്ഥാനിലെ ബുള്ളറ്റ് ദൈവത്തിന്റെ കാര്യം നമ്മളില്‍ പലരും അറിഞ്ഞത് എന്നു മാത്രം. ജോധ്പൂര്‍-പാലി ഹൈവേയില്‍ ജോധപൂരില്‍ നിന്നു 40 കിലോമീറ്റര്‍ അകലെ ബന്‍ഡായി എന്ന ഗ്രാമത്തിലാണ് ബുള്ളറ്റ് ദൈവം യാത്രക്കാരെ അപകടങ്ങളില്‍ നിന്നും രക്ഷിക്കുന്നത്. ഓം ബന്ന എന്ന അഥവാ ബുള്ളറ്റ് ബാബ എന്ന പേരില്‍ അറിയപ്പെടുന്ന ലോക്കല്‍ ദൈവത്തിന്റെ വാഹനമാണ് ആളുകള്‍ പ്രതിഷ്ഠിച്ചു പൂജിക്കുന്ന റോയല്‍ എന്‍ഫീല്‍ഡ്.

Om Banna RNJ 7773 റജിസ്റ്റര്‍ നമ്പരുള്ള ബുള്ളറ്റ് ദൈവമായതിന്റെ പിന്നില്‍ ഒരു കഥയുണ്ട്. സംഭവം നടക്കുന്നത് 1988ലാണ്. ഓം ബന്ന അഥവാ ബുള്ളറ്റ് ബാബ അന്ന് ഓം സിങ് രാത്തോര്‍ ആണ്. യുവാവായ ഓം സിങ് രാത്രിയില്‍ ഇപ്പോള്‍ തന്റെ ബുള്ളറ്റില്‍ പാലിയില്‍ നിന്നു ചോട്ടിലയിലേക്കു പോകുമ്പോള്‍ ബന്‍ഡായിയില്‍ വച്ച് നിയന്ത്രണം വിട്ട് ഒരു മരത്തിലിടിച്ചു. ബുള്ളറ്റും ഓം സിങ്ങും കൂടി ഓടയിലേക്കു വീണു ഓം സിങ് തല്‍ക്ഷണം മരിച്ചു, എല്ലാം വളരെ സ്വാഭാവികം. നേരം വെളുത്തപ്പോള്‍ പൊലീസുകാര്‍ വന്ന് ബുള്ളറ്റ് എടുത്തു സ്റ്റേഷനിലേക്കു കൊണ്ടുപോയി. എന്നാല്‍, അടുത്ത ദിവസം ബുള്ളറ്റ് സ്‌റ്റേഷനില്‍ നിന്നും അപ്രത്യക്ഷമായി. തിരഞ്ഞു ചെന്ന പൊലീസുകാര്‍ കണ്ടത് അപകടം നടന്ന സ്ഥലത്തു തന്നെ ബുളളറ്റ് കിടക്കുന്നതാണ്. പൊലീസുകാര്‍ പിന്നെയും ബുള്ളറ്റ് സ്റ്റേഷനില്‍ കൊണ്ടുപോയി. അടുത്ത ദിവസം പിന്നെയും ബുള്ളറ്റ് ആക്‌സിഡന്റ് സ്‌പോട്ടിലേക്കു തിരികെപ്പോയി. ഇത് ആവര്‍ത്തിച്ചുകൊണ്ടിരുന്നു.

ബുള്ളറ്റിന് ദിവ്യശക്തിയുണ്ടെന്നു മനസ്സിലാക്കാന്‍ ഇതില്‍പ്പരം തെളിവുകള്‍ വേറെ വേണ്ട. അപകടത്തോടെ ബുള്ളറ്റിന് അതിബൈക്കീയ സിദ്ധികള്‍ ലഭിച്ചതാണെന്നും അതല്ല ഓം സിങ് രാത്തോറിന്റെ ആത്മാവ് ബുള്ളറ്റില്‍ ആവേശിച്ചതാണെന്നും വിവിധങ്ങളായ തിയറികളുണ്ടായി. എന്തായാലും ബുള്ളറ്റിന്റെ ദിവ്യശക്തി അടുത്തുള്ള ഗ്രാമങ്ങളിലേക്കും പടര്‍ന്നു. നാട്ടുകാരെല്ലാം ചേര്‍ന്ന് വിശുദ്ധ ബുള്ളറ്റിന് ഒരു ക്ഷേത്രം പണിതു. ഓം ബന്ന അഥവാ ബുള്ളറ്റ് ബാബയെ വിശുദ്ധനായി പ്രഖ്യാപിച്ച് അദ്ഭുതസിദ്ധിയുള്ള ബുള്ളറ്റിനെ ക്ഷേത്രത്തില്‍ പ്രതിഷ്ഠിച്ചു. ഓം ബന്ന അപകടത്തില്‍ മരിക്കാന്‍ കാരണമായ ആ മരവും അലങ്കരിച്ച് സംരക്ഷിക്കുന്നു. ബുള്ളറ്റിന് ശരിക്കും ദിവ്യശക്തിയുണ്ടായിരുന്നെങ്കില്‍ ഓം ബന്നയെ അപകടത്തില്‍ നിന്നു രക്ഷിക്കുകയായിരുന്നില്ലേ ചെയ്യേണ്ടത്, ആളു തട്ടിപ്പോയിക്കഴിഞ്ഞ് ഒളിച്ചുകളിക്കുന്നതില്‍ എ്തു ദിവ്യത്വമാണുള്ളത് എന്നൊന്നും ആരും ചോദിക്കരുത്. ദൈവങ്ങളെ ചോദ്യം ചെയ്യുന്നത് ആര്‍ക്കും നല്ലതല്ല.

അതുവഴി യാത്ര ചെയ്യുന്നവരൊക്കെ ഇവിടെ കയറി ബുള്ളറ്റ് ബാബയ്ക്ക് നേര്‍ച്ച കാഴ്ചകള്‍ സമര്‍പ്പിക്കും പൂജ ചെയ്തും പ്രാര്‍ഥിച്ചും യാത്രയിലെ അപകടങ്ങള്‍ ഒഴിവാക്കുന്നു. ട്രിപ്അഡൈ്വസര്‍ ഉള്‍പ്പെടെയുള്ള യാത്രാ പോര്‍ട്ടലുകള്‍ പാലിയിലെ പ്രധാനകേന്ദ്രങ്ങളുടെ പട്ടികയില്‍ ബുള്ളറ്റ് ബാബ ക്ഷേത്രവും ഉള്‍പ്പെടുത്തിയിട്ടുണ്ട്. ബുള്ളറ്റ് ബാബ ഭക്തിഗാനങ്ങള്‍ക്കും അവിടെ നല്ല മാര്‍ക്കറ്റാണ്. സാംപിളിനു രണ്ടു ബുള്ളറ്റ് ഭക്തിഗാനങ്ങള്‍ ചുവടെ.

മനുഷ്യന്‍ മതങ്ങളെ സൃഷ്ടിച്ചുവെന്നും മതങ്ങള്‍ ദൈവങ്ങളെ സൃഷ്ടിച്ചു എന്നും പണ്ടു വയലാര്‍ എഴുതിയത് യേശുദാസ് പാടിയത് നമ്മള്‍ കേട്ടിട്ടുണ്ട്. വിശ്വാസികള്‍ ഉള്ളിടത്തോളം ദൈവങ്ങളെ വിലകുറച്ചു കാണാന്‍ പാടില്ല. കേരളത്തില്‍ വളരെ സ്വാധീനമുള്ള ഇരുചക്രവാഹനമെന്ന നിലയില്‍ ബുള്ളറ്റ് മതത്തിനും ബുള്ളറ്റ് ബാബയ്ക്കും ഇവിടെ അനന്തമായ സാധ്യതയാണുള്ളത്. ബാലികമാരെ പീഡിപ്പിക്കാത്ത, ഭക്തരെ മര്‍ദ്ദിക്കാത്ത ഒരു മതമായി ബുള്ളറ്റിസം വളര്‍ന്നു വരുന്നെങ്കില്‍ അത് പ്രോല്‍സാഹിപ്പിക്കുകയാണ് വേണ്ടത്.

ജയ് ഹോ ബുള്ളറ്റ് ബാബ !

അസൂയക്കാരുടെ സദാചാരം

25 വയസ്സില്‍ കല്യാണം കഴിച്ചാല്‍ മുപ്പതാം വയസ്സില്‍ പിക്കപ്പു പോകുന്ന തൈക്കിളവന്‍മാരുടെ തലമുറയ്ക്ക് അറുത്തേഴാം വയസ്സില്‍ കിളി പോലൊരു പെണ്ണിനെ വളച്ചെടുക്കുന്ന ഒറിജിനല്‍ കിളവനോട് തോന്നുന്ന വികാരത്തിന് പേര് ഒന്നേയുള്ളൂ- അസൂയ. കോണ്‍ഗ്രസ് നേതാവ് ദിഗ് വിജയ് സിങ് ടിവി അവതാരക അമൃത റായിലെ പ്രേമിക്കുന്നതിന്റെയും വിവാഹം കഴിക്കാന്‍ പോകുന്നതിന്റെയും സദാചാരപ്രശ്‌നങ്ങള്‍ ചര്‍ച്ച ചെയ്യുന്നവര്‍ പ്രണയം എന്നതിനെ എങ്ങനെ നിര്‍വചിക്കുന്നു എന്നു നോക്കിയാല്‍ തന്നെ കുഴപ്പം നാട്ടുകാര്‍ക്കാണോ ദിഗ്ഗങ്കിളിനാണോ എന്നു വ്യക്തമാകും.

മകളുടെ പ്രായമുള്ള സ്ത്രീയെ 67-ാം വയസ്സില്‍ ദിഗ് പ്രേമിച്ചു എന്നതാണ് യുവകോമളന്‍മാരുടെ പ്രധാന ആക്ഷേപങ്ങളിലൊന്ന്. 67-ാം വയസ്സില്‍ എണീറ്റു നില്‍ക്കാന്‍ തന്നെ കഷ്ടപ്പെടുന്ന, എണീറ്റു നിന്നാലും ഷുഗര്‍- പ്രഷര്‍, ഹാര്‍ട്ട്, പൈല്‍സ് പ്രശ്‌നങ്ങളാല്‍ കഷ്ടപ്പെടുന്നവരുടെ ലോകത്ത് ഒരാള്‍ ജീവിതത്തെ യൗവ്വനതീക്ഷ്ണവും ഹൃദയത്തെ പ്രേമസുരഭിലവുമാക്കി കാത്തുസൂക്ഷിച്ചത് വലിയ കുറ്റകൃത്യമായിപ്പോയെന്നു പറയുന്നവരെക്കാള്‍ വലിയ ബോറന്‍മാര്‍ വേറെയില്ല. എങ്ങനെ ഒരു പെണ്‍കുട്ടിയുടെ മനസ്സില്‍ ഇടം നേടണം എന്നതു ഗൂഗിള്‍ ചെയ്യുന്ന സാധുക്കളോട് ഈ ഓള്‍ഡ് ജനറേഷന്‍ ദിഗ് വിജയത്തിന്റെ റൊമാന്റിക് സൈഡ് പറഞ്ഞുന മനസ്സിലാക്കാന്‍ നോക്കിയിട്ടും കാര്യമില്ല.

അമൃത റായ് ഇത് എന്തു കണ്ടിട്ടാണ് എന്നാണ് പൊതുവേ എല്ലാവരും ചോദിക്കുന്നത്. ഇന്നാട്ടില്‍ ഇതിനും മാത്രം ചെറുപ്പക്കാരുള്ളപ്പോള്‍ അറുപത്തേഴു വയസ്സുള്ള കോണ്‍ഗ്രസ് നേതാവിനെ (ഡബിള്‍ നെഗറ്റീവ്) പ്രണയിക്കാനും അതു തുറന്നു സമ്മതിക്കാനും മാത്രം അമൃത എന്ത് ആനന്ദമാണ് കണ്ടെത്തിയിരിക്കുന്നത് എന്നാണ് പലര്‍ക്കും അറിയേണ്ടത്. പ്രണയം എന്നു വച്ചാല്‍ 25 വയസ്സില്‍ താഴെയുള്ള പക്വതയില്ലാത്ത വ്യക്തികള്‍ തമ്മിലുള്ള ഹഠാദാകര്‍ഷണമാണ് എന്നാണ് സാഹിത്യം, സിനിമ തുടങ്ങിയ മാധ്യമങ്ങള്‍ പറഞ്ഞു വച്ചിരിക്കുന്നത്. 30 വയസ്സുള്ള വ്യക്തികള്‍ തമ്മിലുള്ള പ്രണയത്തെ നമ്മുടെ നാട്ടുകാര്‍ അവിഹിതം എന്നാണ് വിളിക്കുന്നത്. ദിഗ് വിജയ് സിങ് ഒരു വിധവനാണ്. അമൃത റായ് വിവാഹമോചിതയും. മോചിതനാകുന്ന അമതൃയുടെ ഭര്‍ത്താവ് അമൃതയ്ക്ക് ദിഗേട്ടനോടൊപ്പം യുഭകരമായ ജീവിതവും ആശംസിച്ചിട്ടുണ്ട് (അത് ബ്ലാക് ഹ്യൂമറാവാനും മതി). ഇവര്‍ക്കൊന്നുമില്ലാത്ത സദാചാര പ്രശ്‌നം എന്തുകൊണ്ട് നാട്ടുകാര്‍ക്ക് എന്നതാണ് യഥാര്‍ഥ പ്രശ്‌നം.

മാധ്യമപ്രവര്‍ത്തകരുടെ സദാചാരബോധവും ഞരമ്പുരോഗവും വ്യക്തിത്വവൈകല്യങ്ങളുമൊക്കെ എത്ര ഭീകരമാണെന്നു മനസ്സിലാക്കാന്‍ ദിഗ് വിജയ് സിങ്- അമൃത റായ് ബന്ധത്തെക്കുറിച്ചുള്ള റിപ്പോര്‍ട്ടുകള്‍ വായിച്ചാല്‍ മതി. റൊമാന്റിക് ആയ ജീവിതവും ലൈംഗികശേഷിയുമൊക്കെ ഉള്ളവരോട് എന്തിനാണ് ഇത്ര അസഹിഷ്ണുത എന്നത് മനസ്സിലാവുന്നില്ല. ദിഗ് വിജയ് സിങ്ങിനെ കുറ്റപ്പെടുത്തുന്നവരെല്ലാം ഏതപത്‌നീ വ്രതക്കാരും മറ്റുമാണോ എന്നതാണ് മറ്റൊരു ചോദ്യം. ഇവരുടെയൊക്കെ വാട്ട്‌സ്ആപ്പ് ഹിസ്റ്ററി പരിശോധിച്ചാല്‍ അറിയാം ഏകപത്‌നീവ്രതത്തിന്റെ പുണ്യം. പത്തു പേരെ വിര്‍ച്വലായി കല്യാണം കഴിക്കുകയും ഭോഗിക്കുകയും ചെയ്യുന്ന ഏകപത്‌നീവ്രതഫ്രോഡുകള്‍ക്ക് യഥാര്‍ഥജീവിതത്തില്‍ പ്രണയിക്കുന്നവരോടെല്ലാം ഒരു തരം പ്രതികാരബുദ്ധി തോന്നുന്നത് സ്വാഭാവികമാണ്.

ഇനി ഈ വിഷയം രാഷ്ട്രീയമായി കൈകാര്യം ചെയ്യുന്നവരുമുണ്ട്. ഭാര്യയുടെ വിവരം മറച്ചുവച്ച മോദിയെ വിമര്‍ശിച്ച ദിഗ് വിജയ് സിങ്ങിന് രഹസ്യമായി പ്രണയിക്കാന്‍ എന്തവകാശം എന്നാണ് ചിലരുടെ ചോദ്യം. മോദി തന്റെ കാര്യം മറച്ചുവച്ചതില്‍ പരാതിയുണ്ടെന്നു മോദിയുടെ ഭാര്യ പത്രസമ്മേളനം വിളിച്ചു പറഞ്ഞിട്ടില്ല. മറിച്ച്, മോദി പ്രധാനമന്ത്രിയാകാന്‍ വേണ്ടി വ്രതമെടുത്തു പ്രാര്‍ഥിക്കുകയായിരുന്നു അവര്‍. അവിടെയും കുത്തിക്കഴപ്പ് എരണംകെട്ട പത്രക്കാര്‍ക്കായിരുന്നു. മോദിയെക്കുറിച്ച് യശോദച്ചേച്ചിക്കും ദിഗിനെക്കുറിച്ച് അമൃതച്ചേച്ചിക്കും പരാതിയില്ലെങ്കില്‍ പരാന്നഭോജികളായ ചാനലുകാരുടെ ഷോക്കിങ് ന്യൂസ് എക്‌സ്‌കഌസീവുകള്‍ ശുദ്ധ പോക്രിത്തരങ്ങളാണെന്നു പറയേണ്ടി വരും.

രാഷ്ട്രീയപ്രവര്‍ത്തകര്‍ സംശുദ്ധ ജീവിതം നയിക്കുന്നവാരിക്കണം എന്നു വാശി പിടിക്കാന്‍ പൊതുജനത്തിന് അവകാശമുണ്ട്. നിലവിലുള്ളവരില്‍ നല്ലൊരു ശതമാനവും ക്രിമിനലുകളാണെന്ന് കണക്കുകള്‍ സൂചിപ്പിക്കുമ്പോള്‍ പ്രണയിച്ചു എന്ന കുറ്റത്തിന് നേതേക്കന്‍മാരെ കല്ലെറിയുന്നത് ശരിയല്ല. സ്വന്തം സ്വകാര്യതയില്‍ സര്‍ക്കാര്‍ എത്തിനോക്കുന്നു എന്നു കണ്ടാല്‍ മനുഷ്യാവകാശലംഘനം എന്നു പറഞ്ഞ് മുറവിളി കൂട്ടുന്നവര്‍ രാഷ്ട്രീയനേതാക്കന്‍മാരുടെ കിടപ്പറച്ചിത്രങ്ങള്‍ വരെ ഫെയ്‌സ്ബുക്കില്‍ ഷെയര്‍ ചെയ്തു കളിക്കുന്നത് വൃത്തികേടാണ്. പ്രേമിക്കാനാണെങ്കിലും ഒരു മിനിമം ആണത്തമെങ്കിലും വേണം. ജസ്റ്റിസ് മനുവിനെപ്പോലുള്ള ഓള്‍ഡ് ജെനറേഷന്‍ യുവറോണര്‍മാര്‍ പറഞ്ഞിരിക്കുന്നതനുസരിച്ച് ഗൃഹസ്ഥാശ്രമം കഴിഞ്ഞാല്‍ പിന്നെ വാനപ്രസ്ഥമാണ്. വാനപ്രസ്ഥം നയിക്കേണ്ട പ്രായത്തില്‍ ഗൃഹസ്ഥാശ്രമം ട്രൈ ചെയ്യുന്നതിലാണ് വിപ്ലവം ഉള്ളത്. അതിനെയാണ് ന്യൂ ജനറേഷന്‍ എന്നു വിളിക്കേണ്ടത്. ന്യൂജനറേഷന്‍ എന്നു പച്ചകുത്തി നടക്കുന്ന വിഡ്ഡികള്‍ ദിഗ് വിജയ് സിങ്ങിനെ കരിവാരി തേക്കുന്നതിലൂടെ കുലം കുത്തിക്കളിക്കുന്നത് സ്വന്തം ജനറേഷനിലാണ്. ദിഗ് വിജയ് സിങ്ങിനോട് എനിക്കു ബഹുമാനം മാത്രമേയുള്ളൂ. അറുപത്തേഴാം വയസ്സില്‍ ഏതെങ്കിലും ഒരു സ്ത്രീയെ പ്രണയിക്കാന്‍ മാത്രം യൗവ്വനമോ ആരോഗ്യമോ റൊമാന്റിക് ആയ ഒരു മനസ്സോ എനിക്കുണ്ടാകുമെന്ന് പ്രതിക്ഷയില്ല. ദിഗ് വിജയ് സിങ്ങിനും അമൃതയ്ക്കും ശുഭകരമായ ഒരു പ്രണയജീവിതം ആശംസിക്കുന്നു.

ഗജരാജപിതൃരാജചുംബനരാജ

ഇത് ഈ പാര്‍ട്ടിയിലെ ഒരാചാരമാണ്. ഇറ്റലിയിലും മറ്റും ആളുകള്‍ പരസ്പരം കാണുമ്പോള്‍ തുരുതുരാ ചുംബിക്കുന്നതും ലിപ്‌ലോക്ക് അടിക്കുന്നതും സിനിമകളിലും ടിവി സീരിയലുകളിലും എന്തിന് ഹാര്‍ഡ്‌കോര്‍ ന്യൂസ് ബുൂള്ളറ്റിനുകളില്‍ വരെ കാണാം. ചുബനം വളരെ ഉന്നതമായ ഒരു സ്‌നേഹപ്രകടനോപാധിയാണ്. നഗ്മയെ കണ്ടാല്‍ ആര്‍ക്കായാലും സ്‌നേഹം തോന്നും. ആ സ്‌നേഹം ഉള്ളിലടക്കിവച്ച് വീര്‍പ്പുമുട്ടി മരിക്കുന്നതിനെക്കാള്‍ നല്ലത് പരസ്യമായെങ്കില്‍ അങ്ങനെ ആ കവിളില്‍ ഒരു ചുംബനം നല്‍കി അതിന്റെ പേരില്‍ രക്ഷസാക്ഷിയാകുന്നതാണ് എന്നു ഗജരാജ് ശര്‍മ എംഎല്‍എ വിചാരിച്ചിരുന്നിരിക്കാം. ഇന്നലെ അദ്ദേഹം അതു സാധിച്ചു. എത്രയോ ദിവസങ്ങള്‍ കൂടി അദ്ദേഹം ഇന്നലെ സമാധാനമായി ഉറങ്ങിക്കാണും. പാവം !

ഉമ്മ വച്ചു കഴിഞ്ഞ് വീട്ടില്‍ച്ചെന്ന ഗജരാജ് ശര്‍മയെ ഭാര്യ പെട്രോളൊഴിച്ചു കത്തിച്ചില്ല എന്നത് ഇന്ത്യയുടെ സാംസ്‌കാരികപുരോഗതിയുടെ ലക്ഷണമാണ് എന്നു പറയാം. അസ്സമില്‍ വച്ചു രാഹുല്‍ ഗാന്ധിയെ ചുംബിച്ചു സ്വീകരിച്ച പെണ്‍കുട്ടിയുടെ സ്ഥിതി അതായിരുന്നു. രാഹുലിനെ പെണ്‍കുട്ടികള്‍ ഉമ്മ വച്ചപ്പോള്‍ അതിസുന്ദരനായ പയ്യനെ വായില്‍നോക്കികളായ പെണ്ണുങ്ങള്‍ കൊതിമൂത്ത് ഉമ്മ വച്ചതാണെന്നും അത് അസ്സമിലെ ആചാരണാണ് എന്നും വ്യത്യസ്തമായ തിയറികളുണ്ടായിരുന്നു. സീനിയര്‍ നേതാവ് നഗ്മയെ ഉമ്മ വച്ചപ്പോള്‍ നഗ്മ പണ്ട് സിനിമയില്‍ ഇതല്ല ഇതിനപ്പുറം ചാടിക്കടന്നവളല്ലേ പിന്നെയിപ്പോള്‍ പിതൃസഹജമായ ആ ചുംബനം ഇഷ്ടപ്പെടാതിരിക്കുന്നത് മര്യാദയാണോ എന്നുമൊക്കെയാണ് പൊതുവേയുള്ള അഭിപ്രായം. ചുംബനത്തില്‍ പ്രതിഷേധിച്ച് എംഎല്‍എയ്‌ക്കെതിരെ നഗ്മ ബലാല്‍സംഗക്കേസ് കൊടുക്കുമെന്ന പ്രതീക്ഷയിലാണ് പാവം പത്രക്കാര്‍.

നഗ്മയ്ക്ക് അതില്‍ പരാതിയൊന്നുമില്ലാത്തതിനാല്‍ ചുംബനം വലിയ വിവാദമൊന്നുമാകാന്‍ പോകുന്നില്ല. അഥവാ പരാതി ഉണ്ടായാലും അവളൊന്നുറക്കെ കരഞ്ഞിരുന്നെങ്കില്‍… ഒന്നൊച്ച വച്ചിരുന്നെങ്കില്‍ താനുണര്‍ന്നേനെ എന്നു പരിതപിച്ചോ പിതൃസഹജമായ വാല്‍സല്യത്തോടെ നല്‍കിയ ചുംബനത്തെപ്പോലും ദുര്‍വ്യാഖ്യാനം ചെയ്യുന്ന ഈ സമൂഹം എങ്ങോട്ടാണു പോകുന്നതെന്ന് ആശങ്കപ്പെട്ടോ ഗജരാജ് അങ്കിളിന് ഊരാവുന്നതേയുള്ളൂ. അല്ലെങ്കിലും തലമൂത്ത നേതാക്കള്‍ക്കാണോ ഇത്തരം കേസുകളില്‍ നിന്ന് ഊരാന്‍ പാട്.

ഈ തിരഞ്ഞെടുപ്പു കാലത്തെ ഏറ്റവും ശ്രദ്ധേയമായ വിഡിയോകളില്‍ ഒന്നായി മാറാന്‍ പോകുന്ന ഈ ചുംബന വിഡിയോ ഇതാണ്.

നഗ്മയുടെ അനുമതിയില്ലാതെയാണ് എംഎല്‍എ ചുംബിച്ചത് എന്നതിന്റെ തെളിവായി ചൂണ്ടിക്കാണിക്കുന്നത് എംഎല്‍എയുടെ കൈ വലിച്ചെറിഞ്ഞ ശേഷം ഏറെക്കുറെ രോഷാകുലയായി നഗ്മ ജീപ്പില്‍ ചാടിക്കയറുന്ന സീന്‍ ആണ്. രേഖാമൂലമുള്ള പരാതിയല്ലാതെ ശരീരഭാഷയുടെ അടിസ്ഥാനത്തില്‍ കേസെടുക്കാന്‍ ഇന്ത്യയില്‍ വകുപ്പില്ലാത്തതിനാല്‍ എംഎല്‍എയ്ക്ക് ഭീഷണികളൊന്നുമില്ല. കോണ്ഗ്രസ് സ്ഥാനാര്‍ഥിയായി മല്‍സരിക്കുന്ന നഗ്മ ഈ വീട്ടില്‍പ്പോയി ഡെറ്റോള്‍ ഒഴിച്ചു മുഖം കഴുകുകയോ മറ്റോ ചെയ്‌തേക്കാം എന്നല്ലാതെ ഈ തിരഞ്ഞെടുപ്പുകാലത്ത് ഗജരാജന്റെ പിതൃരാജചുംബനത്തിനെതിരായി ക-മാന്നു രണ്ടക്ഷരം മിണ്ടാന്‍ സാധ്യതയില്ല.

സ്ത്രീകളുടെ സുരക്ഷയ്ക്കു പ്രാധാന്യം നല്‍കുന്ന രാഹുല്‍ ഗാന്ധി നയിക്കുന്ന കോണ്‍ഗ്രസിന്റെ തിരഞ്ഞെടുപ്പു സന്ദേശങ്ങളിലൊന്നായി ഇതിനെ വ്യാഖ്യാനിക്കാവുന്നതേയുള്ളൂ. രാജ്യമൊട്ടാകെ നീചന്‍മാര്‍ സ്ത്രീകളെ പിച്ചിച്ചീന്തുമ്പോള്‍ തങ്ങളുടെ സ്ഥാനാര്‍ഥിയെ സ്വന്തം മകളെ എന്നതു പോലെ ചുംബിച്ച് പ്രചരിപ്പിക്കുന്നു. എഹാ എത്ര മനോഹരം. ഇത്തരം പിതൃസഹജമായ ചുംബനങ്ങളും തലോടലുകളും ഞെക്കലുകളുമൊക്കെ രാജ്യവ്യാപകമായി നടപ്പാക്കുന്നത് ഈ സാഹചര്യത്തില്‍ കോണ്‍ഗ്രസിനു പരീക്ഷിക്കാവുന്നതാണ്. ഉദാഹരണത്തിന് രമേശ് ചെന്നിത്തലയെ ഉമ്മന്‍ ചാണ്ടിയും കെ.മുരളീധരനെ സുധീരനുമൊക്കെ ചുംബിക്കട്ടെ. ചുംബനം ഒരു സംസ്‌കാരമായി മാറട്ടെ. ചുംബനത്തിലൂടെ അങ്ങനെ ഒരു രാഷ്ട്രീയം പകര്‍ച്ചവ്യാധി പോലെ പടരട്ടെ.

കൊടുത്താല്‍ കൊല്ലത്തും:-

നഗ്മയെ ഗജരാജ് എംഎല്‍എ ചുംബിച്ചതുകൊണ്ട് മനസമാധാനം നഷ്ടപ്പെടുന്നത് കൊല്ലത്ത് ഒരാള്‍ക്കാണ്. നഗ്മ പ്രതിഷേധിച്ചാലും ഇല്ലെങ്കിലും, ജില്ലാ കളക്ടറോട് പേഴ്‌സനലായിട്ടു പറഞ്ഞാലും ഇല്ലെങ്കിലും മാധ്യമങ്ങള്‍ വാര്‍ത്തയാക്കുമ്പോള്‍ അതിന്റെ അവസാനം പീതാംബരക്കുറുപ്പിന്റെയും ശ്വേതാ മേനോന്റെയും കാര്യം ഒന്നു പറഞ്ഞുപോയാല്‍ മതി വൃത്തികെട്ട ജനം അതെല്ലാം വീണ്ടുമോര്‍ക്കാന്‍. കുറുപ്പേട്ടന്‍ തിരഞ്ഞെടുപ്പില്‍ മല്‍സരിക്കുന്നില്ല എന്നതുകൊണ്ട് കുറച്ചു സമാധാനിക്കാം. എന്നാലും, ലോകത്ത് എവിടെ ആരു സിനിമാനടിയെ പബ്ലിക്കായി പിടിച്ചാലും മീഡിയ അപ്പോള്‍ ഇത് ഓര്‍മിക്കുമെന്നത് വലിയൊരു ഭീഷണി തന്നെയാണ്.

വിഎസ് എന്ന ചതിയന്‍

മാതൃകാദമ്പതികള്‍ തമ്മില്‍ സൗന്ദര്യപ്പിണക്കമുണ്ടാകുമ്പോള്‍ അത് സോള്‍വ് ചെയ്യുന്നതിനായി സന്നദ്ധപ്രവര്‍ത്തനം നടത്തുന്നത് നാട്ടുകാരുടെ ഒരു ഹോബിയാണ്. ഈ ദമ്പതികളുടെ വീട്ടില്‍ കയറി നിരങ്ങി, പ്രശ്‌നം സോള്‍വ് ചെയ്യാനെന്ന മട്ടില്‍ ദാമ്പത്യജീവിതത്തിന്റെ വിശദാംശങ്ങള്‍ വരെ ചികഞ്ഞെടുത്ത് നാട്ടില്‍ പാട്ടാക്കുകയും ഇവരുടെ സൗന്ദര്യപ്പിണക്കത്തെ ഡൈവോഴ്‌സിന്റെ വക്കോളമെത്തിക്കുകയും ചെയ്യുന്നതാണ് ഈ സന്നദ്ധപ്രവര്‍ത്തകരുടെ ഒരു ശൈലി. ഒടുവില്‍ പരസ്പരം തെറിവിളിച്ചു പിരിയുന്നതിനു പകരം സന്നദ്ധപ്രവര്‍ത്തകരുടെ മാധ്യസ്ഥമില്ലാതെ തന്നെ ദമ്പതികള്‍ വീട്ടിനുള്ളില്‍ പ്രശ്‌നം സോള്‍വ് ചെയ്യുകയും സന്തോഷത്തോടെ ഒരുമിച്ചു പോകാന്‍ തീരുമാനിക്കുകയും ചെയ്യുമ്പോള്‍ സന്നദ്ധപ്രവര്‍ത്തകര്‍ക്ക് കൂട്ടത്തോടെ ഉണ്ടാകുന്ന ഞെട്ടലും അമ്പരപ്പും രോഷവും പ്രതിഷേധവുമാണ് ഇപ്പോള്‍ വിഎസ് അച്യുതാനന്ദന്റെ നിലപാടു മാറ്റത്തില്‍ കേരളത്തിലെ സിപിഎം ഒഴികെയുള്ള രാഷ്ട്രീയപ്രസ്ഥാനങ്ങളിലെ നേതാക്കന്‍മാരും രാഷ്ട്രീയനിരീക്ഷകരും മാധ്യമപ്രവര്‍ത്തകരും പ്രകടിപ്പിച്ചുകൊണ്ടിരിക്കുന്നത്.

വിഎസിന്റെ നിലപാടുമാറ്റം സമകാലികരാഷ്ട്രീയത്തിലുണ്ടായിട്ടുള്ള ഏറ്റവും വലിയ ദുരന്തമാണെന്ന മട്ടിലാണ് പലരും പ്രതികരിക്കുന്നത്. വിഎസ് ആരെയൊക്കെയോ ചതിച്ചു എന്നും വിഎസിനു ഇവിടുത്തെ ജനങ്ങള്‍ മറുപടി നല്‍കും എന്നുമൊക്കെയാണ് പ്രതികരണത്തൊഴിലാളികളുടെ പ്രഖ്യാപനങ്ങള്‍. വിഎസ് അച്യുതാനന്ദന്‍ സിപിഎം വിട്ടു കോണ്‍ഗ്രസില്‍ ചേരുകയോ കോണ്‍ഗ്രസ് വിട്ടു ബിജെപിയില്‍ ചേരുകയോ ഇന്നലെ വരെയുണ്ടായിരുന്ന രാഷ്ട്രീയം തള്ളിപ്പറയുകയോ ചെയ്തിട്ടില്ല. നാളിന്നു വരെ സിപിഎമ്മുകാരനായി ജീവിച്ച വിഎസിന്റെ രാഷ്ട്രീയത്തില്‍ ഒരു മാറ്റവും വന്നിട്ടില്ല. പാര്‍ട്ടിയെ സമ്മര്‍ദ്ദത്തിലാക്കുന്ന തരത്തിലുള്ള പരസ്യനിലപാടുകള്‍ ഉപേക്ഷിച്ച് പാര്‍ട്ടിയുമായി ചര്‍ന്നു നിന്നുകൊണ്ട് പ്രവര്‍ത്തിക്കാനുള്ള അദ്ദേഹത്തിന്റെ തീരുമാനത്തെ ചതിയെന്നും വഞ്ചനയെന്നും വിശേഷിപ്പിക്കുന്ന പ്രബുദ്ധരാഷ്ട്രീയമീമാംസകര്‍ കുടിലബുദ്ധിക്കാരായ അട്ടകളാണ് എന്നു മനസ്സിലാക്കാന്‍ പൊളിറ്റിക്‌സ് എംഎയും ജേണലിസം ഡിപ്ലോമയും ആവശ്യമില്ല.

സീറ്റ് കിട്ടുന്നതും കസേര കിട്ടുന്നതുമനുസരിച്ച് നൂറുവട്ടം പാര്‍ട്ടി മാറുകയും മുന്നണി മാറുകയും സ്വന്തം രാഷ്ട്രീയത്തെ തള്ളിപ്പറയുകയും ചെയ്തിട്ടുള്ള നിലവാരമില്ലാത്ത നാലാംകിട രാഷ്ട്രീയക്കാരും അവരുടെ അനുയായികളും, ഏറെനളായുള്ള അസ്വാരസ്യങ്ങള്‍ മറന്ന് പാര്‍ട്ടിയോടൊപ്പം നില്‍ക്കാന്‍ തീരുമാനിച്ച വിഎസിനെ ചതിയനെന്നും കാലുവാരിയെന്നും വിശേഷിപ്പിക്കുന്നത് കൗതുകകരമായ കാഴ്ചയാണ്. വിഎസിനെ ആരാണ് ഏറ്റവുമധികം മുതലെടുത്തിട്ടുള്ളത് എന്നതറിയണമെങ്കില്‍ വിഎസിന്റെ നിലപാടുമാറ്റത്തില്‍ പ്രതിഷേധിക്കുന്ന നേതാക്കന്‍മാര്‍ ആരൊക്കെയാണെന്നു നോക്കിയാല്‍ മതി.

സിപിഎമ്മിന്റെ ഔദ്യോഗികപക്ഷത്തെ എതിര്‍ത്തുകൊണ്ട് സംസാരിക്കുമ്പോള്‍ വിഎസ് മഹാനായ നേതാവും ഔദ്യോഗികപക്ഷത്തോടൊപ്പം നില്‍ക്കുമ്പോള്‍ വിഎസ് ചതിയനായ രാഷ്ട്രീയപ്രവര്‍ത്തകനായും ചിത്രീകരിക്കുന്നസമൂഹം ഷക്കീല എ പടത്തിലഭിനയിക്കുമ്പോള്‍ കയ്യടിക്കുകയും അവാര്‍ഡ് പടത്തിലഭിനയിക്കുമ്പോള്‍ കൂവുകയും ചെയ്യുന്നവരില്‍ നിന്നും വ്യത്യസ്തമല്ല. വിഎസ് സിപിഎം നേതൃത്വത്തിനെതിരെ നില്‍ക്കുന്നതാണ് ഞങ്ങള്‍ക്കു ഹരം എന്നു തുറന്നുപറയാതെ രാഷ്ട്രീയത്തിലെ വിശുദ്ധിയെപ്പറ്റിയും ധാര്‍മിതകയെപ്പറ്റിയുമൊക്കെ വര്‍ണിച്ച് ആളുകളെ തെറ്റിദ്ധരിപ്പിക്കാന്‍ ശ്രമിക്കുന്നതാണ് സത്യത്തില്‍ യഥാര്‍ഥതട്ടിപ്പ്.

ടിപി ചന്ദ്രശേഖരന്‍ വധക്കേസില്‍ വിഎസ് എടുത്ത നിലപാടുകള്‍ ഉദ്ധരിച്ചാണ് പലരും വിഎസിനെ വിമര്‍ശിക്കുന്നത്. ടിപിയുടെ മരണത്തിന്റെ ഉത്തരവാദി വിഎസാണ് എന്നുവരെയാണ് പ്രതികരണങ്ങള്‍. ടിപിയെ കൊന്നതു നന്നായെന്നോ പാര്‍ട്ടിക്ക് അതുമായി പങ്കില്ലെന്നോ വിഎസ് പറഞ്ഞിട്ടില്ല. ആര്‍എംപി കോണ്‍ഗ്രസിന്റെ വാലായി മാറി എന്ന നിരീക്ഷണം ടിപിയെ ഏതെങ്കിലും തരത്തില്‍ അധിക്ഷേപിക്കുന്നതാണെന്നു തോന്നുന്നില്ല. സിപിഎം അന്വേഷണ കമ്മിഷന്‍ ഒരു പാര്‍ട്ടി അംഗത്തെ ടിവി വധത്തില്‍ കുറ്റക്കാരനായി കണ്ടെത്തി പുറത്താക്കിയത് വിഎസിന്റെ വിജയമാണ് എന്നതില്‍ തര്‍ക്കമില്ല. പൊലീസിന്റെ കയ്യില്‍ പോലും വേണ്ടത്ര തെളിവുകളില്ലാതിരിക്കെ വിചാരണ കഴിഞ്ഞു ശിക്ഷയും വിധിച്ച കേസില്‍ പിണറായി വിജയനെ ജയിലിലിടാന്‍ വേണ്ടി വിഎസ് പോരാടണമായിരുന്നു എന്നു പറയുന്നത് സിപിഎമ്മിനെയും വിഎസിനെയും ഒരുപോലെ നശിപ്പിക്കാമെന്നു വ്യാമോഹിക്കുന്നവരാണ്.

സിപിഎമ്മിനൊപ്പം നില്‍ക്കാന്‍ വിഎസ് തീരുമാനിച്ചത് അടുത്ത കാലത്ത് കേരള രാഷ്ട്രീയത്തിലുണ്ടായിട്ടുള്ള ഏറ്റവും പോസിറ്റീവായ തീരുമാനമാണ്. വിഎസിനെ ഉള്‍ക്കൊള്ളാന്‍ മാത്രം പാര്‍ട്ടിയും പാര്‍ട്ടിയോടൊപ്പം നില്‍ക്കാന്‍ വിഎസും വളര്‍ന്നു എന്നതില്‍ ലജ്ജാകരമായി ഒന്നുമില്ല. ഈ മാറ്റം കൊണ്ടു ഗുണമുണ്ടാകുന്നത് പാര്‍ട്ടിക്കും വിഎസിനും സിപിഎമ്മിനെ ഇപ്പോഴും സ്‌നേഹിക്കുന്ന സാധാരണ പ്രവര്‍ത്തകര്‍ക്കുമാണ്. ഒരു വാര്‍ത്തയുമില്ലെങ്കില്‍ വിഎസിനെ വച്ചൊരു കീറുകീറാം എന്നു വിചാരിച്ചിരുന്ന ചാനലുകാര്‍ക്കും പത്രക്കാര്‍ക്കും രാഷ്ട്രീയനിരീക്ഷകര്‍ക്കും മാത്രമാണ് ഒരു നഷ്ടം സംഭവിച്ചിരിക്കുന്നത്. അത് ഒരിക്കലും കേരളസമൂഹത്തിന്റെ നഷ്ടമല്ല.

കുറിപ്പ്:

ദിലീപും മഞ്ജു വാര്യരും വിവാഹമോചനം നേടാത്തതാണ് നമ്മുടെ ദുഖം.
മമ്മൂട്ടിയും മോഹന്‍ലാലും തമ്മില്‍ ശത്രുത ഉണ്ടെന്നു കേള്‍ക്കാനാണ് നമുക്കിഷ്ടം.
മോദിയും അ്ഡ്വാനിയും തെരുവില്‍ കിടന്ന് അടികൂടുന്ന ഒരു ദിനം വരുമെന്നു നമ്മള്‍ പ്രതീക്ഷിക്കുന്നു.
നമ്മുടേതൊഴികെ ബാക്കിയെല്ലാവരുടെയും വീട്ടിലെ സംഘര്‍ഷങ്ങള്‍ നമുക്ക് ഒരാവേശമാണ്.
ബികോസ് വി ഓള്‍ ആര്‍ ബ്ലഡി ഫക്കിങ് മല്ലൂസ്…. തിളയ്ക്കണം ചോര നമുക്ക് ഞരമ്പുകളില്‍.

മുല്ലപ്പൂ വിപ്ലവം അഥവാ സാങ്കേതികതടസ്സം

പുടിന്‍ യുക്രൈയ്‌നോടു ചെയ്യുന്നതും റഡിസന്റ് എഡിറ്റര്‍ ജമാലുദ്ദീന്‍ ഫാറുഖി ഇന്ത്യാവിഷന്‍ ജീവനക്കാരോടു ചെയ്യുന്നതും താരതമ്യം ചെയ്യാവുന്ന കാര്യങ്ങളല്ല. പുടിന്റെ രാഷ്ട്രീയത്തെ അനുകൂലിക്കുന്ന, പുടിനെ വാഴ്ത്തുന്ന ചാനലില്‍ നിന്നും വാര്‍ത്താവായനക്കിടെ രാജി വച്ച റഷ്യ ടുഡേ ന്യൂസ് ചാനലിലെ അവതാരകയുടെ വാര്‍ത്ത കഴിഞ്ഞയാഴ്ച കൊടുത്ത ഇന്ത്യാവിഷന് നിര്‍ണായകമായ ഈ തിരുമാനത്തിനുള്ള ആശയം ലഭിച്ചത് ആ വാര്‍ത്തയില്‍ നിന്നു തന്നെയാവണം.കേരളത്തെ ബ്രേക്കിങ് ന്യൂസുകള്‍ കൊണ്ടു ഞെട്ടിച്ച റിപ്പോര്‍ട്ടര്‍മാരുടെയും രാഷ്ട്രീയ-സാമൂഹിക-സാംസ്‌കാരിക മണ്ഡലങ്ങളിലെ ജീര്‍ണതകള്‍ക്കെതിരെ നല്ല നമസ്‌കാരം പറഞ്ഞുകൊണ്ടിരുന്ന ജയശങ്കരന്‍മാരുടെയും ഈറ്റില്ലമായ ഇന്ത്യാവിഷന്‍ ന്യൂസ് ടീം ഇന്നലെ പ്രവര്‍ത്തനം നിര്‍ത്തിയതോടെ കേരളത്തിലെ മാധ്യമരംഗത്തെ മുല്ലപ്പൂവിപ്ലവത്തിനു തുടക്കം കുറിച്ചിരിക്കുകയാണെന്നു പറയാം.

മനേജ്‌മെന്റുമായുള്ള പ്രശ്‌നങ്ങളെ തുടര്‍ന്നാണ് ഇന്ത്യാവിഷന്‍ വാര്‍ത്താസംഘം ഒന്നടങ്കം പ്രവര്‍ത്തനം നിര്‍ത്തി പ്രേക്ഷകരെ ഞെട്ടിച്ചത് എന്നിരിക്കെ, സാങ്കേതികകാരണങ്ങളാലാണ് സംപ്രേഷണം മുടങ്ങിയത് എന്നാണ് മാനേജ്‌മെന്റ് പറയുന്നത്. ഇന്ത്യവിഷന്‍ പ്രേക്ഷകര്‍ പോളിടെക്‌നിക് പഠിക്കാത്തവരായതുകൊണ്ട് സാങ്കേതികകാരണം എന്നു വച്ചാല്‍ എന്താണെന്ന് അവര്‍ക്കു മനസ്സിലാകില്ല എന്നാവണം മുന്‍വിധി. അല്ലെങ്കിലും നാണക്കേടുണ്ടാക്കുന്ന ചിത്രങ്ങള്‍ പുറത്തു വന്നാല്‍ സിനിമാക്കാര്‍ അതിനെ മോര്‍ഫിങ് എന്നു വിളിക്കുന്നതുപോലെ പുറത്തു പറയാന്‍ കൊള്ളാത്ത കാരണങ്ങളെയെല്ലാം സാങ്കേതികകാരണങ്ങള്‍ എന്നു വിശേഷിപ്പിക്കുന്നത് ക്ലീഷേയായിട്ടുണ്ട്.

ഇന്ത്യാവിഷനിലെ സാങ്കേതികപ്രശ്‌നങ്ങളെപ്പറ്റി ജീവനക്കാര്‍ തന്നെ ഇന്ത്യാവിഷന്‍ വെബ്‌സൈറ്റില്‍ ഇന്നലെ രാവിലെ പ്രസിദ്ധീകരിച്ചിരുന്നു. അത് വാര്‍ത്ത ചുരണ്ടി ന്യൂസ് സൈറ്റുകള്‍ പുനപ്രസിദ്ധീകരിക്കുകയും ചെയ്തിട്ടുണ്ട്. സാമ്പത്തികപ്രതിസന്ധിയില്‍പ്പെട്ട ചാനലിലെ മാനേജ്‌മെന്റ് തലത്തിലുള്ള അഴിമതിക്കെതിരെ ജീവനക്കാര്‍ പ്രതികരിച്ചതിനെ തുടര്‍ന്ന് എക്‌സിക്യുട്ടീവ് എഡിറ്റര്‍ എം.പി.ബഷീര്‍ ഉള്‍പ്പെടെയുള്ളവരെ പുറത്താക്കുകയും അതില്‍ പ്രതിഷേധിച്ച് വാര്‍ത്താസംഘം ഒന്നടങ്കം പ്രവര്‍ത്തനം നിര്‍ത്തുകയുമായിരുന്നു. സമരത്തില്‍ പങ്കെടുക്കുന്നില്ലാത്ത ജീവനക്കാരുടെ സഹായത്തോടെ പുതിയ നിയമനങ്ങള്‍ നടത്തിയെങ്കിലും പ്രശ്‌നങ്ങള്‍ പൂര്‍ണമായി പരിഹരിച്ചിട്ടില്ല. ജീവനക്കാര്‍ വിശദീകരണക്കുറിപ്പു പുറത്തിറക്കിയ ഇന്ത്യാവിഷന്‍ വെബ്‌സൈറ്റിന്റെ പ്ലഗ് ഇന്നലെ വലിച്ചൂരിയത് ഇതുവരെ കുത്തിയിട്ടില്ല.

പുടിനെ വെള്ളപൂശുന്നതില്‍ പ്രതിഷേധിച്ചാണ് കഴിഞ്ഞയാഴ്ച റഷ്യ ടുഡേയിലെ അവതാരക ലിസ് വാള്‍ ലൈവായി രാജിവച്ചൊഴിഞ്ഞത്. റഷ്യ-യുക്രെയ്ന്‍ രാഷ്ട്രീയസംഭവവികാസങ്ങള്‍ ലോകം ശ്രദ്ധിച്ചുകൊണ്ടിരിക്കുകയായതുകൊണ്ട് ലിസ്‌മോള്‍ടെ രാജിയും ലോകശ്രദ്ധ നേടി. അങ്ങനെയാണ് കഴിഞ്ഞയാഴ്ച ഇന്ത്യാവിഷനും അത് വാര്‍ത്തയാക്കിയത്. ദൃശ്യം സിനിമ കണ്ടതിനു ശേഷം കേരളത്തില്‍ കുറ്റവാളികള്‍ പെരുകിയിട്ടുണ്ടെന്നു പറയുന്നത് ശരിയാണെങ്കില്‍ ഇന്ത്യാവിഷനിലെ സാങ്കേതികപ്രശ്‌നങ്ങള്‍ക്കു കാരണം ലിസിന്റെ രാജിയും അതിനു കാരണമായ യുക്രെയ്ന്‍ പ്രതിസന്ധിയുമാണെന്നു വാദിക്കാവുന്നതേയുള്ളൂ.

മൊത്തത്തില്‍ മാധ്യമരംഗത്ത് മുല്ലപ്പൂവിപ്ലവത്തിന്റെ സമയമായതുകൊണ്ടാവാം മാതൃഭൂമി മുതലാളി എം.പി.വീരേന്ദ്രകുമാറിന്റെ പാലക്കാട്ടെ അത്താഴം മുടക്കുമെന്ന ഭീഷണിയുമായി ഒരു മാതൃഭൂമി ജീവനക്കാരന്‍ തന്നെ രംഗത്തെതതിയിരിക്കുന്നത്. സര്‍ക്കാര്‍ നടപ്പാക്കിയ ശമ്പളവര്‍ധന നല്‍കണമെന്നാവശ്യപ്പെട്ടതിനു പ്രതികാരമായി മാതൃഭൂമി ഗുാഹത്തിയിലേക്കു സ്ഥലം മാറ്റിയ ലേഖകന്‍ കെ.ശ്രീജിത്താണ് പാലക്കാട്ട് വീരനെതിരെ മല്‍സരിക്കുന്നത്. ജനങ്ങള്‍ക്കുമുന്നില്‍ ജനാധിപത്യവാദിയും സാംസ്‌കാരികനായകനുമായി അറിയപ്പെടുന്ന വീരേന്ദ്രകുമാര്‍ ഒരു സമരത്തിന്റെ പേരില്‍ മാതൃഭൂമിയിലെ ജീവനക്കാരെ അതിക്രൂരമായി പീഡിപ്പിക്കുന്നതിന്റെ കഥകള്‍ ലോകത്തെ അറിയിക്കാന്‍ മറ്റു വഴികളൊന്നുമില്ലാത്തതുകൊണ്ടാണ് പാലക്കാട്ട് മല്‍സരിക്കുന്നത് എന്നാണ് ശ്രീജിത് പറയുന്നത്.

ആം ആദ്മി: ഒരു താത്വിക അവലോകനം

പറഞ്ഞതുപോലെ താത്വികമായ ഒരു അവലോകനമാണ് ഞാനുദ്ദേശിക്കുന്നത്. ആം ആദ്മി പാര്‍ട്ടിക്കെതിരെയും ഞങ്ങളുടെ നേതാവായ അരവിന്ദ് കേജ്‌രിവാളിനെതിരെയും സംഘടിതവും അസംഘടിതവുമായ അനേകം ആക്രമണങ്ങള്‍ നടന്നുകൊണ്ടിരിക്കുന്ന സാഹചര്യത്തിലാണ് ഇത്തരത്തില്‍ ഒരവലോകനത്തിന് ഞാന്‍ ശ്രമിക്കുന്നത്. അരവിന്ദ് കേജ്‌രിവാള്‍ ഞങ്ങളുടെ ദൈവമാണ്. അദ്ദേഹം എന്തു ചെയതാലും അത് രാജ്യത്തെ അഴിമതി തുടച്ചുനീക്കുന്നതിനും സാധാരണക്കാരെയും പാവപ്പെട്ടവരെയും ഉദ്ധരിക്കുന്നതിനും അംബാനിയെ ഒരു പാഠം പഠിപ്പിക്കുന്നതിനും വേണ്ടിയായിരിക്കും എന്നു ഞാന്‍ ഉറച്ചു വിശ്വസിക്കുന്നു.

പണ്ട് അണ്ണാ ഹസാരെ മഹാത്മാഗാന്ധിയെക്കാള്‍ മഹാനാണെന്നു പറഞ്ഞ് ന്യൂജനറേഷന്‍കാര്‍ ഹസാരെഭക്തിഗാനങ്ങള്‍ പാടി നടന്ന കാലത്ത് അദ്ദേഹം കുഴപ്പക്കാരനാണെന്നും ആ ഗാന്ധിയന്‍ പ്രഭാവം നിലനില്‍ക്കില്ലെന്നും ചൂണ്ടിക്കാട്ടി പോസ്റ്റുകളിപ്പോള്‍ ഹസാരെ ഫാന്‍സ് എന്നെ കൊന്നില്ലന്നേയുള്ളൂ. ഇപ്പോള്‍ ഹസാരെ എവിടെക്കിടക്കുന്നു, അന്നു മെഴുകുതിരി പ്രദക്ഷിണം നടത്തിയ ഫാന്‍സുകാര്‍ എവിടെ കിടക്കുന്നു. അതുപോലെ തന്നെ ആം ആദ്മി പാര്‍ട്ടി ഒരു താല്‍ക്കാലിക പ്രതിഭാസം മാത്രമാണെന്നും കേജ്‌രിവാള്‍ അപകടകാരിയാണെന്നും ചൂണ്ടിക്കാട്ടി പോസ്റ്റിട്ടപ്പോള്‍ ആം ആദ്മി അനുഭാവികള്‍ കൂട്ടത്തോടെ വന്ന് ലാല്‍സലാം, ജയ് ചിഞ്ചോ എന്നൊക്കെ പറയുന്നതുപോലെ #@ യു, #@ യൂ എന്നു മുദ്രാവാക്യം വിളിച്ചു പോയിരുന്നു.

പിന്നീട്, ഞാന്‍ ആം ആദ്മിയെപ്പറ്റി കൂടുതല്‍ പഠിച്ചു, ആഴത്തില്‍ മനസ്സിലാക്കി. കാര്യങ്ങള്‍ മനസ്സിലായപ്പോള്‍ ഞാനും ആം ആദ്മിയായി. യേശുക്രിസ്തുവിനെപ്പോലെ മഹാത്മാഗാന്ധിയെപ്പോലെ, മാര്‍ട്ടിന്‍ ലൂതര്‍ കിങ്ങിനെപ്പോലെ ലോകത്തെയാകെയും ഇന്ത്യയെ തന്നെയും വഴിനടത്താനുള്ള കാഴ്ചപ്പാടും വിവേകവുമുള്ള മഹാനാണ് അരവിന്ദ് കേജ്‌രിവാള്‍ എന്നു ഞാന്‍ തിരിച്ചറിഞ്ഞു. എന്റെ കിടപ്പുമുറി മുതല്‍ ടോയ്‌ലറ്റില്‍ വരെ എല്ലായിടത്തും അദ്ദേഹത്തിന്റെ ചിത്രം വച്ചു ഞാന്‍ പൂജിക്കുന്നുണ്ട്. പറ്റുമ്പോഴൊക്കെ മുദ്രാവാക്യവും വിളിക്കുന്നുണ്ട്. ഈ സാഹചര്യത്തില്‍ അദ്ദേഹത്തിനെതിരെ ഉന്നയിക്കപ്പെടുന്ന ആരോപണങ്ങള്‍ക്കെല്ലാം മറുപടി നല്‍കുക എന്നതാണ് ഞാനുദ്ദേശിക്കുന്നത്.

അദ്ദേഹത്തിനെതിരെ മാധ്യമങ്ങള്‍ ഏറ്റവും ഒടുവിലായി ഉന്നയിക്കുന്നത് ജീവിച്ചിരിക്കുന്ന മൂന്ന് വിവരാവകാശ പ്രവര്‍ത്തകര്‍ രക്തസാക്ഷികളാണെന്നു പ്രഖ്യാപിച്ച് അവര്‍ക്ക് ആദരാജ്ഞലികള്‍ അര്‍പ്പിച്ചു എന്നതാണ്. അഹമ്മദാബാദില്‍ വച്ച് അദ്ദേഹം നാല് വിവരാവകാശ പ്രവര്‍ത്തകര്‍ക്കാണ് അദരാജ്ഞലികള്‍ അര്‍പ്പിച്ചത്. അതില്‍ മുന്നു പേരും ജീവിച്ചിരിക്കുന്നു എന്നതാണ് അംബാനി-കോണ്‍ഗ്രസ്-ബിജെപി പിംപുകളായ മാധ്യമങ്ങള്‍ കണ്ടുപിടിച്ചിരിക്കുന്നത്. അവര്‍ മരിച്ചോ ജീവിച്ചോ എന്നതാണോ ഇവിടെ പ്രധാനപ്പെട്ട കാര്യം എന്നാണ് എനിക്കു ചോദിക്കാനുള്ളത് ? ആപ്പ് വളരെ പഴക്കമുള്ള ഒരു പാര്‍ട്ടിയല്ല. കോണ്‍ഗ്രസിനും സിപിഎമ്മിനും ബിജെപിക്കുമൊക്കെ എത്രയെത്ര രക്തസാക്ഷികളാണുള്ളത് എന്നത് നോക്കണം. രക്തസാക്ഷികളുള്ള പാര്‍ട്ടിക്ക് വോട്ടു കിട്ടാന്‍ സാധ്യതയുണ്ടെന്നാണ് ചരിത്രം നമ്മെ പഠിപ്പിക്കുന്നത്. അറിഞ്ഞോ അറിയാതെയോ ഞങ്ങളുടെ നേതാവ് ജീവിച്ചിരിക്കുന്നവരെ കൂടി മരിച്ചവരായി പ്രഖ്യാപിച്ച് ആദരാജ്ഞലികള്‍ അര്‍പ്പിച്ചുണ്ടെങ്കില്‍ അതിലെന്താണ് ഇത്ര പരിഹസിക്കാനിരിക്കുന്നത്. ആം ആദ്മി പാര്‍ട്ടിക്ക് സ്വന്തമായി നാലു രക്തസാക്ഷികള്‍ ഉണ്ടാവുന്നതില്‍ അസൂയയും ഭിതിയും പൂണ്ട കോണ്‍ഗ്രസ്-ബിജെപി-അംബാനി അച്ചുതണ്ട് എന്തും ചെയ്യാന്‍ മടിക്കില്ല എന്നാണ് ഈ വാര്‍ത്തകളില്‍ നിന്നു മനസ്സിലാവുന്നത്.

ആം ആദ്മി ദേശീയ എക്‌സിക്യുട്ടീവ് അംഗമായ അശോക് അഗര്‍വാള്‍ ഞങ്ങളുടെ നേതാവിനെ അപഹസിച്ചു പാര്‍ട്ടി വിട്ടതും ഇതേ വൃത്തികെട്ട മാധ്യമങ്ങള്‍ വാര്‍ത്തയാക്കിയിട്ടുണ്ട്. കോണ്‍ഗ്രസില്‍ നിന്നും ബിജെപിയില്‍ നിന്നും എത്രയോ ആളുകള്‍ ഓരോ ദിവസവും വിട്ടുപോകുന്നു. അതൊക്കെ കൊടുത്താല്‍ പോരേ ഈ ചെറ്റകള്‍ക്ക്. ആം ആദ്മി തെരഞ്ഞെടുപ്പ് സീറ്റ് നല്‍കുന്നത് ഉന്നതര്‍ക്കാണെന്നും അതില്‍ സാധാരണക്കാര്‍ തഴയപ്പെടുകയാണെന്നും അശോക് അഗര്‍വാള്‍ ആരോപിച്ചു. പാര്‍ട്ടിക്ക് ദിശാബോധം നഷ്ടപ്പെട്ടിരിക്കുന്നുവെന്നും പാര്‍ട്ടി ജനങ്ങളില്‍ സംശയം ജനിപ്പിക്കുന്നുണ്ടെന്നും പറഞ്ഞാണ് അശോക് രാജി വച്ചിരിക്കുന്നത്. ഇത്രകാലം ആ പാര്‍ട്ടിയില്‍ പ്രവര്‍ത്തിച്ചിട്ടു പോലും ആം ആദ്മി പാര്‍ട്ടിയെപ്പറ്റി ഞാന്‍ മനസ്സിലാക്കിയ അത്ര പോലും അശോക് മനസ്സിലാക്കിയില്ല എന്നതു വേദനാജനകമാണ്. പിന്നെ, കോണ്‍ഗ്രസ്-ബിജെപി-അംബാനി അച്ചുതണ്ട് അശോകിനെയും വിലയ്‌ക്കെടുത്തിട്ടുണ്ടാവും എന്നത് പ്രത്യേകം എടുത്തു പറയേണ്ട കാര്യമില്ലല്ലോ.

മറ്റൊരു ആരോപണം ബാംഗ്ലൂരില്‍ ഞങ്ങളുടെ നേതാവിനൊപ്പം അത്താഴം കഴിക്കാന്‍ ആളൊന്നിന് 20,000 രൂപ വീതം വാങ്ങുന്നു എന്നുള്ളതാണ്. ഇത് സാധാരണക്കാരുടെ പാര്‍ട്ടിയാണ് എന്നത് എല്ലാവര്‍ക്കും അറിയാവുന്നതാണ്. സിപിഎമ്മുകാരും കോണ്‍ഗ്രസുകാരുമൊക്കെ ചെയ്യുന്നതുപോലെ വീടുവീടാന്തരം കയറിയിറങ്ങി ബക്കറ്റു പിരിവു നടത്തി സാധാരണക്കാരെ ബുദ്ധിമുട്ടിക്കാന്‍ ആപ്പ് ശ്രമിക്കുന്നില്ല എന്നത് വളരെ പോസിറ്റീവായ കാര്യമാണ്. രാഹുല്‍ ഗാന്ധിയുടെ കൂടെയോ നരേന്ദ്ര മോദിയുടെ കൂടെയോ അംബാനിയുടെ കൂടെയോ അത്താഴം കഴിക്കാന്‍ ഈ നാട്ടില്‍ എത്ര പേര്‍ക്കു സാധിക്കും എന്നതു നമ്മളാലോചിക്കണം. 20,000 രൂപ കൊടുത്താല്‍ ഏതു ദരിദ്രവാസിക്കും ഞങ്ങളുടെ നേതാവിനോടൊപ്പം അത്താഴം കഴിക്കാം എന്നതിനെക്കാള്‍ വിപ്ലവകരമായി മറ്റെന്താണുള്ളത് ? 20,000 രൂപയൊക്കെ ഇന്നത്തെ കാലത്ത് ഒരു തുകയാണോ. ബാംഗ്ലൂരിലെ ആപ്പിന്റെ സ്ഥാനാര്‍ഥിയും മലയാളിയുമായ മുന്‍ ഇന്‍ഫോസിസ് ബോര്‍ഡ് അംഗവും സാധാരണക്കാരുടെ പ്രതീകവുമായ ബാലകൃഷ്ണനാണ് 20,000 രൂപയ്ക്ക് അരവിന്ദ് കേജ്‌രിവാളിനൊടൊപ്പം ഊണു കഴിക്കാന്‍ 200 പേര്‍ക്ക് അവസരം നല്‍കുന്നത്. കൂലിപ്പണിക്കാരും ചുമട്ടുകാരും ട്രേഡ് യൂണിയന്‍കാരും റിക്ഷാത്തൊഴിലാളികളും ഒക്കെയടങ്ങുന്ന സാധാരണക്കാര്‍ക്ക് ഇതൊരു സുവര്‍ണാവസരമായിരിക്കും എന്നതില്‍ സംശയമില്ല. ഇങ്ങനെയുള്ള പുരോഗമനപരമായ ആശയങ്ങളെപ്പോലും വിമര്‍ശിച്ചുകൊണ്ട് ആം ആദ്മി പാര്‍ട്ടിയെയും നേതാക്കന്‍മാരെയും കരി വാതി തേക്കാന്‍ ശ്രമിക്കുന്നവരോട് ഒന്നേ പറയാനുള്ളൂ- #@ യൂ !

അതേ സമയം, ദളിത് സംഘടനകളുടെ കൂട്ടായ്മയായ മഹാരാഷ്ട ഡെമോക്രാറ്റിക് ഫ്രണ്ട് എന്ന കൂട്ടായ്മയോടു സഹകരിക്കാമോ എന്നു ചോദിച്ച അബേദ്കറുടെ കൊച്ചുമകനായ പ്രകാശ് അബേദ്കറുടെ ആവശ്യം ആം ആദ്മി പാര്‍ട്ടി നിരസിച്ചതും ചിലര്‍ ബോധപൂര്‍വം പ്രചരിപ്പിക്കുന്നുണ്ട്. ആരുമായും സഖ്യം വേണ്ട എന്നതാണ് പാര്‍ട്ടിയുടെ നിലപാട് എന്നു കാണിച്ചാണ് ദളിതരെ അവഗണിച്ചതെന്നിരിക്കെ പാര്‍ട്ടി അംഗം പോലുമല്ലാത്ത മേധാ പട്കറെ ആപ്പ് മുംബൈയില്‍ സ്ഥാനാര്‍ഥിയാക്കി എന്നത് കോണ്‍ഗ്രസ്-ബിജെപി-അംബാനി പിംപുകളെ പ്രകോപിപ്പിച്ചിട്ടുണ്ട്. എ.കെ.ആന്റണിയെയും വി.എസ്.അച്യുതാനന്ദനെയും ഇറോം ഷര്‍മിളയെയുമൊക്കെ ആപ്പിലേക്കു ക്ഷണിച്ച കേജ്്‌രിവാള്‍ പ്രകാശ് അംബേദ്കറെ അവഗണിച്ചത് സെലബ്രിറ്റികളെ മാത്രം മതി എന്നതുകൊണ്ടാണ് പിംപുകള്‍ പറയുന്നത്. കഷ്ടം എന്നല്ലാതെ എന്തു പറയാന്‍.

അതുപോലെ അനേകം അനേകം നിസ്സാര പ്രശ്‌നങ്ങളില്‍ ആം ആദ്മിയെ കരിവാരി തേക്കാന്‍ കോണ്‍ഗ്രസ്-ബിജെപി-അംബാനി അച്ചുതണ്ടിന്റെ ഭാഗമായ മാധ്യമങ്ങള്‍ കുല്‍സിത ശ്രമങ്ങള്‍ നടത്തിക്കൊണ്ടിരിക്കുകയാണ്. ദില്ലിയില്‍ സത്യപ്രതിജ്ഞ ചെയ്തപ്പോള്‍ ചടങ്ങിന് 13 ലക്ഷം രൂപ ചിലവഴിച്ചു എന്നതും അതില്‍ പകുതിയും സത്യപ്രതിജ്ഞയുടെ പബ്ലിസിറ്റിക്കു വേണ്ടിയായിരുന്നെന്നും ചിലര്‍ വിവരാവകാശ നിയമപ്രകാരം അന്വേഷിച്ചു കണ്ടെത്തി വാര്‍ത്ത കൊടുത്തു. ഇതൊക്കെ ഒരു വാര്‍ത്തയാണോ ? അല്ലെങ്കിലും ആം ആദ്മി പാര്‍ട്ടിക്കും നേതാക്കന്‍മാര്‍ക്കുമെതിരെ വിവരങ്ങള്‍ ശേഖരിക്കാനായി വിവരാവകാശനിയമം ദുരുപയോഗിക്കുന്നത് മര്യാദയാണോ ?

ആം ആദ്മി വെബ്‌സറ്റില്‍ കൊടുത്ത ഇന്ത്യയുടെ ഭൂപടത്തില്‍ കശ്മീരിന്റെ പല ഭാഗങ്ങളും പാകിസ്ഥാന്റെ ഭാഗമായി കാണിച്ചത് സോഷ്യല്‍ മീഡിയയിലെ കോണ്‍ഗ്രസ്-ബിജെപി-അംബാനി പിംപുകള്‍ വലിയ വിവാദമാക്കിയിരുന്നു. ഇവിടെ ഒരു കാര്യം മനസ്സിലാക്കേണ്ടത് ഇത് സാധാരണക്കാരുടെ പാര്‍ട്ടിയാണ് എന്നതാണ്. ഇന്നാട്ടിലെ എത്ര സാധാരണക്കാര്‍ക്ക് ഇന്ത്യയുടെ മാപ്പ് കൃത്യമായി വരയ്ക്കാനറിയാം എന്നു ഞാന്‍ ചോദിക്കുകയാണ് ? ഭരണഘടന, നിയമങ്ങള്‍, ചട്ടങ്ങള്‍, രാഷ്ട്രീയമര്യാദ, മകനേ ഇതിന്ത്യയുടെ ഭൂപടം തുടങ്ങിയ അനേകം വിഷയങ്ങളില്‍ മറ്റു പാര്‍ട്ടികളെക്കാള്‍ വ്യത്യസ്തമായ നിലപാടുകളാണ് ആപ്പ് ഇതുവരെ എടുത്തിട്ടുള്ളത് എന്നത് എല്ലാവര്‍ക്കും അറിയാവുന്നതാണ്.

കേജ്‌രിവാളിന്റെ സ്വകാര്യവിമാനയാത്രയുമായി ബന്ധപ്പെട്ടാണ് മറ്റൊരു വിവാദം. സാധാരണക്കാരുടെ പ്രതിനിധിയാണ് അദ്ദേഹം എന്നിരിക്കെ അദ്ദേഹം ചാര്‍ട്ടേര്‍ഡ് വിമാനത്തില്‍ നമ്മുടെ തലയ്ക്കു മീതെ പറക്കുന്നുണ്ടെങ്കില്‍ അത് സാധാരണക്കാരുടെ വിജയമാണ് എന്നുറച്ചു പറയാന്‍ എനിക്ക് അഭിമാനമയുള്ളൂ. ബിജെപി-കോണ്‍ഗ്രസ് നേതാക്കള്‍ ചാര്‍ട്ടേര്‍ഡ് വിമാനം ഉപയോഗിക്കുന്നതിനെ എതിര്‍ക്കുമ്പോള്‍ തന്നെ സ്വന്തം നിലയ്ക്ക് ചാര്‍ട്ടേര്‍ഡ് വിമാനം ഉപയോഗിക്കുകയും സാധാരണക്കാരന്റെ പ്രതീകമായി നിലകൊള്ളാന്‍ കഴിയുന്നതും ഈ നാട്ടിലെ കൂലിപ്പണിക്കാരും ചുമട്ടുകാരും ട്രേഡ് യൂണിയന്‍കാരും റിക്ഷാത്തൊഴിലാളികളും ഒക്കെയടങ്ങുന്ന സാധാരണക്കാരുടെ വിജയമാണ് എന്നു നിസ്സംശയം പറയാം.

കേജ്‌രിവാള്‍ തന്റെ അഭിമുഖത്തിലെ ഏതൊക്കെ ഭാഗങ്ങള്‍ എങ്ങനെയൊക്കെ നല്‍കണമെന്നു പറഞ്ഞുകൊണ്ട് മാധ്യമപ്രവര്‍ത്തകനെ സ്വാധീനിക്കുന്ന ഒരു വിഡിയോ യൂ ട്യൂബില്‍ പ്രചരിക്കുന്നുണ്ട്. ആ വിഡിയോ ചിത്രീകരിച്ചവരും പ്രചരിപ്പിച്ചവരും കോണ്‍ഗ്രസ്-ബിജെപി-അംബാനി പിംപുകളാണെന്നത് പ്രത്യേകം എടുത്തു പറയുന്നില്ല. മാധ്യമങ്ങള്‍ കൂട്ടത്തോടെ ആം ആദ്മിയെ നശിപ്പിക്കാന്‍ ശ്രമിക്കുന്നു എന്നാരോപിക്കുമ്പോള്‍ തന്നെ മാധ്യമപ്രവര്‍ത്തകനെ സ്വാധീനിക്കാന്‍ കേജ്‌രിവാളിനു കഴിയുന്നുണ്ടെങ്കില്‍ അത് മാധ്യമസ്വാതന്ത്ര്യത്തിന്റെയും ജനാധിപത്യത്തിന്റെയും വിജയമാണ് എന്നുറപ്പിച്ചു പറയാം.

ഏറ്റവും ഒടുവിലായി കേജ്‌രിവാള്‍ ഏകാധിപതിയാണ് എന്നുള്ള ആരോപണം. കുറെക്കാലമായി ഇതു കേള്‍ക്കുന്നു. പാര്‍ട്ടി പ്രവര്‍ത്തകരുടെ അഭിപ്രായം പരിഗണിക്കാതെ കേജ്‌രിവാള്‍ വളരെ ഏകാധിപത്യപരമായി സ്ഥാനാര്‍ഥിനിര്‍ണയം നടത്തുന്നു എന്നാരോപിച്ച് ഒരു സംഘം ആം ആദ്മി പ്രവര്‍ത്തകര്‍ ദൈവതുല്യനായ നേതാവിന്റെ വീടിനു മുന്നില്‍ പ്രതിഷേധിക്കുക വരെ ചെയ്തു. ഇതിനു പിന്നിലും കോണ്‍ഗ്രസ്-ബിജെപി-അംബാനി അച്ചുതണ്ടാണെന്ന് വിവരമുള്ള ആര്‍ക്കും മനസ്സിലാവും. അല്ലെങ്കിലും ഇത്രകാലം ഇവിടെ വിവിധ പാര്‍ട്ടികള്‍ ജനാധിപത്യപരമായി പ്രവര്‍ത്തിച്ചിട്ട് എന്തു നേടി എന്നാണ് എനിക്കു ചോദിക്കാനുള്ളത്. ആ സാഹചര്യത്തില്‍ ഏകാധിപതിയായ ഒരു നേതാവുള്ള പാര്‍ട്ടിക്ക് ഭാരതത്തിന്റെ ഭാവിയില്‍ വലിയ സാധ്യതയാണുള്ളത്. ആരൊക്കെ എന്തൊക്കെ പറഞ്ഞാലും ആം ആദ്മി പാര്‍ട്ടിയിലുള്ള എന്റെ വിശ്വാസവും അരവിന്ദ് കേജ്‌രിവാള്‍ എന്ന അവതാരപുരുഷനോടുള്ള ഭക്തിയും അണുവിട കുറയ്ക്കാന്‍ ആര്‍ക്കും സാധിക്കില്ല. നരേന്ദ്ര മോദിയും രാഹുല്‍ ഗാന്ധിയും മുകേഷ് അംബാനിയും കൂടി ഒരുമിച്ചു വന്നു കാലുപിടിച്ചാലും ഇല്ല. അതാണ് സാധാരണക്കാരന്റെ പവര്‍.

ജയ് ചിഞ്ചോ… അല്ല, #@ യു ഓള്‍ !

അഭ്യാസം:-
ബ്രാക്കറ്റില്‍ നിന്നു ശരിയായ ഉത്തരം തിരഞ്ഞെടുക്കുക.

‘#@ യൂ’ എന്നതുകൊണ്ട് കവി എന്താണുദ്ദേശിച്ചിരിക്കുന്നത് ?
(ലവ് യു, കിസ്സ് യു, കില്‍ യു, ഫക്ക് യു, മിസ്സ് യു)

മാധ്യമസ്വാതന്ത്ര്യത്തിന് ഒരു ഹഗ്ഗ്

എറണാകുളം സിജെഎം കോടതിക്കും പാലാരിവട്ടം പൊലീസിനും എന്റെയൊരു ആലിംഗനം. പത്രസ്വാതന്ത്ര്യം അഭിപ്രായ സ്വാതന്ത്ര്യം തുടങ്ങിയ വലിയ മൂല്യമുള്ളതെന്നു പ്രചരിപ്പിക്കുന്ന സംഗതികള്‍ നോക്കിയും കണ്ടും ഉപയോഗിക്കണമെന്നും വാര്‍ത്തകള്‍ കൊടുക്കുമ്പോഴും അഭിപ്രായങ്ങള്‍ പറയുമ്പോഴും ഒന്നാം കക്ഷിയുടെയും രണ്ടാം കക്ഷിയുടെയും കുലം, ജാതി, സമുദായം തുടങ്ങിയവയും വിലയിരുത്തുകയും അതനുസരിച്ച് നിലപാടുകള്‍ എടുക്കുകയും വേണമെന്നും എത്രയോ കാലമായി പലരും പറഞ്ഞിട്ടും ഇവറ്റകള്‍ മൈന്‍ഡ് ചെയ്യുന്നേയില്ല. ഇതോടെ ആ പാഠം കുബുദ്ധികളായ മാധ്യമപ്രവര്‍ത്തകര്‍ക്കു മനസ്സിലാകുമെന്നു പ്രതീക്ഷിക്കുന്നു.

കേരളത്തിന്റെ അമ്മയായ, സര്‍വ്വേശ്വരി പരിശുദ്ധ മാതാ അമൃതാനന്ദമയീ ദേവിക്കെതിരെ കല്ലുവച്ച നുണകള്‍ എഴുതി പ്രസിദ്ധീകരിച്ച വിദേശ ചാരവനിത ഗെയില്‍ ട്രെഡ്‌വെല്ലിനെതിരെയും ആ ചാരവനിതയുടെ പുസ്തകത്തെപ്പറ്റി വാര്‍ത്തകള്‍ കൊടുത്ത ഇന്ത്യാവിഷന്‍, മീഡിയവണ്‍, റിപ്പോര്‍ട്ടര്‍ തുടങ്ങിയ ചാനലുകള്‍ക്കും മാധ്യമം, തേജസ് തുടങ്ങിയ പത്രങ്ങള്‍ക്കുമെതിരെയും കേസെടുക്കുന്നതിലൂടെ ജനാധിപത്യത്തെയും അഭിപ്രായസ്വതന്ത്ര്യത്തെയും മാധ്യമസ്വാതന്ത്ര്യത്തെയും മഹത്വവല്‍ക്കരിച്ചിരിക്കുകയാണ്. കേസെടുത്തതുകൊണ്ടു മാത്രം പ്രശ്‌നം തീരുന്നില്ല. ഈ മാധ്യമസ്ഥാപനങ്ങള്‍ അടച്ചുപൂട്ടുകയും അവരുടെ സ്ഥാവരജംഗമ വസ്തുക്കളെല്ലാം കൂടി പിടിച്ചെടുത്ത് അമ്മയുടെ മഠത്തിന്റെ ഭാഗമാക്കുകയും വേണം എന്നാണ് യഥാര്‍ഥ സെക്യുലറിസ്റ്റുകള്‍ ആവശ്യപ്പെടുന്നത്.

സോഷ്യലിസ്റ്റ് സെക്യുലറിസ്റ്റ് ഡെമോക്രാറ്റിക് റിപ്പബ്ലിക്കില്‍ മതവികാരം വ്രണപ്പെടുത്തുന്നത് വളരെ നീചമായ പ്രവൃത്തിയാണ്. കോടതിയുടെ ഈ ഇടപെടല്‍ മതവികാരത്തിന് ഒരു ബാന്‍ഡേജായിത്തീരുമെന്നതില്‍ സംശയമില്ല. നിയമം അതിന്റെ വഴിക്കു പോകുമെന്ന യുഡിഎഫ് പഴഞ്ചൊല്ലിന്റെ ഭാഗമാണ് കോടതി നടപടി എങ്കിലും എന്റെ പറമ്പില്‍ തൂറണ്ട, നിന്റെ പറമ്പില്‍ തൂറിക്കോ എന്ന പഴയ സെക്യുലര്‍ ഭക്തിഗാനത്തിന്റെ പൂര്‍ത്തീകരണം കൂടിയാണിതെന്നു നിസ്സംശയം ചൂണ്ടിക്കാണിക്കാം.

കേരളത്തെ ദൈവത്തിന്റെ സ്വന്തം നാട് എന്നു വിശേഷിപ്പിച്ചതിനു ശേഷം ഇവിടുത്തെ മാധ്യമങ്ങള്‍ ദൈവങ്ങളെ അപകീര്‍ത്തിപ്പെടുത്തി വാര്‍ത്ത കൊടുക്കുന്നത് ഒരിക്കലും നീതികരിക്കാനാവുന്നതല്ല. അപ്പോള്‍ അമേരിക്കയില്‍പ്പോയി അഭിമുഖം നടത്തിയ ജോണ്‍ ബ്രിട്ടാസിനും കൈരളിക്കുമെതിരെ കേസില്ലാത്തത് എന്തുകൊണ്ട് എന്നു പലരും സംശയിക്കും. കമ്യൂണിസ്റ്റുകാര്‍ ദൈവം ഇല്ലെന്നു വാദിക്കുന്നവരായതുകൊണ്ടും അമേരിക്കയില്‍ വച്ചു നടത്തിയ അഭിമുഖം ആയതുകൊണ്ട് അതിനു നയതന്ത്ര പരിരക്ഷ ലഭിക്കുമെന്നതുകൊണ്ടുമാണ് അതെന്ന് ഒറ്റനോട്ടത്തില്‍ മനസ്സിലാക്കാവുന്നതേയുള്ളൂ.

ഈ സാഹചര്യത്തില്‍ ടിപി ചന്ദ്രശേഖരന്‍ വധത്തെപ്പറ്റിയും അതില്‍ സിപിഎമ്മിന്റെ പങ്കിനെപ്പറ്റിയും വാര്‍ത്ത നല്‍കിയ ദേശാഭിമാനിയും കൈരളിയും ഒഴികെയുള്ള മാധ്യമങ്ങള്‍ക്കെതിരെയും ഉടനെ കേസെടുക്കുമെന്നു പ്രതീക്ഷിക്കാം. രാഷ്ട്രീയവികാരം വ്രണപ്പെടുത്തി എന്ന കുറ്റത്തിന് പാര്‍ട്ടിക്ക് പരാതിയുമായി കോടതിയെ സമീപിക്കാന്‍ ന്യായമുണ്ട്. സൂര്യനെല്ലി, പറവൂര്‍, വിതുര പീഡനക്കേസുകള്‍ ഈ സാഹചര്യത്തില്‍ പുനപരിശോധിക്കുകയും ഇരകള്‍ അന്യസമുദായത്തില്‍പ്പെട്ട പ്രബലരായ ആളുകള്‍ക്കെതിരെ ആരോപണം ഉന്നയിച്ചിട്ടുണ്ടെങ്കില്‍ ഇരകള്‍ക്കെതിരെ കേസെടുക്കുകയും ചെയ്യാവുന്നതേയുള്ളൂ.

അനേകം ആളുകള്‍ ബഹുമാനിക്കുന്ന ആരാധിക്കുന്ന അബ്ദുല്ലക്കുട്ടിക്കതിരെ ആരോപണമുന്നയിക്കുകയും പരാതി കൊടുക്കുകയും ചെയ്ത സരിത നായര്‍ അതിനാല്‍ത്തന്നെ മതവികാരം വ്രണപ്പെടുത്തിയിരിക്കുകയാണ്. പാലാരിവട്ടം പൊലീസിന് കണ്ണുമടച്ച് സരിതക്കെതിരെ കേസെടുക്കാം. സമൂഹത്തില്‍ നിന്നും ജാതിമത-ഭിന്നതകള്‍ നീക്കുന്നതോടൊപ്പം സമത്വസുന്ദരമായ ഒരു കേരളം കെട്ടിപ്പടുക്കാന്‍ ഈ നടപടികള്‍ക്കാവട്ടെ എന്നു പ്രത്യാശിക്കുന്നു. കേന്ദ്രത്തില്‍ നരേന്ദ്ര മോദിയുടെ നേതൃത്വത്തില്‍ ഒരു സെക്യൂലര്‍ ഭരണകൂടം നിലവില്‍ വരുന്നതോടെ ഈ സ്വപ്‌നങ്ങള്‍ യാഥാര്‍ഥ്യമാകുമെന്ന് ഉറച്ചു വിശ്വസിക്കുന്നു.