സൈബര്‍ ബുദ്ധിജീവി ശുദ്ധികലശം

ശബരിമല ക്ഷേത്രസന്നിധിയില്‍ ആചാരം ലഘിച്ച് മേല്‍ശാന്തി മകളെ കൊണ്ടുപോയി ദര്‍ശനം നടത്തിയതും അതെത്തുടര്‍ന്ന് ദേവസ്വം ബോര്‍ഡ് അവിടെ പരിഹാരക്രിയകള്‍ നടത്തുകയും ചെയ്തതിനെതിരെ പ്രബുദ്ധരായ ആളുകളുടെയും സാസ്‌കാരികപ്രവര്‍ത്തകരുടെയും ബുദ്ധിജീവികളുടെയും നേതൃത്വത്തില്‍ വലിയ പ്രതിഷേധങ്ങള്‍ നടന്നുകൊണ്ടിരിക്കുകയാണല്ലോ. ഞാനൊരു ബുദ്ധിജീവിയോ സംസ്‌കാരസമ്പന്നനോ അല്ല. ബുദ്ധിയെക്കാളും സംസ്‌കാരത്തെക്കാളും മനുഷ്യന് ഉപകാരപ്പെടുന്നത് കോമണ്‍സെന്‍സ് ആണെന്നാണ് എന്റെ അനുഭവം. അതുകൊണ്ടു തന്നെ സംസ്‌കാരിക കേരളത്തെ മുറിവേല്‍പിച്ചു കളഞ്ഞ ഈ വിഷയത്തില്‍ എന്റെ ചില അഭിപ്രായങ്ങള്‍ ഇവിടെ പങ്കു വയ്ക്കാനാഗ്രഹിക്കുന്നു.

12 വയസുള്ള പെണ്‍കുട്ടി സന്നിധാനത്തു കാലു കുത്തിയതിനെ തെറ്റ് എന്നു വിശേഷിപ്പിക്കുന്നതിന്റെ യുക്തിയെ ആണ് പലരും ചോദ്യം ചെയ്യുന്നത്. ആര്‍ത്തവം ആരംഭിച്ചവരും അവസാനിക്കാത്തവരുമായ ഒരു സ്ത്രീയും സന്നിധാനത്ത് ദര്‍ശനം നടത്താന്‍ പാടില്ല എന്ന നിയമം ദേവസ്വം ബോര്‍ഡ് പരിഷ്‌കരിച്ച് 10 വയസ്സിനും 50 വയസ്സിനും ഇടയിലുള്ള സ്ത്രീകള്‍ ശബരിമല സന്നിധാനത്ത് ദര്‍ശനം നടത്തേണ്ടതില്ല എന്നാക്കി മാറ്റുകയണ് ചെയ്തത് എന്നാണ് ഞാന്‍ മനസ്സിലാക്കുന്നത്. അതൊരു പഴയ ചട്ടമാണ്. മാറ്റുവിന്‍ ചട്ടങ്ങളെ എന്നു കവി പാടിയത് ഇത്തരം ചട്ടങ്ങള്‍ ഒക്കെക്കൂടി ഉള്‍പ്പെടുത്തിയായിരിക്കാം.

അയ്യപ്പന് പെണ്‍കുട്ടികളോട് അയിത്തമുണ്ടോ, ഒരു 12 വയസ്സുകാരി പ്രവേശിച്ചാല്‍ സന്നിധാനം എങ്ങനെയാണ് അശുദ്ധമാകുന്നത് എന്നു തുടങ്ങി അനേകം അനേകം ചോദ്യങ്ങളാണ് ഉയര്‍ന്നു കേള്‍ക്കുന്നത്. എല്ലാം യുക്തിസഹജമായ ചോദ്യങ്ങള്‍ തന്നെ. എന്നാല്‍, ശബരിമലയിലെ ഈ ആചാരം ഇന്നോ ഇന്നലെയോ തുടങ്ങിയതല്ല. ഇന്ത്യയുടെ വിവിധ ഭാഗങ്ങളില്‍ നിന്നായി വര്‍ഷാവര്‍ഷം ലക്ഷക്കണക്കിനു ഭക്തജനങ്ങള്‍ വന്നുപോകുന്ന ശബരിമലയിലെ ആചാരാനുഷ്ഠാനങ്ങളുടെ തുടര്‍ച്ചയാണ് ഇത്. ഇവ കാലോചിതമായി പരിഷ്‌കരിക്കുന്നതിലോ മാറ്റങ്ങള്‍ വരുത്തുന്നതിലോ ഒന്നും ഒരു തെറ്റുമില്ല.

എന്നാല്‍, സന്നിധാനത്ത് 12 വയസ്സുള്ള മകളെയും കൊണ്ടു പോയത് അങ്ങനെയൊരു ചട്ടം നിലവിലുണ്ട് എന്നറിയാത്ത ഒരാളല്ല. അവിടുത്തെ ആചാരങ്ങളെക്കുറിച്ച് വളരെ വ്യക്തമായ ബോധ്യമുള്ള മേല്‍ശാന്തിയാണ്. നിലവില്‍ ലക്ഷക്കണക്കിനു വിശ്വാസികള്‍ കഠിനവ്രതമെടുത്ത് പ്രാര്‍ഥനാപൂര്‍വം പടിചവിട്ടുന്ന സന്നിധാനത്ത് നിലനില്‍ക്കുന്ന ഒരു ആചാരം ലംഘിക്കുന്നത് ഈ വിശ്വാസികള്‍ക്ക് ബുദ്ധിമുട്ടുണ്ടാക്കുമോ ഇല്ലയോ എന്നതാണ് എന്റെ ചോദ്യം. അതിനു മറുപടി പറയേണ്ടത് ഇതിലൊന്നും വിശ്വാമില്ലാത്ത ആളുകളല്ല എന്നതും ചൂണ്ടിക്കാണിക്കട്ടെ.

ഇനി 12 വയസുള്ള പെണ്‍കുട്ടിയോട് എന്തിനീ ക്രൂരത എന്നതാണ് സ്ത്രിപക്ഷവാദികളും പുരോഗമനവാദികളും യുക്തിവാദികളും എല്ലാം ചോദിക്കുന്നത്. എന്താണ് 12 വയസുള്ള പെണ്‍കുട്ടിയോട് ചെയ്ത ക്രൂരത ? പെണ്‍കുട്ടിയെ ശാസിക്കുകയോ ഭീഷണിപ്പെടുത്തുകയോ ഏതെങ്കിലും തരത്തിലുള്ള ശിക്ഷാനടപടികള്‍ക്കു വിധേയമാക്കുകയോ ചെയ്തിട്ടില്ല. തന്ത്രിയുടെ നേതൃത്വത്തില്‍ സന്നിധാനത്ത് ശുദ്ധിക്രിയകള്‍ നടത്തി എന്നതാണ് പെണ്‍കുട്ടിയോടു ചെയ്ത ക്രൂരതയും സ്ത്രീത്വത്തോടുള്ള അവഹേളനുമായി പലരും കാണുന്നത്. സ്ത്രീകള്‍ പ്രവേശിക്കാന്‍ പാടില്ല എന്ന ചട്ടം അബദ്ധജഢിലവും യുക്തിരഹിതവുമാണെന്നു വാദിക്കുന്നവര്‍ ഈ ശുദ്ധിപ്രക്രിയയെ പെണ്‍കുട്ടിയെ അവഹേളിക്കലായി ചിത്രീകരിക്കുന്നതിന്റെ യുക്തി എനിക്കു മനസ്സിലാവുന്നില്ല. രണ്ടും ഒരേ ആചാരത്തെ അടിസ്ഥാനമാക്കിയുള്ളതാണെന്നിരിക്കെ ഒന്ന് അബദ്ധവും മറ്റേത് അവഹേളനവുമാകുന്നതെങ്ങനെ ?

11 വയസ്സുകാരി സന്നിധാനത്ത് ചെന്നത് ആചാരലംഘനമല്ല എങ്കില്‍ അതിന്റെ തുടര്‍ച്ചയായി നടക്കുന്ന ശുദ്ധിക്രിയകള്‍ പെണ്‍കുട്ടിയെ അവഹേളിക്കലുമല്ല. അദ്യത്തേത് ആചാരലംഘനമാണ് എന്നുറച്ചു വിശ്വസിക്കുന്നവര്‍ക്ക് മാത്രമേ ശുദ്ധിക്രിയകളിലും വിശ്വസിക്കേണ്ട കാര്യമുള്ളൂ. ആചാരം ലംഘിച്ചതിന്റെ പേരില്‍ പെണ്‍കുട്ടിയെ ഏതെങ്കിലും തരത്തിലുള്ള ശിക്ഷാനടപടികള്‍ക്കു വിധേയമാക്കാത്തിടത്തോളം സാംസ്‌കാരികപ്രവര്‍ത്തകരുടെ ആശങ്കകള്‍ അടിസ്ഥാനരഹിതമാണ് എന്നാണ് എന്റെ വിനീതമായ അഭിപ്രായം.

ഇനി ശബരിമലയില്‍ സ്ത്രീകള്‍ക്കു പ്രവേശനം നല്‍കണം എന്നുള്ള വാദം നോക്കാം. അത് ഒരു സമുദായവുമായി ബന്ധപ്പെട്ട, വിശ്വാസങ്ങളുടെയും ആചാരങ്ങളുടെയും ഭാഗമായുള്ള പ്രശ്‌നമാണ്. പുരോഗമനം നടപ്പാക്കുമ്പോള്‍ അത് പുരോഗമനവാദികള്‍ക്കു ഹിതകരമാണോ എന്നതിനെക്കാള്‍ ആ വിശ്വാസങ്ങളെയും ആചാരങ്ങളെയും മുറുകെപ്പിടിക്കുന്ന വ്യക്തികള്‍ക്കു ഹിതകരമാണോ എന്നാണ് പരിശോധിക്കേണ്ടത്. ജനാധിപത്യം എന്നു പറയുമ്പോള്‍ ജനം എന്ന നിര്‍വചനത്തില്‍ പുരോഗമനവാദികള്‍ അവരെയും അവരെ അനുകൂലിക്കുന്നവരെയും മാത്രം കാണുന്നതിന്റെ പ്രശ്‌നമാണിത്. ശബരിമലയില്‍ സ്ത്രീകളെ പ്രവേശിപ്പിക്കണം എന്നത് വിശ്വാസികളുടെ പൊതു അഭിപ്രായമാണെങ്കില്‍ അതു നടപ്പാക്കണം. സാംസകാരിക-ബുദ്ധിജീവികളല്ല ഇവിടെ എല്ലാ കാര്യങ്ങളിലും വിധി പറയേണ്ടത്.

ദുരാചാരങ്ങളും സ്ത്രീവിവേചനവും പറിച്ചെറിയേണ്ടതു തന്നെയാണെന്ന കാര്യത്തില്‍ ഒരു സംശയവുമില്ല. എന്നാല്‍ അത് ലക്ഷക്കണക്കിനാളുകള്‍ വന്നു ചേരുന്ന ശബരിമലയില്‍ നിന്ന് ആരംഭിക്കുന്നതിനെക്കാള്‍ വിപ്ലവകരം അവനവന്റെ വീടുകളില്‍ നിന്നു തന്നെ ആരംഭിക്കുന്നതായിരിക്കുമെന്നു തോന്നുന്നു. പുരോഗമന വിപ്ലവ ചേച്ചിമാര്‍ പരിശുദ്ധമായി കാണുന്ന കിറ്റി പാര്‍ട്ടികളില്‍ കെട്ടിയോനെയും എഴുന്നള്ളിച്ചുകൊണ്ടുപോകാനുള്ള വിശാലമനസ്‌കത ആദ്യം കാണിക്കണം. ഭാര്യ അടുക്കളയില്‍ പണിയെടുക്കുമ്പോള്‍ ന്യൂസ് ചാനല്‍ ഓഫ് ചെയ്ത് അവിടെ പോയി നാലു പാത്രമെങ്കിലും കഴുകി വയ്ക്കാന്‍ ബുദ്ധിജീവികളും തയ്യാറാവണം. ശബരിമലയില്‍ സ്ത്രീകളെ പ്രവേശിപ്പിക്കുന്നതിനെക്കാള്‍ ആയിരം മടങ്ങ് ഇഫക്ടോടെ ഇതൊക്കെ സമൂഹത്തില്‍ ഗുണകരമായി പ്രതിഫലിക്കുമെന്നതില്‍ സംശയമില്ല. ആചാരങ്ങള്‍ നമ്മളെപ്പോലെയുള്ള മനുഷ്യര്‍ ഉണ്ടാക്കിയതാണ്. നമ്മുടെയൊക്കെ മനസ്സുകളില്‍ നിന്ന് അതിന്റെ വേരുകള്‍ മായുമ്പോള്‍ എല്ലായിടത്തു നിന്നും അവ മാഞ്ഞു പൊയ്‌ക്കൊള്ളും. ശുഭദിനം.

സുഗതകുമാരി ടീച്ചറെ പാഠം പഠിപ്പിക്കുമ്പോള്‍

സുഗതകുമാരി ടീച്ചറിനെതിരെ സോഷ്യല്‍ മീഡിയയില്‍ ഫെമിനിസ്റ്റുകളുടെയും സ്വാതന്ത്ര്യവാദികളുടെയും ധാര്‍മികരോഷം തിളച്ചുമറിയുകയാണ്. പെണ്‍കുട്ടികള്‍ക്ക് മൊബൈല്‍ ഫോണ്‍ വാങ്ങിക്കൊടുക്കരുതേ എന്നു ടീച്ചര്‍ അമ്മമാരോടു നടത്തിയ അപേക്ഷയ്ക്കുള്ള മറുപടിയായി ടീച്ചറെ പുരോഗമനം പഠിപ്പിക്കാനുള്ള ശ്രമത്തിലാണ് ന്യൂ ജനറേഷന്‍ തൈക്കിളവന്‍മാരും ഫ്രസ്‌ട്രേറ്റഡ് ഡെസ്പരേറ്റ് ഫെമിന്സ്റ്റുകളും. അവരോട് രണ്ടേ രണ്ടു കാര്യങ്ങളേ പറയാനുള്ളൂ. ഒന്ന്, അനുഭവങ്ങളുടെ വെളിച്ചത്തില്‍ സംസാരിക്കുന്ന ടീച്ചറെ അഹന്തയുടെ സ്റ്റാറ്റസ് കൊണ്ട് പാഠം പഠിപ്പിക്കാന്‍ ശ്രമിക്കരുത്. രണ്ട്, ടീച്ചര്‍ സംസാരിച്ചത് സ്‌കൂളില്‍ പഠിക്കുന്ന പെണ്‍കുട്ടികളുടെ അമ്മമാരോടാണ്. അതിന്റെ പൊരുള്‍ അവര്‍ക്കു മനസ്സിലാവുകയും ചെയ്യും.

സുഗതകുമാരി ടീച്ചര്‍ ഏതു കാലത്താണ് ജീവിക്കുന്നതെന്നാണ് പലരും ചോദിക്കുന്നത്. മൊബൈല്‍ ഫോണ്‍ ഇല്ലാതെ ഇന്നത്തെ കാലത്ത് എങ്ങനെ ജീവിക്കാനാവുമെന്നും ഏജ് ഓവറായതുകൊണ്ട് പുതുതലമുറയുടെ ആവശ്യങ്ങള്‍ ടീച്ചര്‍ക്ക് അനാവശ്യമാണെന്നു തോന്നുന്നതാണെന്നും ഒരു വിഭാഗം വാദിക്കുമ്പോള്‍ സ്ത്രീപക്ഷ രാഷ്ട്രീയം 90 ഡിഗ്രി ഉയര്‍ത്തിപ്പിടിച്ചിരിക്കുന്നവരുടെ രോഷം മറ്റൊരു വഴിക്കാണ്. മൊബൈല്‍ ഫോണ്‍ ഉള്ള പെണ്‍കുട്ടികള്‍ വഴി തെറ്റിപ്പോവുമെന്നും മിസ്ഡ് കോള്‍ വഴി പെണ്‍കുട്ടികള്‍ ചീത്തയായിപ്പോവുമെന്നും പറയാന്‍ മാത്രം സ്ത്രീവിരുദ്ധയാണോ ടീച്ചര്‍ എന്നാണ് അവര്‍ ചോദിക്കുന്നത്.

പ്രധാനമായും ടീച്ചറുടെ അഭ്യര്‍ഥന കേരളത്തിലെ പൊതുസമൂഹത്തോടുള്ളതായിരുന്നില്ല. തിരുവനന്തപുരം കോട്ടണ്‍ഹില്‍ സ്‌കൂളിലെ പൂര്‍വ വിദ്യാര്‍ഥി സംഗമത്തില്‍ പങ്കെടുക്കുമ്പോഴാണ് ടീച്ചര്‍ ഇക്കാര്യം പറഞ്ഞത്. അതായത് പെണ്‍പള്ളിക്കൂടത്തിലെ വിദ്യാര്‍ഥികളുടെ അമ്മമാരോടാണ് പെണ്‍കുട്ടികള്‍ക്ക് മൊബൈല്‍ വാങ്ങിക്കൊടുക്കരുതെന്നു ടീച്ചര്‍ പറഞ്ഞത്. ഇന്ത്യയിലും വിദേശത്തും സ്‌കൂളുകള്‍ കുട്ടികള്‍ മൊബൈല്‍ ഫോണ്‍ കൊണ്ടുവരുന്നത് പ്രോല്‍സാഹിപ്പിക്കുന്നതായി കേട്ടിട്ടില്ല എന്നു മാത്രമല്ല, പല സ്‌കൂളുകളും ഫൈനും ഇടാക്കാറുണ്ട്. പിന്നെ ഏതു സാഹചര്യത്തിലാണ് സൂഗതകുമാരി ടീച്ചര്‍ പറഞ്ഞത് വിവരക്കേടായി മാറുന്നത് എന്നു മനസ്സിലാവുന്നില്ല. ഇനി ടീച്ചറെ വിമര്‍ശിക്കുന്നവരില്‍ എത്ര പേര്‍ സ്‌കൂളില്‍ പഠിക്കുന്ന പെണ്‍മക്കള്‍ക്ക് മൊബൈല്‍ ഫോണ്‍ വാങ്ങി നല്‍കുകയും അത് സ്വതന്ത്രമായി യഥേഷ്ടം ഉപയോഗിക്കാന്‍ അനുമതി നല്‍കുകയും ചെയ്യും ?

ഫെമിനിസ്റ്റുകളുടെയും അവരുടെ ആരാധകരുടെയും പ്രശ്‌നം ഇതൊന്നുമല്ല. മൊബൈല്‍ ഫോണ്‍ സ്വന്തമായുള്ള സ്‌കൂള്‍ വിദ്യാര്‍ഥിനികള്‍ വഴിപിഴച്ചുപോകാന്‍ സാധ്യത ഏറെയാണ് എന്നു പറയാന്‍ ടീച്ചര്‍ക്കെങ്ങനെ ധൈര്യം വന്നു എന്നാണ് അവര്‍ ചോദിക്കുന്നത്. അങ്ങനെ പറയുന്നതിലൂടെ ടീച്ചര്‍ ഈ പെണ്‍കുട്ടികളുടെ ധാര്‍മികബോധത്തെ അവഹേളിക്കുകയും അവരുടെ സ്ത്രീസത്തയെ കരിവാരിതേക്കുകയും ചെയ്തു എന്നാണ് പ്രധാന ആരോപണം. നൂറുകണക്കിനു പെണ്‍കുട്ടികള്‍ വല്ലവരുടേയും കൂടെപ്പോയി അകാലത്തില്‍ ഗര്‍ഭമുണ്ടാക്കുകയും, അപ്രത്യക്ഷരാവുകയും, ആത്മഹത്യ ചെയ്യുകയും ചെയ്യുന്ന കേരളത്തില്‍ അതിന്റെയൊന്നും മൂലകാരണങ്ങള്‍ അറിയാതെ ദൈനംദിനം ഇത്തരം പ്രശ്‌നങ്ങളിലിടപെടുന്ന സുഗതകുമാരി ടീച്ചര്‍ നല്‍കിയ മുന്നറിയിപ്പിനെതിരെ പൊട്ടിത്തെറിക്കുന്ന ഫെമിനിസ്റ്റുകള്‍ക്കും ഭക്തന്‍മാര്‍ക്കും നല്‍കാന്‍ മുഖമടച്ചൊരാട്ട് മാത്രമേ ബാക്കിയുള്ളൂ.

ഫെയ്‌സ്ബുക്ക് അക്കൗണ്ടില്ലാതെ, ആണുങ്ങളെ ഡാ മയിരേ എന്നു വിളിക്കുന്നത് വിപ്ലവമാണെന്നറിയാതെ, വിഹ്വലതകളുള്ള മനസ്സുകളുമായി ആയിരക്കണക്കിനു പെണ്‍കുട്ടികള്‍ ഈ നാട്ടില്‍ ജീവിക്കുന്നുണ്ട്. കൗമാരപ്രായത്തില്‍ അവര്‍ക്കു വേണ്ടത് മൊബൈല്‍ ഫോണുകളല്ല, അമ്മയുടെ സ്‌നേഹവും കൈത്താങ്ങും അച്ഛന്റെ കരുത്തിന്റെ തണലുമാണ് എന്നറിയാവുന്ന കേരളത്തിലെ അപൂര്‍വം സാംസ്‌കാരികനേതാക്കളിലൊരാളാണ് സുഗതകുമാരി ടീച്ചര്‍. അവരുടെ അപേക്ഷ എല്ലാവരും ചെവിക്കൊള്ളണമെന്നില്ല, പക്ഷെ അവരെ തിരുത്താന്‍ മാത്രം ലോകപരിചയമുള്ളവരാണ് തങ്ങളെന്നു വിശ്വസിച്ചുകൊണ്ട് വിവരക്കേടുകള്‍ ആധികാരികമായി അവതരിപ്പിക്കുന്നത് മ്ലേച്ഛമാണ്.

മൊബൈല്‍ ഫോണ്‍ വാങ്ങിക്കൊടുത്താല്‍ പെണ്‍കുട്ടികള്‍ വഴി തെറ്റിപ്പോവും എന്ന പ്രസ്താവനയെ രാജ്യാന്തരനിലവാരത്തില്‍ വച്ചു വിലയിരുത്തതുകൊണ്ടാണ് പലര്‍ക്കും തെറ്റു പറ്റിപ്പോവുന്നത്. കേരളത്തില്‍ സംഭവിക്കുന്നത് എന്താണെന്നു പോലും അറിയാത്തവര്‍ അമേരിക്കയിലെയും ജപ്പാനിലെയും ദുബായ്‌ലിയെും പെണ്‍കുട്ടികളെപ്പോലെയാണ് കേരളത്തിലെ പെണ്‍കുട്ടികള്‍ എന്നു വിചാരിക്കുന്നത് വിഡ്ഡിത്തമാണ്. മൊബൈല്‍ ഫോണ്‍ വാങ്ങിക്കൊടുത്താലും എന്റെ മകള്‍ വഴി തെറ്റില്ല എന്ന് ഒരച്ഛന് ഉറച്ചു പറയാന്‍ കഴിയുമെങ്കില്‍ അത് നല്ലതാണ്. എന്നാല്‍, മൊബൈല്‍ ഫോണ്‍ വാങ്ങിക്കൊടുത്താല്‍ ഒരു പെണ്‍കുട്ടിയും വഴി തെറ്റില്ല എന്നു പറയാന്‍ അവര്‍ക്കാവില്ല. കേരളത്തില്‍ വഴി തെറ്റിപ്പോവുന്ന അഥവാ ചൂഷണങ്ങള്‍ക്കിരയായി ജീവിതം നശിച്ചുപോവുന്ന പെണ്‍കുട്ടികള്‍ 95 ശതമാനവും കുരുങ്ങുന്ന ചൂണ്ട മൊബൈല്‍ ഫോണ്‍ ആണെന്നത് കേരളാ പൊലീസിന്റെ കേസ് ഡയറികളില്‍ നിന്നു തന്നെ വ്യക്തമാണ്. ടീച്ചര്‍ പറയുന്നത് യാഥാര്‍ഥ്യങ്ങളുടെ അടിസ്ഥാനത്തിലാണ്. തിയറികളിലൂടെ വിപ്ലവം സൃഷ്ടിക്കാമെന്നു കരുതുന്നവര്‍ക്ക് അത് മനസ്സിലാകണം എന്നു നിര്‍ബന്ധമില്ല.

സ്ത്രീസ്വാതന്ത്ര്യം വലിയൊരു സംഭവം തന്നെയാണ്. എന്നാല്‍, അതിനെക്കാള്‍ പ്രധാനമാണ് സ്ത്രീസുരക്ഷ. ഫെമിനിസ്റ്റുകളെന്നു സ്വയം വിളിച്ച് വല്ലവരുടെയും പെണ്‍മക്കളെ പുകവലിക്കാനും തെറിവിളിക്കാനും പഠിപ്പിക്കുന്നത് സ്ത്രീപക്ഷ രാഷ്ട്രീയം ഉയര്‍പ്പിടിക്കലല്ല. മിസ്ഡ് കോളുകള്‍ വഴി പെണ്‍കുട്ടികളെ വളച്ചെടുത്തുകൊണ്ടുപോയി ദുരുപയോഗിക്കുന്ന മാഫിയകള്‍ കേരളത്തില്‍ സജീവമായി നില്‍ക്കുമ്പോള്‍ പെണ്‍കുട്ടികളുടെ മാതാപിതാക്കളെ സംബന്ധിച്ച് അവര്‍ പ്ലസ് ടു പാസ്സാകും വരെയെങ്കിലും മൊബൈല്‍ ഫോണ്‍ വാങ്ങി നല്‍കാതിരിക്കുക എന്നത് മാതൃകാപരമായ തീരുമാനമാണ്. മറ്റുള്ളവരുടെ പെണ്‍മക്കള്‍ അജ്ഞാതരായ ആളുകളോടൊപ്പം അപ്രത്യക്ഷരാകുന്ന വാര്‍ത്തകള്‍ വായിച്ച് നെടുവീര്‍പ്പിടാന്‍ നല്ല രസമാണ്. എട്ടാം ക്ലാസ്സിലും ഒന്‍പതാം ക്ലാസ്സിലും പഠിക്കുന്ന പെണ്‍കുട്ടികള്‍ ആത്മഹത്യ ചെയ്യുന്നത് എല്ലാവരും ആത്മഹത്യ അഭിനയിച്ചു കാണിക്കുന്നതുകൊണ്ടല്ല. പലരുടെയും മൊബൈല്‍ ഫോണ്‍ ഹിസ്റ്ററികള്‍ക്ക് ഞെട്ടിക്കുന്ന കഥകള്‍ പറയാനുണ്ട്. യാഥാര്‍ഥ്യം അംഗീകരിച്ചില്ലെങ്കിലും അതിനെ നിസ്സാരവല്‍ക്കരിക്കാന്‍ നോക്കരുത്.

കുറിപ്പ്: സ്വന്തമായി മൊബൈല്‍ ഫോണ്‍ ഉള്ള എല്ലാ കുട്ടികളും ഫോണില്‍ നിന്നു ടീച്ചറെ വിളിച്ച് ഡൗട്ട്‌സ് ക്ലിയര്‍ ചെയ്യുകയും സഹപഠികളെ വിളിച്ച് നോട്ടു ചോദിക്കുകയും സംശയമുള്ള പാഠഭാഗങ്ങള്‍ ഗൂഗിളില്‍ സേര്‍ച്ച് ചെയ്യുകയും മാത്രമാണ് ചെയ്യാറുള്ളത് എന്നു വിശ്വസിക്കുന്നവരേ- നിങ്ങളുടെ നിഷ്‌കളങ്കതയ്ക്ക് ഒരു പൂച്ചെണ്ട് !

ഉമ്മന്‍ ചാണ്ടി ഷെയര്‍ ചെയ്യുന്നത്

ഉമ്മന്‍ ചാണ്ടി അത്യുന്നതനായ നേതാവാണെന്നും സരിത നായര്‍ വെറുമൊരു തട്ടിപ്പുകാരി ആണെന്നും കേരളത്തിലെ നല്ലൊരു ശതമാനം ആളുകളും വിശ്വസിക്കുന്നു. ആ ഉമ്മന്‍ ചാണ്ടിയും സരിതയും തമ്മില്‍ ബന്ധമുണ്ടെന്ന് ആരോപിക്കുന്നതും വിശ്വസിക്കുന്നതും അപ്രകാരം പ്രചരിപ്പിക്കുന്നതും വലിയ ക്രൂരതയാണെന്നാണ് പല കോണ്‍ഗ്രസുകാരും പറഞ്ഞു കേട്ടിട്ടുള്ളത്. എന്നാല്‍ പിടിച്ചു നില്‍ക്കാന്‍ ഉമ്മന്‍ ചാണ്ടിക്കും സരിതയുടെ സാരിത്തുമ്പേയുള്ളൂ എന്നത് അത്യുന്നതന്‍ തന്നെ തുറന്നു കാണിക്കുമ്പോള്‍ ഏഴാംകൂലികളായ നമ്മളൊക്കെ എത്ര നിസ്സാരന്‍മാര്‍.

തിരഞ്ഞെടുപ്പു കാലത്ത് സജീവപ്രവര്‍ത്തനം കാഴ്ച വയ്ക്കുന്നതിനു വേണ്ടി ഉമ്മന്‍ ചാണ്ടി അവതരിപ്പിച്ച വെബ്‌സൈറ്റ് ആണ് ഉമ്മന്‍ചാണ്ടി ഡോട്ട് നെറ്റ്. അതില്‍ അദ്ദേഹം തനിക്ക് അനുകൂലമായ പല പല വാര്‍ത്തകളും ഷെയര്‍ ചെയ്യുന്നുണ്ട്. യുപിഎ സര്‍ക്കാരിന്റെ നേട്ടങ്ങള്‍, യുഡിഎഫ് സര്‍ക്കാരിന്റെ നേട്ടങ്ങള്‍ എന്നിങ്ങന വിവിധ വിഭാഗങ്ങളിലായി പലതരം വാര്‍ത്തകളും വിഭവങ്ങളും സമ്പല്‍സമൃദ്ധമായ വെബ്‌സൈറ്റിലുണ്ട്. അതോടൊപ്പമുള്ള ഒന്നാണ് കുമാരി സരിത നായരുടെ അഭിമുഖത്തിന്റെ ശകലം.

ഉമ്മന്‍ ചാണ്ടിയെ കുരുക്കാന്‍ സിപിഎം 10 കോടി രൂപ വാഗ്ദാനം ചെയ്തു എന്ന സരിതയുടെ ആരോപണം ഇന്ത്യാ ടുഡേ അഭിമുഖത്തിലും മാധ്യമത്തിലും വന്നതാണ് ഉമ്മന്‍ ചാണ്ടി തന്റെ വെബ്‌സൈറ്റില്‍ ഷെയര്‍ ചെയ്തിരിക്കുന്നത്. അത് അദ്ദേഹം ഫെയ്‌സ്ബുക്കിലും ഷെയര്‍ ചെയ്തിട്ടുണ്ട്. പ്രധാനമന്ത്രി മന്‍മോഹന്‍സിങ്ങിന്റെയും കോണ്‍ഗ്രസ് അധ്യക്ഷ സോണിയാ ഗാന്ധിയുടെയും പ്രസ്താവനകളോടൊപ്പം സരിത എസ് നായരുടെ ആരോപണവും തുല്യപ്രധാന്യത്തോടെ ഷെയര്‍ ചെയ്യാന്‍ ആര്‍ജ്ജവം കാണിച്ച ഉമ്മന്‍ ചാണ്ടി അഭിനന്ദനമര്‍ഹിക്കുന്നു. സരിതയെ കണ്ടിട്ടില്ല, കേട്ടിട്ടില്ല എന്നൊക്കെ പറഞ്ഞ് ഇത്രയും കാലം ഉരുണ്ടുകളിച്ചത് എന്തിനായിരുന്നു എന്നാണ് മനസ്സിലാവാത്തത്.

സരിത നായരെ നാട്ടുകാര്‍ക്കു വലിയ വിശ്വാസമൊന്നുമില്ലെങ്കിലും ഉമ്മന്‍ ചാണ്ടിക്ക് തികഞ്ഞ വിശ്വാസമാണ് എന്നതിന്റെ തെളിവാണ് സ്വന്തം വെബ്‌സൈറ്റിലും ഫെയ്‌സ്ബുക്കിലും അദ്ദേഹം സരിതയുടെ അഭിമുഖത്തില്‍ നിന്നുള്ള ഭാഗം ഷെയര്‍ ചെയ്തിരിക്കുന്നത്. വെറുമൊരു ഉമ്മന്‍ ചാണ്ടിയെ കുരുക്കാന്‍ സരിതയെപ്പോലുള്ള ഒരു സ്ത്രീക്ക്് (സംരംഭക) സിപിഎം പോലുള്ളൊരു പാര്‍ട്ടി 10 കോടി രൂപ ഓഫര്‍ ചെയ്തു എന്നത് വളരെ വിലയേറിയ ഒരു ആരോപണമാണ്. ഉമ്മന്‍ ചാണ്ടി അത് പലവട്ടം ഷെയര്‍ ചെയ്യുമ്പോള്‍ സരിതയുടെ ആരോപണത്തിന്റെ അടിയില്‍ മുഖ്യമന്ത്രി അറ്റസ്റ്റ് ചെയ്യുന്ന ഒരു ഇഫക്ട് ആണ്. മുഖ്യമന്ത്രിയെ മാത്രമല്ല കുമാരി സരിതയെയും മലയാളികള്‍ വല്ലാതെ തെറ്റിദ്ധരിച്ചിരിക്കുകയാണ് എന്നാണ് ഇതില്‍ നിന്നും മനസ്സിലാക്കേണ്ടത്.

സോളാര്‍ കേസില്‍ സിബിഐ അന്വേഷണം ആവശ്യപ്പെട്ട് വിഎസ് അച്യുതാനന്ദന്‍ ഹൈക്കോടതിയില്‍ സമര്‍പ്പിച്ച ഹര്‍ജിയെ എതിര്‍ത്തുകൊണ്ട് സര്‍ക്കാര്‍ എജി കോടതിയില്‍ നടത്തിയ പെര്‍ഫോമന്‍സ് സരിതയെ ഇനി ഒരു തരത്തിലും വേദനിപ്പിക്കാന്‍ സംസ്ഥാന സര്‍ക്കാര്‍ തയ്യാറല്ല എന്ന സൂചനയാണ് നല്‍കുന്നത്. സോളാര്‍ തട്ടിപ്പില്‍ പണം നഷ്ടപ്പെടാത്ത വിഎസിന് അന്വേഷണം ആവശ്യപ്പെട്ട് ഹൈക്കോടതിയെ സമീപിക്കാന്‍ അവകാശമില്ലെന്നാണ് സര്‍ക്കാര്‍ എജി കോടതിയില്‍ വാദിച്ചത്.

ഇതെല്ലാം കൂട്ടിവച്ചു വായിക്കുമ്പോള്‍ സാധാരണക്കാരന് കാര്യങ്ങള്‍ ഏറെക്കുറെ പിടികിട്ടുന്നുണ്ട്. സോളാര്‍ കേസില്‍ ഉമ്മന്‍ ചാണ്ടിയെ കുടുക്കാന്‍ 10 കോടി രൂപ ഓഫര്‍ ചെയ്തിട്ടും സത്യം, നീതി, ധര്‍മം എന്നിവയില്‍ വ്യതിചലിക്കാതെ ഉമ്മന്‍ ചാണ്ടിക്കൊപ്പം നിന്ന സരിത തീര്‍ച്ചയായും മഹത്വമുള്ളവളാണ്. ആ സരിതയ്‌ക്കെതിരെ, സരിതയുടെ സംരംഭങ്ങള്‍ക്കെതിരെ ഒരാക്ഷേപവും ഉന്നയിക്കാന്‍ ആരെയും അനുവദിക്കരുത്. ഉമ്മന്‍ ചാണ്ടിയെ എനിക്കു വിശ്വാസമാണ്. ഉമ്മന്‍ ചാണ്ടി പറഞ്ഞാല്‍ സരിതയെയും വിശ്വസിക്കാം.

ഫെയ്‌സ്ബുക്കിനെന്തു വിര്‍ച്വല്‍ റിയാലിറ്റി

കയ്യില്‍ നിറയെ കാശുള്ള മുതലാളി നാട്ടിലെ കണ്ണായ സ്ഥലങ്ങളെല്ലാം വാങ്ങിക്കൂട്ടുന്നതുപോലെയാണ് ഫെയ്‌സ്ബുക്കിന്റെ ഏറ്റെടുക്കല്‍ മഹായജ്ഞം. 1.18 ലക്ഷം കോടി രൂപയ്ക്ക് വാട്ട്‌സ്ആപ്പ് ഇന്‍സ്റ്റന്റ് മെസ്സെഞ്ചര്‍ ഏറ്റെടുത്ത ഫെയ്‌സ്ബുക്ക് വിര്‍ച്വല്‍ റിയാലിറ്റിയില്‍ വിസ്മയങ്ങള്‍ തീര്‍ത്ത ഒക്യുലസ് റിഫ്റ്റിനെയും ഏറ്റെടുക്കുന്നു. 12000 കോടി രൂപയ്ക്കാണ് കിക്ക്സ്റ്റാര്‍ട്ടറില്‍ ഞെട്ടിച്ച വിര്‍ച്വല്‍ റിയാലിറ്റി കമ്പനിയെ ഫെയ്‌സ്ബുക്ക് ഏറ്റെടുത്തത്. താനാരാണെന്നു തനിക്കറിയില്ലെങ്കില്‍ അത് തന്നോടു ചോദിക്കേണ്ട അവസ്ഥയിലെത്തിക്കുന്ന വിധം സ്ഥലജലവിഭ്രാന്തിയുണ്ടാക്കുന്ന എച്ച്ഡി 3ഡി വിര്‍ച്വല്‍ റിയാലിറ്റി ഗെയിമിങ് ഹെഡ്‌സെറ്റ് ആണ് ഒക്യുലസ് റിഫ്റ്റിന്റെ പ്രധാന ഉല്‍പന്നം. ജനുവരിയില്‍ ലാസ് വെഗാസില്‍ നടന്ന രാജ്യാന്തര കണ്‍സ്യുമര്‍ ഇലക്ട്രോണിക്‌സ് ഷോയിലെ ഏറ്റവും ശ്രദ്ധേയമായ അവതരണമായിരുന്നു ഒക്യുലസ് റിഫ്റ്റ്.

2012ല്‍ കിക്ക്സ്റ്റാര്‍ട്ടറില്‍ നിക്ഷേപസമാഹരണം നടത്തിയ ഒക്യുലസ് റിഫ്റ്റ് ചുരുങ്ങിയ സമയം കൊണ്ടാണ് ലോകത്തെ ഏറ്റവും ഇന്നൊവേറ്റീവായ സംരംഭവങ്ങളിലൊന്നായി മാറിയത്. റോബോട്ടിക്‌സിലും വിര്‍ച്വല്‍ റിയാലിറ്റിയിലുമുള്ള ഫെയ്‌സ്ബുക്കിന്റെ താല്‍പര്യവും നിക്ഷേപവും അഞ്ചു വര്‍ഷത്തിനപ്പുറം സോഷ്യല്‍ നെറ്റ്‌വര്‍ക്കിങ് വെബ്‌സൈറ്റ് എന്നതില്‍ നിന്ന് മറ്റെന്തോ ഒക്കെയായി മാറാനുള്ള ഫെയ്‌സ്ബുക്കിന്റെ ശ്രമത്തിന്റെ ഭാഗമാണ്.

വാട്ട്‌സ്ആപ്പ് ഏറ്റെടുക്കലും ഒക്യുലസ് റിഫ്റ്റ് ഏറ്റെടുക്കലും തമ്മിലുള്ള പ്രധാന വ്യത്യാസം വാട്ട്‌സ്ആപ്പിനെ ഏറ്റെടുത്തത് അതിനെ വളര്‍ത്താനല്ല എന്നതാണ്.സ്വന്തം നിലയ്‌ക്കൊരു സോഷ്യല്‍ മീഡിയ സംസ്‌കാരം തന്നെ വളര്‍ത്തിയെടുത്ത വാട്ട്‌സ്ആപ്പ് ഫെയ്‌സ്ബുക്കിന്റെ കൈകളിലായപ്പോള്‍ രണ്ടു പേരുടെയും ഇമേജ് മാറി. അല്ലെങ്കിലും കൂടുതല്‍ അംഗങ്ങള്‍ ചേരുമെന്നതിനപ്പുറം വാട്ട്‌സ്ആപ്പില്‍ വലിയ വിസ്മയങ്ങള്‍ക്കൊന്നും ഇനി സാധ്യതയില്ല. വോയ്‌സ് കോള്‍ ഉടനെ ആരംഭിക്കുമെന്നു പ്രഖ്യാപിച്ചെങ്കിലും അതൊന്നും വലിയ കാര്യമല്ലെടാ പുല്ലേ എന്ന സന്ദേശം നല്‍കി ഫെയ്‌സ്ബുക്ക് മെസഞ്ചറില്‍ സക്കര്‍ബര്‍ഗ് ആദ്യം അത് കൊണ്ടുവന്നു. അല്ലെങ്കിലും വൈബര്‍ ഉള്‍പ്പെടെയുള്ള മെസഞ്ചര്‍ ആപ്പുകളില്‍ വോയ്‌സ് കോളിങ് ഉള്ളപ്പോള്‍ അതിനെയും പുതിയൊരു സങ്കേതം എന്നു വിളിക്കുന്നതില്‍ കാര്യമില്ല.

ഗെയിമിങ് ഹെഡ്‌സെറ്റ് എന്നതിനപ്പുറത്ത് ഒക്യുലസ് റിഫ്റ്റിന് ഏതൊക്കെ മേഖലകളില്‍ എന്തൊക്കെ വിസ്മയങ്ങള്‍ സാധിക്കും എന്നു നിര്‍ണയിക്കപ്പെടുന്നത് പദ്ധതിയില്‍ ഫെയ്‌സ്ബുക്ക് നടത്തുന്ന നിക്ഷേപവും ഏതു മേഖലയില്‍ ഒക്യുലസ് റിഫ്റ്റിനെ ഫെയ്‌സ്ബുക്ക് വികസിപ്പിച്ചെടുക്കും എന്നതും ആശ്രയിച്ചിരിക്കും. ചുരുക്കിപ്പറഞ്ഞാല്‍, വാട്ട്‌സ് ആപ്പ് 30 കഴിഞ്ഞ ഫെമിനിസ്റ്റിനെപ്പോലെയാണെങ്കില്‍ ഒക്യുലസ് റിഫ്റ്റ് അദ്ഭുതലോകത്ത് നില്‍ക്കുന്ന അതിസുന്ദരിയായ കൗമാരക്കാരിയാണ്. ഫെയ്‌സ്ബുക്ക് എന്ന കൊച്ചുമുതലാളിക്ക് എന്തെങ്കിലും ചെയ്യാന്‍ സ്‌കോപ്പുള്ളത് ഒക്യുലസ് റിഫ്റ്റിലാണ്.

ഏറ്റെടുക്കലിനെ സംബന്ധിച്ച് ഫെയ്‌സ്ബുക്ക് മുതലാളിയുടെ കുറിപ്പ്-[Link]
ഒക്യുലസ് റിഫ്റ്റ് മുതലാളിമാരുടെ കുറിപ്പ്- [Link]

ഒക്യുലസ് റിഫ്റ്റ് എന്താണെന്നും അതിലെ വിര്‍ച്വല്‍ റിയാലിറ്റി അനുഭവം എന്താണെന്നും മനസ്സിലാക്കാവുന്ന ഒരു വിഡിയോ താഴെ. ഫെയ്‌സ്ബുക്കിനും ഒക്യുലസിനും ലോകം മുഴുവനും നന്മ വരട്ടെ.

വാട്ട്‌സ് ആപ്പ് ഇനി ഫെയ്‌സ്ബുക്കിന്

വി.എസ്.അച്യുതാനന്ദന്‍ ആം ആദ്മി പാര്‍ട്ടിയില്‍ ചേരുന്നതുപോലെ ഒരു നീക്കമായിരുന്നു അത്. ടെക് ലോകത്തിന്റെ ചരിത്രത്തിലെ ഏറ്റവും വലിയ ഏറ്റെടുക്കലിലൂടെ ഏകദേശം ഒന്നരലക്ഷം കോടി രൂപയ്ക്ക് ഫെയ്‌സ്ബുക്ക് ഇന്‍സ്റ്റന്റ് മെസ്സേജിങ് സര്‍വീസ് ആയ വാട്ട്‌സ്ആപ്പിനെ സ്വന്തമാക്കി. 100 കോടിയിലേറെ ഉപയോക്താക്കളുള്ള ഇരു സേവനങ്ങളും ഒരു കുടക്കീഴിലാകുന്നതോടെ ഇന്ത്യയുടെ ജനസംഖ്യയെക്കാള്‍ വലിയ സമൂഹമാണ് ഈ ആപ്ലിക്കേഷനുകളില്‍ ഒരുമിക്കുന്നത്.

72000 കോടി രൂപയ്ക്ക് ഗൂഗിള്‍ 2012ല്‍ മോട്ടറോള മൊബിലിറ്റിയെ ഏറ്റെടുത്തതായിരുന്നു ഇതുവരെ ഏറ്റവും വലിയ ഏറ്റെടുക്കല്‍. പിന്നീട് 47000 കോടി രൂപയ്ക്ക് മൈക്രോസോഫ്റ്റ് നോക്കിയയെ ഏറ്റെടുത്തു. അതിലൊക്കെ ഹാര്‍ഡ്‌വെയര്‍ മികവും പേറ്റന്റുകളുടെ കരുത്തും ഉണ്ടായിരുന്നെങ്കില്‍ ഫെയ്‌സ്ബുക്ക്- വാട്ട്‌സ് ആപ്പ് സംബന്ധത്തില്‍ ആപ്ലിക്കേഷനുകളുടെ ജനപ്രീതിയും സേവനങ്ങളുടെ ലാളിത്യവും മാത്രമേയുള്ളൂ. ചുരുക്കി പറഞ്ഞാല്‍, ഫെയ്‌സ്ബുക്ക് ഏറ്റെടുത്തത് വാട്ട്‌സ് ആപ്പിലെ നൂറുകോടിയിലധികം വരുന്ന ഉപയോക്താക്കളെ ആണ്, നമ്മളെ ഒക്കെയാണ്. നമ്മള്‍ ഓള്‍റെഡി ഫെയ്‌സ്ബുക്കിനു സ്വന്തമാണല്ലോ.

മൊബൈല്‍ പരസ്യവരുമാനത്തില്‍ വലിയ മുന്നേറ്റം നടത്തുന്ന ഫെയ്‌സ്ബുക്ക് വാട്ട്‌സ് ആപ്പിനെ വെറുതെ വിടുമെന്നു പ്രതീക്ഷിച്ചു കൂടാ. വൈ ഡോണ്‍ഡ് വി സെല്‍ ആഡ്‌സ് എന്ന ലിങ്ക് ദൂരെക്കളഞ്ഞ് മധുരമനോഹരമായ പരസ്യങ്ങള്‍ വാട്ട്‌സ് ആപ്പിലും പ്രത്യക്ഷപ്പെട്ടേക്കാം. വാട്ട്‌സ് ആപ്പ് ഫെയ്‌സ്ബുക്കില്‍ തിരുകിക്കയറ്റി അലമ്പുണ്ടാക്കില്ല എന്നാണ് ഫെയ്‌സ്ബുക്ക് പറയുന്നത്. വാട്ട്‌സ് ആപ്പ് സ്വതന്ത്ര സേവനമായി തന്നെ നിലനിര്‍ത്തും.

ഫെയ്‌സ്ബുക്ക് വാട്ട്‌സ് ആപ്പിനെ ഏറ്റെടുത്തതില്‍ അദ്ഭുതപ്പെടാനൊന്നുമില്ലെങ്കിലും ഏറ്റെടുത്ത തുക ഞെട്ടിക്കുന്നതാണ്. അതില്‍ തന്നെ 70000 കോടി ഫെയ്‌സ്ബുക്ക് സ്റ്റോക്കായും 24000 കോടി രൂപ റെഡി ക്യാഷായും ബാക്കി തുക വാട്ട്‌സ് ആപ്പിന്റെ മുതലാളിമാരായും തൊഴിലാളിമാരായുമുള്ള 55 പേര്‍ക്കു നാലു വര്‍ഷത്തിനുള്ളില്‍ നിയന്ത്രിത സ്റ്റോക്ക് ആയും നല്‍കും. വാട്ട്‌സ് ആപ്പ് സ്ഥാപകര്‍ ഫെയ്‌സ്ബുക്ക് ഡയറക്ടര്‍ ബോര്‍ഡ് അംഗങ്ങളാകുമ്പോള്‍ ജീവനക്കാര്‍ ഇനി ഫെയ്‌സ്ബുക്ക് ജീവനക്കാരാകും.

എന്തൊരു നിശബ്ദത !

അടക്കം പറച്ചിലുകളേയുള്ളൂ, ആശങ്കകളില്ല. മദാമ്മയുടെ പുസ്തകം ആരെയും അമ്പരപ്പിക്കുന്നും ഞെട്ടിക്കുന്നുമില്ല. ഇതൊക്കെ കുറെ കേട്ടതാണല്ലോ എന്നു കൈയൊഴിഞ്ഞ് സാസ്‌കാരിക-സാമൂഹിക-മാധ്യമലോകം അമ്മയ്ക്കു വിശുദ്ധിയുടെ ജാമ്യം നല്‍കുന്നു. ദീര്‍ഘകാലം മാതാ അമൃതാനന്ദമയിയോടൊപ്പം സഞ്ചരിച്ചിട്ടുള്ള മാധ്യമപ്രവര്‍ത്തകര്‍ക്കും സാമൂഹികപ്രവര്‍ത്തകര്‍ക്കും എല്ലാം ചിരപരിചിതയുമായ ഗായത്രി എന്ന ഗെയ്ല്‍ ട്രെഡ്വെല്‍ എഴുതി ആമസോണ്‍ പ്രസിദ്ധീകരിച്ചികുന്ന ഹോളി ഹെല്‍ എന്ന പുസ്തകത്തിലെ വെളിപ്പെടുത്തലുകള്‍ പച്ചത്തവളകളുടെയും ചിലന്തികളുടെയും കാര്യത്തില്‍ വേവലാതിയുള്ള പുണ്യാത്മാക്കള്‍ അറിഞ്ഞ മട്ടില്ല.

ഗായത്രി എഴുതിയിരിക്കുന്നത് അവരുടെ ജീവിതത്തെപ്പറ്റിയാണ് അല്ലെങ്കില്‍ ജീവിതം നശിച്ചതിനെപ്പറ്റിയാണ് എന്നതുകൊണ്ട് അത് മറ്റാര്‍ക്കെങ്കിലും എതിരാണ് എന്നു വാദിക്കുന്നത് അര്‍ഥശൂന്യമാണ്. കേട്ടുകേള്‍വികളും ഊഹാപോഹങ്ങളുമല്ല, അവര്‍ നേരിട്ടു കാണുകയും അനുഭവിക്കുകയും ചെയ്ത കാര്യങ്ങളാണ് പുസ്തകത്തിലുള്ളത്. അതുകൊണ്ട് തന്നെ രാജ്യാന്തരസമൂഹം പുസ്തകത്തിന് അര്‍ഹിക്കുന്ന ഗൗരവം നല്‍കിയിട്ടുണ്ട്. വിദേശ മാധ്യമങ്ങള്‍ ഗായത്രിയുടെ അഭിമുഖങ്ങളും മറ്റും നല്‍കുന്നുണ്ട്. ഇത് അമ്മയെന്ന കിഴക്കിന്റെ ദൈവത്തിലേക്കുള്ള വിദേശികളുടെ കുത്തൊഴുക്കിനെയും ബാധിക്കും. മൊത്തത്തില്‍ കാര്യങ്ങള്‍ അമ്മയ്ക്ക് അുകൂലമല്ല എങ്കിലും ഇനിയൊരു 10 വര്‍ഷത്തേക്കു കൂടി കേരളത്തില്‍ ഒന്നും പേടിക്കാനില്ല.

ഗായത്രിയുടെ പുസ്തകത്തോടുള്ള പ്രതികരണങ്ങള്‍ സമ്മിശ്രമാണ്. അമൃതാനന്ദമയിയെ വെറുക്കുന്നവരും ആരാധിക്കുന്നവരും ചേരി തിരിഞ്ഞു തെറിപറയുന്നതിനപ്പുറം കാര്യമാത്രപ്രസക്തമായ, സത്യസന്ധമായ പ്രതികരണങ്ങള്‍ കാണാനില്ല. അത് കാണാനാവുമെന്നും പ്രതീക്ഷയില്ല. പുസ്തകം സ്വയം സംസാരിക്കുന്ന മാധ്യമമായതുകൊണ്ട് അതില്‍ പ്രത്യേകിച്ച് ഒരു പ്രതികരണത്തിന്റെ ആവശ്യമില്ല എന്നതും സത്യമാണ്. എന്നാല്‍, മറ്റു വിഷയങ്ങളിലും സോ കോള്‍ഡ് സാമൂഹിക-മനുഷ്യാവകാശ-സാംസ്‌കാരിക ഫ്രീക്കുകള്‍ ഇതേ പക്വത കാണിക്കുന്നത് നന്നായിരിക്കും.

ഹോളി ഹെല്‍ അമൃതാനന്ദമയിയെ അപകീര്‍ത്തിപ്പെടുത്തുന്ന, വള്ളിക്കാവ് ആശ്രമത്തെ കരിവാരി തേക്കുന്ന ഒരു പുസ്തകമാണ് എന്നു വേണമെങ്കില്‍ ആരോപിക്കാം. എഴുത്തുകാരി അമ്മയ്ക്കും ആശ്രമത്തിനും കേരളസമൂഹത്തിനും അപരിചിതയല്ല എന്നതാണ് പുസ്തകത്തിന്റെയും അതിലെ വെളിപ്പെടുത്തലുകളെയും ഗൗരവം വര്‍ധിപ്പിക്കുന്നത്. മറ്റൊരാളെപ്പറ്റിയായിരുന്നെങ്കില്‍ ഇത്തരമൊരു വിഷയത്തില്‍ പ്രതികരിച്ചും ചോദ്യം ചെയ്തും കേരളസമൂഹത്തില്‍ പൊട്ടിത്തെറികള്‍ സൃഷ്ടിക്കുമായിരുന്ന ഇവിടുത്തെ സാമൂഹികപരിഷ്‌കര്‍ത്താക്കളും സാസ്‌കാരികനായകന്‍മാരും സ്വീകരിച്ചിരിക്കുന്ന അപകടകരമായ മൗനം ആശങ്കയുണര്‍ത്തുന്നതുമാണ്. പ്രത്യേകിച്ച് ആരെയും ഭയമില്ലാത്ത സിപിഎം കണ്ണൂര്‍ ജില്ലാ സെക്ട്രറി പി.ജയരാജന്റെ ഫേസ്ബുക്ക് പേജില്‍ മാത്രമാണ് ഇതെപ്പറ്റി കാര്യമായ പ്രതികരണം കണ്ടത്. എന്നാല്‍, ആ പ്രതികരണം വാര്‍ത്തയായപ്പോള്‍ പേജില്‍ നിന്നു പ്രതികരണം അപ്രത്യക്ഷമാവുകയും അദ്ദേഹത്തിന്റെ പേരില്‍ വ്യാജ ഫേസ്ബുക്ക് പേജുണ്ടെന്നും അതില്‍ അദ്ദേഹത്തിന്റെ സമ്മതമില്ലാതെയാണ് അമ്മയ്‌ക്കെതിരായ വാര്‍ത്ത പ്രചരിക്കുന്നതെന്നും അതേ പേജില്‍ പുതിയ പോസ്റ്റ് പ്രത്യക്ഷപ്പെട്ടു. എല്ലാം അമ്മയുടെ മായ !

പ്രവചനം: ഇന്നേയ്ക്ക് 30 ദിവസത്തിനകം ഹോളി ഹെല്‍ എന്ന അശ്ലീലപുസ്തകം സംസ്‌കാരസമ്പന്നമായ ഭാരതത്തില്‍ നിരോധിച്ചിരിക്കും.

മോഡറേഷന്‍ മിഡില്‍ ഫിംഗര്‍

സാറേ…

ആരെടീ അത് ?

ഞാനാ സാറേ…

നിനക്കെന്തു പറ്റി ? വല്ലാതെ കിതയ്ക്കുന്നുണ്ടല്ലോ.. ഇവിടെ ഇരിക്കൂ.. ഞാന്‍ തടവിത്തരാം…

കിതയ്ക്കുന്നത് ഓടിയിട്ടല്ല… പിന്നെ, സാറു തടവണ്ട… തടവിയാല്‍…. ?

ഓ.. കണ്‍ട്രോള്‍ ഇല്ലാത്ത കുട്ടികള്‍ !… ശരി കാര്യം പറയൂ…

സാറ് പുതിയ പോസ്റ്റിന്റെ കമന്റ് ഒക്കെ നോക്കിയോ ?

കമന്റ് നോക്കാനും അപ്രൂവ് ചെയ്യാനുമൊക്കെയല്ലേടീ പെണ്ണേ നിന്നെ ഏല്‍പിച്ചിരിക്കുന്നത്… ഫോണില്‍ അതിന്റെ ആപ്പും ഡൗണ്‍ലോഡ് ചെയ്തു തന്നിട്ടില്ലേ ?

ആപ്പിനെ പറ്റി സാറിനി ഒന്നും പറയരുത്… പിന്നെ, ബ്ലോഗിലെ കമന്റ് ഞാന്‍ നോക്കുന്നുണ്ട് സര്‍… ഞാന്‍ പറഞ്ഞത്… ഫേസ്ബുക്കിലെ കമന്റ്‌സ്…

ഛെ, ഞാനതൊന്നും വായിക്കാറില്ല…

ഞാന്‍ വായിച്ചു… വായിച്ചിട്ട് സാറിനോടു പറയാന്‍ ഓടി വന്നതാ… ആ പോസ്റ്റ് അങ്ങു ഡിലീറ്റ് ചെയ്‌തേക്കട്ടെ ?

കഴുവേര്‍ട മോളെ… പോസ്റ്റില്‍ തൊട്ടാല്‍ കൊല്ലും ഞാന്‍… മേലില്‍ എന്റെ പോസ്റ്റുകള്‍ ഡിലീറ്റ് ചെയ്താല്‍ അറിയാല്ലോ… ശിക്ഷിക്കും ഞാന്‍.. ക്രൂരമായി…

ശ്ശൊ !… ഈ സാറിന്റെ ഒരു കാര്യം… ഒറ്റ ഇടി വച്ചു തരും കേട്ടോ…

എന്നാല്‍ നീ പൊക്കോ…

അതല്ല സാറേ… എല്ലാം ഭീകര കമന്റുകളാ…. ഞാനതില്‍ കുറെ ഡിലീറ്റ് ചെയ്യട്ടെ ? എന്റെ സാറിനെ ആരെങ്കിലും ചീത്ത പറയുന്നത് എനിക്കു സഹിക്കില്ല….

റിയലി ? ആളുകള്‍ എന്നെ ചീത്ത പറയുന്നുണ്ട് ?

ഉണ്ടോന്നോ ? കട്ടത്തെറിയല്ലേ ? കേജ്‌രിവാളിനെതിരെ എഴുതിയതില്‍ സത്യത്തില്‍ എനിക്കും സാറിനോട് ദേഷ്യമുണ്ട്…

യു ടൂ ബ്രൂട്ട്‌സ്‌മോള്‍ ? നീയും ആ ടൈപ്പ് ആണോ ? ബൈ ദ ബൈ.. ഞാന്‍ മിസ്റ്റര്‍ അരിവാളിനെതിരെ ഒന്നുമെഴുതിയില്ലല്ലോ… മൂപ്പരുടെ രാഷ്ട്രീയത്തെപ്പറ്റി എനിക്കു മനസ്സിലായ കാര്യങ്ങള്‍ പറഞ്ഞു… അത് ഇന്ത്യന്‍ ഭരണഘടന അനുവദിച്ചു തന്നിട്ടുള്ള കാര്യമല്ലേ ? അഭിപ്രായസ്വാതന്ത്ര്യം… അതിനെ ചോദ്യം ചെയ്യാന്‍ ആരാണ് അവിടെയുള്ളത് ?

ഒത്തിരിപ്പേര്‍ ഉണ്ട്… തെറിയും പുച്ഛവും മിഡില്‍ ഫിംഗറും പിന്നെ കുറെ ഡിസ്‌ലൈക്കും….

ഹഹഹഹഹ….

ഹൊ !… ഇങ്ങനെ ചിരിക്കല്ലേ… എന്റെ കണ്‍ട്രോള്‍ പോവും ട്ടോ…

ശരി, ശരി…. അല്ല തെറിയുടെ ഒരു നിലവാരം എങ്ങനെ ?

ആവറേജ്…. ഒത്തിരിപ്പേര് Fuck you, Fuck you എന്നു പറഞ്ഞിട്ടുണ്ട്…

റിയലി ???? അതൊരു ഓഫറല്ലേ മോളെ… എങ്ങനെ തെറിയാവും ?

അതു തെറിയാണ്…

ഞാന്‍ നിന്നോട് സാരി വാങ്ങിത്തരാം… സാരി വാങ്ങിത്തരാം എന്നു പറഞ്ഞാല്‍ അത് നിനക്ക് തെറിയായി തോന്നുമോ ?

ഒരിക്കലുമില്ല സര്‍…

അതുപോലെ ഫക്ക് യൂ, ഫക്ക് യൂ എന്നു സ്ത്രീകള്‍ എന്നോടു പറയുമ്പോള്‍ അതൊരു തെറിയായി എനിക്കും ഫീല്‍ ചെയ്യില്ല…

പക്ഷെ സര്‍… അങ്ങനെ പറഞ്ഞിരിക്കുന്നതെല്ലാം ആണുങ്ങളാ… നോ ലേഡീസ്

നോ ലേഡീസ് ???… ഛെ, വഷളന്‍മാര്‍… അവരോട് ഞാനൊരു ഗേ അല്ലെന്നു പറഞ്ഞേക്കൂ… എന്താ ഈ തലമുറ ഇങ്ങനെ…

പിന്നെ, സാറെനിക്കു വാങ്ങിത്തരുന്നുണ്ടെങ്കില്‍ സാരി വേണ്ട… ഒരു ഡസന്‍ ലെഗ്ഗിങ്‌സ് മതി….

അതിട്ടോണ്ട് എന്റെ മുന്നില്‍ വരില്ലെന്നുറപ്പു തന്നാല്‍ വാങ്ങിത്തരാം….

താങ്ക്യു സര്‍… പിന്നെ സാറൊരു കോണ്‍ഗ്രസുകാരനാണെന്ന് എല്ലാവരും പറയുന്നു…

കഴിഞ്ഞയാഴ്ച എല്ലാവരും പറഞ്ഞത് ബിജെപിക്കാരനാണെന്നായിരുന്നു… അതിനു മുന്‍പിലത്തെ ആഴ്ച സിപിഎമ്മുകാരനെന്നും.. മൈന്‍ഡ് ചെയ്യേണ്ട..

ഒത്തിരിപ്പേര്‍.. ഡിസ്‌ലൈക്ക് ബട്ടണ്‍ എവിടെയാണെന്നും മറ്റും ചോദിച്ചിട്ടുണ്ട്…

ഇതാണ് ഇവരുടെ ഒരു കുഴപ്പം… ഫേസ്ബുക്കിന്റെ ഭരണഘടനയില്‍ ആ സാധനം ഇല്ല. ഭരണഘടനയില്‍ ഇല്ലാത്തതിനു വേണ്ടി വാശിപിടിക്കുന്നതാണോ ഇപ്പോഴത്തെ ഫാഷന്‍ ?

ഗാന്ധിജിയെയും ജയപ്രകാശിനെയും എകെജിയെയും പോലെയാണ് കേജ്‌രിവാള്‍ എന്നു പലരും പറഞ്ഞിട്ടുണ്ട്…

അതായത്…. റാഡിക്കലായ ഒരു മാറ്റമല്ല… ഹും…

സാറിന് ഇന്ത്യയെപ്പറ്റി ഒന്നും അറിയില്ലെന്നും ഇന്ത്യയെപ്പറ്റി കൂടുതല്‍ പഠിച്ചതിനു ശേഷമേ പോസ്റ്റിടാവൂ എന്നും ഒരാള്‍ പറഞ്ഞിട്ടുണ്ട്…

ആ ചങ്ങാതിയുടെ ലൊക്കേഷന്‍ ഏതാ ?

കുവൈറ്റ്…

വെരി ഗുഡ് !

കേജ്‌രിവാളിന്റെ രാഷ്ട്രീയത്തെപ്പറ്റി സാറിന് ഒരു ചുക്കും അറിയില്ലെന്നും ദില്ലിയിലെ സമകാലിക രാഷ്ട്രീയ അടിയൊഴുക്കുകളെ സാര്‍ അവഗണിക്കുകയാണെന്നും… സാര്‍ മള്‍ട്ടിനാഷന്‍ കമ്പനികളുടെ ഏജന്റാണെന്നും പലരും പറഞ്ഞിട്ടുണ്ട്..

അവരൊക്കെ ദില്ലിയിലെ ഇടത്തരക്കാരാണോ ?

അല്ല, ന്യൂസീലാന്‍ഡിലെയും ദുബായ്‌ലെയും ഖത്തറിലെയും യുഎസിലെയും വിവിധ മള്‍ട്ടിനാഷനല്‍ കമ്പനികളില്‍ ജോലി ചെയ്യുന്നവരാ…

ഹഹഹഹഹഹ…

ഇങ്ങനെ ചിരിക്കല്ലേ പൊന്നേ..

പോടി കള്ളീ !

അച്ചായാ പിന്നെ കുറെപ്പേര്‍… മിഡില്‍ ഫിംഗര്‍, മിഡില്‍ ഫിംഗര്‍ എന്നു പറഞ്ഞിട്ടുണ്ട്…

അത് ഇംഗ്ലിഷ് ബ്ലോഗുകളിലും സൈറ്റുകളിലുമൊക്കെ സായിപ്പന്‍മാര്‍ ഇടുന്ന കമന്റ് ആണ്… ഇന്ത്യന്‍ സംസ്‌കാരത്തില്‍ അങ്ങനൊരു പ്രതികരണമില്ല… സായിപ്പ് ട്രെയിനികളായ ഇന്ത്യക്കാര്‍ അടുത്ത കാലത്തായി അങ്ങനത്തെ കമന്റുകള്‍ ഇടുന്നുണ്ട്…

എന്നു വച്ചാല്‍ അത് നല്ല കമന്റാണോ ചീത്ത കമന്റാണോ ?

രണ്ടുമാണ്… മിഡില്‍ ഫിംഗര്‍ മാത്രം ഉയര്‍ത്തിക്കാട്ടുന്നത് വേറൊരു സംഗതിയുടെ സിംബലാണ്..

മനസ്സിലായി, മനസ്സിലായി…

മിടുക്കി… എന്റെ പോസ്റ്റ് വായിച്ചിട്ട് അവര്‍ക്കൊക്കെ ഭീകരമായ ഉത്തേജനമുണ്ടായി എന്നാണ് ആ കമന്റിലൂടെ അവര്‍ പറയുന്നത്.. അല്‍പം അശ്ലീലച്ചുവയുണ്ടെങ്കിലും കമന്റ് പോസിറ്റീവാണ്…

സാറൊരു മൂന്നാംകിട ബ്ലോഗറാണെന്നും നാലാംകിട കൂലിയെഴുത്തുകാരനാണെന്നും പലരും പറഞ്ഞിട്ടുണ്ട്…

ഹഹഹഹഹഹഹഹ….

അല്ല, സാറെന്തിനാ ചിരിച്ചത് ?

മൂന്നാം കിട ബ്ലോഗും നാലാം കിട കൂലിയെഴുത്തും വായിച്ച് അതിനൊക്കെ കമന്റിടുന്ന ഒന്നാംകിട ആളുകകളെപ്പറ്റി ആലോചിച്ചപ്പോള്‍… ഇവര്‍ക്കൊക്കെ ഒന്നാം കിട സാധനങ്ങള്‍ തന്നെ വായിച്ചാല്‍പ്പോരേ ?

ഒരു പെങ്കൊച്ച് അച്ചായനോട് ഷട്ടപ്പ് എന്നു പറഞ്ഞിട്ടുണ്ട്.. അച്ചായന് ഹിഡണ്‍ അജന്‍ഡയുണ്ടെന്നും ഗെറ്റ് ലോസ്‌റ്റെന്നും ഒക്കെ പറഞ്ഞിട്ടുണ്ട്…

എന്റെ പേജില്‍ വന്നിട്ട് എന്നോടു ഷട്ടപ്പെന്നും ഗെറ്റ് ലോസ്‌റ്റെന്നും പറയുന്ന പെങ്കൊച്ചിന് അഞ്ചു ലക്ഷം രൂപ സമ്മാനം പ്രഖ്യാപിച്ചേക്കട്ടെ ?

അയ്യോ വേണ്ട… പിന്നെ നിരാഹാരമായി… സത്യഗ്രഹമായി… നാണക്കേടാവും..

എന്നാ വേണ്ട..

അച്ചായന്‍ കൂലിയെഴുത്തുകാരനാണെന്നും കേജ്‌രിവാളിനെപ്പറ്റി പോസ്റ്റിട്ടത് കാശു കിട്ടിയതുകൊണ്ടാണെന്നും ബ്ലോഗിങ് നിര്‍ത്തണമെന്നും ബ്ലോഗ് ഡിസ്‌ലൈക്ക് ചെയ്യുകയാണെന്നും കുറെപ്പേര്‍ പറഞ്ഞിട്ടുണ്ട്..

എന്നിട്ട് എത്ര പേര്‍ ഡിസ്‌ലൈക്ക് ചെയ്തു ?

അറിയില്ല… പത്തുനൂറു പേര്‍ കൂടി ലൈക്ക് ചെയ്തിട്ടുണ്ട്…

ഹും…

അച്ചായാ ഞാന്‍ വന്നപ്പോള്‍ മുതല്‍ ചോദിക്കണമെന്നു വിചാരിക്കുന്നു… അവിയൊരു ഹൈഹില്‍ഡ് ചെരിപ്പു കിടക്കുന്നത് ആരുടേതാ ?

നീ വന്നപ്പോള്‍ എന്നെ സാര്‍ എന്നാണ് വിളിച്ചത് ? ഇപ്പോ അച്ചായാ എന്നാക്കി ? എന്താ ഉദ്ദേശം ?

ചെരിപ്പിന്റെ കാര്യം പറഞ്ഞില്ല… ആ റൂം എന്തിനാ അടച്ചിട്ടിരിക്കുന്നത് ?

ആ റൂം ഇല്ല… അത് പൊളിച്ചു…

പൊളിക്കാനോ ? വാതില്‍ അടച്ചിട്ടിരിക്കുകയാണല്ലോ…

അപ്പുറത്ത് ഫ്ളാറ്റ്‌ പണി നടക്കുന്നുണ്ട്… അവര്‍ ആ റൂം ഫുള്ളായിട്ട് പൊളിച്ചു.. വാതില്‍ തുറന്നാല്‍ പത്തായിരം അടി താഴേക്കു വീണു ചാവും.. തുറക്കരുത്..

പക്ഷെ, കുറച്ചു മുമ്പ് ഒരു സ്ത്രീ ചുമയ്ക്കുന്ന ശബ്ദം ഞാന്‍ കേട്ടല്ലോ…

പണിക്കാര് പെണ്ണുങ്ങള് വല്ലവരുമായിരിക്കും…

പണി നടക്കുന്നത് പത്തായിരം അടി താഴെയാണെന്നല്ലേ പറഞ്ഞത് ?

അല്ല.. അതു പിന്നെ…

ഫ്രിഡ്ജിന്റെ മുകളില്‍ ഒരു ലേഡീസ് ബാഗ് ഇരിക്കുന്നത് ആരുടേതാ ?

മോളെ, ഞാനിനി ഒന്നും മറച്ചു വയ്ക്കുന്നില്ല…

പറ.. ഏതവളാ അത്… എനിക്കിപ്പം അറിയണം…

നീ അടങ്ങ്… ഞാന്‍ പറയാം… പക്ഷെ, ഇതാരോടും പറയരുത്…

ഇല്ല…

അത് അവളല്ല, അവനാ…

അവനോ ?

അതെ… അവന്‍ !

പക്ഷെ, ഹൈ ഹീല്‍സ്, ലേഡീസ് ബാഗ്, ചുമ…

അതെ, ആരും തിരിച്ചറിയാതിരിക്കാന്‍ വേണ്ടി പെണ്‍വേഷം കെട്ടി വന്നതാ…

ആരാ അത് ?

മുകേഷ് അംബാനി !!

ഓ മൈ ഗോഡ് !!!!

യെസ്… മൈ ഗോഡ്…

മുകേഷ് അംബാനിയോ ? അദ്ദേഹം എന്തിനിവിടെ വന്നു ?

നീയാ ജനലിലൂടെ പുറത്തേക്ക് നോക്കിയേ…

നോക്കി…

എന്താ കാണുന്നേ ?

റിലയന്‍സ് ഫ്രഷ്… അതിനു മുന്നില്‍ അവരുടെ പച്ചക്കറി വാന്‍…

അതില്‍ വന്നത് പച്ചക്കറിയല്ല…

പിന്നെ… ??

മൂപ്പരാ….!! നിറയെ കാശും….

അപ്പോള്‍ വായനക്കാര്‍ പറയുന്നതില്‍ സത്യമുണ്ടല്ലേ ?

കുറച്ചൊക്കെ…

ഒത്തിരി കാശ് കിട്ടിക്കാണുമല്ലോ…

കുറച്ച് കോടികള്‍… നീയൊക്കെ കേജ്‌രിവാള്‍ ഫാനല്ലേ… അല്ലെങ്കില്‍ ഞാന്‍ കുറച്ചു തന്നേനെ…

അയ്യോ, അങ്ങനൊന്നുമില്ല…. സാറെനിക്ക് ഇതുവരെ ഒന്നും തന്നിട്ടില്ലല്ലോ…

എന്നാലും നീയെന്നെ സംശയിച്ചില്ലേ ?

സോറി, സോറി, സോറി, സോറി……

എന്നാ നീ പോയിട്ട് വൈകിട്ട് വാ… ഞാന്‍ അംബാനിയെ പറഞ്ഞു വിടട്ടെ… അങ്ങേര് നിന്നെ കാണേണ്ട..

ശരി, ശരി… വൈകിട്ട് വരുമ്പോള്‍ എനിക്കെന്തു തരും ?

മിഡില്‍ ഫിംഗര്‍…

ശ്ശൊ.. ഫക്ക് യൂ.. ട്ടോ !

Laters, Baby !

😉

പ്രിസണര്‍ ഓണ്‍ലൈന്‍

ഹലോ..

ഹലോ.. ആരാ ?

ഇത് ഞാനാടീ…

ഓ.. ഏട്ടനോ ? ഇതെവിടുന്നാ ഇപ്പോള്‍ ?

എവിടുന്നാന്നോ ? ഞാന്‍ ജയിലിലല്ലേ ? പത്രത്തിലും ടിവീലുമൊക്കെ കാണാറില്ലേ ?

ശരിയാണല്ലോ… സോളാര്‍ കേസു വന്നതോടെ എല്ലാരും ഈ കേസൊക്കെ അങ്ങു മറന്നു..

ആ മറക്കും മറക്കും… സരിത വന്നപ്പോ… അവള്‍ടെ പൂങ്കണ്ണീരു കണ്ടപ്പോ.. ഞങ്ങളെയെല്ലാം അങ്ങു മറന്നു… ഞങ്ങളൊന്നു പുറത്തേക്കിറങ്ങിക്കോട്ടെ… എല്ലാവരേം എല്ലാം ഓര്‍മിപ്പിക്കുന്നുണ്ട്…

നിങ്ങളിനി പുറത്തിറങ്ങുവോ ഏട്ടാ ? … കൊലക്കേസല്ലേ ?

ഹഹഹഹഹഹ…. നിന്നെക്കൊണ്ട് ഞാന്‍ തോറ്റു… പുറത്തിറങ്ങണോന്ന് എനിക്കും വല്യ ആഗ്രഹമൊന്നുമില്ല…

ജീവിതമൊക്കെ എങ്ങനെ ?

ഇവിടെ സുഗവല്ലേ… ഒന്നുകില്‍ മന്ത്രിയാകണം… അല്ലെങ്കില്‍ ആരെയെങ്കിലും തട്ടീട്ട് ഇവിടെ വന്നു കിടക്കണം…

മന്ത്രിമാര്‍ക്കൊക്കെ കഷ്ടപ്പാടാ ഏട്ടാ… അവിടെയായിരിക്കും ഭേദം.. അകത്തു കിടക്കുന്ന നിങ്ങളൊക്കെ ചെയ്യുന്ന പോക്രിത്തരത്തിനു നാട്ടുകാര്‍ മന്ത്രിയുടെ നെഞ്ചത്തോട്ടല്ലേ കയറുന്നത്…

ഡീ, ഡീ.. വേണ്ടാ…

അല്ല ഏട്ടനെന്താ ഇപ്പോ വിളിച്ചത് ?

അല്ല നീ ഫെയ്‌സ്ബുക്കിലൊന്നും ഇല്ലേ ?

ഉണ്ടല്ലോ ഏട്ടാ… എന്തേ ?

മിനിയാന്നു രാത്രി ഞാന്‍ നിന്നെയൊന്നു പോക്ക് ചെയ്തിട്ട് അനക്കമൊന്നുമില്ലല്ലോ…

പോക്കൊന്നും ഞാന്‍ നോക്കാറില്ല ഏട്ടാ.. ഇപ്പോഴത്തെ കാലമല്ലേ… ഒരു ദിവസം തന്നെ എത്ര അവന്‍മാരാ പോക്കു ചെയ്യുന്നേ… അതൊക്കെ നോക്കാന്‍ പോയാല്‍ പോക്കുന്നവന്റെയൊക്കെ ജീവിതം തെഹല്‍ക്കയാകും… ഞാന്‍ ലൈക്കുമാത്രേ നോക്കാറുള്ളൂ…

നിനക്കെന്റെ പുതിയ പടത്തിനൊരു ലൈക്ക് കൊടുത്താലെന്താരുന്നു ?

ഞാന്‍ കണ്ടില്ലല്ലോ ഏട്ടാ… ഏട്ടന്റെ ഏതു പടം ?

ഡീ, ജയിലിന്റെ ഭിത്തിയേല്‍ ചാരി മമ്മൂട്ടീനെപ്പോലെ കൂളിങ് ഗ്ലാസൊക്കെ വച്ചു നിക്കുന്ന ആ പടമില്ലേ… നീ മാത്രേയുള്ളൂ ഇനി ലൈക്ക് ചെയ്യാന്‍… ഫെയ്‌സ്ബുക്കിലത് വൈറസായലെന്നാ ഫാന്‍സ് പറയുന്നത്…

വൈറസല്ല ഏട്ടാ… വൈറല്‍…. അല്ല, ഏട്ടാ.. എട്ടനു ഫാന്‍സ് ഒക്കെയുണ്ടോ ?

കൊള്ളാം…. ഉണ്ടോന്നോ… മമ്മൂട്ടീം മോഹന്‍ലാലും കഴിഞ്ഞാ പിന്നെ ഞാനാ… അടുത്ത തവണ പരോളിനു വരുമ്പഴേക്കും 10 ലക്ഷം ഫാന്‍സ് ആകുമെന്നാ എന്റെ കണക്കു കൂട്ടല്‍… ഡീ, നീയൊന്നു ഹോള്‍ഡ് ചെയ്‌തേ… ഡാ പട്ടീ, ഇങ്ങു വന്നേ… നിനക്കെന്താടാ ഇതിനു മുന്നിലൂടെ പോകുമ്പോ നെഞ്ചിനൊരു വിരിവ്… ങും ?? യൂണിഫോം അഴിക്കെടാ… പാന്റ് അഴിക്കെടാ… മുട്ടില്‍ നിരങ്ങിപ്പോടാ…ങും…

ഹലോ ??

ഹ.. നീ പറയെടീ…

എന്താ ഏട്ടാ അവിടെ ?

അതിവിടെ പതിവൊള്ളതാ… ജയില്‍ വാര്‍ഡന്‍ ഇതുവഴി പോയപ്പോ ഞാനൊന്നു വിരട്ടി വിട്ടതാ… വിരട്ടി നിര്‍ത്തിയില്ലെങ്കില്‍ ഇവന്‍മാരൊക്കെ തലയില്‍ കയറുമെന്നേ…

ശ്ശൊ ! ഏട്ടന്റെ ഒരു കാര്യം…

അപ്പോ… നീയെന്താ എന്റെ പടം ലൈക്ക് ചെയ്യാത്തേ ?

ഞാനാരേം ലൈക്ക് ചെയ്യാറില്ല ഏട്ടാ… ഏട്ടന്‍ വേണേല്‍ എന്നെ ലൈക്ക് ചെയ്‌തോ…

ഡീ പുന്നാരമോളേ… നീയാരോടാ സംസാരിക്കുന്നതെന്നറിയാമോ ?

സോറി ഏട്ടാ… ഏട്ടന് ഞാന്‍ ഒന്നല്ല… 51 ലൈക്ക് തരും…

ങ്ഹും… നിന്നെ ഞാന്‍ പൊക്കും…

ഏട്ടന്‍ എന്തോന്നാ പറഞ്ഞേ ? ഏട്ടാ.. കൊലക്കേസ് പോലെയല്ല പെണ്ണുകേസ്… ജീവിതം തെഹല്‍ക്കയാകും..

ഹൊ… ഞാന്‍ പോക്കുമെന്നാ പറഞ്ഞത്.. ഫെയ്‌സ്ബുക്കില്‍ പോക്ക് ചെയ്യുമെന്ന്…

ഉവ്വ ഉവ്വ…

ഡീ ഒന്നു ഹോള്‍ഡ് ചെയ്‌തേ… ഡോ ഇങ്ങു വന്നേ… അങ്ങേ മൂലയ്ക്ക് റേഞ്ച് കുറവാണല്ലോ… ഞാനവിടെ കിടന്നോണ്ടൊക്കെ ഫോണ്‍ വിളിക്കുന്നതാ… എനിക്കു ഫുള്‍ റേഞ്ച് കിട്ടിയില്ലെങ്കില്‍ താന്‍ വിവരമറിയും… എന്തോന്ന് ?? ബിഎസ്എന്‍എല്ലും ടവറുമൊന്നും എനിക്കറിയണ്ട… 48 മണിക്കൂറിനകം എനിക്കാ മൂലയില്‍ ഫുള്‍ റേഞ്ച് കിട്ടിയിരിക്കണം… ബിഎസ്എന്‍എല്‍ മാനേജരുടെ നമ്പരങ്ങു താടോ… ഞാന്‍ വിളിച്ചു പറയാം…ങും… പൊക്കോണം…

ഏട്ടാ.. ഞാന്‍ വയ്ക്കട്ടെ ?

നിക്കെടീ…

പിന്നേം വാര്‍ഡനാരുന്നോ ?

അതെയതെ… ഇതു വേറൊരുത്തനാ.. പാവമാ..

എന്നാലും ഇങ്ങനെ പേടിപ്പിക്കുന്നതു ശരിയാണോ ?

പേടിപ്പിക്കുന്നല്ലെഡീ… അവറ്റകളൊക്കെ പേടിച്ചാ ജീവിക്കുന്നേ… സിംഹത്തെ കാണുമ്പോള്‍ മുയലുകള്‍ ഓടിയൊളിക്കുന്നത് സിംഹത്തിന്റെ കുറ്റമാണോ ? അതുപോലെയാണ് ഈ ജയിലിലും.. ഞങ്ങളെ കാണുന്നതേ ഇവന്‍മാരുടെ മുട്ട് കൂട്ടിയിടിക്കാന്‍ തുടങ്ങും…

ഏട്ടന്റെയൊരു കാര്യം…

ഞാനിവിടുന്നു വരുമ്പോ നിനക്കെന്താടീ കൊണ്ടു വരേണ്ടത് ?

അതിന് ഏട്ടന്‍ അവിടുന്നു വരുന്ന കാര്യമൊന്നും ഉറപ്പായില്ലല്ലോ….

ജഡ്ജിമാര്‍ക്കൊക്കെ ഞങ്ങളെ പേടിയാഡീ… വെറുതെ വിട്ടില്ലെങ്കില്‍ പണി കിട്ടൂന്ന് അവര്‍ക്കറിഞ്ഞൂടെ ? നിനക്കു ഞാനെന്താ കൊണ്ടു വരണ്ടേന്നു പറ…

ഏട്ടന്‍ ജയിലീന്നല്ലേ.. ഗള്‍ഫീന്നൊന്നുമല്ലല്ലോ വരുന്നേ ?

ഹഹഹ… നിനക്കിവിടുത്തെ സെറ്റപ്പിനെക്കുറിച്ചൊന്നും ഒരു പിടീമില്ല… ഗള്‍ഫില്‍ കിട്ടുന്ന സാധനങ്ങളൊക്കെ ഇവിടേം എനിക്കു സംഘടിപ്പിക്കാമെടീ… ഞാനിപ്പോ ഇവിടെ ഉപയോഗിക്കുന്നത്… ആപ്പിള്‍ ഐഫോണ്‍ 5എസും സാംസങ് ഗാലക്‌സി നോട്ട് ടുവും ആണ്.. ഇതൊക്കെ നിന്റെ ചുറ്റുവട്ടത്തുള്ള ഏതെങ്കിലും കോന്തന്‍മാരുടെ കയ്യിലൊണ്ടോ ?

ശ്ശൊ ! ഈ ഏട്ടന്‍…

ഡീ.. മിണ്ടല്ലേ.. ഹോള്‍ഡ് ചെയ്യ്….. വരണം, വരണം… എന്തൊക്കെയുണ്ട് ? അത് ചാര്‍ജായോ ? ഇതിനകത്തൊരു സ്വിച്ച് ബോര്‍ഡ് പിടിപ്പിക്കാന്‍ പറഞ്ഞിട്ട് നാളെത്രയായി സര്‍… ങും, ശരി ശരി..

അതാരാ.. ഏട്ടാ ? ഏട്ടന്‍ വളരെ മയത്തിലാണല്ലോ…

അത് ഐജിയാരുന്നു.. രാവിലെ എന്റെ ഗാലക്‌സി നോട്ടിന്‍െ ബാറ്ററി തീര്‍ന്നിട്ട് ചാര്‍ജ് ചെയ്യാന്‍ കൊടുത്തുവിട്ടത് തിരിച്ചു കൊണ്ടുവന്നു തരാന്‍ വന്നതാ…

ജയിലിലാണെങ്കിലും ഏട്ടനെപ്പോഴും ബിസിയാണല്ലോ….

ഹും… ശരിയാണെഡീ… നീയൊരു കാര്യം ചെയ്യ്്… വൈകിട്ട് ചാറ്റില്‍ വാ… നീ വാട്ട്‌സ്ആപ്പിലുണ്ടോ ?

ഇല്ല ഏട്ടാ…

വൈബര്‍ ? വി ചാറ്റ് ? ലൈന്‍ ?

ശ്ശൊ.. അതൊന്നുമില്ല ഏട്ടാ…

കഷ്ടം… നിങ്ങളൊക്കെ ഏതു കാലത്താണ് ജീവിക്കുന്നത്… എന്തായാലും വൈകിട്ട് ചാറ്റില്‍ വാ… എന്റെ പടങ്ങളൊക്കെയൊന്നു ലൈക്ക് ചെയ്‌തേക്കണം… വല്യ ഷെയറിങ്ങൊന്നും വേണ്ട.. ഇപ്പോഴത്തെ കാലമല്ലേ…

ശരി ഏട്ടാ…

എന്നാ നീ വച്ചോ, എനിക്ക് ചില പ്രധാനപ്പെട്ട കോളുകള്‍ വരാനുണ്ട്…

ശരി ഏട്ടാ…

ടേക് കെയര്‍…

കോഴിക്കോട് ജയിലിന് സോഷ്യല്‍ മീഡിയ അവാര്‍ഡ്

ലോകത്തിലെ ആദ്യത്തെ സോഷ്യല്‍ നെറ്റ്‌വര്‍ക്കിങ് ജയില്‍ എന്ന പദവി നേടിയ കോഴിക്കോടിന് ജില്ലാ ജയിലിന് യുനെസ്‌കോയും ആംനെസ്റ്റിയും ചേര്‍ന്നു നല്‍കുന്ന സോഷ്യല്‍ നെറ്റ്‌വര്‍ക്കിങ് ഫോര്‍ ദി അപ്ബ്രിങ്ങിങ് ഓഫ് ദി ഡൗണ്‍ട്രൊഡ്ഡെന്‍ പുരസ്‌കാരം നല്‍കാന്‍ ശുപാര്‍ശ. പരിഷ്‌കൃത രാജ്യങ്ങളില്‍ പോലും തടവുപുള്ളികള്‍ക്ക് ജയിലിനുള്ളില്‍ വലിയ സൗകര്യങ്ങളൊന്നുമില്ലാതിരിക്കെ, സ്മാര്‍ട്‌ഫോണും ഇന്റര്‍നെറ്റ് കണക്ഷനും ഉള്‍പ്പെടെയുള്ള സൗകര്യങ്ങളും ജയിലിനുള്ളില്‍ കൂളിങ് ഗ്ലാസും ബെര്‍മുഡയുമിട്ട് ഫോട്ടോഷൂട്ട് നടത്താനുമൊക്കെ സാഹചര്യങ്ങളൊരുക്കുകയും ചെയ്തതുള്‍പ്പെടെയുള്ള മികവുകളാണ് കോഴിക്കോട് ജില്ലാ ജയിലിനെ ചരിത്രനേട്ടത്തിലേക്ക് കൈപിടിച്ചുയര്‍ത്തിയത്. വരുന്ന ചിങ്ങത്തില്‍ പോളണ്ടില്‍ നടക്കുന്ന ചടങ്ങില്‍ വച്ച് ആഭ്യന്തരമന്ത്രി തിരുവഞ്ചൂര്‍ രാധാകൃഷ്ണന് അവാര്‍ഡ് സമ്മാനിക്കുമെന്ന് രാജ്യാന്തര വാര്‍ത്താ ഏജന്‍സികളോടടുത്ത വൃത്തങ്ങള്‍ അറിയിച്ചു.

ലോകമെങ്ങുമുള്ള മര്‍ദ്ദിതരും പീഡിതരുമായ ജനവിഭാഗങ്ങളെ സമൂഹത്തിന്റെ മുഖ്യധാരയിലേക്കു കൊണ്ടുവരിക എന്ന ലക്ഷ്യത്തോടെ മര്‍ക്ക് സക്കര്‍ബര്‍ഗ് തുടങ്ങി വച്ച മഹത്തായ പ്രസ്ഥാനമാണ് ഫെയ്‌സ്ബുക്ക്. ടിപി ചന്ദ്രശേഖരന്‍ കേസിലെ ജീവിക്കുന്ന രക്തസാക്ഷികളായ സുനിയേട്ടനും മറ്റും കല്‍ത്തുറുങ്കില്‍ നിന്നും ഫെയ്‌സ്ബുക്കിലൂടെ തങ്ങളുടെ സ്വാതന്ത്ര്യവും വ്യക്തിപ്രഭാവവും ലോകത്തോടു പങ്കുവച്ചത് ഫെയ്‌സ്ബുക്കിന്റെ ജനപ്രീതിയുടെയും സാമൂഹികപരിഷ്‌കരണപ്രവര്‍ത്തനങ്ങളുടെയും തെളിവായി ചൂണ്ടിക്കാണിക്കപ്പെടുന്നു. സിറിയയിലും ഈജിപ്തിലും നടന്ന സോഷ്യല്‍ മീഡിയ വിപ്ലവങ്ങള്‍ സമൂഹത്തില്‍ നിന്നും സ്വതന്ത്രരായ ജനവിഭാഗങ്ങള്‍ മുന്‍കൈയെടുത്തതായിരുന്നെങ്കില്‍ ജയിലറയ്ക്കുള്ളില്‍ നിന്നും സോഷ്യല്‍ മീഡിയയിലൂടെ ഇത്തരത്തിലൊരു വിപ്ലവം ചരിത്രത്തിലാദ്യമാണെന്നും ഇത് സോഷ്യല്‍ നെറ്റ്‌വര്‍ക്കിങ് ചരിത്രത്തിലെ നാഴികക്കല്ലാണെന്നും ഫെയ്‌സ്ബുക്ക് മുതലാളി മാര്‍ക്ക് സക്കര്‍ബര്‍ഗ് പറഞ്ഞതായി അദ്ദേഹത്തോട് അടുത്ത വൃത്തങ്ങള്‍ പറഞ്ഞു. പുതിയ സാഹചര്യത്തില്‍ ഫെയ്‌സ്ബുക്കിന്റെ പ്രാദേശിക ഓഫിസ് കണ്ണൂരില്‍ ആരംഭിക്കുന്ന കാര്യവും പരിഗണനയിലുണ്ടെന്നാണ് വിവരം.

പണ്ട് കംപ്യൂട്ടര്‍ ഗോ ബാക്ക് വിളിച്ച ആളുകളുടെ അനുയായികള്‍ ഇപ്പോള്‍ ജയിലിനുള്ളില്‍ നിന്നു വരെ ഫെയ്‌സ്ബുക്ക് അപ്‌ഡേറ്റ് ചെയ്യുന്നതാണ് കാലഘട്ടത്തിലെ ഏറ്റവും വലിയ വിപ്ലവം എന്നു റഷ്യയില്‍ നിന്നു ടൂറിസ്റ്റ് വീസയിലെത്തിയ സാഷ ഫക്ക്യേനോവ് കൊച്ചിയില്‍ പറഞ്ഞു. ടിപി കേസിലെ രക്തസാക്ഷികള്‍ എന്ന നിലയില്‍ കൊടി സുനിയേട്ടനും മറ്റും ഫെയ്‌സ്ബുക്കില്‍ മാത്രം ഒതുങ്ങി നില്‍ക്കുന്നത് ഖേദകരമാണെന്നും ട്വിറ്റര്‍, ഗൂഗിള്‍ പ്ലസ്, ലിങ്ക്ട് ഇന്‍, ഇന്‍സ്റ്റഗ്രാം, പിന്ററസ്റ്റ് തുടങ്ങിയ മറ്റു സോഷ്യല്‍ നെറ്റ്‌വര്‍ക്കുകളിലേക്കും വൈകാതെ എത്തണമെന്നും അതാത് സോഷ്യല്‍ നെറ്റ്‌വര്‍ക്കുകളുടെ പ്രതിനിധികള്‍ ആവശ്യപ്പെട്ടു. ഗൂഗിള്‍ പ്ലസില്‍ വരികയാണെങ്കില്‍ ഹാങ് ഔട്ടിലൂടെ ഇവര്‍ക്ക് ജയിലില്‍ നിന്നും പുറംലോകവുമായി നേരില്‍ കണ്ട് സംസാരിക്കാം. ആരാധകര്‍ക്കു ദര്‍ശനം നല്‍കാനും അണികള്‍ക്കു നിര്‍ദേശങ്ങള്‍ നല്‍കാനുമൊക്കെ ഇത് സഹായകമായിരിക്കും. ലോകത്തെ ഏറ്റവും വലിയ പ്രൊഫഷനല്‍ സോഷ്യല്‍ നെറ്റ്‌വര്‍ക്ക് ആയ ലിങ്ക്ട് ഇന്നില്‍ വരികയാണെങ്കില്‍ പുതിയ ക്വട്ടേഷന്‍ ഓഫറുകളും മറ്റും ലഭിക്കാന്‍ എളുപ്പമുണ്ട്. ഫെയ്‌സ്ബുക്കില്‍ ഇട്ടമാതിരിയുള്ള ആരെയും ഹഠാദാകര്‍ഷിക്കുന്ന ചിത്രങ്ങള്‍ പോസ്റ്റ് ചെയ്യാനാണെങ്കില്‍ ഫെസ്ബുക്കിനെക്കാള്‍ നല്ലത് ഇന്‍സ്റ്റഗ്രാം ആണ്.

അതേ സമയം, ലോകത്തിനു തന്നെ മാതൃകയാവുന്ന തരത്തില്‍ കോഴിക്കോട് ജയിലില്‍ പരിഷ്‌കാരങ്ങള്‍ വരുത്തിയ ഉദ്യോഗസ്ഥരെ സ്ഥലം മാറ്റുന്നതും ജയിലില്‍ ഫെയ്‌സ്ബുക്ക് വിപ്ലവത്തിനു നാന്ദി കുറിച്ച തടവുകാരായ രക്തസാക്ഷികളെ പൂജപ്പുര ജയിലിലേക്കും ആഭ്യന്തര മന്ത്രി തിരുവഞ്ചൂര്‍ രാധാകൃഷ്ണനെ ഊളമ്പാറയിലേക്കും സ്ഥലം മാറ്റാന്‍ നടക്കുന്ന ശ്രമങ്ങള്‍ സാമൂഹികപുരോഗതിയെ പിന്നോട്ടു വലിക്കുന്നതും മനുഷ്യാവകാശങ്ങളെ നിഷേധിക്കുന്നതിനും തുല്യമാണെന്നു മനുഷ്യാവകാശ പ്രവര്‍ത്തകനായ വടിവാള്‍ വേലുക്കുട്ടി അഭിപ്രായപ്പെട്ടു. താലിബാന്‍കാരോടു പൊരുതി ജയിച്ച മലാലയ്ക്കു തുല്യരായി കുലംകുത്തിയായ ടിപി ചന്ദ്രശേഖരന്റെ ചതിവില്‍ പെട്ടു രക്തസാക്ഷികളായ സുനിയേട്ടനെയും മറ്റും കാണുകയും അവരെ ആദരിക്കുകയും വേണമെന്നും അഭിപ്രായമുയര്‍ന്നിട്ടുണ്ട്.

പുതിയ സംഭവവികാസങ്ങളോടെ വിപ്ലവം പൂര്‍ണമായും വന്നു കഴിഞ്ഞതായി പഴയകാല വിപ്ലവനായകന്‍ കരിമ്പന കുട്ടപ്പന്‍ അഭിപ്രായപ്പെട്ടു. ജയിലറ ഞങ്ങള്‍ക്കു മണിയറയാണ് എന്നായിരുന്നു പഴയ മുദ്രാവാക്യം. ഇന്ന് മണിയറയെക്കാള്‍ മനോഹരമായ ആരെയും കൊതിപ്പിക്കുന്ന സ്ഥലമായി കോഴിക്കോട് ജില്ലാ ജയില്‍ മാറിക്കഴിഞ്ഞു. ഇത് തങ്ങളാഗ്രഹിക്ക വിപ്ലവം വന്നു ചേര്‍ന്നു എന്നതിന്റെ തെളിവാണെന്നും കുട്ടപ്പന്‍ സൂചിപ്പിച്ചു.

പുതിയ സാഹചര്യത്തില്‍ തിഹാര്‍ ജയില്‍ ഉള്‍പ്പെടെയുള്ള രാജ്യത്തെ ജയിലുകളില്‍ നിന്നുള്ള പ്രമുഖരടക്കമുള്ള ആയിരക്കണക്കിനു തടവുകാര്‍ കോഴിക്കോട് ജയിലിലേക്ക് സ്ഥലംമാറ്റത്തിന് അഭ്യര്‍ഥിച്ചതായി വിവിധ ജയിലുകളോടടുത്ത വൃത്തങ്ങള്‍ അറിയിച്ചു. സൂചനയുണ്ട്. കഴിഞ്ഞ ദിവസം ലോക്കപ്പില്‍ ഫാന്‍ ആവശ്യപ്പെട്ട് ബലാല്‍സംഗക്കേസിലെ പ്രതിയും മുന്‍ തെഹല്‍ക്ക മുതലാളിയുമായ തരുണ്‍ തേജ്പാല്‍ കോഴിക്കോട് ജയിലിലേക്കു തന്നെ മാറ്റുകയാണെങ്കില്‍ മൂന്നോ നാലോ വട്ടം ബലാല്‍സംഗം ചെയ്തതായി സമ്മതിക്കാം എന്നു പറഞ്ഞതായും സൂചനയുണ്ട്. വിദേശരാജ്യങ്ങളിലുള്ള രാജ്യാന്തരതടവുകാരും കോഴിക്കോട് ജയിലിലേക്കു മാറാന്‍ താല്‍പര്യം പ്രകടിപ്പിക്കുന്നുണ്ട്.

മേഢ്‌റ ബുഭുക്ഷ (ശ്രഷേ്ഠ കവിത)

മലയാളം വാരികയില്‍ പ്രസിദ്ധീകരിച്ചു വന്ന, ശ്രീ വിഷ്ണുപ്രസാദിന്റെ കവിതയുടെ പേരില്‍ സാഹിത്യ-സദാചാര രംഗത്തെ അല്‍പബുദ്ധികളും തലയില്‍ നിലാവുദിച്ചിട്ടില്ലാത്ത ഏതാനും ഫെമിനിസ്റ്റുകളും ഓണ്‍ലൈന്‍ മഞ്ഞപ്പത്രങ്ങളും കഥയും കവിതയും കണ്ടാല്‍ പോലും തിരിച്ചറിയാത്ത കുറെ സാധുക്കളും പൊട്ടിത്തെറിച്ചുകൊണ്ടിരിക്കുകയാണ്. ലിംഗവിശപ്പ് എന്ന പേരില്‍ അച്ചടിച്ചു വന്ന കവിത സത്യത്തില്‍ ശരാശരി മലയാളിയുടെ ലൈംഗികവ്യക്തിത്വത്തിന്റെ പ്രതിച്ഛായയാണ്. പൊതുസ്ഥലങ്ങളിലും സൗഹൃദങ്ങളിലും തുടങ്ങി സ്ത്രീയും പുരുഷനും അടുത്തിടപെഴകുന്ന എല്ലായിടത്തും ഒരു പണി നടക്കുമോ എന്നന്വേഷിക്കുകയും പല പണികള്‍ നടക്കുന്നതായി ഭാവനയില്‍ കാണുകയും ചെയ്യുന്ന മലയാളിക്ക് അയ്യോ, ഇതെന്നെപ്പറ്റിയാണല്ലോ എന്ന തോന്നലുണ്ടാവുന്നത് സ്വാഭാവികമാണ്. ആ ഞെട്ടലില്‍ നിന്നുള്ള ആദ്യപ്രതികരണമാണ് കവിതയോടുള്ള എതിര്‍പ്പ്.

വിഷ്ണുപ്രസാദിനെയും കവിതയെയും തെറിവിളിക്കുന്നവര്‍ അവരുടെ രോഷപ്രകടന സ്റ്റാറ്റസുകളില്‍ ലൈക്ക് ചെയ്യുന്ന സ്ത്രീകളുടെ പ്രൊഫൈലുകളില്‍ നിരങ്ങിയും വായില്‍നോക്കിയും സമയം കളയുന്നത് പോലെയാണ് കവിതയിലെ കഥാപാത്രത്തിന്റെ ജീവിതവും. ഇത്തരത്തിലൊരു ആത്മകഥാംശം തിരിച്ചറിയുന്നതിന്റെ അമ്പരപ്പാണ് വിമര്‍ശകരില്‍ പലര്‍ക്കുമെന്നതില്‍ സംശയമില്ല. ഫെമിനിസ്റ്റുകളുടെ കാര്യം പിന്നെ പറയാനില്ല. ലിംഗം, പണി എന്നൊക്കെ ഒരു പുരുഷകവി എഴുതുന്നതു കണ്ടാല്‍ പി.സി.ജോര്‍ജിന്റെ പ്രസംഗം കേട്ട യൂത്ത് കോണ്‍ഗ്രസുകാരുടെ അവസ്ഥയാണ്. എന്നാല്‍, യോനിയെപ്പറ്റിയും മറ്റും വളരെ വിശദമായി ഇവരെഴുതുന്ന ചവറുകളൊക്കെ ക്ലാസിക്കളായി പരിഗണിക്കപ്പെടണമെന്ന് ഇവര്‍ക്ക് നിര്‍ബന്ധവുമുണ്ട്. അത്തരം യോനി പോസ്റ്റുകളില്‍ ആഞ്ഞാഞ്ഞ് ലൈക്ക് ചെയ്യുന്ന മണകുണാഞ്ചന്‍മാരാണ് ഇവിടെ കവിതയുടെ നിലവാരം അളന്നുതൂക്കി തിട്ടപ്പെടുത്തിക്കൊണ്ടിരിക്കുന്നത് എന്നതും ശ്രദ്ധേയമാണ്.

ഇനി വിഷ്ണുപ്രസാദിന്റെ കവിത വായിക്കാം.

ലിംഗ വിശപ്പ്

ഒന്ന് പണിയാന്‍ തരുമോ എന്ന്
അവളോട് ചോദിക്കാഞ്ഞതിന്റെ ഖേദം
ഇന്നും തീര്‍ന്നിട്ടില്ല

ചോദിച്ചിരുന്നെങ്കില്‍ എന്തായേനെ ?

അവളോട് മാത്രമല്ല,
എത്രയോ സ്ത്രീകളോട്
ചോദിക്കാന് മുട്ടിയതാണ്

മനസ്സില് കിടത്തിയും
ഇരുത്തിയും നിര്‍ത്തിയും
കാമശാസ്ത്രത്തിലെ മുഴുവന്‍ മുറകളും
അഭ്യസിച്ചതാണ്

എന്നാലും
ഒരിക്കല്‍ പോലും ചോദിച്ചില്ല
ലിംഗത്തിന്റെ വിശപ്പോളം
ഒന്നുമുണ്ടായിട്ടില്ല
എന്നിട്ടും..

വെളിപ്പെടുത്തുന്നതോടെ
അപമാനത്തിന്റെ നരകത്തിലേക്ക്
തള്ളിക്കളയുമോ
എന്ന ഭയത്താല്‍
സ്വന്തം ലിഗംത്തെയും
അതിന്റെ അനാദിയായ വിശപ്പിനെയും
പിന്‍വലിച്ച്
അങ്ങനെയൊരു ജീവി
ഇവിടെ പാര്‍ക്കുന്നില്ലെന്ന്
എല്ലാവരെയും പോലെ
ഞാനും ഒരു ബോര്‍ഡ് വയ്ക്കുന്നു

കടുകിട തെറ്റിയാല്‍
ബലാല്‍സംഗം ചെയ്തുപോകുന്ന
ആ കുറ്റവാളി ഞാന്‍ തന്നെയാണ്

കൂട്ടുകാരാ,
ശുക്ലം വീണ് കീറിപ്പോകുന്ന
നമ്മുടെ അടിവസ്ത്രങ്ങള്‍
നുണ പറയുന്നില്ല…

ലിംഗവിശപ്പിന്റെ വിമര്‍ശകരെ അടച്ചാക്ഷേപിക്കുന്നതുകൊണ്ട് അവരുടെ വിശപ്പ് അവസാനിക്കും എന്നു ഞാന്‍ വിശ്വസിക്കുന്നില്ല. പൊതുവേയുള്ള പരാതി, കവിതയില്‍ കവി തുറന്നെഴുതിയിരിക്കുന്നു എന്നതാണ്. എല്ലാവര്‍ക്കും മനസ്സിലാവുന്ന മലയാളത്തില്‍ വളരെ ലളിതമായി കവി പറയാനുദ്ദേശിച്ചത് പറഞ്ഞു എന്നത് പലര്‍ക്കും സഹിച്ചിട്ടില്ല. കഠോരപദപ്രയോഗങ്ങളും ഒരിക്കലും പിടികിട്ടാത്ത വാക്കുകളുമായിരുന്നെങ്കില്‍ കവിതയെ അംഗീകരിച്ചേനെ എന്നാണ് അവര്‍ പറയുന്നതിന്റെ ചുരുക്കം. അതുകൊണ്ട് അവരുടെ വ്യംഗവിശപ്പ് തീര്‍ക്കുന്നതിനായി വിഷ്ണുപ്രസാദിന്റെ കവിതയെ ഞാനൊന്നു മാറ്റിയെഴുതുകയാണ്. അതിന്റെ ലാളിത്യവും മനോഹാരിതയും നീക്കി ആശയത്തില്‍ ഒരു മാറ്റവും വരുത്താതെ, വാക്കുകള്‍ മാത്രം മാറ്റി പ്രതിഷ്ഠിച്ച് കവിത സാഹിത്യ-സദാചാരവാദികള്‍ക്കു മുന്നില്‍ സമര്‍പ്പിക്കുന്നു.

മേഢ്‌റ ബുഭുക്ഷ (ശ്രഷേ്ഠ കവിത)

ഏകഭോഗത്തിനുടല്‍ പകര്‍ന്നീടുമോ എന്നു
നാരിയോടാരായാഞ്ഞതിന്‍ വ്യഥ
വര്‍ത്തമാനത്തിലുമൊഴിഞ്ഞിട്ടില്ല

ആരാഞ്ഞിരുന്നെങ്കില്‍ പരിണാമഗുപ്തിയിലെന്തു വിളഞ്ഞേനെ ?

കേവലം അവളോടല്ല,
നാനാ നാരികളോടപ്രകാരം
തിരയാനുദ്യമിച്ചതാം ഭവാന്‍

ചിത്തത്തിനുള്ളില്‍ ശയിച്ചും
ഉപവിഷ്ടയാക്കിയും, നിലകൊള്ളിച്ചും
രതിശാസ്ത്രത്തിന്‍ ശൈലികളത്രയില്‍
പ്രയുക്തമാം ശേഷിയും കൈവരിച്ചു

എങ്കിലും ഏകാവസരത്തിലുമാരാഞ്ഞില്ലൊന്നും
മേഢ്‌റ തന്‍ ബുഭുക്ഷയോളം
ഭവിച്ചിട്ടില്ലിതുവരെയൊന്നും
എങ്കിലും…

പ്രത്യക്ഷമാക്കുന്നതിന്‍ ശേഷം അയശസ്സിന്‍
പരമപീഢാസ്ഥാനനിര്‍ദ്ദിഷ്ടമാകുമോ
ശങ്കയാല്‍ മമ മേഢ്‌റയും
അതിനപരിമേയമാം ബുഭുക്ഷയും ഉള്‍വലിച്ച്
ഇപ്രകാരമൊരു ജീനം വാസമില്ലെന്നു
സര്‍വപ്രകാരം ഒരു ഫലകമുയര്‍ത്തു ഞാന്‍

ക്ഷുദ്രാന്തരാളം പിഴച്ചാല്‍
ദുഷിപ്പിച്ചു പോകുന്ന
അപരാധിയാണീയുള്ളവന്‍ ഭവാന്‍

തോഴാ,
രേതസ്സ് പതിച്ചു
ജീര്‍ണിച്ചുപോകയാം
അടിയുടയാടകള്‍
മൊഴിയില്ല വ്യാജം.

——–

അനുഗ്രഹിക്കൂ, ആശീര്‍വദിക്കൂ….