മിസ്ഡ് കോള്‍ പൊളിറ്റിക്‌സ്

ചൈനീസ് കമ്യൂണിസ്റ്റ് പാര്‍ട്ടിയെ തോല്‍പിച്ച് ബിജെപി ലോകത്തിലെ ഏറ്റവും വലിയ രാഷ്ട്രീയ പാര്‍ട്ടിയായി മാറി. എന്നാല്‍, എങ്ങനെ പാര്‍ട്ടിയില്‍ ഇത്രയധികം ്അംഗങ്ങളുണ്ടായി എന്നതിനെ സംബന്ധിച്ച ചര്‍ച്ചകളും ആക്ഷേപവുമാണ് മൊത്തത്തില്‍ ചര്‍ച്ചകളില്‍ നിറഞ്ഞു നില്‍ക്കുന്നത്. പ്രധാന ആക്ഷേപം മിസ്ഡ് കോള്‍ വഴിയാണ് ബിജെപി ഇത്രയധികം അംഗങ്ങളെ ചേര്‍ത്തത് എന്നതാണ്. മിസ്ഡ് കോള്‍ അടിച്ചാല്‍ ബിജെപി അംഗമാകാം എന്നുള്ള എസ്എംഎസ് എനിക്കും വന്നിട്ടുണ്ട്. ഞാന്‍ മിസ്ഡ് കോള്‍ അടിച്ചില്ല, ബിജെപി അംഗമായിട്ടുമില്ല. ബിജെപി അംഗമാകാന്‍ ആഗ്രഹമുള്ളവര്‍ മിസ്ഡ് കോള്‍ അടിക്കുകയും അംഗമാവുകയും ചെയ്തിട്ടുണ്ടാവാം. ഇതില്‍ എന്താണ് ഇത്ര ആക്ഷേപകരമായി കണ്ടെത്തിയിരിക്കുന്നത് എന്നത് എനിക്കു മനസ്സിലായിട്ടില്ല.

മിസ്ഡ് കോള്‍ മെംബര്‍ഷിപ്പിനെ ആക്ഷേപിക്കുന്നവരുടെ ശ്രദ്ധയിലേക്ക് ഏതാനും പോയിന്റുകള്‍ ഞാന്‍ കൊണ്ടുവരാനാഗ്രഹിക്കുകയാണ്.

1. മിസ്ഡ് കോള്‍ ബിജെപി കണ്ടുപിടിച്ച സംഗതിയല്ല. സ്വന്തം അച്ഛനെ ഐസിയുവിലേക്കു കൊണ്ടുപോകുന്ന വിവരം മറ്റു സഹോദരന്‍മാരെ അറിയിക്കാന്‍ പോലും മിസ്ഡ് കോള്‍ അടിക്കുന്ന ഇന്ത്യക്കാരന്‍, ബിജെപി പാര്‍ട്ടി മെബര്‍ഷിപ്പിന് മിസ്ഡ് കോള്‍ ഒരു മാര്‍ഗമായി സ്വീകരിച്ചതിനെ പഴിക്കുന്നില്‍ അസൂയ അല്ലാതെ മറ്റൊരു കാരണവും കാണുന്നില്ല. മിസ്ഡ് കോള്‍ കണ്ടാല്‍ അതിന്റെ പിന്നാലെ വിളിച്ചു വിളിച്ചു പോയി ലൈനുണ്ടാക്കുകയും അതുവഴി പ്രണയവും വിവാഹവും ചതിയും ഉള്‍പ്പെടെ നീണ്ട എപ്പിസോഡുകള്‍ സൃഷ്ടിക്കുന്നവരാണ് നമ്മള്‍. ഒരു രാഷ്ട്രീയ പാര്‍ട്ടി അവരുടെ അംഗത്വ ക്യംപെയിനു വേണ്ടി അതേ മിസ്ഡ് കോള്‍ ഉപയോഗിച്ചു വിജയിച്ചപ്പോള്‍ അയ്യേ ഛെ എന്നു പുച്ഛിക്കുന്നത് നിഷ്പക്ഷമായി പറഞ്ഞാല്‍ കുശുമ്പല്ലാതെ മറ്റൊന്നുമല്ല.

2. പാര്‍ട്ടി ഓഫിസില്‍ പോയി ആപ്ലിക്കേഷന്‍ വാങ്ങി അത് ഫില്‍ ചെയ്ത് ഫോട്ടോയും ഒട്ടിച്ച് എന്തുകൊണ്ടു ഞാനൊരു ബിജെപി അംഗമാകാനാഗ്രഹിക്കുന്നു എന്നതിനെപ്പറ്റി 200 വാക്കില്‍ കവിയാതെ ഉപന്യസിച്ച ശേഷം അംഗത്വമെടുക്കുന്നതാണ് മാതൃകാപരം എന്നു പറയുന്നവര്‍ സര്‍ക്കാര്‍ സേവനങ്ങള്‍ മിസ്ഡ് കോളിലും എസ്എംഎസിലുമൊക്കെ ലഭിക്കുന്നത് മാതൃകാപരമാണ് എന്നു പറയുന്നത് എന്തിനാണ് ? സര്‍ക്കാര്‍ ഓഫിസുകളില്‍ പോയി സമാനമായ രീതിയില്‍ ആപ്ലിക്കേഷന്‍ എഴുതി കാത്തിരുന്ന് അതു സമര്‍പ്പിച്ച് കാര്യം നടത്തുന്നതിനെ പുച്ഛിക്കുകയും ബിജെപി അംഗത്വ ക്യംപെയിന് അങ്ങനെ ചെയ്യാത്തതിനെ ആക്ഷേപിക്കുകയും ചെയ്യുന്നത് ലജ്ജാകരമായ ഇരട്ടത്താപ്പാണ്.

3. മിസ്ഡ് കോള്‍ വഴി അംഗത്വത്തിന് അവസരമൊരുക്കിയ ബിജെപിയെ പുച്ഛിക്കുന്ന നല്ലൊരു ശതമാനം ആളുകളും സ്വന്തം ജിമെയില്‍ അക്കൗണ്ടിന്റെ മാത്രം പേരില്‍ മിസ്ഡ് കോള്‍ പോയിട്ട് ഒരു ലിങ്കില്‍ പോലും ക്ലിക്ക് ചെയ്യാതെ ഗൂഗിള്‍ പ്ലസ് എന്ന ലോകത്തെ രണ്ടാമത്തെ വലിയ സോഷ്യല്‍ നെറ്റ്‌വര്‍്ക്കില്‍ അറിയാതെ അംഗമായവരാണ് എന്നത് രസകരമാണ്. അവരില്‍ ആര്‍ക്കും തന്നെ എങ്ങനെ അതില്‍ നിന്നു പുറത്തുകടക്കണം എന്നതും അറിയില്ല എന്നത് നിര്‍ഭാഗ്യകരവും.

4. മിസ്ഡ് കോള്‍ എന്നത് നമ്മള്‍ ഫോണില്‍ ബോധപൂര്‍വം ഒരു നമ്പര്‍ ഡയല്‍ ചെയ്ത ശേഷം റിങ് ചെയ്യുമ്പോള്‍ കട്ടാക്കുന്നതാണ്. എന്നാല്‍, അതേ ഫോണില്‍ ദിവസേനയെന്നോണം വരുന്ന അനേകം ഓഫറുകള്‍ പ്രത്യേകിച്ചൊരു മറുപടിയും നല്‍കാതെ തന്നെ സബ്‌സ്‌ക്രൈബ് ചെയ്ത് അക്കൗണ്ടില്‍ നിന്നും പണം പൊയ്‌ക്കൊണ്ടിരിക്കുന്നവരാണ് മെനക്കെട്ടു കുത്തിയിരുന്ന് മലയാളം സിനിമാ സീനുകള്‍ വെട്ടിമുറിച്ച് ആക്ഷേപഹാസ്യം രചിക്കുന്നത് എന്നതും സഹതാപജനകമാണ്. ഗൂഗിള്‍ പ്ലസില്‍ നിന്നു പുറത്തു കടക്കാനും ബിഎസ്എന്‍എല്‍ വാല്യു ആഡഡ് സര്‍വീസുകളില്‍ നിന്നു രക്ഷപെടാനും അറിയാത്തവര്‍ മിസ്ഡ് കോള്‍ വഴി ബിജെപി അംഗമായവരെ പരിഹസിക്കുന്നത് പരിതാപകരമാണ്.

5. വളരെ ലളിതമായി പറഞ്ഞാല്‍, പാര്‍ട്ടി അംഗത്വം നല്‍കുന്നത് ലളിതമാക്കുകയും കൂടുതലാളുകളെ പാര്‍ട്ടിയിലേക്കാകര്‍ഷിക്കുകയുമായിരുന്നു ബിജെപിയുടെ ലക്ഷ്യം. ഇതിനെക്കാള്‍ മാരകമായി പാര്‍ട്ടി അംഗത്വത്തിനായി ലളിതവല്‍ക്കരണപദ്ധതികള്‍ നടത്തിയത് ആംആദ്മി പാര്‍ട്ടിയാണ്. ഞാന്‍ ആം ആദ്മിയാണ് എന്നു പറയുന്നതില്‍ അഭിമാനിക്കുന്ന ആളുകള്‍ ആപ്പിന്റെ മിസ്ഡ് കോള്‍ ക്യാംപെയിനെ വിശുദ്ധവല്‍ക്കരിക്കുകയും ബിജെപിയുടേതിനെ പരിഹസിക്കുകയും ചെയ്യുന്നത് നാണം കെട്ട പരിപാടിയാണ്.

6. ബിജെപിയെ മിസ്ഡ് കോള്‍ പാര്‍ട്ടി എന്നാക്ഷേപിക്കുന്ന ഇന്ത്യന്‍ നാഷനല്‍ കോണ്‍ഗ്രസ് (അവരുടെ അടുത്ത പ്രസിഡന്റ് എവിടെയാണെന്ന് അവര്‍ക്കു തന്നെ അറിയില്ല) അംഗത്വലളിതവല്‍ക്കരണത്തിനായി ഇന്നലെ ഒരു മൊബൈല്‍ ആപ്പാണ് അവതരിപ്പിച്ചത്. ആപ്പ് വഴി അപ്ലൈ ചെയ്യുന്ന എല്ലാവരും പാര്‍ട്ടിയില്‍ അംഗമാകും. ആളുകള്‍ക്ക് ആപ്ലിക്കേഷനോടൊപ്പം സെല്‍ഫി എടുത്തയക്കാനും ആപ്പില്‍ സൗകര്യമുണ്ട്. ബിജെപിക്കു മിസ്ഡ് കോളടിച്ചുപോയതില്‍ പശ്ചാത്തപിക്കുന്നവര്‍ക്ക് ആപ്പ് ഡൗണ്‍ലോഡ് ചെയ്തു കോണ്‍ഗ്രസില്‍ ചേരാം.

ഇത്രയും പറഞ്ഞ ഞാന്‍ ഒരു ബിജെപിക്കാരനാണ് എന്നു സ്ഥാപിച്ച് ആരും കടന്നുകളയരുത്. ഇതുപോലെ വിവിധ വിഷയങ്ങളില്‍ നടത്തിയ അഭിപ്രായപ്രകടനങ്ങളുടെ പേരില്‍ ഞാനൊരു സിപിഎംകാരനും കോണ്‍ഗ്രസുകാരനും ലീഗുകാരനും മാണി കോണ്‍ഗ്രസുകാരനുമൊക്കെ ആയിട്ടുണ്ട്. ആരുടെയെങ്കിലും ആരുമാകാതെ അഭിപ്രായം പറയാം എന്നതു കൂടി ഓര്‍മിപ്പിച്ചുകൊണ്ട് നിര്‍ത്തട്ടെ, നന്ദി നമസ്‌കാരം.

കുറിപ്പ്: എന്റെ വീട്ടില്‍ എല്ലാവരും (ഞാനും) ബീഫ് കഴിക്കാറുണ്ട്.

എം.വി.നികേഷ് കുമാറിനോട് പത്തു ചോദ്യങ്ങള്‍

ഉടുക്കു കൊട്ടി പേടിപ്പിക്കല്ലേ എന്ന തലക്കെട്ടില്‍ റിപ്പോര്‍ട്ടര്‍ ചാനല്‍ വെബ്‌സൈറ്റില്‍ ശ്രീ. എം.വി.നികേഷ് കുമാര്‍ എഴുതിയ ഒരു ലേഖനം വായിക്കാനിടയായി. വാര്‍ത്ത അവതരിപ്പിക്കുന്ന അതേ ശൈലിയില്‍ അബദ്ധങ്ങളും വിവരക്കേടുകളും വളരെ ആധികാരികമായി അവതരിപ്പിക്കാനുള്ള അദ്ദേഹത്തിന്റെ ധാര്‍ഷ്ട്യത്തെ ഞാനഭിനന്ദിക്കുന്നു. മുഖ്യമന്ത്രിയുള്‍പ്പെടെയുള്ള ജനപ്രതിനിധികളെയും രാഷ്ട്രീയപ്രവര്‍ത്തകരെയും തല്‍സമയ വാര്‍ത്താപരിപാടികളിലൂടെ പരസ്യവിചാരണ നടത്താറുള്ള നികേഷ് ഒരു സര്‍ക്കാര്‍ വകുപ്പിന്റെ പ്രവര്‍ത്തനത്തെ ഉടുക്കുകൊട്ടി പേടിപ്പിക്കലായി ചിത്രീകരിക്കുന്നത് ഖേദകരമാണ്.

ഒരിക്കലും പിരിഞ്ഞ് കിട്ടില്ല എന്നുറപ്പുള്ള തുകയ്ക്ക് സര്‍വീസ് ടാക്‌സ് ഈടാക്കരുതെന്നും അതിന്‍മേല്‍ സര്‍ക്കാര്‍ പലിശ ഈടാക്കിയത് തന്റെ ചാനലിനോടുള്ള ക്രൂരതയാണെന്നും നികേഷ് പറയുന്നു. പരസ്യത്തിന്റെ കാശ് പിരിച്ചെടുക്കാന്‍ കഴിയാത്തത് ചാനലിന്റെ പരാജയമാണ്. അതിന്റെ ഭാരം ഏറ്റെടുക്കേണ്ടത് സര്‍ക്കാരും ജനങ്ങളുമല്ല. മിസ്മാനേജ്‌ന്റെിനെ ബുദ്ധിജീവിനാട്യങ്ങള്‍ കൊണ്ടു മഹത്വവല്‍ക്കരിക്കാന്‍ ശ്രമിക്കുന്നത് പഴയ നമ്പരാണ്. നികുതി അടയ്ക്കാത്തതിന്റെ പേരില്‍ അദ്ദേഹത്തെ അറസ്റ്റ് ചെയ്ത സംഭവത്തെക്കുറിച്ചുള്ള ലേഖനത്തില്‍ നിന്നും എനിക്കു തോന്നിയ ചില സംശയങ്ങളാണ് ഇവിടെ ചോദിക്കുന്നത്. സ്വന്തമായി ചാനലൊന്നും ഇല്ലാത്തതുകൊണ്ടാണ് അതൊക്കെ ബ്ലോഗിലൂടെ ചോദിക്കുന്നത്.

1. പരസ്യക്കാര്‍ തരാനുള്ള ആറു കോടി രൂപ പിരിഞ്ഞു കിട്ടാതെ ഒന്നരക്കോടി രൂപ നികുതി അടയ്ക്കാന്‍ നിവൃത്തിയില്ല എന്നു കോടതിയില്‍ വാദിച്ച താങ്കള്‍, മാര്‍ച്ച് 23ന് സ്റ്റുഡിയോയിലെത്തിയ സെന്‍ട്രല്‍ എക്‌സൈസ് ഉദ്യോഗസ്ഥരോട് എല്ലാ ഡിസ്പ്യൂട്ടും മാറ്റിവച്ച് മുഴുവന്‍ പണവും അടയ്ക്കാം അറസ്റ്റ് ഒഴിവാക്കാമോ എന്നു ചോദിച്ചതായി പറയുന്നു. ആറുകോടി കിട്ടിയാലേ നികുതി അടയ്ക്കാന്‍ കഴിയൂ എന്ന വാദം അവിടെ പൊളിയുകയല്ലേ മിസ്റ്റര്‍ നികേഷ് ? കയ്യില്‍ പണമില്ലെങ്കില്‍ എങ്ങനെ അപ്പോള്‍ മുഴുവന്‍ തുകയും അടയ്ക്കുമായിരുന്നു ?

2. സെന്‍ട്രല്‍ എക്‌സൈസ് കമ്മിഷണറുടെ ഓഫിസിലേക്കു പോകുന്നതിനു പകരം അതുമായി ബന്ധമില്ലാത്ത മറ്റൊരു ഓഫിസിലെത്തിച്ചു എന്നു പറയുന്നു. കമ്മിഷണര്‍ ശ്രീ.നികേഷിനെ കാണണം എന്നാവശ്യപ്പെട്ടതുപ്രകാരം കൂട്ടിക്കൊണ്ടുപോകാന്‍ വന്നവരായിരുന്നില്ല ആ ഉദ്യോഗസ്ഥര്‍ എന്നാണ് മനസ്സിലാവുന്നത്. താങ്കള്‍ക്ക് സമന്‍സുമായി വന്നവരോട് എന്നെ കമ്മിഷണറുടെ അടുത്തേക്ക് കൊണ്ടുപോകൂ എന്ന താങ്കളുടെ ആവശ്യം അവര്‍ അനുസരിച്ചില്ല എന്നത് അവര്‍ സ്വാധീനങ്ങള്‍ക്കു വഴങ്ങാത്ത സത്യസന്ധരായ ഉദ്യോഗസ്ഥരാണ് എന്നതിനു തെളിവല്ലേ മിസ്റ്റര്‍ നികേഷ് ? അവരെ അഭിനന്ദിക്കുകയായിരുന്നില്ലേ ചെയ്യേണ്ടത് ?

3. താങ്കള്‍ ആവശ്യപ്പെട്ടതു പ്രകാരം കമ്മിഷണറുടെ ഓഫിസിലെത്തിച്ചില്ല എന്നു മനസ്സിലായപ്പോള്‍ മുന്‍ കമ്മിഷണറായ ഡോ.രാഘവനോട് സഹായമഭ്യര്‍ഥിച്ചു എന്നു താങ്കള്‍ പറയുന്നു. താന്‍ നിസ്സഹായനാണെന്നു പറഞ്ഞ രാഘവന്‍ നിയമപ്രകാരമുള്ള അവകാശങ്ങള്‍ നികേഷിനു ലഭിക്കും എന്നും പറഞ്ഞു. നിയമനടപടികളെ നേരിട്ടുകൊണ്ടിരിക്കുന്ന ഒരാള്‍ ഇത്തരത്തില്‍ ഉന്നത ഉദ്യോഗസ്ഥരെ വിളിച്ച് സഹായമഭ്യര്‍ഥിക്കുന്നത് ശരിയാണ് എന്ന് താങ്കള്‍ വിശ്വസിക്കുന്നുണ്ടോ ? ഉന്നതങ്ങളിലുള്ള സ്വാധീനം ഉപയോഗിച്ച് നിയമനടപടികളില്‍ നിന്നു രക്ഷപെടാന്‍ ശ്രമിക്കുന്നവരെ മോശക്കാരായി ചിത്രീകരിച്ചു വാര്‍ത്ത കൊടുക്കുന്ന താങ്കള്‍ അതിനു തന്നെയല്ലേ അപ്പോള്‍ ശ്രമിച്ചത് ?

4. ഡോ.രഘവന്‍ കൈവിട്ടതോടെ ‘തുടര്‍ന്നു ഞാന്‍ വിളിക്കേണ്ടത് കേന്ദ്രം ഭരിക്കുന്ന ബിജെപി നേതാക്കളെയും സംസ്ഥാനം ഭരിക്കുന്ന മന്ത്രിമാരെയുമാണ്. അതിനെക്കാള്‍ ഭേദം ജയിലാണല്ലോ…’- എന്നെഴുതിയിരിക്കുന്നത് വായിച്ചു. എന്താണ് താങ്കള്‍ അതുകൊണ്ടുദ്ദേശിച്ചത് എന്നു വ്യക്തമായില്ല. കേന്ദ്രം ഭരിക്കുന്ന ബിജെപി നേതാക്കളും സംസ്ഥാനം ഭരിക്കുന്ന നേതാക്കളും താങ്കള്‍ക്കു സഹായം ചെയ്യാന്‍ മാത്രം യോഗ്യതയുള്ളവരല്ല എന്നാണോ ? അതോ അവരും താങ്കളുടെ കാര്യത്തില്‍ നിഷ്പക്ഷത പുലര്‍ത്തുമോ എന്ന ഭീതിയായിരുന്നോ ? എന്തൊക്കെ കുറവുകളുണ്ടെങ്കിലും ജനാധിപത്യത്തില്‍ ജനങ്ങള്‍ തിരഞ്ഞെടുത്ത ജനപ്രതിനിധികള്‍ ഒരു സ്റ്റാന്‍ഡ് എലോണ്‍ ചാനല്‍ മുതലാളിയെക്കാള്‍ ആയിരം മടങ്ങു മുകളിലാണ് എന്നതു മനസിലാക്കുമല്ലോ ?

5. താങ്കളെ അറസ്റ്റ് ചെയ്ത വാര്‍ത്ത നവമാധ്യമങ്ങളില്‍ വന്നു തുടങ്ങിയതോടെ ലോകത്തിന്റെ വിവിധ ഭാഗങ്ങളില്‍ നിന്നു താങ്കളുടെ സുഹൃത്തുക്കള്‍ താങ്കളുടെ അക്കൗണ്ടിലേക്ക് സ്വമേധയാ പണം അയച്ചുകൊണ്ടിരുന്നു എന്നതാണ് ലേഖനത്തില്‍ എന്നെ കരയിച്ചുകളഞ്ഞ ഭാഗം. ശ്രീ.നികേഷ് കുമാറിനെ അറിയുന്നവര്‍ കടം വാങ്ങിയും സ്വര്‍ണം പണയം വച്ചുമായി വളരെ ചുരുങ്ങിയ സമയത്തിനുള്ളില്‍ ഒരു കോടി 20 ലക്ഷം രൂപ താങ്കളുടെ അക്കൗണ്ടിലെത്തിച്ചു എന്നത് എന്നെ സംബന്ധിച്ച് അവിശ്വസനീയവും അമ്പരപ്പിക്കുന്നതുമാണ്. സ്വര്‍ണം ഊരിക്കൊണ്ടുപോയി പണയം വച്ച് കാശാക്കിയെടുക്കാനൊക്കെ കുറച്ചു സമയം വേണ്ടെ ? അതിനും പുറമേ അക്കൗണ്ടിലേക്ക് പണം ട്രാന്‍സ്ഫര്‍ ചെയ്യണമെങ്കിലും കുറച്ചു സമയം ആവശ്യമാണ്. അതിനും പുറമേ, എങ്ങനെ ഇത്രയധികം ആളുകളുടെ പക്കല്‍ താങ്കളുടെ അക്കൗണ്ട് നമ്പര്‍ എത്തിപ്പെട്ടു ? മേക്കപ്പിനൊക്കെ ഒരു പരിധിയില്ലേ രാജപ്പാ ?

6. തുടര്‍ന്നങ്ങോട്ട് ലേഖനത്തിലുടനീളം താങ്കള്‍ താങ്കളുടെ തന്നെ മാഹാത്മ്യം വര്‍ണിക്കുകയാണ്. വായിച്ചപ്പോള്‍ പാവം തോന്നി. താങ്കള്‍ സ്വന്തമായി ചാനല്‍ തുടങ്ങിയത് ഈ നാട്ടില്‍ ഒരു സ്വതന്ത്രമാധ്യമം ഉണ്ടാക്കേണ്ടതിന്റെ ആവശ്യകത മനസ്സിലാക്കിക്കൊണ്ടായിരുന്നു എന്നതും എന്നെ ഞെട്ടിച്ചു. ഏഷ്യാനെറ്റില്‍ നിന്നും പുറത്തുചാടി ഇന്ത്യാവിഷന്‍ ഉണ്ടാക്കിയപ്പോഴും അങ്ങ് അതു തന്നെയല്ലേ ചെയ്തത് ? ഇന്ത്യാവിഷന്‍ മുങ്ങിത്തുടങ്ങിയ സമയത്തല്ലേ അങ്ങ് റിപ്പോര്‍ട്ടര്‍ ഉണ്ടാക്കിയത് ? അപ്പോള്‍ ഇന്ത്യാവിഷന്‍ കുത്തക ചാനലായി മാറിക്കഴിഞ്ഞിരുന്നോ ? എങ്കില്‍ എന്തുകൊണ്ടാണ് ഇപ്പോള്‍ ഇന്ത്യാവിഷന്‍ പ്രവര്‍ത്തിക്കാത്തത് ?

7. താങ്കള്‍ താങ്കളെ തന്നെ വാഴ്ത്തുന്ന ഭാഗത്ത് താങ്കള്‍ ‘തുടക്കമിട്ടത് വാഴപ്പിണ്ടി എടുത്തു കളഞ്ഞ് പകരം നട്ടെല്ലു വച്ച മാധ്യമപ്രവര്‍ത്തനം’ ആണെന്നു വിശേഷിപ്പിക്കുന്നുണ്ട്. കേരളത്തിലെ മാധ്യമപ്രവര്‍ത്തനത്തിന്റെ ചരിത്രം അറിയാത്ത ഏതോ ന്യൂജന്‍ ട്രെയിനിയെപ്പോലെ താങ്കള്‍ എന്തോ പുലമ്പുന്നു എന്നാണ് തോന്നിയത്. താങ്കളെപ്പോലെ ഒച്ചയും ബഹളും അലമ്പും ഉണ്ടാക്കിയിട്ടില്ലെങ്കിലും താങ്കളെക്കാള്‍ ആത്മാര്‍ഥമായി, താങ്കളെക്കാള്‍ നീതിക്കു വേണ്ടിയുള്ള ദാഹത്തോടെ മാധ്യമപ്രവര്‍ത്തനം നടത്തിയ ആയിരക്കണക്കിനാളുകള്‍ ജീവിച്ചിരുന്ന, ജീവിച്ചിരിക്കുന്ന നാടാണ് കേരളം. അവിടെ താങ്കള്‍ക്കൊപ്പമല്ലാത്ത എല്ലാവരുടെയും നട്ടെല്ല് വാഴപ്പിണ്ടിയാണ് എന്ന വിശ്വാസം ചപലമാണ്. നാര്‍സിസത്തിന്റെ കണ്ണഞ്ചിപ്പിക്കുന്ന വെളിച്ചത്തില്‍ നിന്ന് പുറത്തുവരുമ്പോള്‍ ചുറ്റുപാടും നോക്കിയാല്‍ താങ്കള്‍ക്ക് അവരെ കാണാന്‍ സാധിക്കും.

8. താങ്കളെ അറസ്റ്റ് ചെയ്തപ്പോള്‍ മാത്രമാണ് താങ്കള്‍ നീതി കിട്ടിയില്ല, കരുണ കാട്ടിയില്ല തുടങ്ങിയ പരാമര്‍ശങ്ങള്‍ നടത്തുന്നത് എന്നത് ശ്രദ്ധേയമാണ്. കേരളത്തില്‍ ഇതിനെക്കാള്‍ ചെറിയ കുറ്റങ്ങള്‍ക്ക് ആളുകള്‍ അറസ്റ്റ് ചെയ്യപ്പെടുമ്പോള്‍ അത് ബ്രേക്കിങ് ന്യൂസ് ആക്കുന്നയാളല്ലേ താങ്കള്‍ ? ചെറിയ ആരോപണങ്ങളുടെ പേരില്‍ ആളുകളെ സ്റ്റുഡിയോയില്‍ വിളിച്ചു വരുത്തി നാലാംകിട ചോദ്യങ്ങള്‍ ചോദിച്ച് വെറുപ്പിക്കുമ്പോള്‍ നീതി, കരുണ തുടങ്ങിയ വാക്കുകള്‍ താങ്കളുടെ നിഘണ്ടുവില്‍ ഇല്ലായിരുന്നോ ?

9. മൊത്തത്തില്‍ താങ്കളുടെ ലേഖനത്തില്‍ നിന്നും താങ്കളും താങ്കളുടെ ചാനലും എന്തോ വിശുദ്ധ കര്‍മമാണ് ചെയ്യുന്നതെന്നും അതിനാല്‍ മറ്റു ചാനലുകളെ കാണുന്നതുപോലെ കാണാന്‍ പാടില്ലെന്നും ഒരു സൂചനയുള്ളതുപോലെ തോന്നി. തീര്‍ച്ചയായും അങ്ങനെയായിരിക്കാം. എന്നാല്‍, റിമോട്ടെടുത്ത് ചാനലുകള്‍ മാറ്റുന്ന സാധാരണക്കാരെ സംബന്ധിച്ച് അത്തരം മാറ്റങ്ങള്‍ ഫീല്‍ ചെയ്യുകയില്ല. സമത്വവും സ്വാതന്ത്ര്യവും പുലര്‍ന്നുകാണാനാഗ്രഹിച്ച ധീരന്‍മാരായ മാധ്യമപ്രവര്‍ത്തകരുടെ പാത പിന്‍തുടരുന്ന താങ്കള്‍ ജനാധിപത്യവ്യവസ്ഥിതിയില്‍ സ്വയം മഹത്വവല്‍ക്കരിക്കാന്‍ ശ്രമിക്കുന്നത് ശരിയാണോ ?

10. താങ്കള്‍ക്കു നട്ടെല്ലുണ്ടെന്നു കരുതി ബാക്കി എല്ലാവരും അത് മാറ്റി വാഴപ്പിണ്ടി വയ്ക്കണം എന്നില്ലല്ലോ അല്ലേ  ?  ഉണ്ടോ ? ഇല്ലേ ? ഉവ്വോ ?

തിരഞ്ഞെടുപ്പ് അവലോകനം

ചരിത്രവിജയം നേടി നരേന്ദ്രമോദിയുടെ പ്രഭാവത്തില്‍ ബിജെപി രാജ്യത്ത് സുസ്ഥിരമായ ഒരു സര്‍ക്കാര്‍ രൂപീകരിക്കുന്ന തിരക്കിലാണ്. ഒപ്പം ചരിത്ത്രിലെ ഏറ്റവും വലിയ പരാജയം നല്‍കി പ്രതിപക്ഷസ്ഥാനത്തു പോലും ഇരിക്കാനുള്ള യോഗ്യത നല്‍കാതെ കോണ്‍ഗ്രസിനെ ജനങ്ങള്‍ പുറംതള്ളി. പലരും ചൂണ്ടിക്കാണിച്ചതുപോലെ, പത്തു വര്‍ഷം കൊണ്ട് ജനങ്ങളെ ശത്രുക്കളാക്കിയ യുപിഎ സര്‍ക്കാരിനോടുള്ള പ്രതികാരമാണ് ഈ തിരഞ്ഞെടുപ്പില്‍ പ്രതിഫലിച്ചത്. ഇനിയെങ്കിലും നെഹ്‌റു ഫാമിലി ഹാങ് ഓവറില്‍ നിന്നും പേരിനോടൊപ്പം ഗാന്ധി എന്നു വച്ചുള്ള തട്ടിപ്പുകളില്‍ നിന്നും മുക്തരായി യഥാര്‍ഥ രാഷ്ട്രീയ പ്രവര്‍ത്തനം പരിശീലിക്കാന്‍ രാഹുലും സംഘവും തയ്യാറാവുമെന്നു പ്രത്യാശിക്കാം.

ബിജെപിയുടെയും നരേന്ദ്ര മോദിയുടെയും നേട്ടത്തില്‍ പൊതുവേ മൂന്നു തരം പ്രതികരണങ്ങളാണ് കാണാനുള്ളത്. ഒന്ന്, അടുത്ത ബസില്‍ ഞാന്‍ പാകിസ്ഥാനിലേക്കു പോകുന്നു എന്ന മട്ടിലുള്ളത്. മോദിയെ എതിര്‍ക്കുന്നവര്‍ പാകിസ്ഥാനിലേക്കു പോകണം എന്ന ഗിരിരാജ് സിങ്ങിന്റെ പ്രസ്താവനയോടുള്ള പ്രതികരണമാണ് അതെങ്കിലും തിരഞ്ഞെടുപ്പുഫലം വന്ന ശേഷം അത്തരത്തിലുള്ള പ്രതികരണം തിരിച്ചടിക്കാനാണ് സാധ്യത. രണ്ട്, നീയൊക്കെ പാകിസ്ഥാനിലേക്കു പോടാ.. എന്നാക്രോശിക്കുന്ന തരത്തിലുള്ള പ്രതികരണം. ഇതും തിരഞ്ഞെടുപ്പുഫലം വന്നതിനു ശേഷം പറയുമ്പോള്‍ അതിന്റെ അര്‍ത്ഥം വേറെയാണ്. അങ്ങേയറ്റം ഗുരുതരവുമാണ്. മൂന്ന്, പത്തു വര്‍ഷമായില്ലേ മറ്റവരെ സഹിക്കുന്നു, ഇനി ഇവരുമൊന്നു ഭരിക്കട്ടെ നമുക്കു നോക്കാല്ലോ എന്ന ലൈന്‍. സത്യത്തില്‍ ഇന്ത്യയിലെ നിഷ്പക്ഷരായ വോട്ടര്‍മാര്‍ മൂന്നാമത്തെ സമീപനം സ്വീകരിച്ചതുകൊണ്ടാണ് ബിജെപി ഉജ്വലവിജയം നേടിയത്.

ഇന്ത്യ മുഴുവന്‍ ബിജെപിക്ക് അൂകൂലമായി വോട്ട് ചെയ്തപ്പോള്‍ കേരളവും തമിഴ്‌നാടും ബംഗാളുമൊക്കെ വേറിട്ടു നിന്നു എന്നതും ശ്രദ്ധേയമാണ്. അതിനെപ്പറ്റിയും രണ്ടു തരത്തിലുള്ള അഭിപ്രായങ്ങളാണ് കേള്‍ക്കുന്ന്. ഒന്ന്, മലയാളികള്‍ അല്ലെങ്കിലും നന്നാവില്ല, അവര്‍ക്ക് വിവരമില്ല എന്നത്. രണ്ട്, മോദി തരംഗം കേരളത്തെ സ്പര്‍ശിച്ചില്ല എന്നത് കേരളത്തിന്റെ വിദ്യാഭ്യാസനിലവാരത്തെയും സാംസ്‌കാരിക നിലവാരത്തെയുമൊക്കെ ഉയര്‍ത്തിക്കാട്ടുന്നു എന്നത്. രണ്ടും ശരിയായ നിലപാടുകളല്ല എന്നാണ് എന്റെ അഭിപ്രായം.

ജനാധിപത്യരാജ്യത്തെ തിരഞ്ഞെടുപ്പു പ്രക്രിയ ആ രാജ്യത്തെ ജനങ്ങളുടെ വിധിയെഴുത്താണ്. വോട്ടു ചെയ്യുന്നത് ഓരോ വ്യക്തിയും ഒറ്റയ്ക്കാണ്. അതായത് ഇത്രയധികം വ്യക്തികളുടെ സ്വതന്ത്രചിന്തയുടെയും ആലോചനയുടെയും ഫലമാണ് ഈ തിരഞ്ഞെടുപ്പു ഫലം. തിരഞ്ഞെടുപ്പുഫലത്തെപ്പറ്റി ഒരു വിധി പറയാന്‍ സുപ്രീംകോടതിക്കു പോലും അധികാരമില്ല. കാരണം, അതില്‍ തെറ്റും ശരിയുമില്ല. ജനങ്ങളുടെ വിധിയെഴുത്തിന് അത്രത്തോളം മൂല്യമുണ്ട്. കേരളത്തില്‍ ബിജെപിക്ക് സീറ്റൊന്നും ലഭിക്കാത്തത് മലയാളികള്‍ക്ക് വിവരമില്ലാത്തതുകൊണ്ടോ മലപ്പുറത്ത് ഇ.അഹമ്മദ് റെക്കോര്‍ഡ് ഭൂരിപക്ഷം നേടി വിജയിച്ചത് അവിടത്തുകാര്‍ മണ്ടന്‍മാരായതുകൊണ്ടോ അല്ല. അത് അവരുടെ തീരുമാനമായിരുന്നു, അതിനെ ആദരിക്കുകയും അംഗീകരിക്കുകയും ചെയ്യാനുള്ള കടമ എല്ലാവര്‍ക്കുമുണ്ട്.

നരേന്ദ്രമോദി സര്‍ക്കാര്‍ അധികാരത്തില്‍ വരുന്നതിനെ ആശങ്കയോടെ കാണുന്നവരുണ്ട്. പുതിയൊരു സര്‍ക്കാര്‍ വരുമ്പോള്‍ ജനങ്ങള്‍ക്കുണ്ടാവുന്ന സ്വാഭാവികമായ ഉല്‍കണ്ഠയും ആശങ്കയുമെന്നതിനപ്പുറം ഈ സര്‍ക്കാര്‍ ജനങ്ങള്‍ക്കു വിരുദ്ധമായി എന്തെങ്കിലും ചെയ്യും എന്നാശങ്കപ്പെടുന്നതില്‍ കഴമ്പില്ല. കഴിഞ്ഞ പത്തു വര്‍ഷം ഭരിച്ച സര്‍ക്കാര്‍ ചെയ്തതെല്ലാം ജനങ്ങള്‍ക്കിഷ്ടമുള്ളതായിരുന്നില്ല. ബിജെപി സര്‍ക്കാരിനെ അധികാരത്തിലേറ്റിയത് ഈ രാജ്യത്തെ ജനങ്ങളാണെന്നതിനാല്‍ അത് 100 ശതമാനം സ്വീകാര്യമായ തീരുമാനമാണ്. മോദിയെയും ബിജെപിയെയും അംഗീകരിക്കാനും അഭിനന്ദിക്കാനും കോണ്‍ഗ്രസും ലോകരാഷ്ട്രങ്ങളും മുന്നോട്ടു വരുമ്പോള്‍ ലോകത്തെ ഏറ്റവും വലിയ പൊതുതിരഞ്ഞെടുപ്പിനും ഈ രാജ്യത്തെ ജനങ്ങള്‍ക്കും ലഭിക്കുന്ന ആദരവു കൂടിയായി അതിനെ കാണണം. ഈ വലിയ വിജയം ജനങ്ങള്‍ കഴുതകളല്ല എന്നതിന്റെ ഏറ്റവും വലിയ തെളിവാണ്.

ബിജെപി തരംഗം കേരളത്തെ സ്പര്‍ശിക്കാതെ പോയതിലുള്ള പ്രതികരണങ്ങള്‍ കേരളീയരുടെ വിവരക്കേടായി വിലയിരുത്തപ്പെടുന്നുണ്ട്. കേരളമെന്ന ഇട്ടാവട്ടത്തിലെ പൊട്ടന്‍മാര്‍ ഇന്ത്യയെന്ന മഹാരാജ്യത്തില്‍ ഒന്നുമല്ലെന്നും നിന്റെയൊന്നും വോട്ടില്ലാതെ ‘ഞങ്ങള്‍’ ഭരിക്കുമെന്നുമൊക്കെയാണ് ചിലരുടെ പ്രതികരണം. മലപ്പുറത്ത് ഇ.അഹമ്മദിനെ ഇത്രയേറെ വോട്ടുകള്‍ക്കു ജയിപ്പിച്ചു വിട്ടവരുടെ ഐക്യു എന്തായിരിക്കുമെന്നാണ് പലരും ചോദിക്കുന്നത്. ഇ.അഹമ്മദ് അവിടെ റെക്കോര്‍ഡ് ഭൂരിപക്ഷം നേടിയിട്ടുണ്ടെങ്കില്‍ അതിനു ചില കാരണങ്ങളും ഉണ്ടാവും. ചാലക്കുടിയിലെ ജനങ്ങള്‍ ഇന്നസെന്റിനെ വിജയിപ്പിക്കില്ല എന്നായിരുന്നു ഞാന്‍ ഉള്‍പ്പെടെ പലരും വിചാരിച്ചിരുന്നത്. എന്നാല്‍, പി.സി.ചാക്കോയോടുള്ള വെറുപ്പ് അത്രയധികമാകയാല്‍ ജനം ഇന്നസെന്റിനെ തിരഞ്ഞെടുത്തു. ആ തിരുമാനവും തെറ്റോ ശരിയോ എന്നതല്ല, അത് അംഗീകരിക്കപ്പെടേണ്ടതാണ് എന്നതാണ് പ്രധാനം.

കല്യാണം കഴിഞ്ഞാല്‍ പിന്നെ പഴയ പ്രണയത്തെപ്പറ്റി മിണ്ടരുത് എന്നു പറയുന്നതുപോലെ ജനം വോട്ടു ചെയ്തു തിരഞ്ഞെടുത്തു കഴിഞ്ഞ ഒരാളിനെ അംഗീകരിക്കാന്‍ ജനാധിപത്യത്തില്‍ പൗരന്‍മാര്‍ക്കു കടമയുണ്ട്. അവരുടെ നയങ്ങളെയും അഭിപ്രായങ്ങളെയും എതിര്‍ക്കാനും പ്രതിരോധിക്കാനുമുള്ള സ്വാതന്ത്ര്യവുമുണ്ട്. കേവലഭൂരിപക്ഷം എന്നു വച്ചാല്‍ പരമാധികാരമോ ജനാധിപത്യത്തിന്റെ അവസാമോ അല്ല. ഈ രാജ്യത്തെ ജനാധിപത്യം തുടച്ചുനീക്കാന്‍ ആര്‍ക്കും സാധിക്കുകയുമില്ല.

രാജ്യം ബിജെപിയെ തിരഞ്ഞെടുത്തത് അബദ്ധമായിപ്പോയി എന്ന് മോദിവിരുദ്ധര്‍ പറയുന്നതും താമര വിരിയാത്ത കേരളത്തിലെ ജനങ്ങള്‍ കഴുതകളാണ് എന്നു മോദിഭക്തര്‍ പറയുന്നതും ഒരുപോലെയാണ്. നരേന്ദ്രമോദി ഇനി ഇന്ത്യയുടെ പ്രധാനമന്ത്രിയാണ്, ബിജെപിയുടെ പ്രധാനമന്ത്രി സ്ഥാനാര്‍ഥി അല്ല. ഇത് ജനാധിപത്യത്തിന്റെ വിജയമാണ്, ഹിന്ദുദേശീയതയുടെ അല്ല. രാജ്യപുരോഗതിയും നാടിന്റെ വികസനവും ജനങ്ങളുടെ ജീവിതനിലവാരത്തിലുള്ള പുരോഗതിയും പട്ടിണിയുടെ അന്ത്യവും സ്ര്തീശാക്തീകരണവും സാമൂഹികപുരോഗതിയുമാണ് നമുക്കു വേണ്ടത്. അതിനു മോദി സര്‍ക്കാരിനു കഴിയട്ടെ എന്നാശംസിക്കുന്നു, പ്രാര്‍ഥിക്കുന്നു. ജയ് ഹിന്ദ് !

ഹാപ്പി കൗണ്ടിങ് ഡേ !

പതിനാറാം ലോക്‌സഭാ തിരഞ്ഞെടുപ്പിന്റെ വോട്ടെണ്ണല്‍ ഇന്ത്യയുടെ ചരിത്രത്തിലെ തന്നെ ഏറ്റവും മികവോടെ റിപ്പോര്‍ട്ട് ചെയ്യപ്പെടുകയും തല്‍സമയം വിശകലനം ചെയ്യപ്പെടുകയും ചെയ്യുന്ന ദിവസമാണിന്ന്. ന്യൂസ് ചാനലുകള്‍ മുതല്‍ മൊബൈല്‍ ഫോണ്‍ ആപ്പുകള്‍ വരെ ഏതാനും മണിക്കൂറുകള്‍ മാത്രം നീണ്ടു നില്‍ക്കുന്ന വോട്ടെണ്ണലിനെ സംഭവബഹുലമായ റിയാലിറ്റി ഷോയാക്കി മാറ്റുമ്പോള്‍ ലൈവ് ടെലകാസ്റ്റ് മുതല്‍ വിര്‍ച്വല്‍ റിയാലിറ്റി വരെയുള്ള സാങ്കേതികവിദ്യകളും പരീക്ഷിക്കപ്പെടുന്നുണ്ട്.

ഒരേ സമയം, ടിവി കാണുകയും വെബ്‌സൈറ്റ് പരിശോധിക്കുകയും മൊബൈല്‍ ആപ്ലിക്കേഷന്‍ നോക്കുകയും അസാധ്യമാണ്. വോട്ടെണ്ണലിന്റെ ആവേശം ചോരാതെ ജനങ്ങളിലേക്കെത്തിക്കാന്‍ മല്‍സരിക്കുന്ന മാധ്യമങ്ങളും തിരഞ്ഞെടുപ്പ് കമ്മിഷനും ഒരുക്കിയിരിക്കുന്ന സംവിധാനങ്ങളിലൂടെ ഒന്നു കണ്ണോടിക്കാം. ടിവി ചാനലുകള്‍ക്കു പുറമേ ഓണ്‍ലൈന്‍-മൊബല്‍ പ്രേക്ഷകര്‍ക്ക് വോട്ടെണ്ണല്‍ വിശേഷം തല്‍സമയം അറിയാനുള്ള സംവിധാനങ്ങള്‍ ഇവയൊക്കെയാണ്.

1. തിരഞ്ഞെടുപ്പു കമ്മിഷന്‍

തിരഞ്ഞെടുപ്പു ഫലങ്ങള്‍ക്കായി ആദ്യം ആശ്രയിക്കാവുന്ന ആധികാരികവും വിശ്വസനീയവുമായ ഉറവിടം തിരഞ്ഞെടുപ്പു കമ്മിഷന്‍ വെബ്‌സൈറ്റ് ആണ്. ലളിതമായ ഇലക്ഷന്‍ റിസള്‍ട്ട് പേജില്‍ രാവിലെ 8 മണി മുതല്‍ ഫലസൂചനകള്‍ ലഭിച്ചു തുടങ്ങും: Election Commission Of India- Results

കേരളത്തില്‍ നിന്നുള്ള ഫലങ്ങള്‍ക്കു മാത്രമായി ഇതാദ്യമായി മറ്റൊരു വെബ്‌സൈറ്റും മൊബൈല്‍ ആപ്ലിക്കേഷനും തിരഞ്ഞെടുപ്പു കമ്മിഷന്‍ ഒരുക്കിയിട്ടുണ്ട്. Kerala Elections Trend എന്നു ഗൂഗിള്‍ പ്ലേ സ്റ്റോറില്‍ സേര്‍ച്ച് ചെയ്താല്‍ ആന്‍ഡ്രോയ്ഡ് ആപ്ലിക്കേഷന്‍ ഡൗണ്‍ലോഡ് ചെയ്യാം. വെബ്‌സൈറ്റില്‍ കേരളത്തിലെ ഫലങ്ങള്‍ കാണാനാഗ്രഹിക്കുന്നവര്‍ക്ക് ഇതാണ് വിലാസം: trend.kerala.gov.in

2. ഗൂഗിള്‍ ഇലക്ഷന്‍ ഹബ്

തിരഞ്ഞെടുപ്പിനോടനുബന്ധിച്ച് ഗൂഗിള്‍ അരംഭിച്ച ഇലക്ഷന്‍ ഹബ് അതിന്റെ പൂര്‍ണതോതില്‍ പ്രവര്‍ത്തനം പൂര്‍ത്തിയാക്കുന്ന ദിവസമാണിന്ന്. ഇലക്ഷന്‍ ഹബിലെ ലൈവ് റിസള്‍ട്ട്‌സ് പേജ് രാജ്യത്തെ മൊത്തം വോട്ടെടുപ്പിന്റെ തല്‍സമയ വിവരങ്ങളും സീറ്റ് നിലയും നല്‍കും. അതോടൊപ്പം പേജിന്റെ വലതുഭാഗത്ത് മുകളില്‍ നിങ്ങളുടെ പിന്‍കോഡ് നല്‍കിയാല്‍ ആ മണ്ഡലത്തിലെ ഫലങ്ങളും ലീഡ് നിലയും സ്ഥാനാര്‍ഥികളുടെ ചിത്രങ്ങളോടൊപ്പം തെളിയും. ഒരു ടാബില്‍ ഇത് തുറന്നു വച്ചേക്കുക: Google Election Hub

3. യു ട്യൂബ് ലൈവ്

തിരഞ്ഞെടുപ്പു ഫലങ്ങള്‍ തല്‍സമയം സംപ്രേഷണം ചെയ്യുന്ന ടിവി ചാനലുകളുടെ ലൈവ് സ്ട്രീമിങ് ആണ് യു ട്യൂബ് നല്‍കുന്നത്. ടൈംസ് നൗ, ഹെഡ്്‌ലൈന്‍സ് ടുഡേ, രാജ്യസഭാ ടിവി എന്നീ ചാനലുകള്‍ ഇംഗഌഷില്‍ ഫലങ്ങള്‍ നല്‍കുമ്പോള്‍ മലയാളത്തില്‍ നിന്നു യു ട്യൂബുമായി സഹകരിക്കുന്നത് ഏഷ്യാനെറ്റ് മാത്രമാണ്. ഒരു ടാബില്‍ അതും തുറന്നു വയ്ക്കാം: You Tube Live Results

4. മനോരമ

മലയാള മനോരമ ഓണ്‍ലൈനും മനോരമ ന്യൂസ് ടിവിയും പ്രത്യേകം വെബ് പേജുകളും ലൈവ് അപ്‌ഡേറ്റുകളും ഒരുക്കിയിട്ടുണ്ട്. ആദ്യഫലങ്ങള്‍ മുതല്‍ മനോരമയുടെ രണ്ടു സൈറ്റുകളില്‍ നിന്നും അറിയാം, വിശദാംശങ്ങളോടെ.
മനോരമ ഓണ്‍ലൈന്‍, മനോരമ ന്യൂസ്

5. മാതൃഭൂമി

മാതൃഭൂമി ഓണ്‍ലൈന്‍ എഡിഷനും മാതൃഭൂമി ന്യൂസ് ചാനലും വെബ്‌സൈറ്റിലൂടെ തിരഞ്ഞെടുപ്പു ഫലങ്ങള്‍ തല്‍സമയം നല്‍കുന്നുണ്ട്.

6. ഏഷ്യാനെറ്റ്

വോട്ടെണ്ണല്‍ വാര്‍ത്തകളും ഫലങ്ങളും ഓണ്‍ലൈന്‍ മൊബൈല്‍ പ്രേക്ഷകരിലെത്തിക്കാന്‍ സമഗ്രമായ സംവിധാനങ്ങളാണ് ഏഷ്യാനെറ്റ് ന്യൂസ് ഒരുക്കിയിരിക്കുന്നത്. എഷ്യാനെറ്റ് ന്യൂസ് ടിവി വെബ്‌സൈറ്റിലൂടെ ഫലങ്ങള്‍ അപ്പപ്പോള്‍ അറിയാം. ലൈവ് ടിവിയും ഉണ്ട്. യൂ ട്യൂബിലും ഏഷ്യാനെറ്റ് ലൈവാണ്. മൊബൈല്‍ ഉപയോക്താക്കള്‍ക്ക് ഐഫോണ്‍, ആന്‍ഡ്രോയ്ഡ് പ്ലാറ്റ്‌ഫോമുകള്‍ക്കുള്ള ആപ്ലിക്കേഷനുകളും ഏഷ്യാനെറ്റ് ഒരുക്കിയിട്ടുണ്ട്. അതാത് ആപ്പ് സ്റ്റോറുകളില്‍: Janavidhi 2014 – Asianet News എന്നു സേര്‍ച്ച് ചെയ്താല്‍ ഏഷ്യാനെറ്റ് ന്യൂസ് ആപ്ലിക്കേഷന്‍ ലഭിക്കും. ഗൂഗിള്‍ പ്ലേ സ്റ്റോര്‍ ഇല്ലാത്ത ആന്‍ഡ്രോയ്ഡ് ഉപയോക്താക്കള്‍ക്ക് ആമസോണ്‍ ആപ്പ്‌സ്റ്റോറില്‍ നിന്നും ആന്‍ഡ്രോയ്ഡ് ആപ്പ് ഡൗണ്‍ലോഡ് ചെയ്യാം.

നമ്മുടെ വിധിയെഴുത്തിന്റെ ഫലമറിയാന്‍ രാജ്യത്തെ നയിക്കേണ്ടതാരെന്നറിയാന്‍ നമ്മളെപ്പോലെ തന്നെ വിവിധ രാഷ്ട്രീയകക്ഷികളിലെ നേതാക്കന്‍മാരും പൊതുപ്രവര്‍ത്തകരും കാത്തിരിക്കുകയാണ്. ജനാധിപത്യത്തിലെ ഏറ്റവും ത്രസിപ്പിക്കുന്ന മണിക്കൂറുകളിലേക്ക് സ്വാഗതം. ഹാപ്പി കൗണ്ടിങ് ഡേ !

ലാസ്റ്റ് സപ്പര്‍

ഡോ.മന്‍മോഹന്‍സിങ് എന്ന രാഷ്ട്രീയബലിമൃഗത്തിനുള്ള അന്ത്യത്താഴം ഇന്നലെ കഴിഞ്ഞു. പത്തു വര്‍ഷത്തെ യുപിഎ ഭരണത്തിന്റെ പാപഭാരം പേറി സോണിയാജിക്കും മക്കള്‍ക്കും വിശുദ്ധപരിവേഷം ബാക്കി വച്ച് അദ്ദേഹം രാഷ്ട്രീയജീവിതത്തില്‍ നിന്നും പടിയിറങ്ങുകയാണ്. സോണിയാഗാന്ധി ഒരുക്കിയ അത്താഴവിരുന്നില്‍ പാര്‍ട്ടിയിലെ ഉന്നതശ്രേഷ്ഠന്‍മാരെല്ലാം വന്നു വീഞ്ഞുകുടിക്കുകയും അതിന്റെ ലഹരിയില്‍ മന്‍മോഹന്‍ സിങ്ങിനെ പുകഴ്ത്തുകയും ചെയ്തിട്ടുണ്ടാവും. ഇന്നും നാളെയും കൂടി ഇന്ത്യയുടെ പ്രധാനമന്ത്രിയായി അദ്ദേഹം അവശേഷിക്കും. മറ്റന്നാള്‍ കാലത്ത് വന്നു ഓഫിസ് ഒഴിയും. ശനിയാഴ്ച വൈകിട്ട് രാഷ്ട്രത്തെ അഭിസംബോധന ചെയ്ത് ടാറ്റ ബൈബൈ പറഞ്ഞ് രാഷ്ട്രീയജീവിതത്തോടു വിടപറയും.

മന്‍മോഹന്‍സിങ് സ്ഥാനമൊഴിയുന്നതു കൊണ്ട് ആര്‍ക്കും പ്രത്യേകിച്ച് ഒരു നഷ്ടവുമില്ല. ആരെങ്കിലുമൊക്കെ വിരമിക്കുമ്പോള്‍ നല്ലതു പറയണണെന്നുളള നയത്തിന്റെ ഭാഗമായി പലരും അദ്ദേഹത്തിന്റെ നിഷ്‌കളങ്കമായ പുഞ്ചിരിയെയും പിച്ചവച്ചുള്ള നടപ്പിനെയും പിന്നെ അനന്തവിശാലമായ നിശബ്ദതയെയുമൊക്കെ വാഴ്ത്തിപ്പാടുന്നുണ്ട്. എക്കണോമിക്‌സില്‍ പുള്ളിക്കു പലതും അറിയാമായിരുന്നു എന്നല്ലാതെ ഈ രാജ്യത്തെ സംബന്ധിച്ച് സ്വന്തമായ ഒരു കാഴ്ചപ്പാടോടു കൂടി സ്വതന്ത്രമായി തീരുമാനങ്ങളെടുക്കാന്‍ അദ്ദേഹത്തിനു കഴിഞ്ഞിട്ടുണ്ട് എന്നു തോന്നുന്നില്ല. അതുകൊണ്ടു തന്നെ ഡോ.മന്‍മോഹന്‍സിങ് പെട്ടിയും കിടക്കയുമെടുത്ത് പ്രധാനമന്ത്രിയുടെ ഓഫിസ് വിടുമ്പോള്‍ പിച്ചനടത്തവും പുഞ്ചിരിയും നിശബ്ദതയും മാത്രമേ നമുക്കു നഷ്ടപ്പെടുന്നുള്ളൂ. സോണിയാ ഗാന്ധി പോലും പുള്ളിയോട് ഐ മിസ്സ് യു എന്നു പറയും എന്നു തോന്നുന്നില്ല.

പിരിഞ്ഞുപോകുന്നതിന്റെ ഭാഗമായി പലരും മന്‍മോഹന്‍ സിങ്ങിന്റെ ഗുണഗണങ്ങള്‍ വര്‍ണിക്കുന്നുണ്ട്. സാധാരണഗതിയില്‍ ഏതൊരു രാജ്യത്തിന്റെ പ്രധാനമന്ത്രിയെ പുകഴ്ത്താന്‍ ഉപയോഗിക്കാവുന്ന ഒരു വിശേഷണങ്ങളും ഇദ്ദേഹത്തിന്റെ കാര്യത്തില്‍ ആരും ഉപയോഗിക്കുന്നില്ല എന്നത് ശ്രദ്ധേയമാണ്. മമ്മിയുടെ ഡമ്മി മാത്രമായിരുന്നു എന്നതുകൊണ്ട് ശത്രുക്കള്‍ക്കു പോലും അദ്ദേഹത്തോട് ശത്രുതയില്ല. മന്‍മോഹന്‍ സിങ് ഒരു പണ്ഡിതശ്രേഷ്ഠനായിരുന്നു എന്ന ബിജെപി നേതാവ് അരുണ്‍ ജെയ്റ്റ്‌ലിയുടെ പ്രസ്താവന താനാരാണെന്നു പിടികിട്ടാതെ പകച്ചു നില്‍ക്കുന്ന മന്‍മോഹന്‍സിങ്ങിന് ഒരു പിടിവള്ളിയാകും. മടങ്ങിപ്പോകും മുമ്പ് അരുണ്‍ ജെയ്റ്റ്‌ലിയെ കെട്ടിപ്പിടിച്ചൊന്നു കരയാന്‍ അദ്ദേഹം മനസ്സുകൊണ്ടെങ്കിലും ആഗ്രഹിക്കുന്നുണ്ടാവും.

കഴിഞ്ഞ 10 വര്‍ഷത്തെ യുപിഎ ഭരണത്തിന്റെ എല്ലാ പോരായ്മകളും പരാജയങ്ങളും ഒറ്റ മനുഷ്യന്റെ തലയില്‍ കെട്ടിവച്ച് അയാളെ വനവാസത്തിനയയ്ക്കുന്ന കോണ്‍ഗ്രസ് ബുദ്ധി രാഹുല്‍ ഗാന്ധിയുടെ പട്ടാഭിഷേകത്തിനു മുന്നോടിയായി ആസൂത്രണം ചെയ്തതായിരുന്നു. കപ്പിത്താനെ ഒരു കൊതുമ്പുവള്ളത്തില്‍ കയറ്റി നടുക്കടലില്‍ ഉപേക്ഷിച്ച് കപ്പലിന്റെ നിയന്ത്രണമേറ്റെടുക്കാമെന്നു കരുതിയിരിക്കുമ്പോള്‍ കപ്പല്‍ മുങ്ങി എല്ലാവരും ചത്തുപോവുകയും കൊതുമ്പുവള്ളത്തില്‍ കയറ്റിവിട്ട കപ്പിത്താന്‍ മാത്രം രക്ഷപെടുകയും ചെയ്യുന്നതുപോലെ ഒരു വിരോധാഭാസമാണ് കോണ്‍ഗ്രസ് നേരിടാന്‍ പോകുന്നത്. യാത്രയയപ്പും അത്താഴവിരുന്നും കഴിഞ്ഞ് ലാസ്റ്റ് വണ്ടിക്ക് മന്‍മോഹന്‍ പഞ്ചാബ് പിടിക്കുമ്പോള്‍ മിസ്സിസ് ഗാന്ധിയും ഗാന്ധിക്കുഞ്ഞുങ്ങളും തിരഞ്ഞെടുപ്പില്‍ പൊട്ടി നാണം കെട്ടിരിക്കുന്ന കാഴ്ച നമ്മള്‍ കാണേണ്ടി വരും.

എന്തൊക്കെ പറഞ്ഞാലും, എങ്ങനെയൊക്കെ ശ്ലാഘിച്ചാലും ഇന്ത്യയിലെ സാധാരണ ജനങ്ങളുടെ വികാരം മാനിക്കാത്ത, അല്ലെങ്കില്‍ അങ്ങനെയൊരു വികാരം ഉള്ളതായി ഭാവിക്കുക പോലും ചെയ്യാത്ത ഒരു ഭരണമായിരുന്നു യുപിഎ സര്‍ക്കാര്‍ കാഴ്ച വച്ചത് എന്നു പറയാം. തിരഞ്ഞെടുപ്പില്‍ മല്‍സരിച്ച്, വോട്ടു ചോദിച്ചു വിജയിക്കുന്ന രാഷ്ട്രീയം പിടിയില്ലാത്ത, പണ്ഡിതശ്രേഷ്ഠനായ മന്‍മോഹന്‍സിങ്ങാകട്ടെ ജനങ്ങളുടെ സ്‌നേഹം പിടിച്ചുപറ്റാനാവാതെയാണ് കടന്നു പോവുന്നതെന്നും പറയാം. ഓരോ ഘട്ടങ്ങളില്‍ ഓരോ നേതാക്കന്‍മാരോട് അവരുടെ വാക്കുകളുടെയും പ്രവര്‍ത്തനങ്ങളുടെയുമൊക്കെ അടിസ്ഥാനത്തില്‍ സ്‌നേഹവും ബഹുമാനവുമൊക്കെ തോന്നുക സ്വാഭാവികമാണ്. എന്നാല്‍, ഈ പത്തു വര്‍ഷത്തിനിടയില്‍ ഡോ.മന്‍മോഹന്‍ സിങ്ങിനോട് ഒരു ഘട്ടത്തിലും അത്തരത്തിലൊരു സ്‌നേഹമോ ബഹുമാനമോ തോന്നിയിട്ടില്ല എന്നാണ് എന്റെ വ്യക്തിപരമായ സാക്ഷ്യം.

Note: പണ്ഡിതന്‍മാരെ എനിക്കു പണ്ടേ കണ്ടുകൂട.

അസൂയക്കാരുടെ സദാചാരം

25 വയസ്സില്‍ കല്യാണം കഴിച്ചാല്‍ മുപ്പതാം വയസ്സില്‍ പിക്കപ്പു പോകുന്ന തൈക്കിളവന്‍മാരുടെ തലമുറയ്ക്ക് അറുത്തേഴാം വയസ്സില്‍ കിളി പോലൊരു പെണ്ണിനെ വളച്ചെടുക്കുന്ന ഒറിജിനല്‍ കിളവനോട് തോന്നുന്ന വികാരത്തിന് പേര് ഒന്നേയുള്ളൂ- അസൂയ. കോണ്‍ഗ്രസ് നേതാവ് ദിഗ് വിജയ് സിങ് ടിവി അവതാരക അമൃത റായിലെ പ്രേമിക്കുന്നതിന്റെയും വിവാഹം കഴിക്കാന്‍ പോകുന്നതിന്റെയും സദാചാരപ്രശ്‌നങ്ങള്‍ ചര്‍ച്ച ചെയ്യുന്നവര്‍ പ്രണയം എന്നതിനെ എങ്ങനെ നിര്‍വചിക്കുന്നു എന്നു നോക്കിയാല്‍ തന്നെ കുഴപ്പം നാട്ടുകാര്‍ക്കാണോ ദിഗ്ഗങ്കിളിനാണോ എന്നു വ്യക്തമാകും.

മകളുടെ പ്രായമുള്ള സ്ത്രീയെ 67-ാം വയസ്സില്‍ ദിഗ് പ്രേമിച്ചു എന്നതാണ് യുവകോമളന്‍മാരുടെ പ്രധാന ആക്ഷേപങ്ങളിലൊന്ന്. 67-ാം വയസ്സില്‍ എണീറ്റു നില്‍ക്കാന്‍ തന്നെ കഷ്ടപ്പെടുന്ന, എണീറ്റു നിന്നാലും ഷുഗര്‍- പ്രഷര്‍, ഹാര്‍ട്ട്, പൈല്‍സ് പ്രശ്‌നങ്ങളാല്‍ കഷ്ടപ്പെടുന്നവരുടെ ലോകത്ത് ഒരാള്‍ ജീവിതത്തെ യൗവ്വനതീക്ഷ്ണവും ഹൃദയത്തെ പ്രേമസുരഭിലവുമാക്കി കാത്തുസൂക്ഷിച്ചത് വലിയ കുറ്റകൃത്യമായിപ്പോയെന്നു പറയുന്നവരെക്കാള്‍ വലിയ ബോറന്‍മാര്‍ വേറെയില്ല. എങ്ങനെ ഒരു പെണ്‍കുട്ടിയുടെ മനസ്സില്‍ ഇടം നേടണം എന്നതു ഗൂഗിള്‍ ചെയ്യുന്ന സാധുക്കളോട് ഈ ഓള്‍ഡ് ജനറേഷന്‍ ദിഗ് വിജയത്തിന്റെ റൊമാന്റിക് സൈഡ് പറഞ്ഞുന മനസ്സിലാക്കാന്‍ നോക്കിയിട്ടും കാര്യമില്ല.

അമൃത റായ് ഇത് എന്തു കണ്ടിട്ടാണ് എന്നാണ് പൊതുവേ എല്ലാവരും ചോദിക്കുന്നത്. ഇന്നാട്ടില്‍ ഇതിനും മാത്രം ചെറുപ്പക്കാരുള്ളപ്പോള്‍ അറുപത്തേഴു വയസ്സുള്ള കോണ്‍ഗ്രസ് നേതാവിനെ (ഡബിള്‍ നെഗറ്റീവ്) പ്രണയിക്കാനും അതു തുറന്നു സമ്മതിക്കാനും മാത്രം അമൃത എന്ത് ആനന്ദമാണ് കണ്ടെത്തിയിരിക്കുന്നത് എന്നാണ് പലര്‍ക്കും അറിയേണ്ടത്. പ്രണയം എന്നു വച്ചാല്‍ 25 വയസ്സില്‍ താഴെയുള്ള പക്വതയില്ലാത്ത വ്യക്തികള്‍ തമ്മിലുള്ള ഹഠാദാകര്‍ഷണമാണ് എന്നാണ് സാഹിത്യം, സിനിമ തുടങ്ങിയ മാധ്യമങ്ങള്‍ പറഞ്ഞു വച്ചിരിക്കുന്നത്. 30 വയസ്സുള്ള വ്യക്തികള്‍ തമ്മിലുള്ള പ്രണയത്തെ നമ്മുടെ നാട്ടുകാര്‍ അവിഹിതം എന്നാണ് വിളിക്കുന്നത്. ദിഗ് വിജയ് സിങ് ഒരു വിധവനാണ്. അമൃത റായ് വിവാഹമോചിതയും. മോചിതനാകുന്ന അമതൃയുടെ ഭര്‍ത്താവ് അമൃതയ്ക്ക് ദിഗേട്ടനോടൊപ്പം യുഭകരമായ ജീവിതവും ആശംസിച്ചിട്ടുണ്ട് (അത് ബ്ലാക് ഹ്യൂമറാവാനും മതി). ഇവര്‍ക്കൊന്നുമില്ലാത്ത സദാചാര പ്രശ്‌നം എന്തുകൊണ്ട് നാട്ടുകാര്‍ക്ക് എന്നതാണ് യഥാര്‍ഥ പ്രശ്‌നം.

മാധ്യമപ്രവര്‍ത്തകരുടെ സദാചാരബോധവും ഞരമ്പുരോഗവും വ്യക്തിത്വവൈകല്യങ്ങളുമൊക്കെ എത്ര ഭീകരമാണെന്നു മനസ്സിലാക്കാന്‍ ദിഗ് വിജയ് സിങ്- അമൃത റായ് ബന്ധത്തെക്കുറിച്ചുള്ള റിപ്പോര്‍ട്ടുകള്‍ വായിച്ചാല്‍ മതി. റൊമാന്റിക് ആയ ജീവിതവും ലൈംഗികശേഷിയുമൊക്കെ ഉള്ളവരോട് എന്തിനാണ് ഇത്ര അസഹിഷ്ണുത എന്നത് മനസ്സിലാവുന്നില്ല. ദിഗ് വിജയ് സിങ്ങിനെ കുറ്റപ്പെടുത്തുന്നവരെല്ലാം ഏതപത്‌നീ വ്രതക്കാരും മറ്റുമാണോ എന്നതാണ് മറ്റൊരു ചോദ്യം. ഇവരുടെയൊക്കെ വാട്ട്‌സ്ആപ്പ് ഹിസ്റ്ററി പരിശോധിച്ചാല്‍ അറിയാം ഏകപത്‌നീവ്രതത്തിന്റെ പുണ്യം. പത്തു പേരെ വിര്‍ച്വലായി കല്യാണം കഴിക്കുകയും ഭോഗിക്കുകയും ചെയ്യുന്ന ഏകപത്‌നീവ്രതഫ്രോഡുകള്‍ക്ക് യഥാര്‍ഥജീവിതത്തില്‍ പ്രണയിക്കുന്നവരോടെല്ലാം ഒരു തരം പ്രതികാരബുദ്ധി തോന്നുന്നത് സ്വാഭാവികമാണ്.

ഇനി ഈ വിഷയം രാഷ്ട്രീയമായി കൈകാര്യം ചെയ്യുന്നവരുമുണ്ട്. ഭാര്യയുടെ വിവരം മറച്ചുവച്ച മോദിയെ വിമര്‍ശിച്ച ദിഗ് വിജയ് സിങ്ങിന് രഹസ്യമായി പ്രണയിക്കാന്‍ എന്തവകാശം എന്നാണ് ചിലരുടെ ചോദ്യം. മോദി തന്റെ കാര്യം മറച്ചുവച്ചതില്‍ പരാതിയുണ്ടെന്നു മോദിയുടെ ഭാര്യ പത്രസമ്മേളനം വിളിച്ചു പറഞ്ഞിട്ടില്ല. മറിച്ച്, മോദി പ്രധാനമന്ത്രിയാകാന്‍ വേണ്ടി വ്രതമെടുത്തു പ്രാര്‍ഥിക്കുകയായിരുന്നു അവര്‍. അവിടെയും കുത്തിക്കഴപ്പ് എരണംകെട്ട പത്രക്കാര്‍ക്കായിരുന്നു. മോദിയെക്കുറിച്ച് യശോദച്ചേച്ചിക്കും ദിഗിനെക്കുറിച്ച് അമൃതച്ചേച്ചിക്കും പരാതിയില്ലെങ്കില്‍ പരാന്നഭോജികളായ ചാനലുകാരുടെ ഷോക്കിങ് ന്യൂസ് എക്‌സ്‌കഌസീവുകള്‍ ശുദ്ധ പോക്രിത്തരങ്ങളാണെന്നു പറയേണ്ടി വരും.

രാഷ്ട്രീയപ്രവര്‍ത്തകര്‍ സംശുദ്ധ ജീവിതം നയിക്കുന്നവാരിക്കണം എന്നു വാശി പിടിക്കാന്‍ പൊതുജനത്തിന് അവകാശമുണ്ട്. നിലവിലുള്ളവരില്‍ നല്ലൊരു ശതമാനവും ക്രിമിനലുകളാണെന്ന് കണക്കുകള്‍ സൂചിപ്പിക്കുമ്പോള്‍ പ്രണയിച്ചു എന്ന കുറ്റത്തിന് നേതേക്കന്‍മാരെ കല്ലെറിയുന്നത് ശരിയല്ല. സ്വന്തം സ്വകാര്യതയില്‍ സര്‍ക്കാര്‍ എത്തിനോക്കുന്നു എന്നു കണ്ടാല്‍ മനുഷ്യാവകാശലംഘനം എന്നു പറഞ്ഞ് മുറവിളി കൂട്ടുന്നവര്‍ രാഷ്ട്രീയനേതാക്കന്‍മാരുടെ കിടപ്പറച്ചിത്രങ്ങള്‍ വരെ ഫെയ്‌സ്ബുക്കില്‍ ഷെയര്‍ ചെയ്തു കളിക്കുന്നത് വൃത്തികേടാണ്. പ്രേമിക്കാനാണെങ്കിലും ഒരു മിനിമം ആണത്തമെങ്കിലും വേണം. ജസ്റ്റിസ് മനുവിനെപ്പോലുള്ള ഓള്‍ഡ് ജെനറേഷന്‍ യുവറോണര്‍മാര്‍ പറഞ്ഞിരിക്കുന്നതനുസരിച്ച് ഗൃഹസ്ഥാശ്രമം കഴിഞ്ഞാല്‍ പിന്നെ വാനപ്രസ്ഥമാണ്. വാനപ്രസ്ഥം നയിക്കേണ്ട പ്രായത്തില്‍ ഗൃഹസ്ഥാശ്രമം ട്രൈ ചെയ്യുന്നതിലാണ് വിപ്ലവം ഉള്ളത്. അതിനെയാണ് ന്യൂ ജനറേഷന്‍ എന്നു വിളിക്കേണ്ടത്. ന്യൂജനറേഷന്‍ എന്നു പച്ചകുത്തി നടക്കുന്ന വിഡ്ഡികള്‍ ദിഗ് വിജയ് സിങ്ങിനെ കരിവാരി തേക്കുന്നതിലൂടെ കുലം കുത്തിക്കളിക്കുന്നത് സ്വന്തം ജനറേഷനിലാണ്. ദിഗ് വിജയ് സിങ്ങിനോട് എനിക്കു ബഹുമാനം മാത്രമേയുള്ളൂ. അറുപത്തേഴാം വയസ്സില്‍ ഏതെങ്കിലും ഒരു സ്ത്രീയെ പ്രണയിക്കാന്‍ മാത്രം യൗവ്വനമോ ആരോഗ്യമോ റൊമാന്റിക് ആയ ഒരു മനസ്സോ എനിക്കുണ്ടാകുമെന്ന് പ്രതിക്ഷയില്ല. ദിഗ് വിജയ് സിങ്ങിനും അമൃതയ്ക്കും ശുഭകരമായ ഒരു പ്രണയജീവിതം ആശംസിക്കുന്നു.

ഇനിയും ഈ പാവത്തെ ക്രൂശിക്കരുതേ

അല്ലെങ്കിലും പണക്കാരെ ബഹുമാനിക്കുന്ന കാര്യത്തില്‍ ഇന്ത്യക്കാര്‍ വളരെ പിന്നിലാണ്. എങ്ങനെയെങ്കിലും ആരെങ്കിലും കുറച്ചു പണമുണ്ടാക്കി വരുമ്പോള്‍ അവര്‍ കട്ടതിന്റെയും മോഷ്ടിച്ചതിന്റെയും കൊള്ളയടിച്ചതിന്റെയും കണക്കുകള്‍ പറഞ്ഞ് അവരെയും അവരുടെ കുടുംബക്കാരെയും വേദനിപ്പിക്കുന്ന നിന്ദ്യവും നികൃഷ്ടവുമായ ജനാധിപത്യ ദുരുപയോഗം ഈ രാജ്യത്ത് ഇന്നോ ഇന്നലെയോ തുടങ്ങിയതല്ല. ഇന്ത്യയെ രക്ഷിക്കാന്‍ ഇറ്റലിയില്‍ നിന്നും വന്ന വിശുദ്ധജന്മമാണ് സോണിയാ ഗാന്ധി എന്നും അവരുടെ മക്കളായ രാഹുല്‍ ഗാന്ധി, പ്രിയങ്കാ ഗാന്ധി എന്നിവരുടെ അനുഗ്രഹമുണ്ടെങ്കില്‍ മാത്രമേ രാജ്യം ഗുണം പിടിക്കുകയുള്ളൂ എന്നും നമുക്കൊക്കെ അറിയാവുന്നതാണ്. നെഹ്‌റു കുടുംബത്തിന്റെ ഭരണത്തിന്‍ കീഴില്‍ അത്യധികം സന്തോഷിക്കുകയും അവരുടെ കാല്‍ക്കീഴിലമര്‍ന്നു ജീവിക്കുന്നതിന്റെ ആനന്ദം അനുഭവിക്കുന്നതിനും പകരം അവരുടെ കൊള്ളരുതായ്കകള്‍ വിളിച്ചു പറഞ്ഞും അവരില്‍ നിന്നും മോചനം ആഗ്രഹിച്ചും നമ്മള്‍ നമ്മളെത്തന്നെ അപകടത്തിലാക്കിക്കൊണ്ടിരിക്കുകയാണ്. തിരഞ്ഞെടുപ്പ് നടന്നുകൊണ്ടിരിക്കുന്ന ഈ സമയത്ത് നമ്മളെ ഭരിക്കാനും രാജ്യത്തിന്റെ വിഭവങ്ങള്‍ യഥേഷ്ടം വിനിമയം ചെയ്യാനുമുള്ള അവകാശം സോണിയാ ഗാന്ധിയുടെയും മക്കളുടെയും കൈകളില്‍ ഏല്‍പിക്കാന്‍ നമ്മള്‍ പ്രതിജ്ഞാബദ്ധമാണ്.

ജവഹര്‍ലാല്‍ നെഹ്‌റുവും ഇന്ദിരാ ഗാന്ധിയും രാജീവ് ഗാന്ധിയും സോണിയാ ഗാന്ധിയുമാണ് ഈ രാജ്യത്തിന് സ്വന്തമായി ഒരു അഡ്രസ് ഉണ്ടാക്കിയെടുത്തിട്ടുള്ളത്. അവരുടെ ജീവിതം ഈ രാജ്യത്തെ ജനങ്ങള്‍ക്കു വേണ്ടി ഉഴിഞ്ഞു വച്ചിട്ടുള്ളതാണ്. ഇനി ഈ രാജ്യം ഇതുപോലെ മുന്നോട്ടു പോകണമെങ്കില്‍, വിവിധ രംഗങ്ങളില്‍ വികസനം ഉണ്ടാവണമെങ്കില്‍ രാഹുല്‍ ഗാന്ധിയും പ്രിയങ്ക ഗാന്ധിയും ചേര്‍ന്ന് രാജ്യം ഭരിക്കണം എന്ന കാര്യത്തിലും ഒരു സംശയവുമില്ല. അങ്ങനെ പുതിയ ഭരണം വരുമ്പോള്‍, രാഹുല്‍ നാടു ഭരിക്കുമ്പോള്‍ അളിയനായ റോബര്‍ട്ട് വദ്രയോട് ജനങ്ങള്‍ക്കു വേണ്ടത്ര ബഹുമാനം ഇല്ലാതായാല്‍ എന്തു സംഭവിക്കും ?

എനിക്കറിയാവുന്ന മിക്കവാറും ആളുകളും (രാഷ്ട്രീയവ്യത്യാസമില്ലാതെ) റോബര്‍ട്ട് വദ്രയെ കാണുന്നത് വലിയ പിടിപാടുള്ള ഒരു കൊള്ളക്കാരനെന്ന നിലയ്ക്കാണ്. അയാള്‍ കൊള്ളക്കാരനാണെന്നും ഭൂമി തട്ടിപ്പുകാരനാണെന്നും അയാള്‍ക്കെതിരെ അന്വേഷണം നടത്തണമെന്നും ജയിലില്‍ അടയ്ക്കണമെന്നുമൊക്കെ വിവിധ കാലഘട്ടങ്ങളിലായി പലരും ആവശ്യപ്പെടുന്നുണ്ട്. അധികാരത്തിലെത്തിയാല്‍ അയാളെ ജയിലിലടയ്ക്കുമെന്നു പറഞ്ഞ് മോദി ജനങ്ങളെ കൊതിപ്പിക്കുന്നുമുണ്ട്. എന്നാല്‍, വിഡ്ഢികളായ ജനങ്ങള്‍ മനസ്സിലാക്കുന്നതില്‍ നിന്നും വ്യത്യസ്തമായി സാമ്പത്തികശാസ്ത്രരംഗത്ത് വിപ്ലവകരമായ പരീക്ഷണങ്ങള്‍ നടത്തുന്ന, ലോകത്തിനു മുന്നില്‍ നൂതനമായ വികസനമാതൃകകള്‍ അവതരിപ്പിക്കുന്ന ദിവ്യപുരുഷനാണ് റോബര്‍ട്ട് വദ്ര എന്നാണ് കോണ്‍ഗ്രസിലെ ബോണ്‍ലെസ് കോഴികള്‍ പറയുന്നത് (ഡെവലപ്‌മെന്റ് ഇക്കണോമിക്‌സിലെ ഏറ്റവും പ്രധാനപ്പെട്ട അഞ്ചു പ്രബന്ധങ്ങള്‍ ഇദ്ദേഹത്തിന്റെ പേരിലുള്ളതാണെന്നു കൂടി പറയാമായിരുന്നു).

ഈ സാഹചര്യത്തിലാണ് തന്റെ ഭര്‍ത്താവും മമ്മിയും ചേട്ടായിയുമെല്ലാം ഭയങ്കര സംഭവമാണെന്നു പരസ്യമായി പ്രഖ്യാപിച്ച് പ്രിയങ്ക ഗാന്ധി രംഗത്തു വന്നിരിക്കുന്നത്. ചേച്ചിയുടെ വെളിപ്പെടുത്തലിന്റെ രത്‌നച്ചുരുക്കം ഇതാണ്- റോബര്‍ട്ട് വദ്രയ്‌ക്കെതിരെയുള്ള ആരോപണങ്ങള്‍ ചേച്ചിയെ വേദനിപ്പിച്ചു. എന്നാല്‍ നടത്തിക്കൊണ്ടിരിക്കുന്ന പരിപാടികളില്‍ നിന്നും പിന്തിരിയില്ല. ഇത്തരം വിഷയങ്ങളില്‍ എങ്ങനെ തിരിച്ചടിക്കണമെന്ന് ഇന്ദിരാ ഗാന്ധി തങ്ങളെ പഠിപ്പിച്ചിട്ടുണ്ട്.(ഇന്ദിരാ ഗാന്ധി മരിക്കുമ്പോള്‍ പ്രിയങ്കയ്ക്ക് 12 വയസ്സ്). എല്ലാ പ്രതിസന്ധികളെയും അതിജീവിച്ച് ഫാമിലി ശക്തമായി തിരിച്ചു വരും.

വദ്ര കൊള്ളക്കാരനാണെന്നു വിശ്വസിക്കുന്നവരെ സംബന്ധിച്ച് പ്രിയങ്കയുടേത് ഒരു ഭീഷണിയാണ്. എന്നാല്‍, കോണ്‍ഗ്രസുകാര്‍ക്ക് നെഹ്‌റു ഫാമിലിയില്‍ നിന്നുള്ള മറ്റെല്ലാ മാലിന്യങ്ങളുമെന്ന പോലെ ഇതും അമൃതേത്തിനുള്ള വകയാണ്. പ്രിയങ്കയുടെ തിരുവചനങ്ങളുടെ അടിസ്ഥാനത്തില്‍ ഇന്ത്യക്കാരെക്കൊണ്ട് വദ്രയെ ബഹുമാനിപ്പിക്കുന്നതിനു വേണ്ടി കോണ്‍ഗ്രസ് സജീവമായി രംഗത്തിറങ്ങുകയാണത്രേ. ഗാന്ധി കുടുംബത്തിനു നേരെയുള്ള പ്രതികാരബുദ്ധിയോടെയുള്ള ആക്രമണം ആണേ്രത വദ്രയെ കുറ്റപ്പെടുത്തുന്നത് (നെഹ്‌റു കുടുംബം എങ്ങനെ ‘ഗാന്ധി കുടുംബ’മായി, ഇവറ്റകളുടെ പേരിനൊടൊപ്പം എങ്ങനെ ഗാന്ധി എന്ന വാലു വന്നു തുടങ്ങിയ മണ്ടന്‍ ചോദ്യങ്ങള്‍ ആരും ചോദിക്കരുത്). റോബര്‍ട്ട് വദ്രയുടെ അഴിമതികളെപ്പറ്റി അന്വേഷിക്കണം എന്നു പറയുന്നത് മഹാത്മാഗാന്ധിക്കെതിരെയുള്ള ആക്രമണമായും രാജ്യദ്രോഹമായും മാറിയേക്കാവുന്ന നാളുകളാണ് വരാനിരിക്കുന്നത് എന്നു കരുതാം.

ഭര്‍ത്താവ് എത്ര വൃത്തികെട്ടവനാണെങ്കിലും അതിയാന്‍ ഒരു സംഭവമാണ് എന്നു പരസ്യമായി പറയുന്നതാണ് ഇന്ത്യയിലെ പെണ്ണുങ്ങളുടെ ഒരു രീതി. അമ്മ ഇറ്റലിക്കാരിയാണെങ്കിലും ഇന്ത്യന്‍ പാരമ്പര്യം പിന്തുടരുന്ന് റോബര്‍ട്ട് വദ്രയെ പുകഴ്ത്തുന്ന പ്രിയങ്ക തെറ്റുകാരിയല്ല. ഭര്‍ത്താവ് ഒരു സംഭവമാണെന്നാണ് പണ്ടു വീരപ്പന്റെ ഭാര്യ മുത്തുലക്ഷ്മിയും പറഞ്ഞിട്ടുള്ളത്. മോദിയെ എതിര്‍ക്കുന്നവരെ പാകിസ്ഥാനിലേക്ക് അയക്കും എന്നു പറഞ്ഞതുപോലെ വദ്ര മുതലാളിയെ എതിര്‍ക്കുന്നവരെ എല്ലാം ഇറ്റലിയിലേക്ക് അയക്കുമെന്നോ മറ്റോ ഒരു ഓഫര്‍ മുന്നോട്ടു വച്ചാല്‍ ചിലപ്പോള്‍ എന്തെങ്കിലും ഫലമുണ്ടായേക്കും. ഇറ്റലിയില്‍ നിന്ന് ഇന്ത്യയിലോട്ടു കെട്ടിയെടുത്തിട്ടുള്ളവരൊക്കെ (ഇറ്റാലിയന്‍ നാവികരും മറ്റും) എട്ടിന്റെ പണിയേ തന്നിട്ടുള്ളൂ. ഇവിടെ നിന്നു കുറച്ചു പേര്‍ അങ്ങോട്ടു പോയി തിരിച്ചൊരു പണി കൊടുത്താല്‍ അത്രയുമായി.

മഹാത്മാ ഗന്ധി കീ ജയ് ! (മൂപ്പര് ‘ഗാന്ധി കുടുംബ’ത്തില്‍ അംഗമല്ല)

പാകിസ്ഥാനിലേക്കുള്ള വഴി

ഇന്ത്യ എന്നു വച്ചാല്‍ അണ്ടര്‍വെയറിനുള്ളില്‍ സൂക്ഷിച്ചിരിക്കുന്ന മുറുക്കാന്‍ പൊതി പോലെയാണെന്നാണ് അലവലാതികളായ ചില മോദി ഭക്തന്‍മാരുടെ വിചാരം. എന്റെ കാലു തിരുമ്മിതന്നാല്‍ മുറുക്കാന്‍ കുറച്ചു തരാം അല്ലെങ്കില്‍ തരൂല എന്നു പറയുന്ന ലാഘവത്തോടെ മോദിയെ ആരാധിച്ചാല്‍ ഇന്ത്യയില്‍ കഴിയാം അല്ലെങ്കില്‍ രാജ്യം വിട്ടോണം എന്നു വരെ പറയുന്ന ഒരു നിലയിലേക്ക് ഭക്താസുരന്‍മാര്‍ വളര്‍ന്നിട്ടുണ്ട്. ഫാസിസം ഫാസിസം എന്നൊക്കെ കേട്ടിട്ടുണ്ടെങ്കിലും അതൊക്കെ ഇത്ര ഈസിയായി നടപ്പാക്കാന്‍ പറ്റുമെന്ന് ഈ മണ്ടന്‍മാര്‍ സീരിയസ്സായി വിചാരിക്കുന്നുണ്ട് എന്നത് സഹതാപാര്‍ഹമാണ്.

ദേശീയത എന്നു വച്ചാല്‍ സനാതന ഹിന്ദുക്കള്‍ ഒഴികെയുള്ളവരെ രാജ്യത്തു നിന്നു തുരത്തുക എന്നാണെന്നു മനസ്സിലാക്കി വച്ചിരിക്കുന്ന വിദ്യാഭ്യാസമോ ലോകവിവരമോ ഇല്ലാത്ത മന്ദബുദ്ധികളാണ് ഇത്തരം വിവരക്കേടുകള്‍ പറയുന്നതെങ്കിലും അധികാരസ്ഥാനങ്ങളില്‍ ഇത്തരം നീകൃഷ്ടജീവികള്‍ എത്തിപ്പെടാനുള്ള സാധ്യത വലിയൊരു സാമൂഹികഭീഷണിയാണ്. മോദി അധികാരത്തില്‍ വന്നാല്‍ ആറു മാസത്തിനുള്ളില്‍ പാകിസ്ഥാനെ തകര്‍ക്കുമെന്നാണ് (പാകിസ്ഥാന്‍ എന്തോന്ന് എള്ളുണ്ടയോ) മുംബൈയില്‍ ഒരു ശിവസേനാ നേതാവ് പറഞ്ഞിരിക്കുന്നത്. മോദിജിയെ പിന്തുണയ്ക്കുന്നു എന്ന വ്യാജേന അദ്ദേഹത്തിനു കിട്ടാനുള്ള വോട്ടുകളും ജനപിന്തുണയും തട്ടിത്തെറിപ്പിക്കുന്നതിനു വേണ്ടിയുള്ള ഒരു ആഭ്യന്തരപാരയാണോ ഇത്തരം വിവരക്കേടുകള്‍ എന്നതും സംശയിക്കേണ്ടതാണ്.

ഗിരിരാജ് സിങ്ങും പ്രവീണ്‍ തൊഗാഡിയയുമൊന്നുമല്ല ഇവിടെ കാര്യങ്ങള്‍ തീരുമാനിക്കുന്നത്. ഇവരുടെ ഭീഷണികള്‍ ബിജെപി തള്ളിക്കളഞ്ഞിട്ടുമുണ്ട്. മോദിയെ എതിര്‍ക്കുന്ന മുസ്‌ലിംകള്‍ പാക്കിസ്ഥാനിലേക്കു പോകേണ്ട ആവശ്യമില്ല എന്നാണ് ബിജെപി പറഞ്ഞിട്ടുള്ളത്. ഗിരിരാജ് സിങ്ങിന് ഇന്ത്യയുടെ ചരിത്രവും സംസ്‌കാരവും രാഷ്ട്രീയപാരമ്പര്യവുമൊന്നും അറിയാത്തത് തീര്‍ച്ചയായും മോദിയുടെ കുറ്റമല്ല. എന്നാല്‍, ഇത്തരം വിഷങ്ങള്‍ ചുറ്റും നിന്നു തായം കളിക്കുമ്പോള്‍ ന്യൂനപക്ഷങ്ങളുടെ കാവല്‍മാലാഖയായി മോദിജിയെ സങ്കല്‍പിക്കുക അത്ര എളുപ്പവുമല്ല.

അതിര്‍ത്തി കടന്നുള്ള ആക്രമണങ്ങളും തീവ്രവാദ പ്രശ്‌നങ്ങളും നിലനില്‍ക്കുമ്പോഴും സാമ്പത്തിക-രാഷ്ട്രീയ രംഗത്ത് പരസ്പര സഹകരണത്തിലൂടെ മുന്നോട്ടു പോകുന്ന ഒരേ കുടുംബത്തിലെ അംഗങ്ങളാണ് ഇന്ത്യയും പാക്കിസ്ഥാനും. സ്വാതന്ത്ര്യസമരകാലത്ത് ഈ രണ്ടു രാജ്യത്തെയും ജനങ്ങള്‍ ഒരുമിച്ചു സമരം ചെയ്തും ഒരുമിച്ച് വേദനകള്‍ അനുഭവിച്ചും മാതൃരാജ്യമെന്ന ഒരേയൊരു സ്വപ്‌നത്തിനു വേണ്ടി ചോരയും വിയര്‍പ്പുമൊഴുക്കിയത് മറക്കാറായിട്ടില്ല. ഇരു രാജ്യങ്ങളെയും മുറിച്ചു മാറ്റിയപ്പോള്‍ ഹൃദയം നുറുങ്ങിയ ലോകം ആദരിക്കുന്ന ഒരു മഹാത്മാഗാന്ധിയാണ് ഈ രാജ്യങ്ങളെ ബ്രിട്ടിഷ് ആധിപത്യത്തില്‍ നിന്നും മോചിപ്പിച്ച് സ്വതന്ത്രമാക്കാന്‍ നേതൃത്വം നല്‍കിയത്. മോദി ഭക്തന്‍മാരായ ഈ വിവരദോഷികളോ പേരിനൊപ്പം ഗാന്ധി എന്നു ചേര്‍ത്ത് ജനകോടികളെ വിഡ്ഡികളാക്കിക്കൊണ്ടിരിക്കുന്ന തട്ടിപ്പുകാരോ ആ മഹാത്മാവ് വിഭാവനം ചെയ്ത ഇന്ത്യയെ അറിയുകയോ മനസ്സിലാക്കുകയോ ചെയ്തിട്ടില്ല എന്നത് നമ്മുടെ ഗതികേടാണ്.

രാജ്യസ്‌നേഹവും ദേശീയതയും ചില വ്യക്തികളോടുള്ള വിധേയത്വത്തോടു കൂട്ടിക്കെട്ടുന്നത് ഒരു തരം മാനസികരോഗമാണ്. മോദിയെ എതിര്‍ക്കുന്നവര്‍ക്ക് പാക്കിസ്ഥാനോടാണ് കൂറ് എന്നു പറയാന്‍ തൊലിക്കട്ടി മാത്രം പോര. അതൊരു രോഗാവസ്ഥയാണ്. അത്തരക്കാര്‍ രാഷ്ട്രീയരംഗത്തു നിന്നും പൊതുരംഗത്തു നിന്നും അകന്നു നില്‍ക്കുകയും ജനങ്ങള്‍ അവരില്‍ നിന്ന് അകലം പാലിക്കുകയുമാണ് കരണീയം. ഇനി ഇതൊക്കെ സീരിയസ്സാണെന്നുണ്ടെങ്കില്‍ മോദിയെ എതിര്‍ക്കുന്നവരെ ശരിക്കും ഈയാളുകള്‍ പാക്കിസ്ഥാനിലേക്ക് അയക്കുമെങ്കില്‍ പാകിസ്ഥാന്‍ വളരെ മെച്ചപ്പെട്ട ഒരു സ്ഥലമാണെന്ന് ഇവര്‍ തന്നെ സാക്ഷ്യപ്പെടുത്തുകയാണ് ചെയ്യുന്ത്. ഇന്ത്യന്‍ നേതാവിനെ ആരാധിക്കാത്തതിന്റെ പേരില്‍ നാടുകടത്തപ്പെട്ട ജനകോടികള്‍ക്ക് അഭയം നല്‍കാന്‍ പാകിസ്ഥാന്‍ തയ്യാറായാല്‍ എന്തൊക്കെ പരാധീനതകളുണ്ടെങ്കിലും ലോകം ആ രാജ്യത്തെ ആദരിക്കുക തന്നെ ചെയ്യും.

ഭാരത്മാതാ കീ ജയ്

കെജ്‌രിവാളിനെ കല്ലെറിയുമ്പോള്‍

ജനനന്മയ്ക്കു വേണ്ടി നിലകൊണ്ടിട്ടുള്ള ഒരു രാഷ്ട്രീയനേതാവിന്റെയും വഴികള്‍ പൂക്കള്‍ നിറഞ്ഞതായിരുന്നില്ല. കല്ലേറും മര്‍ദ്ദനവും പീഡനങ്ങളുമേറ്റാണ് ലോകത്ത് എല്ലാ ജനനേതാക്കന്‍മാരും ഉയര്‍ന്നു വന്നിട്ടുള്ളത്. ശത്രുക്കളുടെയും ഏകാധിപതികളുടെയും അക്രമങ്ങളെ അതിജീവിക്കുമ്പോള്‍ അവരുടെയൊക്കെ കരുത്ത് ഒപ്പമുള്ള ജനങ്ങളുടെ പിന്തുണയും വിശ്വാസവുമായിരുന്നു. ഇതില്‍ നിന്നും വളരെ വ്യത്യസ്തമാണ് ഒപ്പം നടക്കുന്നവര്‍ തന്നെ നേതാവിനെ കൈവയ്ക്കുന്നതും ആക്രമിക്കുന്നതും. അരവിന്ദ് കെജ്‌രിവാള്‍ ഈ ഗണത്തില്‍പ്പെട്ട ഒരു രാഷ്ട്രീയപ്രവര്‍ത്തകനും ജനനേതാവുമാണ്. കഴിഞ്ഞ ഒരു മാസത്തിനിടെ മാത്രം അഞ്ചിലേറെ തവണയാണ് കെജ്‌രിവാള്‍ ആക്രമിക്കപ്പെട്ടത്.

ഏപ്രില്‍ എട്ടിന് ഒരു ഓട്ടോറിക്ഷ ഡ്രൈവര്‍ കെജ്‌രിവാളിനെ ആക്രമിച്ചതാണ് അവസാനം നമ്മള്‍ കേട്ടത്. ഏപ്രില്‍ നാലിന് ദില്ലിയിലെ റോഡ് ഷോയ്ക്കിടെ ഒരാള്‍ കെജ്‌രിവാളിന്റെ കരണത്തടിച്ചു. മാര്‍ച്ച് 28ന് ഹരിയാനയില്‍ വച്ച് അണ്ണാ ഹസാരെയുടെ അനുയായി എന്നവകാശപ്പെട്ട് ഒരാള്‍ കെജ്‌രിവാളിനെ ആക്രമിച്ചു. മാര്‍ച്ച് 25ന് വാരണാസിയില്‍ അദ്ദേഹത്തിനു നേരെ മുട്ടയേറുണ്ടായി. അതിനു മുന്‍പ് അടിയും ഇടിയും മഷി കുടയലുമായി അനേകം സംഭവങ്ങള്‍.

കെജ്‌രിവാളിനെ ആക്രമിച്ചു എന്നത് മാധ്യമങ്ങള്‍ക്ക് ഒരു വാര്‍ത്തയല്ലാതായി. പലര്‍ക്കും അത് വളരെ പരിഹാസ്യമായ സംഭവമായി. മറ്റു രാഷ്ട്രീയ പാര്‍ട്ടികളുള്ളവര്‍ക്കും ഇതില്‍ ആശങ്കയുണ്ടായില്ലെന്നു മാത്രമല്ല അതെല്ലാം കെജ്‌രിവാള്‍ തന്നെ ആസൂത്രണം ചെയ്തതാണെന്ന് ആരോപിക്കുകയും ചെയ്തു. സീറ്റ് കിട്ടാത്തവരും പാര്‍ട്ടി നയങ്ങളില്‍ നിരാശ പൂണ്ടവരുമാണ് അക്രമികള്‍ എന്നാണ് റിപ്പോര്‍ട്ടുകള്‍. കോണ്‍ഗ്രസിലും ബിജെപിയിലും സിപിഎമ്മിലുമൊക്കെ സീറ്റു കിട്ടാത്തവരുടെ പത്തിലൊന്നു പോലും വരില്ല ആം ആദ്മിയില്‍ സീറ്റു കിട്ടാത്തവര്‍. പത്തറുപത് വര്‍ഷം രാജ്യം ഭരിച്ച പാര്‍ട്ടികളോടില്ലാത്ത രോഷം ഏതാനും മാസത്തെ ചരിത്രം മാത്രമുള്ള ആം ആദ്മി പാര്‍ട്ടിയോടുണ്ടായി എന്നതും വിചിത്രമാണ്. ഈ കാരണങ്ങളുടെ പേരില്‍ മന്‍മോഹന്‍ സിങ്ങോ നരേന്ദ്ര മോദിയോ ഒന്നും ആക്രമിക്കപ്പെട്ടില്ല എന്നത് മറന്നുകൂടാ. സോളാര്‍ കേസില്‍ പെട്ട് നാറിയ മുഖ്യമന്ത്രി ഉമ്മന്‍ ചാണ്ടിയെ കണ്ണൂരില്‍ കല്ലെറിഞ്ഞതിന്റെ പേരില്‍ ഇവിടൊഴുകിയ കണ്ണീരിനു കണക്കില്ല. എന്നിട്ടും കെജ്‌രിവാളിനെ ആക്രമിച്ചത് മാധ്യമങ്ങള്‍ക്ക് ഒരു തമാശയാണെന്നത് നമ്മുടെ അധപതനത്തിന്റെ ഏറ്റവും പ്രകടമായ ഉദാഹരണമാണ്.

എന്തുകൊണ്ട് കെജ്‌രിവാള്‍ തെരുവില്‍ ആക്രമിക്കപ്പെടുന്നു ? കോടികളുടെ അഴിമതിയും അക്രമങ്ങളും വര്‍ഗീയകലാപങ്ങളും അഴിച്ചു വിട്ട നേതാക്കന്‍മാര്‍ക്കു മുന്നില്‍ നട്ടെല്ലുവളച്ചു നില്‍ക്കുന്ന ഞാനും നിങ്ങളും അടങ്ങുന്ന പൊതുജനം കെജ്‌രിവാളിന്റെ മേല്‍ മഷി കുടയാനും അദ്ദേഹത്തെ കല്ലെറിയാനും മുഖത്തടിക്കാനും തയ്യാറാവുന്നതിന്റെ മനശാസ്ത്രം എന്താണ് ?

ബലാല്‍സംഗത്തിനിരയാവുന്ന പെണ്‍കുട്ടിയെ തൂക്കിക്കൊല്ലണം എന്നു പറയുന്നവരും ലക്ഷം കോടിയുടെ അഴിമതി നടത്തി വീണ്ടും വോട്ടുതേടി വരുന്നവരും കോര്‍പറേറ്റുകള്‍ക്കു വേണ്ടി കൂട്ടിക്കൊടുപ്പു നടത്തുന്നവരും അടങ്ങുന്ന മുഖ്യധാരാ രാഷ്ട്രീയ പാര്‍ട്ടികളില്‍ നിന്നുള്ള ഉന്നതരായ നേതാക്കന്‍മാരെ പൂവിട്ടു പൂജിക്കുകയും അവര്‍ക്കു ക്ഷേത്രങ്ങള്‍ പണിതീര്‍ക്കുകയും ചെയ്യുന്ന സമൂഹം അഴിമതി വിരുദ്ധ ഇന്ത്യയ്ക്കു വേണ്ടി ഏറെക്കുറെ എല്ലാം ഉപേക്ഷിച്ച് തെരുവിലിറങ്ങിയിരിക്കുന്ന നിരായുധനായ ഒരു മനുഷ്യനെ കല്ലെറിയുന്നത് എന്തിനാണ് ?

കെജ്‌രിവാള്‍ ഒരു മികച്ച ഭരണാധികാരിയോ രാഷ്ട്രതന്ത്രജ്ഞനോ ആസൂത്രകനോ അല്ലായിരിക്കാം. എന്നാല്‍ അദ്ദേഹം ജനങ്ങളെ വോട്ടുവാങ്കുകളായി കണ്ട് ഗൂഢപദ്ധതികള്‍ ആസൂത്രണം ചെയ്യുകയോ കോടികളുടെ അഴിമതികള്‍ നടത്തുകയോ ഒരു ഘട്ടത്തില്‍പ്പോലും ജനങ്ങളെ വെല്ലുവിളിക്കുകയോ സാധാരണക്കാരെ ഭീഷണിപ്പെടുത്തുകയോ ചെയ്തിട്ടില്ല. തന്റെ രാഷ്ട്രീയ ആശയം പരമാവധി ജനങ്ങളിലെത്തിക്കാനും അഭിപ്രായരൂപീകരണം നടത്താനും മറ്റെല്ലാവര്‍ക്കുമുള്ളതുപോലെ കെജ്‌രിവാളിനും അവകാശമുണ്ട്. പൊതുജനമധ്യത്തില്‍ കയ്യേറ്റം ചെയ്യപ്പെടാന്‍ യോഗ്യരായ ആയിരം നേതാക്കന്‍മാരെങ്കിലും നാട്ടിലുള്ളപ്പോള്‍ അവരെയൊക്കെ വെറുതെ വിട്ട് കെജ്‌രിവാളിനെ ആക്രമിക്കാന്‍ ജനം തയ്യാറാവുന്നതിന് ഒരേയൊരു കാരണമേയുള്ളൂ- കെജ്‌രിവാള്‍ അതര്‍ഹിക്കുന്നു.

വോട്ടെടുപ്പുകാലത്ത് മാത്രം കൂപ്പുകൈകളോടെ നമ്മെ സമീപിക്കുന്ന പിന്നെ ടിവി ചര്‍ച്ചകളില്‍ മാത്രം കാണുന്ന നേതാക്കന്‍മാരാണ് നമ്മുടെ സങ്കല്‍പത്തിലെ മാതൃകാജനപ്രതിനിധികള്‍. അവര്‍ നമുക്കു വേണ്ടി എന്തു ചെയ്തു എന്നതാലോചിക്കാതെ അവരെ ആരാധിക്കുന്നതാണ് നമ്മുടെ രാഷ്ട്രീയം. നേതാക്കന്‍മാരെ മഹത്വപ്പെടുത്തുന്നതിനു വേണ്ടി പരസ്പരം വെട്ടിക്കൊല്ലുന്നതാണ് ധീരതയെന്നു കരുതുന്ന നികൃഷ്ടജന്മങ്ങളാണ് നമ്മള്‍ സാധാരണക്കാരന്‍. അധികാരവും ആയുധവും കയ്യിലുള്ളവനെയേ നമ്മള്‍ ബഹുമാനിക്കൂ. ആരെയും ആദരിക്കാന്‍ നമുക്കറിയില്ല. പരമാവധി ഭയപ്പെടുത്തുന്നവരെ പൂജിക്കാനേ അറിയൂ. നമ്മളെ അടിമകളായി കാണുന്നവരാണ് നമ്മുടെ നേതാവ്. നമ്മളെ നമ്മളായി കണ്ട് അംഗീകരിക്കുന്നവരെ നമുക്ക് ഭയമാണ്, അവരെപ്പറ്റി ആശങ്കകളാണ്. ഇപ്പോഴും ജീനുകളിലുള്ള അടിമയുടെ അബോധമാണ് കെജ്‌രിവാളിനെതിരെ നമ്മുടെ കൈയുയര്‍ത്തുന്നത്. നമ്മെ ചവുട്ടിമെതിക്കാനും നമ്മുടെ ജീവിതം ദുരിതപൂര്‍ണമാക്കാനും കരുത്തുള്ളവരുടെ മുന്നില്‍ കൈ കൂപ്പി നില്‍ക്കുമ്പോഴാണ് നമ്മള്‍ ഭിതിയും ആശങ്കകളുമില്ലാതെ ജീവിക്കുന്നത്.

സാധാരണക്കാരന്റെ പാര്‍ട്ടിയാണ് ആം ആദ്മി. ഉന്നത നേതാക്കന്‍മാര്‍ക്ക് അനുകരിക്കാനാവാത്ത വിധം സാധാരണക്കാരനായി മുന്നോട്ടു പോകുന്ന നേതാവാണ് കെജ്‌രിവാള്‍. അദ്ദേഹത്തെ കല്ലെറിയുന്ന സമൂഹം സഹതാപമര്‍ഹിക്കുന്നില്ല. നിലവിലുള്ള രാഷ്ട്രീയസംസ്‌കാരത്തില്‍ നിന്നൊരു മാറ്റം അവര്‍ ആഗ്രഹിക്കുന്നില്ല. ജനാധിപത്യത്തിലെ രാഷ്ട്രീയ അടിമത്തം നമ്മുടെ ലഹരിയാണ്. അവിടെ ഒരു സാധാരണക്കാരന്‍ തികഞ്ഞ അശ്ലീലമാണ്. അവനെ തല്ലിക്കൊല്ലുക തന്നെ വേണം.

നിങ്ങളുട വോട്ട്, ഞങ്ങളുടെ കസേര

ഇത് കോണ്‍ഗ്രസിനു മാത്രം സാധിക്കുന്ന അദ്ഭുതമാണ്. തിരഞ്ഞെടുപ്പിനോടനുബന്ധിച്ച് കോണ്‍ഗ്രസ് ഇന്നലെ പുറത്തിറക്കിയ പ്രകടനപത്രികയിലെ വിശേഷങ്ങള്‍ വായിച്ചപ്പോള്‍ പവാര്‍ പറഞ്ഞതുപോലെ കോണ്‍ഗ്രസ് സ്ഥാനാര്‍ഥികള്‍ക്കെല്ലാം രണ്ടു വോട്ടു വീതം ചെയ്യാന്‍ തോന്നിപ്പോയി. രാഹുല്‍ ഗാന്ധിയുടെ പേരുള്ള ബാലറ്റ് പേപ്പെറെങ്ങാനും കയ്യില്‍ കിട്ടിയിലിരുന്നെങ്കില്‍ ആ പേരിനുമുകളില്‍ അന്‍പത്തൊന്നു വോട്ടെങ്കിലും ഞാന്‍ കുത്തിയേനെ. ഈ പ്രകടനപത്രിക പുറത്തിറക്കാന്‍ ധൈര്യം കാണിച്ച കോണ്‍ഗ്രസിനും അതിന്റെ നേതാക്കന്‍മാര്‍ക്കും അഭിവാദ്യങ്ങള്‍ അര്‍പ്പിക്കുന്നു.

ജനദ്രോഹനടപടികളും പട്ടിണിക്കാരെ പിന്നെയും പട്ടിണിക്കാരാക്കുന്ന സാമ്പത്തികനയങ്ങളും കൊണ്ട് അഞ്ചു വര്‍ഷം ഭരിച്ച ശേഷം കോണ്‍ഗ്രസ് വോട്ടര്‍മാരെ ഹഠാദാകര്‍ഷിക്കാന്‍ അവതരിപ്പിച്ചിരിക്കുന്ന പ്രകടനപത്രികയിലെ പ്രധാന ഐറ്റം നമ്പരുകള്‍ ഇവയൊക്കെയാണ്- എല്ലാവര്‍ക്കും ആരോഗ്യം, പാര്‍പ്പിടം, പെന്‍ഷന്‍. പിന്നെ അമേരിക്കന്‍ നിലവാരത്തിലേക്ക് മൊത്തത്തില്‍ രാജ്യത്തെ പുനപ്രതിഷ്ഠിക്കുന്നതിനുള്ള പൊടിക്കൈകളും.

വീണ്ടും അധികാരത്തിലേറിയാല്‍ എല്ലാവര്‍ക്കും ആരോഗ്യവും പാര്‍പ്പിടവും പെന്‍ഷനും നിയമപരമായ അവകാശമാക്കുമെന്നാണ് കോണ്‍ഗ്രസ് വാദ്ഗാനം. അതായത് ഏതാണ്ട് സ്വര്‍ഗരാജ്യത്തിനു തുല്യമായ ഒരു സാമൂഹികസാഹചര്യം ഇന്ത്യയില്‍ വേണം എന്നുള്ളവര്‍ കോണ്‍ഗ്രസിനു വോട്ടു ചെയ്യണം. മുകളില്‍ പറഞ്ഞതൊക്കെ നിയമപരമായ അവകാശമാകുന്നതോടെ രോഗികളും വീടില്ലാത്തവരും പെന്‍ഷന് അവകാശമില്ലാത്തവരും നിയമലംഘകരാകുമോ എന്നറിയില്ല. അങ്ങനെയെങ്കില്‍ അങ്ങനെ, ഈ നാട്ടില്‍ സമ്പത്തും ആരോഗ്യവും ഐശ്വര്യവും മാത്രമുള്ളവര്‍ മതി എന്നു തന്നെയാണ് എന്റെയും അഭിപ്രായം.

എന്നും രാഹുല്‍ ഗാന്ധിയുടെ വീക്ക്‌നെസ്സ് ആയിരുന്ന യുവാക്കളുടെയും സ്ത്രീകളുടെയും പിന്നാക്ക ന്യൂനപക്ഷങ്ങളുടെയും ക്ഷേമവും ഉന്നമനവും പ്രകടനപത്രികയിലും വാഗ്ദാനം ചെയ്യുന്നുണ്ട്. ഒരുപടി കൂടി കടന്ന് സ്വകാര്യമേഖലയില്‍ കൂടി പട്ടികജാതി-വര്‍ഗ വിഭാഗങ്ങളുടെ സംവരണത്തെപ്പറ്റിപ്പോലും കോണ്‍ഗ്രസ് ആലോചിക്കുന്നുണ്ട് എന്നാണ് പ്രകടനപത്രിക സൂചിപ്പിക്കുന്നത്.

സ്ത്രീകള്‍ക്കെതിരായ അതിക്രമങ്ങള്‍ കൈകാര്യം ചെയ്യുന്നതിന് കേന്ദ്രീകൃത പ്രശ്‌നപരിഹാര കേന്ദ്രങ്ങള്‍ രൂപീകരിക്കുമെന്നും പത്രിക വാഗ്ദാനം ചെയ്യുന്നുണ്ട്. ഇതിനു പുറമേ 10 കോടി യുവാക്കള്‍ക്ക് തൊഴില്‍പരിശീലനവും തൊഴിലും കൊടുക്കും. ന്യൂനപക്ഷ ക്ഷേമത്തിനു സുസ്ഥിര ദീര്‍ഘകാല പദ്ധതികളും ആവിഷ്‌കരിക്കും. മൊത്തത്തില്‍ ഇന്ത്യയെ ചുരുങ്ങിയ കാലം കൊണ്ട് ഹരിതസ്വര്‍ഗഭൂമിയാക്കി മാറ്റി അമേരിക്കയെയും യൂറോപ്യന്‍ യൂണിയനെയും ദുബായിയെുമൊക്കെ കൊതിപ്പിക്കുന്നതിനുള്ള അപൂര്‍വഫോര്‍മുലയാണ് ഈ പറഞ്ഞ പ്രകടനപത്രിക.

വരൂ നമുക്കിനി ആ പൊട്ടന്‍മാരെ പറ്റിക്കാനുള്ള സാഹിത്യമെഴുതാം എന്നു പറഞ്ഞ് കുറെ കോണ്‍ഗ്രസുകാര്‍ ഒരു മുറിയില്‍ അടച്ചിരുന്ന് എഴുതിയുണ്ടാക്കിയതാണ് ഈ പ്രകടനപത്രിക എന്നൊന്നും ആരും ആരോപിക്കുകയോ സംശയിക്കുകയോ ചെയ്യരുത്. ഏതാണ്ട് 50 ലക്ഷം പേരുമായി ആശയവിനിമയം നടത്തി അഞ്ചുമാസം കൊണ്ട് ശേഖരിച്ച വിവരങ്ങള്‍ ക്രോഡീകരിച്ചാണ് ഈ പ്രകടനപത്രിക തയ്യാറാക്കിയിരിക്കുന്നത്. കോണ്‍ഗ്രസിന്റെ ചരിത്രത്തിലെ ഏറ്റവും വിപുലമായ പ്രകടനപത്രികയും ഇതാണത്രേ.

അഞ്ചു മാസം അഥവാ 150 ദിവസം കൊണ്ട് 50 ലക്ഷം പേരുമായി ആശയവിനിമയം നടത്തി എന്നതു തന്നെ വലിയൊരു കാര്യമാണ്. അതായത് ഒരു ദിവസം ശരാശരി 33,333 പേരുമായി ആശയവിനിമയം നടത്തി. ഇത് തന്നെ ഒരു ചരിത്രനേട്ടമാണ്. ഒരു കൊച്ചുപ്രകടനപത്രിക തയ്യാറാക്കാന്‍ വേണ്ടി പോലും ഇത്രയേറെ അധ്വാനിച്ച കോണ്‍ഗ്രസ് പാര്‍ട്ടിയെ അഭിനന്ദിക്കുന്നത് തിരഞ്ഞെടുപ്പ് ചട്ടലംഘനമാവില്ല എന്നു വിശ്വസിക്കുന്നു.

മറ്റൊന്ന്, അടിക്കടിയുള്ള ഇന്ധനവിലവര്‍ധന, ആധാര്‍കാര്‍ഡിന്റെ കാര്യത്തിലെ അനിശ്ചിതത്വം, അഴിമതി തുടങ്ങിയ കാര്യങ്ങള്‍ ഇന്ത്യയിലെ പൊതുസമൂഹത്തെ ബാധിക്കുകയോ അവരുടെ ശ്രദ്ധയില്‍പ്പെടുകയോ ചെയ്തിട്ടില്ല എന്ന യാഥാര്‍ഥ്യമാണ്. 50 ലക്ഷം പേരുമായി ആശയവിനിമയം നടത്തി ക്രോഡീകരിച്ച വിവരങ്ങളില്‍ ഇന്ധനവിലവര്‍ധനയോ ആധാര്‍ കാര്‍ഡിലെ അനിശ്ചിതത്വമോ രാജ്യത്തെ അഴിമതിയോ എവിടെയും വന്നിട്ടില്ല എന്നത് വളരെ പ്രധാനമാണ്. ഒന്നുകില്‍ ഇന്ധനവിലവര്‍ധനയും ആധാര്‍ കാര്‍ഡും അഴിമതിയുമൊന്നും ഇവിടുത്തെ ജനങ്ങള്‍ക്ക് ഒരു പ്രശ്‌നമല്ല. അല്ലെങ്കില്‍ ഈ 50 ലക്ഷം ആളുകള്‍ ഇന്ത്യക്കാരല്ല. ഇറ്റലിക്കാരോട് അഭിപ്രായം ചോദിച്ചിട്ട് ഇന്ത്യയില്‍ പ്രകടനപത്രികയിറക്കാന്‍ സാധ്യതയുണ്ടോ ? ആകെ കണ്‍ഫ്യൂഷനായി.

കഴിഞ്ഞ 10 വര്‍ഷം ഇവിടെ സല്‍ഭരണം കാഴ്ചവച്ചപ്പോഴൊക്കെ ഉണ്ടായിരുന്ന പ്രശ്‌നങ്ങളും പ്രതിസന്ധികളും തന്നെയാണ് ഇനിയൊരഞ്ചു വര്‍ഷം കൂടി ഭരിക്കാന്‍ അനുവദിച്ചാല്‍ പരിഹരിച്ചുതരാം എന്നു കോണ്‍ഗ്രസ് പറയുന്നത്. ഈ കാലഘട്ടം കൊണ്ട് ഇന്ത്യയുടെ ചരിത്രത്തിലെ ഏറ്റവും വലിയ അഴിമതികള്‍ നടത്തിയ മന്ത്രിമാരെ ചുമന്നു നടന്ന കോണ്‍ഗ്രസ് വരുന്ന അഞ്ചു വര്‍ഷത്തേക്കുള്ള മോഹനവാദ്ഗാനങ്ങള്‍ നല്‍കുന്നത് രാജ്യത്തെ അവശേഷിക്കുന്ന സമ്പത്തു കൂടി അടിച്ചുമാറ്റാനും മറിച്ചുവില്‍ക്കാനും ആണെന്നു ദുഷ്ടന്‍മാര്‍ ആരോപിക്കും. എന്നാല്‍, കഴിഞ്ഞ 10 വര്‍ഷം കൊണ്ടാണ് ദരിദ്രരാജ്യമായ ഇന്ത്യ ഒരു വികസ്വര രാജ്യമായി മാറിയത്. അഴിമതി വികസനത്തിന്റെയും പുരോഗതിയുടെയും ലക്ഷണമാണ്. ഈ 10 വര്‍ഷം കൊണ്ട് കോണ്‍ഗ്രസ് ദരിദ്രരാജ്യമായിരുന്ന ഇന്ത്യയെ വികസ്വരരാജ്യമാക്കി മാറ്റി. ഇനി ഒരഞ്ചു വര്‍ഷം കൂടി കൊടുത്താല്‍ ഫുള്ളായിട്ട് വികസിപ്പിച്ച് അമേരിക്കയും ഇറ്റലിയും പോലെയാക്കും എന്നാണ് മനസ്സിലാക്കേണ്ടത്.

അഴിമതി വിരുദ്ധ ബില്ലുകള്‍ എത്രയും വേഗം പാസ്സാക്കുമെന്നും കള്ളപ്പണം തടയുന്നതിനുള്ള ശക്തമായ നടപടികള്‍ സ്വീകരിക്കുമെന്നതും ഇന്നലെ കോണ്‍ഗ്രസ് പുറത്തിറക്കിയ പ്രകടനപത്രികയിലെ പ്രധാന പോയിന്റുകളിലൊന്നാണ്. വിദേശബാങ്കുകളിലെ കള്ളപ്പണം തിരികെ കൊണ്ടുവരുന്നതിന് രണ്ട് സുപ്രീംകോടതി ജഡ്ജിമാരുടെ നേതൃത്വത്തില്‍ പ്രത്യേകാന്വേഷണസംഘം രൂപവത്കരിച്ചുള്ള ഉത്തരവ് പിന്‍വലിക്കുകയോ ഭേദഗതി ചെയ്യുകയോ വേണമെന്ന കേന്ദ്ര സര്‍ക്കാരിന്റെ അപേക്ഷ സുപ്രീം കോടതി തള്ളിയതും ഇന്നലെയാണ്. കള്ളപ്പണം തടയുക എന്നതുകൊണ്ട് വിദേശത്തുള്ള കള്ളപ്പണം ഇന്ത്യയിലേക്കു വരുന്നത് തടയുക എന്നതാണ് ഉദ്ദേശിക്കുന്നതെന്നു തോന്നുന്നു.

അല്ലെങ്കിലും കള്ളപ്പണം ചീത്തയാണെന്നു പറയുന്നവര്‍ തന്നെ അത് ഇന്ത്യയിലേക്കു കൊണ്ടുവരണം എന്നു പറയുന്നതിന് എ്തു നീതീകരണമാണുള്ളത്. ചീത്ത വസ്തുക്കള്‍ ഒരിക്കലും ഇന്ത്യയിലേക്കു കൊണ്ടുവരരുത് എന്നല്ലേ നമ്മള്‍ പറയേണ്ടത്. അങ്ങനെ നോക്കുമ്പോള്‍ എല്ലാ അര്‍ത്ഥത്തിലും വളരെ പോസിറ്റീവായ ഒരു പ്രകടനപത്രികയാണ് കോണ്‍ഗ്രസ് ജനങ്ങള്‍ക്കു മുന്നില്‍ അവതരിപ്പിച്ചിരിക്കുന്നത്.

മോദിയെയും സംഘത്തെയും പ്രകടനപത്രിക വിറളി പിടിപ്പിച്ചിട്ടുണ്ടാവും എന്നതില്‍ സംശയമില്ല. പിന്നെ, ഗുജറാത്ത് ഓള്‍റെഡി അമേരിക്കന്‍ നിലവാരത്തിലെത്തിയതുകൊണ്ട് ഇന്ത്യയെ ഹോള്‍സെയിലായി അമരിക്കന്‍ നിലവാരത്തിലെത്തിക്കുമെന്നു വാഗ്ദാനത്തെ അധികം പേടിക്കേണ്ട കാര്യമില്ല. ഗുജറാത്തിനെ ആ പരുവത്തിലാക്കിയ ആളെ ജയിപ്പിച്ചാല്‍ ഇന്ത്യ മുഴുവന്‍ അങ്ങനെയാക്കും എന്നു പറയുമ്പോള്‍ ഗുജറാത്ത് എന്ന ജീവിക്കുന്ന ഉദാഹരണമെങ്കിലും മുന്നിലുണ്ട് എന്നതു വച്ചു നോക്കുമ്പോള്‍ മോദിക്കു പേടിക്കാനുമില്ല. എന്തായാലും അടുത്ത അഞ്ചു വര്‍ഷം ആരു ഭരിച്ചാലും ഇന്ത്യ അമേരിക്കയാകുമെന്ന കാര്യത്തില്‍ ഒരു സംശയവുമില്ല.