പാഷന്‍ ഓഫ് ദി പ്രീസ്റ്റ്‌സ്‌

ഭീകര സെക്കുലറായ പി.സി.ജോര്‍ജ് പോലും മൗനം പാലിക്കുന്ന ഈ വിശുദ്ധ വാരത്തില്‍ ഇങ്ങനൊരു പോസ്റ്റിടേണ്ടി വരുന്നതില്‍ ഖേദിക്കുന്നു. ഈ വിശുദ്ധവാരത്തില്‍ പള്ളീലച്ചന്‍മാരും വിശ്വസികളെപ്പോലെ പ്രാര്‍ഥനയിലും ഉപവാസത്തിലും ഈശ്വരചിന്തയിലും കഴിഞ്ഞുകൂടുകയാണെന്നാണ് പൊതുവേയുള്ള സങ്കല്‍പം. എന്നാല്‍, വര്‍ഷങ്ങളായി മനസ്സില്‍ അടക്കിവച്ചിരിക്കുന്ന കുത്തിക്കഴപ്പുകള്‍ യൂദാസിനെപ്പോലെ അവരുടെ കുഞ്ഞാടുകളെ ഒറ്റിക്കൊടുക്കുകയും പാവപ്പെട്ട മനുഷ്യരുടെ ദൈവവിശ്വാസത്തെ തന്നെ ക്രൂശിലേറ്റുകയും ചെയ്യുമ്പോള്‍ പറയാനുള്ളത് പറയുന്നതാണ് പി.സി.ജോര്‍ജ് കളിക്കുന്നതിനെക്കാള്‍ നല്ലത് എന്നു തോന്നുന്നു.

പറയുമ്പോള്‍ 20 വര്‍ഷം മുന്‍പ് കൊല്ലപ്പെട്ട സിസ്റ്റര്‍ അഭയയുടെ കാര്യം മുതല്‍ നമ്മള്‍ പറയണം. രണ്ടു പതിറ്റാണ്ടായി ഭൗതികശക്തികള്‍ അന്വേഷിച്ചിട്ടും കുറ്റവാളികളെ കിട്ടാത്ത കേസിനെ ഇനി മതമേലധ്യക്ഷന്‍മാര്‍ ദൈവികരഹസ്യമായോ മറ്റോ പ്രഖ്യാപിക്കുന്നതാണ് നല്ലത്. മകളെ കന്യാസ്ത്രീയാക്കാന്‍ വിട്ട ആ രക്ഷിതാക്കളുടെ മനസ്സിലെ കെടാത്ത തീ ബാക്കി നോക്കിക്കോളും. പിന്നെയുമുണ്ട്. ആലപ്പുഴയില്‍ സണ്‍ഡേ സ്‌കൂള്‍ ക്യാംപിനിടെ കൊല്ലപ്പെട്ട 12 വയസുകാരി ശ്രേയ, തൃശൂരില്‍ ആദ്യകുര്‍ബാന വ്‌സ്ത്രം വാങ്ങിക്കൊടുക്കാമെന്നു പറഞ്ഞ് കൊച്ചു പെണ്‍കുട്ടിയെ പീഡിപ്പിച്ച ബ്ലഡി ഫക്കിങ് കൊക്കന്‍, അങ്ങനെ നമ്മള്‍ അറിഞ്ഞതും അറിയാത്തതുമായ സംഭവങ്ങള്‍ അനേകം.

അടുത്തിടെ ചര്‍ച്ചയായ മൂന്ന് പള്ളീലച്ചന്‍മാരാണ് ഇന്ന് പോസ്റ്റില്‍ വിഷയമാകുന്നത്. ഇവരുടെ സഭയേതാണെന്നോ സെമിനാരി ഏതാണെന്നോ എന്നൊന്നും എനിക്കറിഞ്ഞുകൂട. എല്ലാവരുടെയും കയ്യിലിരിപ്പ് സാത്താന്റെയാണെന്നതാണ് പ്രസക്തമാകുന്നത്. ആദ്യത്തെ സംഭവത്തിലെ പ്രതി പുത്തന്‍വേലിക്കര പറങ്കിനാട്ടിയകുരിശ് ലൂര്‍ദ്മാത പള്ളിയിലെ വികാരിയുമാണ്- ഫാ.എഡ്വിന്‍ സിഗ്രേസ്. പേരെടുത്ത ധ്യാനഗുരു, തീപ്പൊരി പ്രഭാഷകന്‍, നിരവധി ഭക്തിഗാനകാസറ്റുകളിലെ പാട്ടുകാരന്‍… അങ്ങനെ നാട്ടുകാരുടെ കണ്ണിലുണ്ണി. ഈ ഉണ്ണി 14 വയസുള്ള ഒരു പെണ്‍കുട്ടിയെ സ്ഥിരമായി പള്ളിമേടയില്‍ കൊണ്ടുപോയി പീഡിപ്പിച്ചു എന്നാണ് കേസ്. പെണ്‍കുട്ടിയെ അച്ചന്‍ സ്ഥിരമായി പള്ളിമേടയില്‍ കൊണ്ടുപോകുന്നത് കണ്ട് വീട്ടുകാര്‍ കാര്യമന്വേഷിച്ചപ്പോള്‍ പെണ്‍കുട്ടി വിവരം പറയുകയും വീട്ടുകാര്‍ പൊലീസില്‍ പരാതിപ്പെടുകയും പൊലീസ് കേസെടുക്കുകയും മാതൃകാ ഇടയന്‍ ഒളിവില്‍ പോവുകയുമായിരുന്നു എന്നാണ് വാര്‍ത്ത.

14 വയസുള്ള പെണ്‍കുട്ടിയാണ് സത്യത്തില്‍ കുറ്റക്കാരിയെന്നും സ്റ്റാന്‍ഡ് എലോണ്‍ സെലബ്രിറ്റിയായ അച്ചനെ കുടുക്കാന്‍ വേണ്ടി കോര്‍പറേറ്റുകള്‍ നടത്തുന്ന ശ്രമമാണിതെന്നും അച്ചന് ഐക്യദാര്‍ഢ്യം നല്‍കണമെന്നുമൊക്കെ വാദിക്കാനും ആളുണ്ടാവും. 14 വയസുള്ള പെണ്‍കുട്ടിയെക്കാള്‍ വിവരവും വിവേകവും, തെറ്റും ശരിയും തമ്മിലുള്ള വ്യത്യാസവുമൊക്കെ നന്നായി അറിയാവുന്ന ആളാണ് 41 വയസുള്ള പള്ളീലച്ചന്‍ എന്നെങ്കിലും പ്രിയ കുഞ്ഞാടുകള്‍ അംഗീകരിക്കണമെന്ന് അഭ്യര്‍ഥിക്കുന്നു. സിംപിളായി പറഞ്ഞാല്‍പ്പോലും ഒരു തെറ്റും ചെയ്യാതെ ക്രൂശിലേറ്റപ്പെട്ട ക്രിസ്തുവിനെ പ്രകീര്‍ത്തിക്കുന്ന ഈയാഴ്ചയില്‍ ധ്യാനഗുരു ഒളിവില്‍ പോയതിന് ക്രിസ്തീയമായ ഒരു വിശദീകരണവും ഞാന്‍ കാണുന്നില്ല.

ഇതുമായി ബന്ധമില്ലെങ്കിലും, കഴിഞ്ഞയാഴ്ച സഭയില്‍ നിന്നു പുറത്താക്കപ്പെട്ട ഒരു കന്യാസ്ത്രീക്ക് 12 ലക്ഷം രൂപ നഷ്ടപരിഹാരം നല്‍കിയ ഒരു വാര്‍ത്തയും കണ്ടിരുന്നു. 13 വര്‍ഷം കന്യാസ്ത്രീയായിരുന്ന അനിതയെ ഇടുക്കിക്കാരന്‍ ഒരു അച്ചന്‍ പീഡിപ്പിക്കാന്‍ ശ്രമിച്ചത് പരാതിപ്പെട്ടതിനെ തുടര്‍ന്നായിരുന്നേ്രത സംഭവങ്ങള്‍. ഇറ്റലിയിലേക്കു സ്ഥലംമാറ്റപ്പെട്ട കന്യാസ്ത്രീ സഭയില്‍ നിന്നു പുറത്താക്കപ്പെടുകയും അതെത്തുടര്‍ന്ന് കോണ്‍വെന്റിനു മുന്നില്‍ കുത്തിയിരിപ്പു നടത്തിയപ്പോള്‍ കൂടുതല്‍ നാറാതിരിക്കാന്‍ സഭ 12 ലക്ഷം രൂപ നഷ്ടപരിഹാരം കൊടുത്ത് ഒതുക്കുകയുമായിരുന്നു എന്നാണ് മനസ്സിലാവുന്നത്. ഇടുക്കിക്കാരന്‍ അച്ചന്‍ ആരാണെന്നോ എവിടെയാണെന്നോ ആര്‍ക്കുമറിയില്ല. തിരുവസ്ത്രം നഷ്ടപ്പെട്ടതും വഴിയിലിരിക്കേണ്ടി വന്നതും ഒടുവില്‍ നഷ്ടപരിഹാരം വാങ്ങി വീട്ടില്‍പ്പോവേണ്ടി വന്നതും കന്യാസ്ത്രീ.

ഇതിനിടയിലാണ് ഓസ്‌ട്രേലിയയിലെ മെല്‍ബണില്‍ നിന്നും ഫാ. ജോസഫ് ഓലിക്കലിന്റെ മുകേഷ് സിങ്ങിസം. രാജ്യത്തെ ഞെട്ടിച്ച ജില്‍ മീഗര്‍ കേസിനെപ്പറ്റിയായിരുന്നു ഓലിക്കലച്ചന്‍ വിവരക്കേട് പറഞ്ഞത്. ഇന്ത്യക്കാരന് നിര്‍ഭയ കേസ് പോലെയാണ് ഓസ്‌ട്രേലിയക്കാരന് ജില്‍ മീഗര്‍ കേസ്. ജില്‍ മീഗറെ മാനഭംഗം ചെയ്തു കൊലപ്പെടുത്തിയ പ്രതിക്ക് ജീവപര്യന്തമേ കിട്ടിയിട്ടുള്ളൂ (14 വര്‍ഷമല്ല, ഒറിജിനല്‍ ജീവപര്യന്തം) എന്നിരിക്കെ ജില്‍ മീഗര്‍ കുറച്ചുകൂടി വിശ്വാസതീവ്രമായ ജീവിതം നയിച്ചിരുന്നെങ്കില്‍ അവള്‍ക്കീ ഗതി വരില്ലായിരുന്നു എന്നാണ് ഓലിക്കലച്ചന്‍ പറഞ്ഞത്.
അങ്ങനെയെങ്കില്‍, വിശ്വാസതീവ്രമായ ജീവിതം നയിച്ചിരുന്ന സിസ്റ്റര്‍ അഭയയ്ക്കും സണ്‍ഡേ സ്‌കൂള്‍ ക്യാംപില്‍ പങ്കെടുക്കാന്‍ പോയ ശ്രേയയ്ക്കും കൊക്കന്‍ ആദ്യകുര്‍ബാന വസ്ത്രം വാങ്ങിത്തരുമെന്നു വിശ്വസിച്ചു പീഡനങ്ങളെല്ലാം സഹിച്ച കുരുന്നിനുമൊക്കെ എന്തുകൊണ്ട് അങ്ങനെ സംഭവിച്ചു എന്നും ഓലിക്കന്‍ വിശദീകരിക്കേണ്ടി വരും.

അച്ചന്‍മാരും മനുഷ്യരാണ്. സമൂഹത്തിലെ തിന്മകളൊക്കെയും അവരിലുമുണ്ടാകും, എന്നു കരുതി വൈദികരെയാകെ കുറ്റപ്പെടുത്തുകയോ പഴിചാരുകയോ സഭയെ അധിക്ഷേപിക്കുകയോ ചെയ്യരുത് എന്നു വളരെ പക്വതയുള്ള ആളുകള്‍ ഉപദേശിക്കുന്നത് കേട്ടിട്ടുണ്ട്. ലോ പോയിന്റാണത്. പക്ഷെ, അവിടെയും പിഴവുകളാണ്. വധശിക്ഷ കാത്തു കഴിയുന്ന മുകേഷ് സിങ്ങിന്റെ അറിവോ ഐക്യുവോ അല്ല മേല്‍പ്പറഞ്ഞ വെള്ളക്കുപ്പായക്കാര്‍ക്ക് എന്നതാണ് ഇത് മറ്റു കുറ്റങ്ങളെപ്പോലെ അല്ലാതാക്കുന്നത്. മുകേഷ് സിങ്ങും ഇവരുമായി ഐക്യുവില്‍ വ്യത്യാസമൊന്നുമില്ലെന്നു തെളിയിച്ചു എന്നിരിക്കട്ടെ, മുകേഷ് സിങ് ഇപ്പോള്‍ തിഹാര്‍ ജയിലിലുണ്ട് എന്നത് ഒരു ആശ്വാസമാണ്. സിസ്റ്റര്‍ അഭയയുടെ കൊലയാളികളും ശ്രേയയെ വെള്ളത്തില്‍ മുക്കി കൊന്നവരും കൊക്കനും ഇപ്പോള്‍ എവിടെയാണ് ?

ഈ വൈദികന്‍മാര്‍ ചെയ്തിരിക്കുന്നതും ചെയ്തുകൊണ്ടിരിക്കുന്നതും ഏറ്റവും നീചമായ പാപങ്ങളാണ്. സഭാധികാരികള്‍ തെറ്റു ചെയ്തവരെ രാജ്യത്തെ നിയമത്തിനു മുന്നില്‍ ഹാജരാക്കി അവരെ മാതൃകാപരമായ ശിക്ഷയ്ക്ക് വിധേയരാക്കുമ്പോഴാണ് നീതി
നടപ്പാവുന്നത്. ഇരകളെ അവഹേളിക്കുകയും കുറ്റവാളികളെ സംരക്ഷിക്കുകയും ചെയ്തുകൊണ്ട് സുവിശേഷം കയ്യിലെടുക്കുന്നവര്‍ വഞ്ചിക്കുന്നത് ക്രിസ്തുവിനെയാണ്, ക്രിസ്തുവിന്റെ പീഡാസഹനത്തെയും മരണത്തെയുമാണ്. ഇത് ഒരു മുട്ടനാടിന്റെ ഇടയലേഖനമായി കണ്ട് വായിക്കണമെന്നും ഇതെപ്പറ്റി ചിന്തിക്കാന്‍ കുറച്ചു സമയം ചിലവഴിക്കണമെന്നും എല്ലാ വൈദികരോടും ആഹ്വാനം ചെയ്യുന്നു.

ഹാപ്പി ഈസ്റ്റര്‍ !

സുഗതകുമാരി ടീച്ചറെ പാഠം പഠിപ്പിക്കുമ്പോള്‍

സുഗതകുമാരി ടീച്ചറിനെതിരെ സോഷ്യല്‍ മീഡിയയില്‍ ഫെമിനിസ്റ്റുകളുടെയും സ്വാതന്ത്ര്യവാദികളുടെയും ധാര്‍മികരോഷം തിളച്ചുമറിയുകയാണ്. പെണ്‍കുട്ടികള്‍ക്ക് മൊബൈല്‍ ഫോണ്‍ വാങ്ങിക്കൊടുക്കരുതേ എന്നു ടീച്ചര്‍ അമ്മമാരോടു നടത്തിയ അപേക്ഷയ്ക്കുള്ള മറുപടിയായി ടീച്ചറെ പുരോഗമനം പഠിപ്പിക്കാനുള്ള ശ്രമത്തിലാണ് ന്യൂ ജനറേഷന്‍ തൈക്കിളവന്‍മാരും ഫ്രസ്‌ട്രേറ്റഡ് ഡെസ്പരേറ്റ് ഫെമിന്സ്റ്റുകളും. അവരോട് രണ്ടേ രണ്ടു കാര്യങ്ങളേ പറയാനുള്ളൂ. ഒന്ന്, അനുഭവങ്ങളുടെ വെളിച്ചത്തില്‍ സംസാരിക്കുന്ന ടീച്ചറെ അഹന്തയുടെ സ്റ്റാറ്റസ് കൊണ്ട് പാഠം പഠിപ്പിക്കാന്‍ ശ്രമിക്കരുത്. രണ്ട്, ടീച്ചര്‍ സംസാരിച്ചത് സ്‌കൂളില്‍ പഠിക്കുന്ന പെണ്‍കുട്ടികളുടെ അമ്മമാരോടാണ്. അതിന്റെ പൊരുള്‍ അവര്‍ക്കു മനസ്സിലാവുകയും ചെയ്യും.

സുഗതകുമാരി ടീച്ചര്‍ ഏതു കാലത്താണ് ജീവിക്കുന്നതെന്നാണ് പലരും ചോദിക്കുന്നത്. മൊബൈല്‍ ഫോണ്‍ ഇല്ലാതെ ഇന്നത്തെ കാലത്ത് എങ്ങനെ ജീവിക്കാനാവുമെന്നും ഏജ് ഓവറായതുകൊണ്ട് പുതുതലമുറയുടെ ആവശ്യങ്ങള്‍ ടീച്ചര്‍ക്ക് അനാവശ്യമാണെന്നു തോന്നുന്നതാണെന്നും ഒരു വിഭാഗം വാദിക്കുമ്പോള്‍ സ്ത്രീപക്ഷ രാഷ്ട്രീയം 90 ഡിഗ്രി ഉയര്‍ത്തിപ്പിടിച്ചിരിക്കുന്നവരുടെ രോഷം മറ്റൊരു വഴിക്കാണ്. മൊബൈല്‍ ഫോണ്‍ ഉള്ള പെണ്‍കുട്ടികള്‍ വഴി തെറ്റിപ്പോവുമെന്നും മിസ്ഡ് കോള്‍ വഴി പെണ്‍കുട്ടികള്‍ ചീത്തയായിപ്പോവുമെന്നും പറയാന്‍ മാത്രം സ്ത്രീവിരുദ്ധയാണോ ടീച്ചര്‍ എന്നാണ് അവര്‍ ചോദിക്കുന്നത്.

പ്രധാനമായും ടീച്ചറുടെ അഭ്യര്‍ഥന കേരളത്തിലെ പൊതുസമൂഹത്തോടുള്ളതായിരുന്നില്ല. തിരുവനന്തപുരം കോട്ടണ്‍ഹില്‍ സ്‌കൂളിലെ പൂര്‍വ വിദ്യാര്‍ഥി സംഗമത്തില്‍ പങ്കെടുക്കുമ്പോഴാണ് ടീച്ചര്‍ ഇക്കാര്യം പറഞ്ഞത്. അതായത് പെണ്‍പള്ളിക്കൂടത്തിലെ വിദ്യാര്‍ഥികളുടെ അമ്മമാരോടാണ് പെണ്‍കുട്ടികള്‍ക്ക് മൊബൈല്‍ വാങ്ങിക്കൊടുക്കരുതെന്നു ടീച്ചര്‍ പറഞ്ഞത്. ഇന്ത്യയിലും വിദേശത്തും സ്‌കൂളുകള്‍ കുട്ടികള്‍ മൊബൈല്‍ ഫോണ്‍ കൊണ്ടുവരുന്നത് പ്രോല്‍സാഹിപ്പിക്കുന്നതായി കേട്ടിട്ടില്ല എന്നു മാത്രമല്ല, പല സ്‌കൂളുകളും ഫൈനും ഇടാക്കാറുണ്ട്. പിന്നെ ഏതു സാഹചര്യത്തിലാണ് സൂഗതകുമാരി ടീച്ചര്‍ പറഞ്ഞത് വിവരക്കേടായി മാറുന്നത് എന്നു മനസ്സിലാവുന്നില്ല. ഇനി ടീച്ചറെ വിമര്‍ശിക്കുന്നവരില്‍ എത്ര പേര്‍ സ്‌കൂളില്‍ പഠിക്കുന്ന പെണ്‍മക്കള്‍ക്ക് മൊബൈല്‍ ഫോണ്‍ വാങ്ങി നല്‍കുകയും അത് സ്വതന്ത്രമായി യഥേഷ്ടം ഉപയോഗിക്കാന്‍ അനുമതി നല്‍കുകയും ചെയ്യും ?

ഫെമിനിസ്റ്റുകളുടെയും അവരുടെ ആരാധകരുടെയും പ്രശ്‌നം ഇതൊന്നുമല്ല. മൊബൈല്‍ ഫോണ്‍ സ്വന്തമായുള്ള സ്‌കൂള്‍ വിദ്യാര്‍ഥിനികള്‍ വഴിപിഴച്ചുപോകാന്‍ സാധ്യത ഏറെയാണ് എന്നു പറയാന്‍ ടീച്ചര്‍ക്കെങ്ങനെ ധൈര്യം വന്നു എന്നാണ് അവര്‍ ചോദിക്കുന്നത്. അങ്ങനെ പറയുന്നതിലൂടെ ടീച്ചര്‍ ഈ പെണ്‍കുട്ടികളുടെ ധാര്‍മികബോധത്തെ അവഹേളിക്കുകയും അവരുടെ സ്ത്രീസത്തയെ കരിവാരിതേക്കുകയും ചെയ്തു എന്നാണ് പ്രധാന ആരോപണം. നൂറുകണക്കിനു പെണ്‍കുട്ടികള്‍ വല്ലവരുടേയും കൂടെപ്പോയി അകാലത്തില്‍ ഗര്‍ഭമുണ്ടാക്കുകയും, അപ്രത്യക്ഷരാവുകയും, ആത്മഹത്യ ചെയ്യുകയും ചെയ്യുന്ന കേരളത്തില്‍ അതിന്റെയൊന്നും മൂലകാരണങ്ങള്‍ അറിയാതെ ദൈനംദിനം ഇത്തരം പ്രശ്‌നങ്ങളിലിടപെടുന്ന സുഗതകുമാരി ടീച്ചര്‍ നല്‍കിയ മുന്നറിയിപ്പിനെതിരെ പൊട്ടിത്തെറിക്കുന്ന ഫെമിനിസ്റ്റുകള്‍ക്കും ഭക്തന്‍മാര്‍ക്കും നല്‍കാന്‍ മുഖമടച്ചൊരാട്ട് മാത്രമേ ബാക്കിയുള്ളൂ.

ഫെയ്‌സ്ബുക്ക് അക്കൗണ്ടില്ലാതെ, ആണുങ്ങളെ ഡാ മയിരേ എന്നു വിളിക്കുന്നത് വിപ്ലവമാണെന്നറിയാതെ, വിഹ്വലതകളുള്ള മനസ്സുകളുമായി ആയിരക്കണക്കിനു പെണ്‍കുട്ടികള്‍ ഈ നാട്ടില്‍ ജീവിക്കുന്നുണ്ട്. കൗമാരപ്രായത്തില്‍ അവര്‍ക്കു വേണ്ടത് മൊബൈല്‍ ഫോണുകളല്ല, അമ്മയുടെ സ്‌നേഹവും കൈത്താങ്ങും അച്ഛന്റെ കരുത്തിന്റെ തണലുമാണ് എന്നറിയാവുന്ന കേരളത്തിലെ അപൂര്‍വം സാംസ്‌കാരികനേതാക്കളിലൊരാളാണ് സുഗതകുമാരി ടീച്ചര്‍. അവരുടെ അപേക്ഷ എല്ലാവരും ചെവിക്കൊള്ളണമെന്നില്ല, പക്ഷെ അവരെ തിരുത്താന്‍ മാത്രം ലോകപരിചയമുള്ളവരാണ് തങ്ങളെന്നു വിശ്വസിച്ചുകൊണ്ട് വിവരക്കേടുകള്‍ ആധികാരികമായി അവതരിപ്പിക്കുന്നത് മ്ലേച്ഛമാണ്.

മൊബൈല്‍ ഫോണ്‍ വാങ്ങിക്കൊടുത്താല്‍ പെണ്‍കുട്ടികള്‍ വഴി തെറ്റിപ്പോവും എന്ന പ്രസ്താവനയെ രാജ്യാന്തരനിലവാരത്തില്‍ വച്ചു വിലയിരുത്തതുകൊണ്ടാണ് പലര്‍ക്കും തെറ്റു പറ്റിപ്പോവുന്നത്. കേരളത്തില്‍ സംഭവിക്കുന്നത് എന്താണെന്നു പോലും അറിയാത്തവര്‍ അമേരിക്കയിലെയും ജപ്പാനിലെയും ദുബായ്‌ലിയെും പെണ്‍കുട്ടികളെപ്പോലെയാണ് കേരളത്തിലെ പെണ്‍കുട്ടികള്‍ എന്നു വിചാരിക്കുന്നത് വിഡ്ഡിത്തമാണ്. മൊബൈല്‍ ഫോണ്‍ വാങ്ങിക്കൊടുത്താലും എന്റെ മകള്‍ വഴി തെറ്റില്ല എന്ന് ഒരച്ഛന് ഉറച്ചു പറയാന്‍ കഴിയുമെങ്കില്‍ അത് നല്ലതാണ്. എന്നാല്‍, മൊബൈല്‍ ഫോണ്‍ വാങ്ങിക്കൊടുത്താല്‍ ഒരു പെണ്‍കുട്ടിയും വഴി തെറ്റില്ല എന്നു പറയാന്‍ അവര്‍ക്കാവില്ല. കേരളത്തില്‍ വഴി തെറ്റിപ്പോവുന്ന അഥവാ ചൂഷണങ്ങള്‍ക്കിരയായി ജീവിതം നശിച്ചുപോവുന്ന പെണ്‍കുട്ടികള്‍ 95 ശതമാനവും കുരുങ്ങുന്ന ചൂണ്ട മൊബൈല്‍ ഫോണ്‍ ആണെന്നത് കേരളാ പൊലീസിന്റെ കേസ് ഡയറികളില്‍ നിന്നു തന്നെ വ്യക്തമാണ്. ടീച്ചര്‍ പറയുന്നത് യാഥാര്‍ഥ്യങ്ങളുടെ അടിസ്ഥാനത്തിലാണ്. തിയറികളിലൂടെ വിപ്ലവം സൃഷ്ടിക്കാമെന്നു കരുതുന്നവര്‍ക്ക് അത് മനസ്സിലാകണം എന്നു നിര്‍ബന്ധമില്ല.

സ്ത്രീസ്വാതന്ത്ര്യം വലിയൊരു സംഭവം തന്നെയാണ്. എന്നാല്‍, അതിനെക്കാള്‍ പ്രധാനമാണ് സ്ത്രീസുരക്ഷ. ഫെമിനിസ്റ്റുകളെന്നു സ്വയം വിളിച്ച് വല്ലവരുടെയും പെണ്‍മക്കളെ പുകവലിക്കാനും തെറിവിളിക്കാനും പഠിപ്പിക്കുന്നത് സ്ത്രീപക്ഷ രാഷ്ട്രീയം ഉയര്‍പ്പിടിക്കലല്ല. മിസ്ഡ് കോളുകള്‍ വഴി പെണ്‍കുട്ടികളെ വളച്ചെടുത്തുകൊണ്ടുപോയി ദുരുപയോഗിക്കുന്ന മാഫിയകള്‍ കേരളത്തില്‍ സജീവമായി നില്‍ക്കുമ്പോള്‍ പെണ്‍കുട്ടികളുടെ മാതാപിതാക്കളെ സംബന്ധിച്ച് അവര്‍ പ്ലസ് ടു പാസ്സാകും വരെയെങ്കിലും മൊബൈല്‍ ഫോണ്‍ വാങ്ങി നല്‍കാതിരിക്കുക എന്നത് മാതൃകാപരമായ തീരുമാനമാണ്. മറ്റുള്ളവരുടെ പെണ്‍മക്കള്‍ അജ്ഞാതരായ ആളുകളോടൊപ്പം അപ്രത്യക്ഷരാകുന്ന വാര്‍ത്തകള്‍ വായിച്ച് നെടുവീര്‍പ്പിടാന്‍ നല്ല രസമാണ്. എട്ടാം ക്ലാസ്സിലും ഒന്‍പതാം ക്ലാസ്സിലും പഠിക്കുന്ന പെണ്‍കുട്ടികള്‍ ആത്മഹത്യ ചെയ്യുന്നത് എല്ലാവരും ആത്മഹത്യ അഭിനയിച്ചു കാണിക്കുന്നതുകൊണ്ടല്ല. പലരുടെയും മൊബൈല്‍ ഫോണ്‍ ഹിസ്റ്ററികള്‍ക്ക് ഞെട്ടിക്കുന്ന കഥകള്‍ പറയാനുണ്ട്. യാഥാര്‍ഥ്യം അംഗീകരിച്ചില്ലെങ്കിലും അതിനെ നിസ്സാരവല്‍ക്കരിക്കാന്‍ നോക്കരുത്.

കുറിപ്പ്: സ്വന്തമായി മൊബൈല്‍ ഫോണ്‍ ഉള്ള എല്ലാ കുട്ടികളും ഫോണില്‍ നിന്നു ടീച്ചറെ വിളിച്ച് ഡൗട്ട്‌സ് ക്ലിയര്‍ ചെയ്യുകയും സഹപഠികളെ വിളിച്ച് നോട്ടു ചോദിക്കുകയും സംശയമുള്ള പാഠഭാഗങ്ങള്‍ ഗൂഗിളില്‍ സേര്‍ച്ച് ചെയ്യുകയും മാത്രമാണ് ചെയ്യാറുള്ളത് എന്നു വിശ്വസിക്കുന്നവരേ- നിങ്ങളുടെ നിഷ്‌കളങ്കതയ്ക്ക് ഒരു പൂച്ചെണ്ട് !

പറവൂര്‍ പെണ്‍കുട്ടിക്ക് ഒരു മറുപടി

പ്രിയപ്പെട്ട പറവൂര്‍ പെണ്‍കുട്ടി,

ഒബ്‌സര്‍വേഷന്‍ ഹോമിലെ തടവറയില്‍ നിന്നും തന്നെ രക്ഷിക്കണമെന്നാവശ്യപ്പെട്ടുകൊണ്ട് കുട്ടി മുഖ്യമന്ത്രിക്ക്‌ എഴുതിയ കത്ത്‌ മാധ്യമങ്ങളില്‍ നിന്നും വായിച്ചു. ഈ മാസം ആദ്യം അയച്ച കത്തിനെപ്പറ്റി ഇന്നു മാധ്യമങ്ങളില്‍ വന്ന നിലയ്ക്ക് ഇപ്പം ശരിയാക്കിത്തരാം എന്നുറപ്പു തരുന്ന മറുപടി രണ്ടു ദിവസത്തിനകം കുട്ടിക്ക് ലഭിക്കും. ‘നിയമം അതിന്റെ വഴിക്കു പോകും’ എന്ന പ്രപഞ്ചസത്യവും അതോടൊപ്പം കാണും, ഭയപ്പെടുത്. അതിനു പുറമേ കുട്ടിയെ നേരില്‍ കണ്ട് ആശ്വസിപ്പിക്കാനും ധൈര്യം പകരാനും നേതാക്കന്‍മാരുടെ ഒരു സംഘം നേരിട്ടു വരാനും സാധ്യതയുണ്ട്. മന്ത്രിമാരോ മറ്റോ വരികയാണെങ്കില്‍ പേഴ്‌സനല്‍ സ്റ്റാഫിനെ പുറത്തു നിര്‍ത്തിയിട്ടേ അകത്തു കടക്കാവൂ എന്നു പ്രത്യേകം പറയണം. ഇവര്‍ക്കു പുറമേ പ്രതിപക്ഷ നേതാവ് വി.എസ്.അച്യുതാനന്ദനും കുട്ടിക്കു വേണ്ടി മുണ്ടുമടക്കി ഉടുത്ത് രംഗത്തിറങ്ങാന്‍ സാധ്യതയുണ്ട്. സ്ത്രീപീഡനക്കേസിലെ പ്രതികളെ കയ്യാമം വയ്ക്കുന്നതില്‍ പുള്ളി സ്‌പെഷലിസ്റ്റാണ്. പോരെങ്കില്‍, പാര്‍ട്ടി വിലക്കുള്ളതുകൊണ്ട് ഇപ്പോള്‍ വേറെ പരിപാടികളുമില്ല.

കുട്ടി കത്തില്‍ പറയുന്ന കാര്യങ്ങളൊക്കെ വേദനാജനകവും അങ്ങേയറ്റം ഖേദകരവുമാണ്. ക്രൂരമായി പീഡിപ്പിക്കപ്പെട്ട കുട്ടി ഒബ്‌സര്‍വേഷന്‍ ഹോമിലെ തടവറയില്‍ കഴിയുകയും കുട്ടിയെ പീഡിപ്പിച്ചവര്‍ ജാമ്യമെടുത്ത് കൂള്‍ കൂളായി പുറത്ത് അടിച്ചുപൊളിക്കുകയും ചെയ്തതിനെപ്പറ്റി കുട്ടി പറഞ്ഞല്ലോ. ഇവിടെ നാട്ടുനടപ്പ് അങ്ങനെയാണ്. നമ്മുടെ വിദ്യാഭ്യാസ-സാംസ്‌കാരിക-സദാചാര മൂല്യങ്ങള്‍ അനുസരിച്ച് കുറ്റം ചെയ്തവരുടെ മനുഷ്യാവകാശങ്ങളും സ്വാതന്ത്ര്യവുമാണ് കൂടുതല്‍ വിലമതിക്കപ്പെടുന്നത്. കുട്ടി പീഡിപ്പിക്കപ്പെട്ടതിന്റെ കുറ്റം കുട്ടിയുടേതു മാത്രമണെന്നു തെളിയിക്കാനുള്ള കഠിനമായ പരിശ്രമത്തിലായിരിക്കും പ്രതിഭാഗം എന്നതിനാല്‍ ആ മഹാപാപികളുടെ കയ്യില്‍ നിന്നു നോട്ടുകെട്ടുകള്‍ എണ്ണി വാങ്ങി കോടതിയില്‍ കുട്ടിയെ വേട്ടയാടുന്ന ചോദ്യങ്ങള്‍ ചോദിക്കുന്ന വക്കീലന്‍മാരെ നന്നാക്കാം എന്ന പ്രതീക്ഷ വേണ്ട.

കുട്ടിക്കു വേണ്ടി ഹാജരാവേണ്ട സ്‌പെഷല്‍ പ്രോസിക്യൂട്ടര്‍ക്കു ഇതുവരെ വാദിച്ച കേസുകളില്‍ സര്‍ക്കാര്‍ പണം നല്‍കാത്തിനാല്‍ അദ്ദേഹം അപേക്ഷ നല്‍കി കേസ് നീട്ടിവയ്പിച്ചിരിക്കുകയാണെന്നു കുട്ടിയുടെ കത്തില്‍ പറയുന്നുണ്ടല്ലോ. കുട്ടീ, സര്‍ക്കാര്‍ വലിയ സാമ്പത്തികപ്രതിസന്ധിയിലൂടെയാണ് കടന്നുപോകുന്നത്. ഖജനാവില്‍ ഒന്നുമില്ല എന്നു മാണിസാര്‍ പറഞ്ഞപ്പോള്‍ കരഞ്ഞില്ല എന്നേയുള്ളൂ. മന്ത്രിമന്ദിരങ്ങള്‍ മോടിപിടിപ്പിക്കാനും കാറുകള്‍ മാറി മാറി വാങ്ങാനും തന്നെ പണം തികയാതിരിക്കുമ്പോള്‍ സ്‌പെഷല്‍ പ്രോസിക്യൂട്ടര്‍ക്ക് കൊടുക്കാന്‍ പണം എവിടെ നിന്നു കണ്ടെത്തും എന്നത് വലിയൊരു ചോദ്യമാണ്. പോരെങ്കില്‍ അടുത്ത കാലത്ത് ക്രൂരമായി പീഡിപ്പിക്കപ്പെട്ട സരിത എസ്.നായര്‍ എന്നൊരു പാവപ്പെട്ട പെണ്‍കുട്ടിയുടെ കേസു നടത്തുന്നതിനു വേണ്ടി സര്‍ക്കാര്‍ ഒരുപാട് പണം ചിലവഴിച്ചു കഴിഞ്ഞു.

കേസുകള്‍ വേഗം തീര്‍ന്നാല്‍ നന്നായി പഠിച്ച് ഉപദ്രവിച്ചവരുടെ മുന്നില്‍ നന്നായി ജീവിച്ചു കാണിക്കണം എന്ന കുട്ടിയുടെ ആഗ്രഹം വളരെ ഉന്നതമാണെന്നു പറയാതെ വയ്യ. വിചാരണ രണ്ടു കൊല്ലം കൊണ്ട് അവസാനിപ്പിച്ച് കേസ് തീര്‍ക്കണം എന്നു ഹൈക്കോടതി തന്നെ ഉത്തരവിട്ടിട്ടുണ്ടെങ്കിലും രണ്ടു കൊല്ലം കൊണ്ട് 42 കേസുകളില്‍ ആറെണ്ണത്തില്‍ മാത്രമാണ് വിചാരണ നടന്നത് എന്നു കുട്ടി തന്നെ സൂചിപ്പിച്ചിട്ടുണ്ടല്ലോ. ഈ നിലയ്ക്കാണ് കേസ് മുന്നോട്ടു പോവുന്നതെങ്കില്‍ 42 കേസിലും വിചാരണ തീരണമെങ്കില്‍ ഇനിയും 20 വര്‍ഷം കൂടി വേണ്ടി വരും. ഇത് വളരെ ആശങ്കാജനകമാണ്. ഒബ്‌സര്‍വേഷന്‍ ഹോമിലെ ജീവിതം ടിപി വധക്കേസിലെ പ്രതികളുടെ ജയില്‍ജീവിതത്തെക്കാള്‍ (കേരളത്തിന്റെ ചരിത്രത്തിലെ ഏറ്റവും കഠിനമായ ജയില്‍ജീവിതം അനുഭവിക്കുന്നത് ആ പാവം ചെറുപ്പക്കാരാണ്) കഠിനമാണെന്നു കുട്ടിയുടെ വാക്കുകളില്‍ നിന്നു മനസ്സിലാകുന്നു.

ഇങ്ങനെ കത്തെഴുതിയതുകൊണ്ട് കാര്യമായ എന്തെങ്കിലും പ്രയോജനം ഉണ്ടാകും എന്നെനിക്കു പ്രതീക്ഷയില്ല. അതുകൊണ്ട്, കേസില്‍ വിചാരണ വേഗം നടക്കണം എന്നുണ്ടെങ്കില്‍ കുട്ടി മുഖ്യമന്ത്രിക്കും ആഭ്യന്തരമന്ത്രിക്കും മറ്റൊരു കത്തു കൂടി അയക്കണം. കുട്ടിയെ ഉപദ്രവിച്ചവരോടൊപ്പം സിപിഎം ഉന്നതര്‍ ഉണ്ടെന്നു ചുമ്മാ കണ്ണും പൂട്ടി എഴുതിയാല്‍ മതി. 24 മണിക്കൂറിനുള്ളില്‍ സര്‍ക്കാര്‍ സിബിഐ അന്വേഷണം പ്രഖ്യാപിക്കുകയും കേസ് അത്യന്തം അസാധാരണമാണെന്നു പ്രഖ്യാപിച്ച് പ്രത്യേക കോടതിയിലേക്കു മാറ്റി ഒന്നോ രണ്ടോ മാസം കൊണ്ട് വിചാരണ പൂര്‍ത്തിയാക്കുകയും ചെയ്യും. ഒരിക്കലും ഒരു കോണ്‍ഗ്രസ് നേതാവ് ഉപദ്രവിച്ചു എന്ന് ആരോടും കളിയായി പോലും പറയരുത്. സൂര്യനെല്ലി പെണ്‍കുട്ടിക്ക് സംഭവിച്ചത് എന്താണെന്നു മറക്കരുത്.

കുട്ടിയുടെ എല്ലാ വേദനകള്‍ക്കും ഈശ്വരന്‍ പരിഹാരമുണ്ടാക്കട്ടെ എന്നു പ്രാര്‍ഥിക്കുന്നു. കുട്ടിയോട് അവിടെ മനുഷ്യത്വപൂര്‍വം പെരുമാറുന്ന, ഇങ്ങനൊരു കത്തെഴുതി അത് മുഖ്യമന്ത്രിയുടെ ഓഫിസിലെത്തിക്കാന്‍ സഹായിച്ച എല്ലാ പൊലീസ് ഉദ്യോഗസ്ഥരെയും ദൈവം അനുഗ്രഹിക്കട്ടെ.

എന്ന് ഒരു സഹോദരന്‍.

ഇടിക്കുന്ന അമൃത കേസെന്നു കേട്ടാല്‍ പേടിക്കരുത്

തന്നെ കമന്റടിച്ച പൂവാലന്‍മാരെ തെരുവിലിട്ടു തല്ലി സാസ്‌കാരിക കേരളത്തിന്റെ ഉണ്ണിയാര്‍ച്ചയായി മാറിയ അമൃത എന്ന യുവതി കേവലം കേരള പൊലീസ് എന്നു കേട്ടാല്‍ ബോധം കെട്ടു വീഴുമെന്ന് എനിക്കു തോന്നുന്നില്ല. അമൃതയ്‌ക്കെതിരേ കേസെടുക്കാനുള്ള കോടതി ഉത്തരവിനോടുള്ള ആളുകളുടെ പ്രതികരണങ്ങള്‍ കാണുമ്പോള്‍ അമൃത ഇടിക്കാന്‍ മാത്രം അറിയാവുന്ന ഒരു കൊച്ചാണെന്നു തോന്നും. കഴിഞ്ഞ ദിവസം മൂല്യബോധന അധ്യാപകന്റെ പ്രബോധനങ്ങള്‍ക്കെതിരേ കൂവി ഇറങ്ങിപ്പോയ ആര്യയും അമൃതയുമൊക്കെ അങ്ങനെ ചെയ്തതിന്റെ കാരണങ്ങള്‍ ഒന്നു തന്നെ ആണെങ്കില്‍ ഈ കേസ് അമൃതയ്ക്ക് ആവേശം പകരുകയേ ഉള്ളൂ. കാരണം, ഇടിക്കാനുള്ള അവകാശത്തിനു വേണ്ടിയല്ല, പൊതുസമൂഹത്തില്‍ അപമാനിക്കപ്പെട്ടതിന്റെ പേരിലാണ് ഇവരൊക്കെ പ്രതികരിച്ചത്. പിന്നെ കേസെടുത്തു എന്നതിന്റെ അര്‍ഥം അമൃതയെ തൂക്കിക്കൊല്ലാന്‍ പോകുന്നു എന്നല്ല. കോടതിയില്‍ തനിക്ക് ഇടിക്കാനുണ്ടായ സാഹചര്യം വ്യക്തമാക്കാനും മറ്റു സ്ത്രീകള്‍ക്ക് മാതൃകയാവാനും ഈ കേസ് അമൃതയെ സഹായിക്കട്ടെ എന്നേ പറയാനുള്ളൂ.

സൂര്യനെല്ലി കേസിലെ ഇരയെ ബാലവേശ്യ എന്നു വിളിക്കാന്‍ തക്കവിധം പക്വതയുള്ള മാന്യന്‍മാരുടെ കേരളത്തില്‍ മാനം രക്ഷിക്കാന്‍ വേണ്ടി കൈയുയര്‍ത്തിയ സ്ത്രീയെയും തുറുങ്കിലടയ്ക്കണമെന്നു ചില ശുംഭന്‍മാര്‍ക്കു തോന്നിയാല്‍ അതില്‍ അതിശയിക്കാനില്ല. കെ.സുധാകരന്റെ സെപ്റ്റിക് ടാങ്ക് പ്രഭാഷണങ്ങള്‍ കേട്ടിട്ട് ഒരു കോടതിക്കും ഒരു മന്ത്രിക്കും അയാള്‍ പറയുന്നത് സ്ത്രീവിരുദ്ധവും മനുഷ്യത്വരഹിതവുമായ കാര്യങ്ങളാണെന്ന് അഭിപ്രായമുണ്ടായില്ല എന്നിരിക്കെ അമൃതക്കെതിരേ കേസെടുക്കുക കൂടി ചെയ്യുന്നത് നമ്മുടെ യഥാര്‍ത്ഥ നിലപാട് എന്താണ് എന്നുള്ളതിന് ഒരു സ്ഥിരീകരണമാണ്. പെണ്ണുപിടിയന്‍മാരും കാമവെറിയന്‍മാരും തിങ്ങി നിറഞ്ഞിരിക്കുന്ന കേരളത്തിലെ മാന്യവേഷം കെട്ടിയ ചെറ്റകളെ നോക്കി പ്രബുദ്ധകേരളമെന്നും സാംസ്‌കാരിക കേരളമെന്നു മൊക്കെ വര്‍ണിക്കുന്നത് നികൃഷ്ടമാണ്. നമുക്കങ്ങനെ അമ്മയെന്നോ പെങ്ങളെന്നോ ഒന്നുമില്ല. തങ്ങള്‍ കാമദേവന്‍മാരാണെന്നു വിശ്വസിക്കുന്ന ശീഘ്രസ്ഖലനക്കാരായ ഞരമ്പുരോഗികള്‍ക്ക് എല്ലാ സ്ത്രീകളും വേശ്യകളാണ്. ഇതിനെയാണ് കേരള മോഡല്‍ എന്നു വിശേഷിപ്പിക്കേണ്ടത്.

ഔഗ്യോദിക കൃത്യനിര്‍വഹണം തടസ്സപ്പെടുത്തിയതിനാണ് അമൃതയ്‌ക്കെതിരേ കേസ് എടുത്തത് എന്നു വാര്‍ത്തകളില്‍ കാണുന്നു. ഖദറിട്ട നേതാക്കന്‍മാര്‍ കൂട്ടത്തോടെ പി.ജെ.കുര്യനെ മഹത്വവല്‍ക്കരിക്കാനും സൂര്യനെല്ലി പീഡനക്കേസിലെ ഇരയായ പെണ്‍കുട്ടിയെ വേശ്യയായി ചിത്രീകരിക്കാനും ശ്രമിക്കുന്നതിന്റെ ഒരു തുടര്‍ച്ചയായേ ഇതിനെയും കാണാനാവൂ. കെ.സുധാകരനെപ്പോലെ ഒരു പൊതുപ്രവര്‍ത്തകന്‍ നെഞ്ചുവിരിച്ചു നടക്കുമ്പോള്‍ അത് അയാളുടെ വ്യക്തിപരമായ നിലപാടാണെന്നും പി.ജെ.കുര്യനു പിന്നില്‍ ഞങ്ങള്‍ ഒറ്റക്കെട്ടായി അണിനിരക്കുമെന്നൊക്കെ പറയുന്ന നേതാക്കന്‍മാര്‍ ഭരിക്കുമ്പോള്‍ സ്ത്രീകളെ ഉപദ്രവിക്കുന്നത് ഔദ്യോഗികകൃത്യനിര്‍വഹണമായി വിശേഷിപ്പിക്കുന്നത് യാദൃച്ഛികമാവാം, പക്ഷെ സ്വാഭാവികമായേ തോന്നൂ.

മൂല്യബോധക പരിശീലകന്‍ ഡോ.രജിത് കുമാറിന്റെ വങ്കത്തരങ്ങളും അമൃതയുടെ ഇടിയും സൂര്യനെല്ലി പെണ്‍കുട്ടി ബലാല്‍സംഗത്തിനിരയായിക്കൊണ്ടിരിക്കെ ഇറങ്ങിയോടാത്തതിന്റെ കാരണങ്ങളും വിശകലനം ചെയ്യുന്ന വലിയൊരു സമൂഹം ഇവിടെയുണ്ട് എന്നത് നിരാശാജനകമാണ്. സ്‌റ്റെപ്പ് ചാടിയിറങ്ങിയാല്‍ ഗര്‍ഭപാത്രം തിരിഞ്ഞുപോകുമെന്നു പറയുന്നവന്റെ സദുദ്ദേശം ഇഴകീറി പരിശോധിക്കുന്ന കുറിപ്പുകള്‍ കഴിഞ്ഞ ദിവസം കണ്ടിരുന്നു. അതുപോലെ തന്നെ അമൃതയുടെ കേസിലും ഇടിയുടെ ആഘാതമെത്ര ? സര്‍ക്കാര്‍ വണ്ടിയില്‍ വന്നവര്‍ കമന്റടിക്കുമോ ? അമൃത ബ്ലാക്‌ബെല്‍റ്റ് ഉള്ളതിന്റെ അഹങ്കാരത്തില്‍ ഇടിച്ചതല്ലേ ? എന്നിങ്ങനെയുള്ള ചോദ്യങ്ങളും വിശകലനങ്ങളും വളരെ സജീവമാണ്. ഇവിടെ അമൃതയുടെ അഹങ്കാരമല്ല, പുരുഷകേന്ദ്രീകൃതമായ സങ്കുചിതത്വമാണ് ആ സ്റ്റണ്ട് സീനിനെ ഷോട് ബൈ ഷോട് എടുത്തു പരിശോധിക്കുന്നത്. എനിക്ക് സത്യത്തില്‍ ആ ഇടികൊണ്ട സാധുക്കളോട് സഹതാപമേയുള്ളൂ. പെണ്ണിന്റെ കയ്യില്‍ നിന്ന് ഇടിയും കൊണ്ടിട്ട് വന്നു നിന്നു മോങ്ങുന്നതിന്റെ ദൈന്യത ഹീനമായ ഒന്നാണ്.

അമൃത ഇടിച്ചവര്‍ക്ക് നീതി വേണ്ടേ എന്നാണിപ്പോള്‍ പലരും ചോദിക്കുന്നത്. കേരളത്തിലെ ഒരു പൊതുനിലവാരം അനുസരിച്ച് ഇത്തരം കേസുകളിലോ സമാനമായ കേസുകളിലോ എത്ര സ്ത്രീകള്‍ക്ക് നീതി കിട്ടിയിട്ടുണ്ട് എന്നു പരിശോധിക്കുക. നമ്മുടെ മുന്നില്‍ നീതി നേടിയവര്‍ കുറവാണ്. അല്ലെങ്കില്‍ ആരുമില്ല എന്നു തന്നെ പറയാം. കണ്ണു തുറന്നു നോക്കിയാല്‍ ഇരകള്‍ മരിച്ചതും ജീവനോടെയുള്ളതുമായി വലിയൊരു സമൂഹമാണ്. ആ സ്ഥിതിക്ക് അമൃതയുടെ ബ്ലാക്ക് ബെല്‍റ്റ് ഇടി കൊണ്ടവരോട് കണക്കായിപ്പോയി എന്നേ പറയാനുള്ളൂ. അമൃത നിയമം കയ്യിലെടുത്തു എന്നത് നിയമപരമായി തെറ്റായിരിക്കാം, പക്ഷെ അമൃതയ്ക്ക് അന്തസ്സോടെ നടക്കാന്‍ കഴിയുന്നത് രാത്രി പത്തരയ്ക്ക് നിയമം കയ്യിലെടുത്തതുകൊണ്ടാണ് എന്നത് നിഷേധിക്കാനുമാവില്ല. ഇനിയും ഇത്തരം അവസരങ്ങളില്‍ കുറച്ചുകൂടി സ്‌ട്രോങ്ങായി ഇടിക്കണം എന്നാണ് എനിക്ക് അമൃതയോട് പറയാനുള്ളത്. ഇതിന്റെ പേരില്‍ ഉണ്ടാവുന്ന കേസുകള്‍ ഓരോ അവാര്‍ഡ് ആയി കരുതാം.

ട്രെയിനില്‍ വച്ച് പീഡനത്തിനിരയായി കൊല്ലപ്പെട്ട സൗമ്യ കരാട്ടേ പഠിച്ചിരുന്നെങ്കില്‍ ഗോവിന്ദച്ചാമിയെ ട്രെയിനില്‍ നിന്നു തൊഴിച്ചു തെറിപ്പിച്ചേനെ. അങ്ങനെ ചെയ്തിരുന്നെങ്കില്‍ നാടോടിയായ വികലാംഗനെ അഹങ്കാരം കൊണ്ട് ആക്രമിച്ചതിന് സൗമ്യ ഇപ്പോള്‍ അകത്തു കിടന്നേനെ. സ്ത്രീകള്‍ കരാട്ടേ എന്നല്ല ഒരു പ്രതിരോധമാര്‍ഗങ്ങളും പഠിക്കരുത്. ഞങ്ങള്‍ ഉപദ്രവിക്കുമ്പോള്‍ അരുതേ അരുതേ എന്ന ഭാവത്തോടെ കരയുക മാത്രമേ ചെയ്യാവൂ.

മനുഷ്യമൃഗങ്ങളുടെ വേട്ടമൃഗം

പിന്നെയും സന്തോഷ് പണ്ഡിറ്റ് ! ആ മനുഷ്യനെപ്പറ്റി എഴുതുന്നതിന് ആരും വിലക്കേര്‍പ്പെടുത്തിയിട്ടില്ലാത്തിനാല്‍ സന്തോഷ് പണ്ഡിറ്റ് എന്ന വ്യക്തിയെപ്പറ്റി, കലാകാരനെപ്പറ്റി, മലയാളത്തിലെ ഏറ്റവും ചിലവു കുറഞ്ഞ സിനിമയെപ്പറ്റി ചില അടിസ്ഥാനവിവരങ്ങള്‍ പങ്കുവയ്ക്കുന്നു. പണ്ഡിറ്റിന്റെ ചോരകുടിച്ച് വിശപ്പടക്കാനിറങ്ങിയിരിക്കുന്ന മനുഷ്യമൃഗങ്ങള്‍ക്കും വായിക്കാം. പണ്ഡിറ്റിനെപ്പറ്റി അടിക്കടി പോസ്റ്റുകളിടുന്നതില്‍ പ്രതിഷേധമോ ധാര്‍മികരോഷമോ ഉള്ളവര്‍ക്ക് വായന ഇവിടെ വച്ചവസനിപ്പിക്കാം. മുഴുവന്‍ വായിച്ചിട്ട് സഹിക്കുന്നില്ല, ക്ഷമിക്കാന്‍ കഴിയില്ല തുടങ്ങിയ കമന്റുകള്‍ എഴുതി പെങ്കൊച്ചിന്റെ അടുത്തേക്ക് വിട്ടേക്കരുത്. കടുത്ത പണ്ഡിറ്റ് ഫാനായ അവള്‍ അതെല്ലാം വെട്ടി ദൂരെക്കളയും. അവള്‍ക്ക് മൂക്കിന്റെ തുമ്പത്താണ് ദേഷ്യം.

സന്തോഷ് പണ്ഡിറ്റ്. കോഴിക്കോട് ജില്ലയിലെ പെരുവണ്ണാമൂഴിയില്‍ ജനിച്ചു (വയസ്സ് ചോദിക്കരുത്). അച്ഛന്‍ ഇറിഗേഷന്‍ വകുപ്പിന്‍ കുറ്റിയാടി പ്രോജക്ടില്‍ അസിസ്റ്റന്റ് എന്‍ജിനീയറായിരുന്ന അപ്പുണ്ണി പണ്ഡിറ്റ്. അമ്മ സരോജിനി അമ്മ (ഇരുവരും മരിച്ചുപോയി). മൂത്ത സഹോദരിയുണ്ട് (വിവാഹിതയാണ്). വിദ്യാഭ്യാസ കാലത്ത് തന്നെ അച്ഛനോടൊപ്പം ഇന്ത്യ മുഴുവന്‍ സഞ്ചരിച്ചിട്ടുള്ള സന്തോഷ് പണ്ഡിറ്റ് വിവിധ ഭാഷകളും പഠിച്ചു. സ്‌കൂളില്‍ മലയാളം മീഡിയത്തിലാണ് പഠിച്ചത്. കോഴിക്കോട് മീഞ്ചന്ത ആര്‍ട്‌സ് ആന്‍ഡ് സയന്‍സ് കോളജില്‍ നിന്ന് ഡിഗ്രി എടുത്ത സന്തോഷ് പണ്ഡിറ്റ് തന്റെ ക്രെഡിറ്റിലുള്ള എന്‍ജിനീയറിങ് ഉള്‍പ്പെടെയുള്ള വിവിധ ഡിപ്ലോമകള്‍ കാലിക്കറ്റ് സര്‍വകലാശാലയില്‍ നിന്നെടുത്തിട്ടുള്ളതാണ്.

കോഴിക്കോട് ടൗണിലാണ് സന്തോഷ് പണ്ഡിറ്റിന്റെ വീട്. ആറു വര്‍ഷം മുമ്പ് വിവാഹിതനായ സന്തോഷ് പണ്ഡിറ്റ് ഇപ്പോള്‍ കോഴിക്കോട്ടെ വീട്ടില്‍ ഒറ്റയ്ക്കാണ് താമസം. ഗാന്ധിയനായ സന്തോഷ് തന്നെയാണ് കക്കൂസ് കഴുകുന്നതുള്‍പ്പെടെയുള്ള വീട്ടുജോലികള്‍ എല്ലാം ചെയ്യുന്നത്. വിവാഹമോചനം നേടിയ ഭാര്യയോടൊപ്പമാണ് മകന്‍. എന്നാല്‍ കൃഷ്ണനും രാധയും എന്ന സിനിമയിലെ ‘അംഗനവാടിയിലെ ടീച്ചറെ’ എന്ന ഗാനം ആലപിച്ചിരിക്കുന്നത് സന്തോഷിന്റെ മകനാണ്. ആ ഗാനരംഗത്തില്‍ സന്തോഷിനോടൊപ്പം മകന്‍ നൃത്തം ചെയ്യുന്നുമുണ്ട്. സന്തോഷ് ഇപ്പോള്‍ മറ്റൊരു വിവാഹത്തെക്കുറിച്ചുള്ള ആലോചനയിലാണ്.

ഇറിഗേഷന്‍ വകുപ്പില്‍ ഓവര്‍സിയറായ സന്തോഷ് പണ്ഡിറ്റ് ഇപ്പോള്‍ അഞ്ചു വര്‍ഷത്തേക്ക് ലീവെടുത്തിരിക്കുകയാണ്. സിനിമയില്‍ രാശി തെളിഞ്ഞാല്‍ വിആര്‍എസ് എടുക്കാനും ആലോചനയുണ്ട്. ക്രിക്കറ്റാണ് സന്തോഷിന്റെ ഇഷ്ടകായികവിനോദം. സച്ചിന്‍ തെന്‍ഡുല്‍ക്കറാണ് പ്രിയതാരം. ഇഷ്ടനടന്‍: മോഹന്‍ലാല്‍, നടി: കരീന കപൂര്‍. പ്രിയദര്‍ശന്റെ ‘ചിത്രം’ ആണ് ഇഷ്ട സിനിമ.

വീടും പറമ്പും വിറ്റ പണം കൊണ്ടാണ് സന്തോഷ് പണ്ഡിറ്റ് സിനിമയെടുക്കാനിറങ്ങിത്തിരിച്ചത്. കോഴിക്കോട്ട് ബ്രെയിന്‍സ് എഡിറ്റിങ് സ്റ്റുഡിയോ നടത്തുന്ന ജയപ്രകാശിനെ കണ്ട് ചെലവു കുറച്ച് സിനിമയെടുക്കുന്നതിനെക്കുറിച്ച് സംസാരിച്ചു. ചാപ്പാ കുരിശില്‍ ഉപയോഗിച്ച കാനന്‍ 7ഡി ക്യാമറയെക്കുറിച്ച് ജയപ്രകാശാണ് സന്തോഷിനോടു പറയുന്നത് ചുരുങ്ങിയ നാള്‍ കൊണ്ട് 70,000 രൂപയ്ക്ക് സ്റ്റില്‍ വിത്ത് എച്ച്ഡി വിഡിയോ ഓപ്ഷനുള്ള കാനന്‍ സെവന്‍ ഡി ക്യാമറയും പതിനായിരം രൂപയ്ക്ക് സെക്കന്‍ഡ് ഹാന്‍ഡ് സിഗ്മ ലെന്‍സും സംഘടിപ്പിച്ച് സന്തോഷ് പണ്ഡിറ്റ് വീണ്ടും ജയപ്രകാശിന്റെ അടുത്തെത്തി. നാല് ലൈറ്റുകള്‍ മാത്രമുപയോഗിച്ച് അവര്‍ സ്റ്റാന്‍ഡ് ഇല്ലാതെ ക്യാമറ തോളില്‍ വച്ച് ഷൂട്ടിങ് തുടങ്ങി.

വീട്ടിലെ കംപ്യൂട്ടറില്‍ തനിയെ ചെയ്തു പഠിച്ച എഡിറ്റിങ്ങും മിക്‌സിങ്ങും തുടങ്ങി എല്ലാ ജോലികളും സ്വയം ചെയ്ത് സിനിമ സെന്‍സര്‍ ബോര്‍ഡിനു മുന്നിലെത്തിച്ചു. മലയാളത്തില്‍ ഇറങ്ങുന്ന സിനിമകളൊക്കെയും കണ്ട് സെന്‍സര്‍ ചെയ്യുന്ന ബോര്‍ഡ് അംഗങ്ങള്‍ സന്തോഷ് പണ്ഡിറ്റിന്റെ സിനിമയില്‍ ഒരു തകരാറും കണ്ടില്ല. ചിത്രം സെന്‍സര്‍ ചെയ്ത് സര്‍ട്ടിഫിക്കറ്റ് കയ്യില്‍ കൊടുത്തു. സിനിമ തിയറ്ററുകളിലെത്തി. വിജയം കണ്ടു തുടങ്ങിയതോടെ ഗോകുലം ഗോപാലന്റെ വിതര കമ്പനി സിനിമയുടെ വിതരണം ഏറ്റെടുത്തു. സൂപ്പര്‍ ഹിറ്റില്‍ നിന്നു മെഗാഹിറ്റിലേക്കുള്ള യാത്രയിലാണ് കൃഷ്ണനും രാധയും എന്ന ട്രെന്‍ഡ് സെറ്റര്‍ പരീക്ഷണചിത്രം.

തന്നെ വച്ചു തമാശയുണ്ടാക്കാന്‍ ശ്രമിക്കുന്നവര്‍ക്ക് തമാശയ്ക്കുള്ള വക നല്‍ക നല്‍കണമെന്നു നിര്‍ബന്ധമുള്ള, തന്നെ വെല്ലുവിളിക്കുന്നവര്‍ക്കു മുന്നില്‍ തല കുനിക്കില്ലെന്നു വാശിയുള്ള, ജനം കൂക്കിവിളിക്കുന്ന കൃഷ്ണനും രാധയും താന്‍ പഠിക്കാനെടുത്തതാണെന്നു പറയുന്ന സന്തോഷ് പണ്ഡിറ്റ് കേരളത്തെ ഇളക്കിമറിക്കുന്ന തെറിവിളി തന്റെ മാര്‍ക്കറ്റിങ്ങിന്റെ വിജയമാണെന്നു പറയുന്നു. ജിത്തുഭായ് എന്ന ചോക്ലേറ്റ് ഭായ് എന്ന രണ്ടാമത്തെ സിനിമ ഇതിനെക്കാള്‍ മികച്ചതായിരിക്കുമെന്ന് അദ്ദേഹം ഉറപ്പുനല്‍കുന്നുമുണ്ട്.

സന്തോഷ് പണ്ഡിറ്റ് മനോരോഗിയാണെന്നു വിശ്വസിക്കുന്നവരോട് ഒരേയൊരു ഡയലോഗ്- മനോരോഗിയായ സന്തോഷ് പണ്ഡിറ്റിന് ഇത്രയൊക്കെ സാധിക്കുമെങ്കില്‍ അമ്പരപ്പിക്കും വിധം നോര്‍മലായ നിങ്ങള്‍ക്ക് എന്തൊക്കെ സാധ്യമാക്കാം.അതുകൊണ്ട് സ്വന്തം കഴിവിലും അധ്വാനത്തിലും വിശ്വസിച്ച് ജീവിതത്തില്‍ മുന്നേറുക.സ്വയം മറന്നുപോകാതിരിക്കാന്‍ സന്തോഷിന്റെ ഡയലോഗ് ഭിത്തിയില്‍ എഴുതിയൊട്ടിച്ചു വയ്‍ക്കുക- ‘നീ വലിയവനാകാം എന്നു കരുതി ഞാന്‍ ചെറിയവനാകണം എന്നര്‍ഥമില്ല’.ശുഭരാത്രി.