പാഷന്‍ ഓഫ് ദി പ്രീസ്റ്റ്‌സ്‌

ഭീകര സെക്കുലറായ പി.സി.ജോര്‍ജ് പോലും മൗനം പാലിക്കുന്ന ഈ വിശുദ്ധ വാരത്തില്‍ ഇങ്ങനൊരു പോസ്റ്റിടേണ്ടി വരുന്നതില്‍ ഖേദിക്കുന്നു. ഈ വിശുദ്ധവാരത്തില്‍ പള്ളീലച്ചന്‍മാരും വിശ്വസികളെപ്പോലെ പ്രാര്‍ഥനയിലും ഉപവാസത്തിലും ഈശ്വരചിന്തയിലും കഴിഞ്ഞുകൂടുകയാണെന്നാണ് പൊതുവേയുള്ള സങ്കല്‍പം. എന്നാല്‍, വര്‍ഷങ്ങളായി മനസ്സില്‍ അടക്കിവച്ചിരിക്കുന്ന കുത്തിക്കഴപ്പുകള്‍ യൂദാസിനെപ്പോലെ അവരുടെ കുഞ്ഞാടുകളെ ഒറ്റിക്കൊടുക്കുകയും പാവപ്പെട്ട മനുഷ്യരുടെ ദൈവവിശ്വാസത്തെ തന്നെ ക്രൂശിലേറ്റുകയും ചെയ്യുമ്പോള്‍ പറയാനുള്ളത് പറയുന്നതാണ് പി.സി.ജോര്‍ജ് കളിക്കുന്നതിനെക്കാള്‍ നല്ലത് എന്നു തോന്നുന്നു.

പറയുമ്പോള്‍ 20 വര്‍ഷം മുന്‍പ് കൊല്ലപ്പെട്ട സിസ്റ്റര്‍ അഭയയുടെ കാര്യം മുതല്‍ നമ്മള്‍ പറയണം. രണ്ടു പതിറ്റാണ്ടായി ഭൗതികശക്തികള്‍ അന്വേഷിച്ചിട്ടും കുറ്റവാളികളെ കിട്ടാത്ത കേസിനെ ഇനി മതമേലധ്യക്ഷന്‍മാര്‍ ദൈവികരഹസ്യമായോ മറ്റോ പ്രഖ്യാപിക്കുന്നതാണ് നല്ലത്. മകളെ കന്യാസ്ത്രീയാക്കാന്‍ വിട്ട ആ രക്ഷിതാക്കളുടെ മനസ്സിലെ കെടാത്ത തീ ബാക്കി നോക്കിക്കോളും. പിന്നെയുമുണ്ട്. ആലപ്പുഴയില്‍ സണ്‍ഡേ സ്‌കൂള്‍ ക്യാംപിനിടെ കൊല്ലപ്പെട്ട 12 വയസുകാരി ശ്രേയ, തൃശൂരില്‍ ആദ്യകുര്‍ബാന വ്‌സ്ത്രം വാങ്ങിക്കൊടുക്കാമെന്നു പറഞ്ഞ് കൊച്ചു പെണ്‍കുട്ടിയെ പീഡിപ്പിച്ച ബ്ലഡി ഫക്കിങ് കൊക്കന്‍, അങ്ങനെ നമ്മള്‍ അറിഞ്ഞതും അറിയാത്തതുമായ സംഭവങ്ങള്‍ അനേകം.

അടുത്തിടെ ചര്‍ച്ചയായ മൂന്ന് പള്ളീലച്ചന്‍മാരാണ് ഇന്ന് പോസ്റ്റില്‍ വിഷയമാകുന്നത്. ഇവരുടെ സഭയേതാണെന്നോ സെമിനാരി ഏതാണെന്നോ എന്നൊന്നും എനിക്കറിഞ്ഞുകൂട. എല്ലാവരുടെയും കയ്യിലിരിപ്പ് സാത്താന്റെയാണെന്നതാണ് പ്രസക്തമാകുന്നത്. ആദ്യത്തെ സംഭവത്തിലെ പ്രതി പുത്തന്‍വേലിക്കര പറങ്കിനാട്ടിയകുരിശ് ലൂര്‍ദ്മാത പള്ളിയിലെ വികാരിയുമാണ്- ഫാ.എഡ്വിന്‍ സിഗ്രേസ്. പേരെടുത്ത ധ്യാനഗുരു, തീപ്പൊരി പ്രഭാഷകന്‍, നിരവധി ഭക്തിഗാനകാസറ്റുകളിലെ പാട്ടുകാരന്‍… അങ്ങനെ നാട്ടുകാരുടെ കണ്ണിലുണ്ണി. ഈ ഉണ്ണി 14 വയസുള്ള ഒരു പെണ്‍കുട്ടിയെ സ്ഥിരമായി പള്ളിമേടയില്‍ കൊണ്ടുപോയി പീഡിപ്പിച്ചു എന്നാണ് കേസ്. പെണ്‍കുട്ടിയെ അച്ചന്‍ സ്ഥിരമായി പള്ളിമേടയില്‍ കൊണ്ടുപോകുന്നത് കണ്ട് വീട്ടുകാര്‍ കാര്യമന്വേഷിച്ചപ്പോള്‍ പെണ്‍കുട്ടി വിവരം പറയുകയും വീട്ടുകാര്‍ പൊലീസില്‍ പരാതിപ്പെടുകയും പൊലീസ് കേസെടുക്കുകയും മാതൃകാ ഇടയന്‍ ഒളിവില്‍ പോവുകയുമായിരുന്നു എന്നാണ് വാര്‍ത്ത.

14 വയസുള്ള പെണ്‍കുട്ടിയാണ് സത്യത്തില്‍ കുറ്റക്കാരിയെന്നും സ്റ്റാന്‍ഡ് എലോണ്‍ സെലബ്രിറ്റിയായ അച്ചനെ കുടുക്കാന്‍ വേണ്ടി കോര്‍പറേറ്റുകള്‍ നടത്തുന്ന ശ്രമമാണിതെന്നും അച്ചന് ഐക്യദാര്‍ഢ്യം നല്‍കണമെന്നുമൊക്കെ വാദിക്കാനും ആളുണ്ടാവും. 14 വയസുള്ള പെണ്‍കുട്ടിയെക്കാള്‍ വിവരവും വിവേകവും, തെറ്റും ശരിയും തമ്മിലുള്ള വ്യത്യാസവുമൊക്കെ നന്നായി അറിയാവുന്ന ആളാണ് 41 വയസുള്ള പള്ളീലച്ചന്‍ എന്നെങ്കിലും പ്രിയ കുഞ്ഞാടുകള്‍ അംഗീകരിക്കണമെന്ന് അഭ്യര്‍ഥിക്കുന്നു. സിംപിളായി പറഞ്ഞാല്‍പ്പോലും ഒരു തെറ്റും ചെയ്യാതെ ക്രൂശിലേറ്റപ്പെട്ട ക്രിസ്തുവിനെ പ്രകീര്‍ത്തിക്കുന്ന ഈയാഴ്ചയില്‍ ധ്യാനഗുരു ഒളിവില്‍ പോയതിന് ക്രിസ്തീയമായ ഒരു വിശദീകരണവും ഞാന്‍ കാണുന്നില്ല.

ഇതുമായി ബന്ധമില്ലെങ്കിലും, കഴിഞ്ഞയാഴ്ച സഭയില്‍ നിന്നു പുറത്താക്കപ്പെട്ട ഒരു കന്യാസ്ത്രീക്ക് 12 ലക്ഷം രൂപ നഷ്ടപരിഹാരം നല്‍കിയ ഒരു വാര്‍ത്തയും കണ്ടിരുന്നു. 13 വര്‍ഷം കന്യാസ്ത്രീയായിരുന്ന അനിതയെ ഇടുക്കിക്കാരന്‍ ഒരു അച്ചന്‍ പീഡിപ്പിക്കാന്‍ ശ്രമിച്ചത് പരാതിപ്പെട്ടതിനെ തുടര്‍ന്നായിരുന്നേ്രത സംഭവങ്ങള്‍. ഇറ്റലിയിലേക്കു സ്ഥലംമാറ്റപ്പെട്ട കന്യാസ്ത്രീ സഭയില്‍ നിന്നു പുറത്താക്കപ്പെടുകയും അതെത്തുടര്‍ന്ന് കോണ്‍വെന്റിനു മുന്നില്‍ കുത്തിയിരിപ്പു നടത്തിയപ്പോള്‍ കൂടുതല്‍ നാറാതിരിക്കാന്‍ സഭ 12 ലക്ഷം രൂപ നഷ്ടപരിഹാരം കൊടുത്ത് ഒതുക്കുകയുമായിരുന്നു എന്നാണ് മനസ്സിലാവുന്നത്. ഇടുക്കിക്കാരന്‍ അച്ചന്‍ ആരാണെന്നോ എവിടെയാണെന്നോ ആര്‍ക്കുമറിയില്ല. തിരുവസ്ത്രം നഷ്ടപ്പെട്ടതും വഴിയിലിരിക്കേണ്ടി വന്നതും ഒടുവില്‍ നഷ്ടപരിഹാരം വാങ്ങി വീട്ടില്‍പ്പോവേണ്ടി വന്നതും കന്യാസ്ത്രീ.

ഇതിനിടയിലാണ് ഓസ്‌ട്രേലിയയിലെ മെല്‍ബണില്‍ നിന്നും ഫാ. ജോസഫ് ഓലിക്കലിന്റെ മുകേഷ് സിങ്ങിസം. രാജ്യത്തെ ഞെട്ടിച്ച ജില്‍ മീഗര്‍ കേസിനെപ്പറ്റിയായിരുന്നു ഓലിക്കലച്ചന്‍ വിവരക്കേട് പറഞ്ഞത്. ഇന്ത്യക്കാരന് നിര്‍ഭയ കേസ് പോലെയാണ് ഓസ്‌ട്രേലിയക്കാരന് ജില്‍ മീഗര്‍ കേസ്. ജില്‍ മീഗറെ മാനഭംഗം ചെയ്തു കൊലപ്പെടുത്തിയ പ്രതിക്ക് ജീവപര്യന്തമേ കിട്ടിയിട്ടുള്ളൂ (14 വര്‍ഷമല്ല, ഒറിജിനല്‍ ജീവപര്യന്തം) എന്നിരിക്കെ ജില്‍ മീഗര്‍ കുറച്ചുകൂടി വിശ്വാസതീവ്രമായ ജീവിതം നയിച്ചിരുന്നെങ്കില്‍ അവള്‍ക്കീ ഗതി വരില്ലായിരുന്നു എന്നാണ് ഓലിക്കലച്ചന്‍ പറഞ്ഞത്.
അങ്ങനെയെങ്കില്‍, വിശ്വാസതീവ്രമായ ജീവിതം നയിച്ചിരുന്ന സിസ്റ്റര്‍ അഭയയ്ക്കും സണ്‍ഡേ സ്‌കൂള്‍ ക്യാംപില്‍ പങ്കെടുക്കാന്‍ പോയ ശ്രേയയ്ക്കും കൊക്കന്‍ ആദ്യകുര്‍ബാന വസ്ത്രം വാങ്ങിത്തരുമെന്നു വിശ്വസിച്ചു പീഡനങ്ങളെല്ലാം സഹിച്ച കുരുന്നിനുമൊക്കെ എന്തുകൊണ്ട് അങ്ങനെ സംഭവിച്ചു എന്നും ഓലിക്കന്‍ വിശദീകരിക്കേണ്ടി വരും.

അച്ചന്‍മാരും മനുഷ്യരാണ്. സമൂഹത്തിലെ തിന്മകളൊക്കെയും അവരിലുമുണ്ടാകും, എന്നു കരുതി വൈദികരെയാകെ കുറ്റപ്പെടുത്തുകയോ പഴിചാരുകയോ സഭയെ അധിക്ഷേപിക്കുകയോ ചെയ്യരുത് എന്നു വളരെ പക്വതയുള്ള ആളുകള്‍ ഉപദേശിക്കുന്നത് കേട്ടിട്ടുണ്ട്. ലോ പോയിന്റാണത്. പക്ഷെ, അവിടെയും പിഴവുകളാണ്. വധശിക്ഷ കാത്തു കഴിയുന്ന മുകേഷ് സിങ്ങിന്റെ അറിവോ ഐക്യുവോ അല്ല മേല്‍പ്പറഞ്ഞ വെള്ളക്കുപ്പായക്കാര്‍ക്ക് എന്നതാണ് ഇത് മറ്റു കുറ്റങ്ങളെപ്പോലെ അല്ലാതാക്കുന്നത്. മുകേഷ് സിങ്ങും ഇവരുമായി ഐക്യുവില്‍ വ്യത്യാസമൊന്നുമില്ലെന്നു തെളിയിച്ചു എന്നിരിക്കട്ടെ, മുകേഷ് സിങ് ഇപ്പോള്‍ തിഹാര്‍ ജയിലിലുണ്ട് എന്നത് ഒരു ആശ്വാസമാണ്. സിസ്റ്റര്‍ അഭയയുടെ കൊലയാളികളും ശ്രേയയെ വെള്ളത്തില്‍ മുക്കി കൊന്നവരും കൊക്കനും ഇപ്പോള്‍ എവിടെയാണ് ?

ഈ വൈദികന്‍മാര്‍ ചെയ്തിരിക്കുന്നതും ചെയ്തുകൊണ്ടിരിക്കുന്നതും ഏറ്റവും നീചമായ പാപങ്ങളാണ്. സഭാധികാരികള്‍ തെറ്റു ചെയ്തവരെ രാജ്യത്തെ നിയമത്തിനു മുന്നില്‍ ഹാജരാക്കി അവരെ മാതൃകാപരമായ ശിക്ഷയ്ക്ക് വിധേയരാക്കുമ്പോഴാണ് നീതി
നടപ്പാവുന്നത്. ഇരകളെ അവഹേളിക്കുകയും കുറ്റവാളികളെ സംരക്ഷിക്കുകയും ചെയ്തുകൊണ്ട് സുവിശേഷം കയ്യിലെടുക്കുന്നവര്‍ വഞ്ചിക്കുന്നത് ക്രിസ്തുവിനെയാണ്, ക്രിസ്തുവിന്റെ പീഡാസഹനത്തെയും മരണത്തെയുമാണ്. ഇത് ഒരു മുട്ടനാടിന്റെ ഇടയലേഖനമായി കണ്ട് വായിക്കണമെന്നും ഇതെപ്പറ്റി ചിന്തിക്കാന്‍ കുറച്ചു സമയം ചിലവഴിക്കണമെന്നും എല്ലാ വൈദികരോടും ആഹ്വാനം ചെയ്യുന്നു.

ഹാപ്പി ഈസ്റ്റര്‍ !

എം.വി.നികേഷ് കുമാറിനോട് പത്തു ചോദ്യങ്ങള്‍

ഉടുക്കു കൊട്ടി പേടിപ്പിക്കല്ലേ എന്ന തലക്കെട്ടില്‍ റിപ്പോര്‍ട്ടര്‍ ചാനല്‍ വെബ്‌സൈറ്റില്‍ ശ്രീ. എം.വി.നികേഷ് കുമാര്‍ എഴുതിയ ഒരു ലേഖനം വായിക്കാനിടയായി. വാര്‍ത്ത അവതരിപ്പിക്കുന്ന അതേ ശൈലിയില്‍ അബദ്ധങ്ങളും വിവരക്കേടുകളും വളരെ ആധികാരികമായി അവതരിപ്പിക്കാനുള്ള അദ്ദേഹത്തിന്റെ ധാര്‍ഷ്ട്യത്തെ ഞാനഭിനന്ദിക്കുന്നു. മുഖ്യമന്ത്രിയുള്‍പ്പെടെയുള്ള ജനപ്രതിനിധികളെയും രാഷ്ട്രീയപ്രവര്‍ത്തകരെയും തല്‍സമയ വാര്‍ത്താപരിപാടികളിലൂടെ പരസ്യവിചാരണ നടത്താറുള്ള നികേഷ് ഒരു സര്‍ക്കാര്‍ വകുപ്പിന്റെ പ്രവര്‍ത്തനത്തെ ഉടുക്കുകൊട്ടി പേടിപ്പിക്കലായി ചിത്രീകരിക്കുന്നത് ഖേദകരമാണ്.

ഒരിക്കലും പിരിഞ്ഞ് കിട്ടില്ല എന്നുറപ്പുള്ള തുകയ്ക്ക് സര്‍വീസ് ടാക്‌സ് ഈടാക്കരുതെന്നും അതിന്‍മേല്‍ സര്‍ക്കാര്‍ പലിശ ഈടാക്കിയത് തന്റെ ചാനലിനോടുള്ള ക്രൂരതയാണെന്നും നികേഷ് പറയുന്നു. പരസ്യത്തിന്റെ കാശ് പിരിച്ചെടുക്കാന്‍ കഴിയാത്തത് ചാനലിന്റെ പരാജയമാണ്. അതിന്റെ ഭാരം ഏറ്റെടുക്കേണ്ടത് സര്‍ക്കാരും ജനങ്ങളുമല്ല. മിസ്മാനേജ്‌ന്റെിനെ ബുദ്ധിജീവിനാട്യങ്ങള്‍ കൊണ്ടു മഹത്വവല്‍ക്കരിക്കാന്‍ ശ്രമിക്കുന്നത് പഴയ നമ്പരാണ്. നികുതി അടയ്ക്കാത്തതിന്റെ പേരില്‍ അദ്ദേഹത്തെ അറസ്റ്റ് ചെയ്ത സംഭവത്തെക്കുറിച്ചുള്ള ലേഖനത്തില്‍ നിന്നും എനിക്കു തോന്നിയ ചില സംശയങ്ങളാണ് ഇവിടെ ചോദിക്കുന്നത്. സ്വന്തമായി ചാനലൊന്നും ഇല്ലാത്തതുകൊണ്ടാണ് അതൊക്കെ ബ്ലോഗിലൂടെ ചോദിക്കുന്നത്.

1. പരസ്യക്കാര്‍ തരാനുള്ള ആറു കോടി രൂപ പിരിഞ്ഞു കിട്ടാതെ ഒന്നരക്കോടി രൂപ നികുതി അടയ്ക്കാന്‍ നിവൃത്തിയില്ല എന്നു കോടതിയില്‍ വാദിച്ച താങ്കള്‍, മാര്‍ച്ച് 23ന് സ്റ്റുഡിയോയിലെത്തിയ സെന്‍ട്രല്‍ എക്‌സൈസ് ഉദ്യോഗസ്ഥരോട് എല്ലാ ഡിസ്പ്യൂട്ടും മാറ്റിവച്ച് മുഴുവന്‍ പണവും അടയ്ക്കാം അറസ്റ്റ് ഒഴിവാക്കാമോ എന്നു ചോദിച്ചതായി പറയുന്നു. ആറുകോടി കിട്ടിയാലേ നികുതി അടയ്ക്കാന്‍ കഴിയൂ എന്ന വാദം അവിടെ പൊളിയുകയല്ലേ മിസ്റ്റര്‍ നികേഷ് ? കയ്യില്‍ പണമില്ലെങ്കില്‍ എങ്ങനെ അപ്പോള്‍ മുഴുവന്‍ തുകയും അടയ്ക്കുമായിരുന്നു ?

2. സെന്‍ട്രല്‍ എക്‌സൈസ് കമ്മിഷണറുടെ ഓഫിസിലേക്കു പോകുന്നതിനു പകരം അതുമായി ബന്ധമില്ലാത്ത മറ്റൊരു ഓഫിസിലെത്തിച്ചു എന്നു പറയുന്നു. കമ്മിഷണര്‍ ശ്രീ.നികേഷിനെ കാണണം എന്നാവശ്യപ്പെട്ടതുപ്രകാരം കൂട്ടിക്കൊണ്ടുപോകാന്‍ വന്നവരായിരുന്നില്ല ആ ഉദ്യോഗസ്ഥര്‍ എന്നാണ് മനസ്സിലാവുന്നത്. താങ്കള്‍ക്ക് സമന്‍സുമായി വന്നവരോട് എന്നെ കമ്മിഷണറുടെ അടുത്തേക്ക് കൊണ്ടുപോകൂ എന്ന താങ്കളുടെ ആവശ്യം അവര്‍ അനുസരിച്ചില്ല എന്നത് അവര്‍ സ്വാധീനങ്ങള്‍ക്കു വഴങ്ങാത്ത സത്യസന്ധരായ ഉദ്യോഗസ്ഥരാണ് എന്നതിനു തെളിവല്ലേ മിസ്റ്റര്‍ നികേഷ് ? അവരെ അഭിനന്ദിക്കുകയായിരുന്നില്ലേ ചെയ്യേണ്ടത് ?

3. താങ്കള്‍ ആവശ്യപ്പെട്ടതു പ്രകാരം കമ്മിഷണറുടെ ഓഫിസിലെത്തിച്ചില്ല എന്നു മനസ്സിലായപ്പോള്‍ മുന്‍ കമ്മിഷണറായ ഡോ.രാഘവനോട് സഹായമഭ്യര്‍ഥിച്ചു എന്നു താങ്കള്‍ പറയുന്നു. താന്‍ നിസ്സഹായനാണെന്നു പറഞ്ഞ രാഘവന്‍ നിയമപ്രകാരമുള്ള അവകാശങ്ങള്‍ നികേഷിനു ലഭിക്കും എന്നും പറഞ്ഞു. നിയമനടപടികളെ നേരിട്ടുകൊണ്ടിരിക്കുന്ന ഒരാള്‍ ഇത്തരത്തില്‍ ഉന്നത ഉദ്യോഗസ്ഥരെ വിളിച്ച് സഹായമഭ്യര്‍ഥിക്കുന്നത് ശരിയാണ് എന്ന് താങ്കള്‍ വിശ്വസിക്കുന്നുണ്ടോ ? ഉന്നതങ്ങളിലുള്ള സ്വാധീനം ഉപയോഗിച്ച് നിയമനടപടികളില്‍ നിന്നു രക്ഷപെടാന്‍ ശ്രമിക്കുന്നവരെ മോശക്കാരായി ചിത്രീകരിച്ചു വാര്‍ത്ത കൊടുക്കുന്ന താങ്കള്‍ അതിനു തന്നെയല്ലേ അപ്പോള്‍ ശ്രമിച്ചത് ?

4. ഡോ.രഘവന്‍ കൈവിട്ടതോടെ ‘തുടര്‍ന്നു ഞാന്‍ വിളിക്കേണ്ടത് കേന്ദ്രം ഭരിക്കുന്ന ബിജെപി നേതാക്കളെയും സംസ്ഥാനം ഭരിക്കുന്ന മന്ത്രിമാരെയുമാണ്. അതിനെക്കാള്‍ ഭേദം ജയിലാണല്ലോ…’- എന്നെഴുതിയിരിക്കുന്നത് വായിച്ചു. എന്താണ് താങ്കള്‍ അതുകൊണ്ടുദ്ദേശിച്ചത് എന്നു വ്യക്തമായില്ല. കേന്ദ്രം ഭരിക്കുന്ന ബിജെപി നേതാക്കളും സംസ്ഥാനം ഭരിക്കുന്ന നേതാക്കളും താങ്കള്‍ക്കു സഹായം ചെയ്യാന്‍ മാത്രം യോഗ്യതയുള്ളവരല്ല എന്നാണോ ? അതോ അവരും താങ്കളുടെ കാര്യത്തില്‍ നിഷ്പക്ഷത പുലര്‍ത്തുമോ എന്ന ഭീതിയായിരുന്നോ ? എന്തൊക്കെ കുറവുകളുണ്ടെങ്കിലും ജനാധിപത്യത്തില്‍ ജനങ്ങള്‍ തിരഞ്ഞെടുത്ത ജനപ്രതിനിധികള്‍ ഒരു സ്റ്റാന്‍ഡ് എലോണ്‍ ചാനല്‍ മുതലാളിയെക്കാള്‍ ആയിരം മടങ്ങു മുകളിലാണ് എന്നതു മനസിലാക്കുമല്ലോ ?

5. താങ്കളെ അറസ്റ്റ് ചെയ്ത വാര്‍ത്ത നവമാധ്യമങ്ങളില്‍ വന്നു തുടങ്ങിയതോടെ ലോകത്തിന്റെ വിവിധ ഭാഗങ്ങളില്‍ നിന്നു താങ്കളുടെ സുഹൃത്തുക്കള്‍ താങ്കളുടെ അക്കൗണ്ടിലേക്ക് സ്വമേധയാ പണം അയച്ചുകൊണ്ടിരുന്നു എന്നതാണ് ലേഖനത്തില്‍ എന്നെ കരയിച്ചുകളഞ്ഞ ഭാഗം. ശ്രീ.നികേഷ് കുമാറിനെ അറിയുന്നവര്‍ കടം വാങ്ങിയും സ്വര്‍ണം പണയം വച്ചുമായി വളരെ ചുരുങ്ങിയ സമയത്തിനുള്ളില്‍ ഒരു കോടി 20 ലക്ഷം രൂപ താങ്കളുടെ അക്കൗണ്ടിലെത്തിച്ചു എന്നത് എന്നെ സംബന്ധിച്ച് അവിശ്വസനീയവും അമ്പരപ്പിക്കുന്നതുമാണ്. സ്വര്‍ണം ഊരിക്കൊണ്ടുപോയി പണയം വച്ച് കാശാക്കിയെടുക്കാനൊക്കെ കുറച്ചു സമയം വേണ്ടെ ? അതിനും പുറമേ അക്കൗണ്ടിലേക്ക് പണം ട്രാന്‍സ്ഫര്‍ ചെയ്യണമെങ്കിലും കുറച്ചു സമയം ആവശ്യമാണ്. അതിനും പുറമേ, എങ്ങനെ ഇത്രയധികം ആളുകളുടെ പക്കല്‍ താങ്കളുടെ അക്കൗണ്ട് നമ്പര്‍ എത്തിപ്പെട്ടു ? മേക്കപ്പിനൊക്കെ ഒരു പരിധിയില്ലേ രാജപ്പാ ?

6. തുടര്‍ന്നങ്ങോട്ട് ലേഖനത്തിലുടനീളം താങ്കള്‍ താങ്കളുടെ തന്നെ മാഹാത്മ്യം വര്‍ണിക്കുകയാണ്. വായിച്ചപ്പോള്‍ പാവം തോന്നി. താങ്കള്‍ സ്വന്തമായി ചാനല്‍ തുടങ്ങിയത് ഈ നാട്ടില്‍ ഒരു സ്വതന്ത്രമാധ്യമം ഉണ്ടാക്കേണ്ടതിന്റെ ആവശ്യകത മനസ്സിലാക്കിക്കൊണ്ടായിരുന്നു എന്നതും എന്നെ ഞെട്ടിച്ചു. ഏഷ്യാനെറ്റില്‍ നിന്നും പുറത്തുചാടി ഇന്ത്യാവിഷന്‍ ഉണ്ടാക്കിയപ്പോഴും അങ്ങ് അതു തന്നെയല്ലേ ചെയ്തത് ? ഇന്ത്യാവിഷന്‍ മുങ്ങിത്തുടങ്ങിയ സമയത്തല്ലേ അങ്ങ് റിപ്പോര്‍ട്ടര്‍ ഉണ്ടാക്കിയത് ? അപ്പോള്‍ ഇന്ത്യാവിഷന്‍ കുത്തക ചാനലായി മാറിക്കഴിഞ്ഞിരുന്നോ ? എങ്കില്‍ എന്തുകൊണ്ടാണ് ഇപ്പോള്‍ ഇന്ത്യാവിഷന്‍ പ്രവര്‍ത്തിക്കാത്തത് ?

7. താങ്കള്‍ താങ്കളെ തന്നെ വാഴ്ത്തുന്ന ഭാഗത്ത് താങ്കള്‍ ‘തുടക്കമിട്ടത് വാഴപ്പിണ്ടി എടുത്തു കളഞ്ഞ് പകരം നട്ടെല്ലു വച്ച മാധ്യമപ്രവര്‍ത്തനം’ ആണെന്നു വിശേഷിപ്പിക്കുന്നുണ്ട്. കേരളത്തിലെ മാധ്യമപ്രവര്‍ത്തനത്തിന്റെ ചരിത്രം അറിയാത്ത ഏതോ ന്യൂജന്‍ ട്രെയിനിയെപ്പോലെ താങ്കള്‍ എന്തോ പുലമ്പുന്നു എന്നാണ് തോന്നിയത്. താങ്കളെപ്പോലെ ഒച്ചയും ബഹളും അലമ്പും ഉണ്ടാക്കിയിട്ടില്ലെങ്കിലും താങ്കളെക്കാള്‍ ആത്മാര്‍ഥമായി, താങ്കളെക്കാള്‍ നീതിക്കു വേണ്ടിയുള്ള ദാഹത്തോടെ മാധ്യമപ്രവര്‍ത്തനം നടത്തിയ ആയിരക്കണക്കിനാളുകള്‍ ജീവിച്ചിരുന്ന, ജീവിച്ചിരിക്കുന്ന നാടാണ് കേരളം. അവിടെ താങ്കള്‍ക്കൊപ്പമല്ലാത്ത എല്ലാവരുടെയും നട്ടെല്ല് വാഴപ്പിണ്ടിയാണ് എന്ന വിശ്വാസം ചപലമാണ്. നാര്‍സിസത്തിന്റെ കണ്ണഞ്ചിപ്പിക്കുന്ന വെളിച്ചത്തില്‍ നിന്ന് പുറത്തുവരുമ്പോള്‍ ചുറ്റുപാടും നോക്കിയാല്‍ താങ്കള്‍ക്ക് അവരെ കാണാന്‍ സാധിക്കും.

8. താങ്കളെ അറസ്റ്റ് ചെയ്തപ്പോള്‍ മാത്രമാണ് താങ്കള്‍ നീതി കിട്ടിയില്ല, കരുണ കാട്ടിയില്ല തുടങ്ങിയ പരാമര്‍ശങ്ങള്‍ നടത്തുന്നത് എന്നത് ശ്രദ്ധേയമാണ്. കേരളത്തില്‍ ഇതിനെക്കാള്‍ ചെറിയ കുറ്റങ്ങള്‍ക്ക് ആളുകള്‍ അറസ്റ്റ് ചെയ്യപ്പെടുമ്പോള്‍ അത് ബ്രേക്കിങ് ന്യൂസ് ആക്കുന്നയാളല്ലേ താങ്കള്‍ ? ചെറിയ ആരോപണങ്ങളുടെ പേരില്‍ ആളുകളെ സ്റ്റുഡിയോയില്‍ വിളിച്ചു വരുത്തി നാലാംകിട ചോദ്യങ്ങള്‍ ചോദിച്ച് വെറുപ്പിക്കുമ്പോള്‍ നീതി, കരുണ തുടങ്ങിയ വാക്കുകള്‍ താങ്കളുടെ നിഘണ്ടുവില്‍ ഇല്ലായിരുന്നോ ?

9. മൊത്തത്തില്‍ താങ്കളുടെ ലേഖനത്തില്‍ നിന്നും താങ്കളും താങ്കളുടെ ചാനലും എന്തോ വിശുദ്ധ കര്‍മമാണ് ചെയ്യുന്നതെന്നും അതിനാല്‍ മറ്റു ചാനലുകളെ കാണുന്നതുപോലെ കാണാന്‍ പാടില്ലെന്നും ഒരു സൂചനയുള്ളതുപോലെ തോന്നി. തീര്‍ച്ചയായും അങ്ങനെയായിരിക്കാം. എന്നാല്‍, റിമോട്ടെടുത്ത് ചാനലുകള്‍ മാറ്റുന്ന സാധാരണക്കാരെ സംബന്ധിച്ച് അത്തരം മാറ്റങ്ങള്‍ ഫീല്‍ ചെയ്യുകയില്ല. സമത്വവും സ്വാതന്ത്ര്യവും പുലര്‍ന്നുകാണാനാഗ്രഹിച്ച ധീരന്‍മാരായ മാധ്യമപ്രവര്‍ത്തകരുടെ പാത പിന്‍തുടരുന്ന താങ്കള്‍ ജനാധിപത്യവ്യവസ്ഥിതിയില്‍ സ്വയം മഹത്വവല്‍ക്കരിക്കാന്‍ ശ്രമിക്കുന്നത് ശരിയാണോ ?

10. താങ്കള്‍ക്കു നട്ടെല്ലുണ്ടെന്നു കരുതി ബാക്കി എല്ലാവരും അത് മാറ്റി വാഴപ്പിണ്ടി വയ്ക്കണം എന്നില്ലല്ലോ അല്ലേ  ?  ഉണ്ടോ ? ഇല്ലേ ? ഉവ്വോ ?

സൈബര്‍ ബുദ്ധിജീവി ശുദ്ധികലശം

ശബരിമല ക്ഷേത്രസന്നിധിയില്‍ ആചാരം ലഘിച്ച് മേല്‍ശാന്തി മകളെ കൊണ്ടുപോയി ദര്‍ശനം നടത്തിയതും അതെത്തുടര്‍ന്ന് ദേവസ്വം ബോര്‍ഡ് അവിടെ പരിഹാരക്രിയകള്‍ നടത്തുകയും ചെയ്തതിനെതിരെ പ്രബുദ്ധരായ ആളുകളുടെയും സാസ്‌കാരികപ്രവര്‍ത്തകരുടെയും ബുദ്ധിജീവികളുടെയും നേതൃത്വത്തില്‍ വലിയ പ്രതിഷേധങ്ങള്‍ നടന്നുകൊണ്ടിരിക്കുകയാണല്ലോ. ഞാനൊരു ബുദ്ധിജീവിയോ സംസ്‌കാരസമ്പന്നനോ അല്ല. ബുദ്ധിയെക്കാളും സംസ്‌കാരത്തെക്കാളും മനുഷ്യന് ഉപകാരപ്പെടുന്നത് കോമണ്‍സെന്‍സ് ആണെന്നാണ് എന്റെ അനുഭവം. അതുകൊണ്ടു തന്നെ സംസ്‌കാരിക കേരളത്തെ മുറിവേല്‍പിച്ചു കളഞ്ഞ ഈ വിഷയത്തില്‍ എന്റെ ചില അഭിപ്രായങ്ങള്‍ ഇവിടെ പങ്കു വയ്ക്കാനാഗ്രഹിക്കുന്നു.

12 വയസുള്ള പെണ്‍കുട്ടി സന്നിധാനത്തു കാലു കുത്തിയതിനെ തെറ്റ് എന്നു വിശേഷിപ്പിക്കുന്നതിന്റെ യുക്തിയെ ആണ് പലരും ചോദ്യം ചെയ്യുന്നത്. ആര്‍ത്തവം ആരംഭിച്ചവരും അവസാനിക്കാത്തവരുമായ ഒരു സ്ത്രീയും സന്നിധാനത്ത് ദര്‍ശനം നടത്താന്‍ പാടില്ല എന്ന നിയമം ദേവസ്വം ബോര്‍ഡ് പരിഷ്‌കരിച്ച് 10 വയസ്സിനും 50 വയസ്സിനും ഇടയിലുള്ള സ്ത്രീകള്‍ ശബരിമല സന്നിധാനത്ത് ദര്‍ശനം നടത്തേണ്ടതില്ല എന്നാക്കി മാറ്റുകയണ് ചെയ്തത് എന്നാണ് ഞാന്‍ മനസ്സിലാക്കുന്നത്. അതൊരു പഴയ ചട്ടമാണ്. മാറ്റുവിന്‍ ചട്ടങ്ങളെ എന്നു കവി പാടിയത് ഇത്തരം ചട്ടങ്ങള്‍ ഒക്കെക്കൂടി ഉള്‍പ്പെടുത്തിയായിരിക്കാം.

അയ്യപ്പന് പെണ്‍കുട്ടികളോട് അയിത്തമുണ്ടോ, ഒരു 12 വയസ്സുകാരി പ്രവേശിച്ചാല്‍ സന്നിധാനം എങ്ങനെയാണ് അശുദ്ധമാകുന്നത് എന്നു തുടങ്ങി അനേകം അനേകം ചോദ്യങ്ങളാണ് ഉയര്‍ന്നു കേള്‍ക്കുന്നത്. എല്ലാം യുക്തിസഹജമായ ചോദ്യങ്ങള്‍ തന്നെ. എന്നാല്‍, ശബരിമലയിലെ ഈ ആചാരം ഇന്നോ ഇന്നലെയോ തുടങ്ങിയതല്ല. ഇന്ത്യയുടെ വിവിധ ഭാഗങ്ങളില്‍ നിന്നായി വര്‍ഷാവര്‍ഷം ലക്ഷക്കണക്കിനു ഭക്തജനങ്ങള്‍ വന്നുപോകുന്ന ശബരിമലയിലെ ആചാരാനുഷ്ഠാനങ്ങളുടെ തുടര്‍ച്ചയാണ് ഇത്. ഇവ കാലോചിതമായി പരിഷ്‌കരിക്കുന്നതിലോ മാറ്റങ്ങള്‍ വരുത്തുന്നതിലോ ഒന്നും ഒരു തെറ്റുമില്ല.

എന്നാല്‍, സന്നിധാനത്ത് 12 വയസ്സുള്ള മകളെയും കൊണ്ടു പോയത് അങ്ങനെയൊരു ചട്ടം നിലവിലുണ്ട് എന്നറിയാത്ത ഒരാളല്ല. അവിടുത്തെ ആചാരങ്ങളെക്കുറിച്ച് വളരെ വ്യക്തമായ ബോധ്യമുള്ള മേല്‍ശാന്തിയാണ്. നിലവില്‍ ലക്ഷക്കണക്കിനു വിശ്വാസികള്‍ കഠിനവ്രതമെടുത്ത് പ്രാര്‍ഥനാപൂര്‍വം പടിചവിട്ടുന്ന സന്നിധാനത്ത് നിലനില്‍ക്കുന്ന ഒരു ആചാരം ലംഘിക്കുന്നത് ഈ വിശ്വാസികള്‍ക്ക് ബുദ്ധിമുട്ടുണ്ടാക്കുമോ ഇല്ലയോ എന്നതാണ് എന്റെ ചോദ്യം. അതിനു മറുപടി പറയേണ്ടത് ഇതിലൊന്നും വിശ്വാമില്ലാത്ത ആളുകളല്ല എന്നതും ചൂണ്ടിക്കാണിക്കട്ടെ.

ഇനി 12 വയസുള്ള പെണ്‍കുട്ടിയോട് എന്തിനീ ക്രൂരത എന്നതാണ് സ്ത്രിപക്ഷവാദികളും പുരോഗമനവാദികളും യുക്തിവാദികളും എല്ലാം ചോദിക്കുന്നത്. എന്താണ് 12 വയസുള്ള പെണ്‍കുട്ടിയോട് ചെയ്ത ക്രൂരത ? പെണ്‍കുട്ടിയെ ശാസിക്കുകയോ ഭീഷണിപ്പെടുത്തുകയോ ഏതെങ്കിലും തരത്തിലുള്ള ശിക്ഷാനടപടികള്‍ക്കു വിധേയമാക്കുകയോ ചെയ്തിട്ടില്ല. തന്ത്രിയുടെ നേതൃത്വത്തില്‍ സന്നിധാനത്ത് ശുദ്ധിക്രിയകള്‍ നടത്തി എന്നതാണ് പെണ്‍കുട്ടിയോടു ചെയ്ത ക്രൂരതയും സ്ത്രീത്വത്തോടുള്ള അവഹേളനുമായി പലരും കാണുന്നത്. സ്ത്രീകള്‍ പ്രവേശിക്കാന്‍ പാടില്ല എന്ന ചട്ടം അബദ്ധജഢിലവും യുക്തിരഹിതവുമാണെന്നു വാദിക്കുന്നവര്‍ ഈ ശുദ്ധിപ്രക്രിയയെ പെണ്‍കുട്ടിയെ അവഹേളിക്കലായി ചിത്രീകരിക്കുന്നതിന്റെ യുക്തി എനിക്കു മനസ്സിലാവുന്നില്ല. രണ്ടും ഒരേ ആചാരത്തെ അടിസ്ഥാനമാക്കിയുള്ളതാണെന്നിരിക്കെ ഒന്ന് അബദ്ധവും മറ്റേത് അവഹേളനവുമാകുന്നതെങ്ങനെ ?

11 വയസ്സുകാരി സന്നിധാനത്ത് ചെന്നത് ആചാരലംഘനമല്ല എങ്കില്‍ അതിന്റെ തുടര്‍ച്ചയായി നടക്കുന്ന ശുദ്ധിക്രിയകള്‍ പെണ്‍കുട്ടിയെ അവഹേളിക്കലുമല്ല. അദ്യത്തേത് ആചാരലംഘനമാണ് എന്നുറച്ചു വിശ്വസിക്കുന്നവര്‍ക്ക് മാത്രമേ ശുദ്ധിക്രിയകളിലും വിശ്വസിക്കേണ്ട കാര്യമുള്ളൂ. ആചാരം ലംഘിച്ചതിന്റെ പേരില്‍ പെണ്‍കുട്ടിയെ ഏതെങ്കിലും തരത്തിലുള്ള ശിക്ഷാനടപടികള്‍ക്കു വിധേയമാക്കാത്തിടത്തോളം സാംസ്‌കാരികപ്രവര്‍ത്തകരുടെ ആശങ്കകള്‍ അടിസ്ഥാനരഹിതമാണ് എന്നാണ് എന്റെ വിനീതമായ അഭിപ്രായം.

ഇനി ശബരിമലയില്‍ സ്ത്രീകള്‍ക്കു പ്രവേശനം നല്‍കണം എന്നുള്ള വാദം നോക്കാം. അത് ഒരു സമുദായവുമായി ബന്ധപ്പെട്ട, വിശ്വാസങ്ങളുടെയും ആചാരങ്ങളുടെയും ഭാഗമായുള്ള പ്രശ്‌നമാണ്. പുരോഗമനം നടപ്പാക്കുമ്പോള്‍ അത് പുരോഗമനവാദികള്‍ക്കു ഹിതകരമാണോ എന്നതിനെക്കാള്‍ ആ വിശ്വാസങ്ങളെയും ആചാരങ്ങളെയും മുറുകെപ്പിടിക്കുന്ന വ്യക്തികള്‍ക്കു ഹിതകരമാണോ എന്നാണ് പരിശോധിക്കേണ്ടത്. ജനാധിപത്യം എന്നു പറയുമ്പോള്‍ ജനം എന്ന നിര്‍വചനത്തില്‍ പുരോഗമനവാദികള്‍ അവരെയും അവരെ അനുകൂലിക്കുന്നവരെയും മാത്രം കാണുന്നതിന്റെ പ്രശ്‌നമാണിത്. ശബരിമലയില്‍ സ്ത്രീകളെ പ്രവേശിപ്പിക്കണം എന്നത് വിശ്വാസികളുടെ പൊതു അഭിപ്രായമാണെങ്കില്‍ അതു നടപ്പാക്കണം. സാംസകാരിക-ബുദ്ധിജീവികളല്ല ഇവിടെ എല്ലാ കാര്യങ്ങളിലും വിധി പറയേണ്ടത്.

ദുരാചാരങ്ങളും സ്ത്രീവിവേചനവും പറിച്ചെറിയേണ്ടതു തന്നെയാണെന്ന കാര്യത്തില്‍ ഒരു സംശയവുമില്ല. എന്നാല്‍ അത് ലക്ഷക്കണക്കിനാളുകള്‍ വന്നു ചേരുന്ന ശബരിമലയില്‍ നിന്ന് ആരംഭിക്കുന്നതിനെക്കാള്‍ വിപ്ലവകരം അവനവന്റെ വീടുകളില്‍ നിന്നു തന്നെ ആരംഭിക്കുന്നതായിരിക്കുമെന്നു തോന്നുന്നു. പുരോഗമന വിപ്ലവ ചേച്ചിമാര്‍ പരിശുദ്ധമായി കാണുന്ന കിറ്റി പാര്‍ട്ടികളില്‍ കെട്ടിയോനെയും എഴുന്നള്ളിച്ചുകൊണ്ടുപോകാനുള്ള വിശാലമനസ്‌കത ആദ്യം കാണിക്കണം. ഭാര്യ അടുക്കളയില്‍ പണിയെടുക്കുമ്പോള്‍ ന്യൂസ് ചാനല്‍ ഓഫ് ചെയ്ത് അവിടെ പോയി നാലു പാത്രമെങ്കിലും കഴുകി വയ്ക്കാന്‍ ബുദ്ധിജീവികളും തയ്യാറാവണം. ശബരിമലയില്‍ സ്ത്രീകളെ പ്രവേശിപ്പിക്കുന്നതിനെക്കാള്‍ ആയിരം മടങ്ങ് ഇഫക്ടോടെ ഇതൊക്കെ സമൂഹത്തില്‍ ഗുണകരമായി പ്രതിഫലിക്കുമെന്നതില്‍ സംശയമില്ല. ആചാരങ്ങള്‍ നമ്മളെപ്പോലെയുള്ള മനുഷ്യര്‍ ഉണ്ടാക്കിയതാണ്. നമ്മുടെയൊക്കെ മനസ്സുകളില്‍ നിന്ന് അതിന്റെ വേരുകള്‍ മായുമ്പോള്‍ എല്ലായിടത്തു നിന്നും അവ മാഞ്ഞു പൊയ്‌ക്കൊള്ളും. ശുഭദിനം.

കരിദിനാശംസകള്‍

പരമപരിശുദ്ധമായ ലോകമാതൃദിനം പൊട്ടിവിരിഞ്ഞു കഴിഞ്ഞു. ഇനി 24 മണിക്കൂര്‍ പെറ്റമ്മയുടെ അപദാനങ്ങള്‍ വര്‍ണിച്ചും അമ്മ, ഗര്‍ഭപാത്രം, മുലപ്പാല്‍ തുടങ്ങിയ വാക്കുകള്‍ വച്ചു കവിതകളെഴുതിയും അമ്മയെ കെട്ടിപ്പിടിച്ചോണ്ടിരിക്കുന്ന ചിത്രങ്ങള്‍ ഷെയര്‍ ചെയ്തും ഗൂഗള്‍ ഡൂഡില്‍ നോക്കിയിരുന്നും നമ്മള്‍ വമ്പിച്ച മാതൃദിനാഘോഷം നടത്തും. നാളെ മുതല്‍ എല്ലാം പഴയതുപോലെ. പെരുങ്കള്ളന്‍മാരും കള്ളികളുമായ, സ്വാര്‍ത്ഥതയുടെ മൂര്‍ത്തിരൂപങ്ങളായ നമുക്ക് ഇത്തരം ദിനാഘോഷങ്ങള്‍ വളരെ ഈസിയാണ്. അതുകൊണ്ട്, ഈ മാതൃദിനം കരിദിനമായി ആചരിച്ചുകൊണ്ട് 276 അമ്മമാരുടെ നിലയ്ക്കാത്ത കണ്ണീരിനൊപ്പം ഒരു പ്രാര്‍ഥനയര്‍പ്പിച്ചുകൊണ്ട് ഈ കരിദിനപോസ്റ്റ് ഞാന്‍ സമര്‍പ്പിക്കുന്നു.

ഒരു സംഘം ഭ്രാന്തന്‍മാര്‍ തട്ടിക്കൊണ്ടുപോയ നൈജീരിയയിലെ 276 പെണ്‍കുട്ടികളുടെ അമ്മമാരും ഇന്ന് മാതൃദിനത്തിലൂടെ കടന്നു പോവുകയാണ്. വില്‍പ്പനച്ചരക്കായി പകുതി ജീവനോടെ അവരില്‍ അവശേഷിക്കുന്ന പെണ്‍കുട്ടികള്‍ നാളത്തെ അമ്മമാരാണ്. ആഫ്രിക്കയിലെ അപ്രധാനമായ ആ സംഭവവികാസം മനസ്സില്‍ തട്ടാതെ അവഗണിച്ചുകൊണ്ട് മാതൃദിനം ആഘോഷിക്കുന്ന സംസ്‌കാരസമ്പന്നമായ ലോകത്തിന് ഒരു കൂപ്പുകൈ.

ആഫ്രിക്കയിലെ അമ്മമാര്‍ക്ക് ഈ മാതൃദിനത്തില്‍ നമ്മുടെ സരസമായ തൂലികത്തുമ്പുകളില്‍ എന്തു സന്ദേശമാണ് നല്‍കാനാവുന്നത് എന്നു പരിശോധിക്കുക. ഞാനും നിങ്ങളും ഉള്‍പ്പെടുന്ന ലോകത്തിലെ ഭൂരിപക്ഷമാളുകളും മാധ്യമങ്ങളും അവഗണിച്ചുപോയ അവരുടെ കണ്ണീരിനെ നമ്മുടെ ഏതു മാതൃസ്‌നേഹം കൊണ്ടാണ് ന്യായീകരിക്കാനാവുക എന്ന് അന്വേഷിക്കുക. ആഫ്രിക്കയിലും അമേരിക്കയിലും ഏഷ്യയിലും അമ്മയുടെ പ്രസവവേദനയ്ക്ക് ഒറ്റ അര്‍ഥമേയുള്ളൂ. അവള്‍ മുലയൂട്ടി വളര്‍ത്തുന്ന കുഞ്ഞിനോട് ഒരേയൊരു വികാരമേയുള്ളൂ. ഈ മാതൃദിനം കരിദിനമാവാന്‍ ലോകത്തിന് മറ്റൊരു കാരണം ആവശ്യമില്ല.

കാണാതായ മലേഷ്യന്‍ വിമാനത്തിന്റെ പേരില്‍ ആഴ്ചകളോളം കണ്ണീരൊഴുക്കിയ, കഥകള്‍ മെനഞ്ഞ മാധ്യമങ്ങളും ആഗോളവാര്‍ത്താ ഏജന്‍സികളും നൈജീരിയയിലെ 276 കുരുന്നുകളുടെ കാര്യത്തില്‍ ആശങ്കാകുലരല്ല. മലേഷ്യന്‍ വിമാനം കണ്ടെത്താന്‍ ചെലവഴിച്ചതിന്റെ ആയിരത്തിലൊന്നു സമയവും പണവും അധ്വാനവും മതി ഈ കുരുന്നുകളെ കണ്ടെത്താന്‍. 276 കറുത്ത കുട്ടികള്‍ കാട്ടില്‍ക്കിടന്നു മരിച്ചുപോവുന്നതില്‍ ആരും ആസ്വസ്ഥരല്ല. അവരുടെ കാര്യത്തിലുള്ള നമ്മുടെ നിസ്സംഗതയും നിര്‍വികാരതയും നമ്മള്‍ പരിഷ്‌കൃതമാതൃസ്‌നേഹങ്ങളിലൂടെ മറയ്ക്കും, മാതൃദിന സന്ദേശങ്ങളിലൂടെ പര്‌സപരം വിസ്മയിപ്പിക്കും.ഇറാക്കിലും പലസ്തീനിലും കുരുന്നുകളെ കൊന്നുതള്ളിയതില്‍ ഒരു വികാരവും തോന്നാത്ത സമൂഹത്തില്‍ നിന്ന് ഈ പ്രശ്‌നത്തില്‍ മാത്രം വ്യത്യസ്തമായൊരു പ്രതികരണം പ്രതീക്ഷിക്കേണ്ടതില്ല. കാലം ഏതായാലും രാജ്യം ഏതായാലും എല്ലാ കണക്കുതീര്‍ക്കലുകള്‍ക്കും ഇരയാവുന്നത് ഒന്നുമറിയാത്ത കുരുന്നുകളാണ്. തീരാവേദനയില്‍ നരകിച്ചു ജീവിക്കുന്നത് ലക്ഷക്കണക്കിന് അമ്മമാരും.

ബൊക്കോ ഹറാം നൈജിരിയയില്‍ 276 പെണ്‍കുട്ടികളെ തട്ടിക്കൊണ്ടു പോയിട്ട് മാസം ഒന്നു തികയാറായി. അവരില്‍ എത്ര പേര്‍ ജീവനോടെ അവശേഷിക്കുന്നുണ്ട് എന്നു നമുക്കറിയില്ല. ഒരു തെറ്റും ചെയ്യാത്ത ആ കുരുന്നുകള്‍ അവിടെ മരണത്തിലേക്കു നടന്നു നീങ്ങുമ്പോള്‍ നന്മ നിറഞ്ഞ വിശാലലോകത്തു നിന്ന് എന്തുകൊണ്ടാണ് ആരും തങ്ങളെ രക്ഷിക്കാന്‍ വരാത്തതെന്ന് അവര്‍ ദൈവത്തോടു ചോദിക്കുന്നുണ്ടാവും. അതിനുത്തരം പറയേണ്ടത് ഈ മാതൃദിനത്തെ അവിസ്മരണീയമാക്കാന്‍ പരിപാടികളാവിഷ്‌കരിക്കുന്ന നമ്മളോരോരുത്തരുമാണ്. ഈ മാതൃദിനത്തിന്റെ മനോഹാരിതയെ ആ കുരുന്നുകളുടെ ചോരയും അമ്മമാരുടെ കണ്ണീരും കൊണ്ടാണ് നമ്മള്‍ അടയാളപ്പെടുത്തുന്നത്.

നൈജിരിയില്‍ മാത്രം ഇങ്ങനെ സംഭവിക്കുന്നത് ബൊക്കൊ ഹറാം ലോകം കണ്ടിട്ടില്ലാ വിധം കരുത്താര്‍ജ്ജിച്ച ഭീകരസംഘടയായതുകൊണ്ടല്ല. രാജ്യപുരോഗതിക്കു വേണ്ടി അമേരിക്ക ഉള്‍പ്പെടെയുള്ള ലോകരാജ്യങ്ങളുടെ കയ്യില്‍ നിന്നും കോടിക്കണക്കിനു ഡോളര്‍ വാങ്ങി വിഴുങ്ങുന്ന ഗുഡ്‌ലക്ക് ജൊനാതന്‍ എന്ന ആണും പെണ്ണും കെട്ട പ്രസിഡന്റാണ് ആ നാടിന്റെ ശാപം. അഴിമതിയില്‍ മുങ്ങിക്കുളിച്ച നാണംകെട്ട ഭരണത്തില്‍ പൊട്ടിമുളച്ച വിഷവിത്താണ് ബൊക്കോ ഹറാം. ആയിരക്കണക്കിനാളുകളെ അവര്‍ കൊന്നൊടുക്കയും നൂറുകണക്കിനു പേരെ ഇത്തരത്തില്‍ തട്ടിക്കൊണ്ടു പോവുകയും ചെയ്തത് സംഘടന അത്ര ശക്തമായതുകൊണ്ടല്ല. ആ രാജ്യത്തെ ഭരണസവിധാനം അത്രയെറെ ദൂര്‍ബലമായതുകൊണ്ടാണ്.

നമ്മള്‍ വിചാരിച്ചാല്‍ പരിഹരിക്കാന്‍ കഴിയുന്നതല്ല നൈജീരിയയിലെ പ്രശ്‌നം. എന്നാല്‍, ആര്‍ക്കും പരിഹരിക്കാനാവാത്ത വിധം സങ്കീര്‍ണവുമല്ല. ലോകത്തെ തന്നെ നിയന്ത്രിക്കുന്ന ഭരണാധികാരികളും മാധ്യമങ്ങളും അവഗണിക്കുന്ന ഒരു പ്രതിസന്ധിയില്‍ നമ്മുടെ അഭിപ്രായങ്ങള്‍ ഒരു ചലനവും സൃഷ്ടിക്കില്ല. മാതൃസ്‌നേഹം വഴിഞ്ഞൊഴുകുന്ന ഈ മാതൃദിനത്തില്‍ ആ കുരുന്നുകളെയും അമ്മമാരെയും ഓര്‍ക്കാനെങ്കിലും കഴിയുന്നില്ലെങ്കില്‍ നമ്മുടെ അമ്മമാരെ നമ്മള്‍ നാണം കെടുത്തുകയാണ് ചെയ്യുന്നത്. നൈജിരിയിലെ കുഞ്ഞുങ്ങള്‍ക്കു വേണ്ടി, അവരുടെ അമ്മമാര്‍ക്കു വേണ്ടി ഈ മാതൃദിനം കരിദിനമായി ആചരിക്കുന്നതില്‍ അമ്മമാര്‍ അഭിമാനിക്കുകയേയുള്ളൂ.

പുളുന്താന്‍ പ്രസിഡന്റിനു കീഴില്‍ നിന്നു കൊണ്ട് ലോകത്തോട് സഹായമഭ്യര്‍ഥിക്കുന്ന, നൈജിരിയയുടെ ശബ്ദം കേള്‍ക്കാതെ പോകരുത്. പ്രമുഖ നൈജീരിയന്‍ നടി സ്റ്റെല്ല ദമാസസിന്റെ ഈ വിഡിയോ കൂടി കാണുക. കരിദിനാശംസകള്‍ !

ബ്ലൂഫിലിം ഡെമോക്രസി

ഈ അടുത്ത കാലത്ത് കേട്ടത്തില്‍ വച്ച് ഏറ്റവും അബദ്ധം നിറഞ്ഞതും അടിസ്ഥാനരഹിതവുമായ ഒരു വിശദീകരണമാണ് കഴിഞ്ഞ ദിവസം സര്‍ക്കാര്‍ വക്കീല്‍ സുപ്രീം കോടതിയില്‍ സമര്‍പ്പിച്ചതായി റിപ്പോര്‍ട്ട് ചെയ്തു കണ്ടത്. കോടതിനടപടികള്‍ റിപ്പോര്‍ട്ട് ചെയ്ത മാധ്യമങ്ങളൊന്നും സര്‍ക്കാര്‍ നിലപാടിന്റെ സുതാര്യതയോ യാഥാര്‍ഥ്യമോ പരിശോധിച്ചതായി കണ്ടില്ല. സിപിഎം നേതാവിന്റെ അവിഹിതബന്ധം പോലും ഘോരമായ സദാചാരധ്വംസനമായി കാണുന്നവര്‍ രാജ്യത്തെ ഏറ്റവും വലിയ സാമൂഹികദുരന്തങ്ങളിലൊന്നിനോട് കേന്ദ്രസര്‍ക്കാര്‍ പുലര്‍ത്തിയ മൃദുസമീപനത്തില്‍ ഞെട്ടിയില്ല എന്നത് ആശ്ചര്യജനകമാണ്.

പറഞ്ഞു വരുന്നത് ഇന്റര്‍നെറ്റിലെ അശ്ലീല വെബ്‌സൈറ്റുകള്‍ക്കു (Internet Pornography) രാജ്യത്ത് നിരോധനം ഏര്‍പ്പെടുത്തുന്നതിനെ സംബന്ധിച്ച് കേന്ദ്രസര്‍ക്കാര്‍ കഴിഞ്ഞ ദിവസം സുപ്രീം കോടതിയില്‍ നല്‍കിയ വിശദീകരണമാണ്. അതു സംബന്ധിച്ച വാര്‍ത്ത ഇങ്ങനെ.

അശ്ലീല വെബ്‌സൈറ്റുകള്‍ എല്ലാം നിരോധിക്കാനാവില്ലെന്ന് കേന്ദ്രം. ഇത്തരം സൈറ്റുകള്‍ നിരോധിക്കുമ്പോള്‍ അശ്ലീല വാക്കുകളോട് സാമ്യമുള്ള മറ്റു ഉള്ളടക്കങ്ങള്‍ ഇന്റര്‍നെറ്റില്‍ ലഭ്യമാകില്ല. അങ്ങനെ വന്നാല്‍ സാഹിത്യ ഉള്ളടക്കങ്ങളെ ഇത് സാരമായി ബാധിക്കുമെന്നും കേന്ദ്രം അറിയിച്ചു. പോണോഗ്രാഫിക് വെബ്‌സൈറ്റുകള്‍ ബ്ലോക്ക് ചെയ്യാവുന്ന സോഫ്റ്റ് വെയര്‍ എല്ലാ കംപ്യൂട്ടറുകളിലും ഉള്‍പ്പെടുത്തണമെന്നും കംപ്യൂട്ടര്‍ നിര്‍മാതാക്കള്‍ക്ക് ഇത് സംബന്ധിച്ച നിര്‍ദേശം നല്‍കണമെന്നും കേന്ദ്ര സര്‍ക്കാര്‍ സുപ്രീംകോടതിയെ അറിയിച്ചു.

സ്ത്രീകള്‍ക്കെതിരായ അതിക്രമം തടയാന്‍ അശ്ലീല സൈറ്റുകള്‍ നിരോധിക്കണമെന്നാവശ്യപ്പെട്ട് ഇന്‍ഡോറിലെ അഭിഭാഷകന്‍ കമലേഷ് വശ്വനി സമര്‍പ്പിച്ച ഹര്‍ജിയിലാണ് കേന്ദ്രത്തിന്റെ വിശദീകരണം. ഇന്റര്‍നെറ്റ് ഉപയോഗത്തിന് വേണ്ടത്ര നിയന്ത്രണങ്ങളില്ലാത്തതിനാല്‍ ജനങ്ങളെ അശ്ലീല സൈറ്റുളിലേക്ക് അടുപ്പിക്കുന്നതായും ഏകദേളം 20 കോടിയിലേറെ പോണോഗ്രാഫിക് സൈറ്റുകള്‍ സൗജന്യമായി ഇന്റര്‍നെറ്റില്‍ ലഭ്യമാണെന്നും ഹര്‍ജിക്കാരന്‍ ചൂണ്ടിക്കാട്ടി. കുട്ടികളടക്കമുള്ളവര്‍ ഇത് കാണുന്നത് സമൂഹത്തിനും നാടിന്റെ ക്രമസമാധാനത്തിനും ഭീഷണിയാണെന്നും ഹര്‍ജിയില്‍ പറയുന്നു. സ്ത്രീകള്‍ക്കും കുട്ടികള്‍ക്കുമെതിരായ അതിക്രമങ്ങള്‍ക്കെല്ലാം പിന്നില്‍ അശ്ലീല സൈറ്റുകള്‍ക്ക് പങ്കുണ്ടെന്നും ചെറിയ കുട്ടികള്‍ വരെ പീഡനത്തിനിരയാകുന്നത് ഉത്കണ്ഠ ജനിപ്പിക്കുന്നതായും ഹര്‍ജിക്കാരന്‍ ചൂണ്ടിക്കാട്ടി.

ഇതേ കേസില്‍ ഒരാഴ്ച മുമ്പ് ഇന്റര്‍നെറ്റ് സേവനദാതാക്കള്‍ കോടതിയല്‍ നല്‍കിയ വിശദീകരണം ഇങ്ങനെയാണ്:

കേന്ദ്രസര്‍ക്കാറിന്റെയോ കോടതിയുടെയോ നിര്‍ദേശമില്ലാതെ അശ്ലീലസൈറ്റുകള്‍ തടയാന്‍ കഴിയില്ലെന്ന് ഇന്റര്‍നെറ്റ് സേവനദാതാക്കള്‍ സുപ്രീംകോടതിയെ അറിയിച്ചു. ടെലികോം മന്ത്രാലയം നല്‍കിയ ലൈസന്‍സുകള്‍ പ്രകാരം വെബ്‌സൈറ്റുകളിലെ ഉള്ളടക്കം നിയന്ത്രിക്കാന്‍ സേവനദാതാക്കള്‍ക്ക് അനുമതിയില്ല. മന്ത്രാലയത്തിന്റെയോ കോടതിയുടെയോ വ്യക്തമായ നിര്‍ദേശത്തിന്റെ അടിസ്ഥാനത്തില്‍ മാത്രമേ സൈറ്റുകള്‍ തടയാവൂവെന്ന് നിലവിലെ ചട്ടങ്ങളില്‍ പറയുന്നുണ്ട്.

എന്താണ് അശ്ലീലമെന്നും സൈറ്റില്‍ അനുവദിക്കാവുന്നത് ഏതാണെന്നും തീരുമാനിക്കാനുള്ള നിയമപരവും സ്ഥാപനപരവുമായ കഴിവ് ഇന്റര്‍നെറ്റ് സേവനദാതാക്കള്‍ക്കില്ലെന്ന് മറുപടിയില്‍ ചൂണ്ടിക്കാട്ടുന്നു. ഒരാള്‍ക്ക് അശ്ലീലമെന്ന് തോന്നുന്നത് മറ്റൊരാള്‍ക്ക് കലയായിരിക്കും. ടെലികോം മന്ത്രാലയമോ കോടതിയോ നിര്‍ദേശിക്കുന്ന എല്ലാ സൈറ്റുകളും തടയാന്‍ സേവനദാതാക്കളെന്ന നിലയില്‍ തയ്യാറാണെന്നും സേവനദാതാക്കള്‍ സുപ്രീംകോടതിയെ അറിയിച്ചു.

പോര്‍ണോഗ്രഫിക്ക് ഒരു തരത്തിലും നിയന്ത്രണം ഏര്‍പ്പെടുത്താനാവില്ലെന്ന നിലപാട് സോഷ്യല്‍ മീഡിയ സ്വീകരിച്ചത് ആഹ്ലാദാരവങ്ങളോടെയാണ്. എവിടെയും ആര്‍ക്കും ഒരു ഞെട്ടലും കണ്ടില്ല. പോര്‍ണോഗ്രഫി നിരോധിക്കണം എന്നു പറയുന്നവര്‍ പഴഞ്ചനും സദാചാരവാദികളുമാണെന്നു മുദ്രകുത്തപ്പെടു ഭയന്നാവാം നിരോധനം വേണമെന്നഭിപ്രായമുള്ളവരും മിണ്ടിയില്ല. അശ്ലീല വെബ്‌സൈറ്റുകള്‍ നിരോധിക്കാനാവില്ലെന്ന കേന്ദ്രസര്‍ക്കാര്‍ നിലപാട് ശുദ്ധ തട്ടിപ്പും പച്ചക്കള്ളവുമാണെന്നാണ് എന്റെ വ്യക്തിപരമായ അഭിപ്രായം.

പോര്‍ണോഗ്രഫി നിരോധിച്ചാല്‍ ശുദ്ധസാഹിത്യത്തിന് ഉടവുതട്ടുമെന്നും അക്കാദമിക് ഉള്ളടക്കമുള്ളവ നഷ്ടമാകുമെന്നുള്ള വാദമാണ് ഇതില്‍ ഏറ്റവും രസകരം. പോണ്‍, സെക്‌സ് തുടങ്ങിയ ടാഗുകള്‍ അടിസ്ഥാനമാക്കി മൊത്തം ഇന്റര്‍നെറ്റ് ട്രാഫിക്കിനെ തന്നെ നിയന്ത്രിക്കാന്‍ ശ്രമിച്ചാല്‍ സര്‍ക്കാര്‍ വക്കീല്‍ പറഞ്ഞതുപോലെ അതുമായി ബന്ധപ്പെട്ട സാഹിത്യവും കോപ്പുമൊക്കെ ബ്ലോക്ക് ചെയ്യപ്പെടും. ഒരു സാധാരണ ഫയര്‍വോള്‍ ചെയ്യുന്നതും അതു തന്നെയാണ്. എന്നാല്‍, ഹര്‍ജിക്കാരന്‍ ആവശ്യപ്പെട്ടതും പ്രായോഗികമായി നടപ്പാവുന്നതും അശ്ലീലവെബ്‌സൈറ്റുകള്‍ അവയുടെ ഐപി അഡ്രസ് അടിസ്ഥാനമാക്കി ബ്ലോക്ക് ചെയ്യുക എന്നതാണ്. അങ്ങനെ ബ്ലോക്ക് ചെയ്യുമ്പോള്‍ ആ വെബ്‌സൈറ്റുകളല്ലാതെ മറ്റൊന്നും ബ്ലോക്ക് ചെയ്യപ്പെടില്ല എന്നത് സാധാരണ ഇന്റര്‍നെറ്റ് കഫേക്കാരനു പോലും അറിയാം. ഇത്തരം വെബ്‌സൈറ്റുകള്‍ ലക്ഷക്കണക്കിനുണ്ടെങ്കിലും 90 ശതമാനം ആളുകളും സന്ദര്‍ശിക്കുന്നത് പത്തോ ഇരുപതോ പ്രമുഖ സൈറ്റുകളാണ്. സൗജന്യമായി കാണുകയും എത്രവോണമെങ്കിലും ഡൗണ്‍ലോഡ് ചെയ്യുകയും ചെയ്യാമെന്നതു തന്നെയാണ് ഇവയുടെ ആകര്‍ഷണം.

അപ്പോള്‍, പ്രായോഗിക ബുദ്ധിമുട്ട് ചൂണ്ടിക്കാട്ടി പോര്‍ണോഗ്രഫിക്ക് വിലക്കേര്‍പ്പെടുത്താന്‍ സര്‍ക്കാര്‍ മടിക്കുന്നതിന്റെ കാരണം എന്തായിരിക്കും ? ആശ്ലീല വെബ്‌സൈറ്റുകളും ഫെയ്‌സ്ബുക്കും യു ട്യൂബും ഗൂഗിളും ചേര്‍ന്നാല്‍ ഇന്ത്യയെ സംബന്ധിച്ച് ഇന്റര്‍നെറ്റായി എന്നു പറയാം. പോര്‍ണോഗ്രഫിക്ക് നിയന്ത്രണം വന്നാല്‍ ഇന്ത്യയിലെ മൊത്തം ഇന്റര്‍നെറ്റ് ട്രാഫിക്കിലും ഗണ്യമായ കുറവുണ്ടാകും എന്നു ചുരുക്കം. സര്‍ക്കാരും ഇന്റര്‍നെറ്റ് സര്‍വീസ് പ്രൊവൈഡര്‍മാരും കൂടി കുറവനും കുറത്തീം കളിക്കുമ്പോള്‍ പോര്‍ണോഗ്രഫിയെ ആവിഷ്‌കാരസ്വാതന്ത്യത്തിന്റെ മകുടോദാഹരണമായി ചൂണ്ടിക്കാണിക്കാനും വിഡ്ഡികളുണ്ട്.

ഇവിടെ പ്രശ്‌നം ബ്ലൂഫിലിം ജനങ്ങള്‍ കാണണോ വേണ്ടയോ എന്നതല്ല. അതിന്റെ ലഭ്യതയിലും നിലവാരത്തിലും ചില മാനദണ്ഡങ്ങള്‍ ഏര്‍പ്പെടുത്തണോ വേണ്ടയോ എന്നതാണ്. നിലവില്‍ ഇന്റര്‍നെറ്റ് ഉപയോഗിക്കുന്ന ഏതൊരാള്‍ക്കും കൊച്ചുകുട്ടികള്‍ ഉള്‍പ്പെടെ ഒറ്റ ക്ലിക്കിനപ്പുറം പോര്‍ണോഗ്രഫി ലഭ്യമാണ്. പലര്‍ക്കും ആസ്വാദ്യകരമായി തോന്നുന്ന ദൃശ്യങ്ങള്‍ ആദ്യമായി കാണുന്ന ഒരു കുട്ടിയെ സംബന്ധിച്ച് അതിന്റെ ട്രോമ ഏറെക്കാലം നിലനില്‍ക്കും. ആദ്യത്തെ ഞെട്ടല്‍ കൗതുകവും കൗതുകം വിസ്മയവും വിസ്മയം അഡിക്ഷനുമായി മാറാന്‍ അധികകാലം വേണ്ട. പ്രായപൂര്‍ത്തിയായ ആളുകള്‍ എന്തു കുന്തം വേണമെങ്കിലും കാണട്ടെ. കുട്ടികളിലേക്ക് ഇത്തരം സൈറ്റുകള്‍ എത്തുന്നതിന് ഒരു നിയന്ത്രണവും ഏര്‍പ്പെടുത്താന്‍ കഴിയില്ലെങ്കില്‍ അഞ്ചാം ക്ലാസ്സുകാരന്‍ ഒന്നാം ക്ലാസ്സുകാരിയെ ബലാല്‍സംഗം ചെയ്യുമ്പോഴും 12 വയസ്സുകാരന്‍ 80 വയസ്സുകാരിലെ ബലാല്‍സംഗം ചെയ്യുമ്പോഴും ഞെട്ടേണ്ട കാര്യമില്ല.

മദ്യവും മയക്കുമരുന്നും സൃഷ്ടിക്കുന്നതിനെക്കാള്‍ ഗുരുതരവും ദൂരവ്യാപകവുമായ പ്രത്യാഘാതകങ്ങളും സാമൂഹികജീര്‍ണതയും വരുത്തി വയ്ക്കുന്നതാണ് പോര്‍ണോഗ്രഫി. നിരോധിക്കണമെന്നല്ല, അതിന്റെ അനര്‍ഗളമായ ലഭ്യതയില്‍ എന്തെങ്കിലും നിയന്ത്രണം ഏര്‍പ്പെടുത്തിയില്ലെങ്കില്‍ കാര്യങ്ങള്‍ കൈവിട്ടുപോകും. എല്ലാ മാതാപിതാക്കളും ഫയര്‍വോള്‍ സ്ഥാപിക്കുന്നതും കുട്ടികളുടെ ഇന്റര്‍നെറ്റ് ഉപയോഗം നിരീക്ഷിക്കുകയും ചെയ്യുകയാണ് പരിഹാരമെന്നൊക്കെ പറയാമെന്നേയുള്ളൂ. മൊബൈല്‍ ഫോണ്‍ മുതലങ്ങോട്ട് ഇന്റര്‍നെറ്റ് കണക്ടിവിറ്റിയുള്ള എന്തിലും പോര്‍ണോഗ്രഫിയും സുലഭമാണ് എന്നിരിക്കെ അതൊന്നും പ്രായോഗികപരിഹാരമല്ല.

കുട്ടികള്‍ക്ക് അടിസ്ഥാന ലൈംഗികവിദ്യാഭ്യാസം നല്‍കുന്നത് പോലും ആര്‍ഷഭാരത സംസ്‌കാരത്തിനു ചേര്‍ന്നതല്ല എന്നു കരുതുന്നവര്‍ ആശ്ലീലവെബ്‌സൈറ്റുകള്‍ക്കു ഒരു നിയന്ത്രണവും ഏര്‍പ്പെടുത്താനാവില്ലെന്നു പറയുന്നതിനെക്കാള്‍ വലിയ വിരോധാഭാസമില്ല. സ്വന്തം ലൈഗിക വ്യക്തിത്വം എന്താണെന്നു മനസ്സിലാക്കുന്നതിനു മുന്‍പേ കുട്ടികള്‍ ബ്ലോജോബും റിംജോബും പരിശീലിക്കുകയും പെണ്ണായി പിറന്നവരെല്ലാം സദാ സെക്‌സിനായി ദാഹിച്ചു നടക്കുകയാണെന്നു ധരിക്കുകയും ചെയ്തിട്ടുണ്ടെങ്കില്‍ അതിന്റെ ക്രെഡിറ്റ് നാട്ടുകാരുടെ പ്രിയപ്പെട്ട കമ്പി സൈറ്റുകള്‍ക്കാണ്. മദ്യവിരുദ്ധ പ്രസ്ഥാനങ്ങളും മദ്യലോബിക്കെതിരെ പോരാടുന്ന സൂപ്പര്‍ സ്റ്റാറുകളുമുള്ള നാട്ടില്‍ ഒരു പോര്‍ണോഗ്രഫി വിരുദ്ധ സംഘനയോ ആന്റി പോര്‍ണോ മൂവ്‌മെന്റോ ഇല്ല എന്നത് കഷ്ടമാണ്. കുട്ടികള്‍ക്ക് എങ്കിലും ലൈഗികത എന്താണെന്നു ശരിയായ രീതിയില്‍ മനസ്സിലാക്കാന്‍ ഇനിയെങ്കിലും അവസരമൊരുക്കണം.

ഗുണപാഠം- ബ്ലൂഫിലിം കണ്ടിട്ട് സെക്‌സ് എന്താണെന്നു പഠിക്കുന്നതും മലയാളം മെഗാസീരിയല്‍ കണ്ട് കുടുംബബന്ധങ്ങളെക്കുറിച്ച് പഠിക്കുന്നതും ഒരുപോലെയാണ്.

സുഗതകുമാരി ടീച്ചറെ പാഠം പഠിപ്പിക്കുമ്പോള്‍

സുഗതകുമാരി ടീച്ചറിനെതിരെ സോഷ്യല്‍ മീഡിയയില്‍ ഫെമിനിസ്റ്റുകളുടെയും സ്വാതന്ത്ര്യവാദികളുടെയും ധാര്‍മികരോഷം തിളച്ചുമറിയുകയാണ്. പെണ്‍കുട്ടികള്‍ക്ക് മൊബൈല്‍ ഫോണ്‍ വാങ്ങിക്കൊടുക്കരുതേ എന്നു ടീച്ചര്‍ അമ്മമാരോടു നടത്തിയ അപേക്ഷയ്ക്കുള്ള മറുപടിയായി ടീച്ചറെ പുരോഗമനം പഠിപ്പിക്കാനുള്ള ശ്രമത്തിലാണ് ന്യൂ ജനറേഷന്‍ തൈക്കിളവന്‍മാരും ഫ്രസ്‌ട്രേറ്റഡ് ഡെസ്പരേറ്റ് ഫെമിന്സ്റ്റുകളും. അവരോട് രണ്ടേ രണ്ടു കാര്യങ്ങളേ പറയാനുള്ളൂ. ഒന്ന്, അനുഭവങ്ങളുടെ വെളിച്ചത്തില്‍ സംസാരിക്കുന്ന ടീച്ചറെ അഹന്തയുടെ സ്റ്റാറ്റസ് കൊണ്ട് പാഠം പഠിപ്പിക്കാന്‍ ശ്രമിക്കരുത്. രണ്ട്, ടീച്ചര്‍ സംസാരിച്ചത് സ്‌കൂളില്‍ പഠിക്കുന്ന പെണ്‍കുട്ടികളുടെ അമ്മമാരോടാണ്. അതിന്റെ പൊരുള്‍ അവര്‍ക്കു മനസ്സിലാവുകയും ചെയ്യും.

സുഗതകുമാരി ടീച്ചര്‍ ഏതു കാലത്താണ് ജീവിക്കുന്നതെന്നാണ് പലരും ചോദിക്കുന്നത്. മൊബൈല്‍ ഫോണ്‍ ഇല്ലാതെ ഇന്നത്തെ കാലത്ത് എങ്ങനെ ജീവിക്കാനാവുമെന്നും ഏജ് ഓവറായതുകൊണ്ട് പുതുതലമുറയുടെ ആവശ്യങ്ങള്‍ ടീച്ചര്‍ക്ക് അനാവശ്യമാണെന്നു തോന്നുന്നതാണെന്നും ഒരു വിഭാഗം വാദിക്കുമ്പോള്‍ സ്ത്രീപക്ഷ രാഷ്ട്രീയം 90 ഡിഗ്രി ഉയര്‍ത്തിപ്പിടിച്ചിരിക്കുന്നവരുടെ രോഷം മറ്റൊരു വഴിക്കാണ്. മൊബൈല്‍ ഫോണ്‍ ഉള്ള പെണ്‍കുട്ടികള്‍ വഴി തെറ്റിപ്പോവുമെന്നും മിസ്ഡ് കോള്‍ വഴി പെണ്‍കുട്ടികള്‍ ചീത്തയായിപ്പോവുമെന്നും പറയാന്‍ മാത്രം സ്ത്രീവിരുദ്ധയാണോ ടീച്ചര്‍ എന്നാണ് അവര്‍ ചോദിക്കുന്നത്.

പ്രധാനമായും ടീച്ചറുടെ അഭ്യര്‍ഥന കേരളത്തിലെ പൊതുസമൂഹത്തോടുള്ളതായിരുന്നില്ല. തിരുവനന്തപുരം കോട്ടണ്‍ഹില്‍ സ്‌കൂളിലെ പൂര്‍വ വിദ്യാര്‍ഥി സംഗമത്തില്‍ പങ്കെടുക്കുമ്പോഴാണ് ടീച്ചര്‍ ഇക്കാര്യം പറഞ്ഞത്. അതായത് പെണ്‍പള്ളിക്കൂടത്തിലെ വിദ്യാര്‍ഥികളുടെ അമ്മമാരോടാണ് പെണ്‍കുട്ടികള്‍ക്ക് മൊബൈല്‍ വാങ്ങിക്കൊടുക്കരുതെന്നു ടീച്ചര്‍ പറഞ്ഞത്. ഇന്ത്യയിലും വിദേശത്തും സ്‌കൂളുകള്‍ കുട്ടികള്‍ മൊബൈല്‍ ഫോണ്‍ കൊണ്ടുവരുന്നത് പ്രോല്‍സാഹിപ്പിക്കുന്നതായി കേട്ടിട്ടില്ല എന്നു മാത്രമല്ല, പല സ്‌കൂളുകളും ഫൈനും ഇടാക്കാറുണ്ട്. പിന്നെ ഏതു സാഹചര്യത്തിലാണ് സൂഗതകുമാരി ടീച്ചര്‍ പറഞ്ഞത് വിവരക്കേടായി മാറുന്നത് എന്നു മനസ്സിലാവുന്നില്ല. ഇനി ടീച്ചറെ വിമര്‍ശിക്കുന്നവരില്‍ എത്ര പേര്‍ സ്‌കൂളില്‍ പഠിക്കുന്ന പെണ്‍മക്കള്‍ക്ക് മൊബൈല്‍ ഫോണ്‍ വാങ്ങി നല്‍കുകയും അത് സ്വതന്ത്രമായി യഥേഷ്ടം ഉപയോഗിക്കാന്‍ അനുമതി നല്‍കുകയും ചെയ്യും ?

ഫെമിനിസ്റ്റുകളുടെയും അവരുടെ ആരാധകരുടെയും പ്രശ്‌നം ഇതൊന്നുമല്ല. മൊബൈല്‍ ഫോണ്‍ സ്വന്തമായുള്ള സ്‌കൂള്‍ വിദ്യാര്‍ഥിനികള്‍ വഴിപിഴച്ചുപോകാന്‍ സാധ്യത ഏറെയാണ് എന്നു പറയാന്‍ ടീച്ചര്‍ക്കെങ്ങനെ ധൈര്യം വന്നു എന്നാണ് അവര്‍ ചോദിക്കുന്നത്. അങ്ങനെ പറയുന്നതിലൂടെ ടീച്ചര്‍ ഈ പെണ്‍കുട്ടികളുടെ ധാര്‍മികബോധത്തെ അവഹേളിക്കുകയും അവരുടെ സ്ത്രീസത്തയെ കരിവാരിതേക്കുകയും ചെയ്തു എന്നാണ് പ്രധാന ആരോപണം. നൂറുകണക്കിനു പെണ്‍കുട്ടികള്‍ വല്ലവരുടേയും കൂടെപ്പോയി അകാലത്തില്‍ ഗര്‍ഭമുണ്ടാക്കുകയും, അപ്രത്യക്ഷരാവുകയും, ആത്മഹത്യ ചെയ്യുകയും ചെയ്യുന്ന കേരളത്തില്‍ അതിന്റെയൊന്നും മൂലകാരണങ്ങള്‍ അറിയാതെ ദൈനംദിനം ഇത്തരം പ്രശ്‌നങ്ങളിലിടപെടുന്ന സുഗതകുമാരി ടീച്ചര്‍ നല്‍കിയ മുന്നറിയിപ്പിനെതിരെ പൊട്ടിത്തെറിക്കുന്ന ഫെമിനിസ്റ്റുകള്‍ക്കും ഭക്തന്‍മാര്‍ക്കും നല്‍കാന്‍ മുഖമടച്ചൊരാട്ട് മാത്രമേ ബാക്കിയുള്ളൂ.

ഫെയ്‌സ്ബുക്ക് അക്കൗണ്ടില്ലാതെ, ആണുങ്ങളെ ഡാ മയിരേ എന്നു വിളിക്കുന്നത് വിപ്ലവമാണെന്നറിയാതെ, വിഹ്വലതകളുള്ള മനസ്സുകളുമായി ആയിരക്കണക്കിനു പെണ്‍കുട്ടികള്‍ ഈ നാട്ടില്‍ ജീവിക്കുന്നുണ്ട്. കൗമാരപ്രായത്തില്‍ അവര്‍ക്കു വേണ്ടത് മൊബൈല്‍ ഫോണുകളല്ല, അമ്മയുടെ സ്‌നേഹവും കൈത്താങ്ങും അച്ഛന്റെ കരുത്തിന്റെ തണലുമാണ് എന്നറിയാവുന്ന കേരളത്തിലെ അപൂര്‍വം സാംസ്‌കാരികനേതാക്കളിലൊരാളാണ് സുഗതകുമാരി ടീച്ചര്‍. അവരുടെ അപേക്ഷ എല്ലാവരും ചെവിക്കൊള്ളണമെന്നില്ല, പക്ഷെ അവരെ തിരുത്താന്‍ മാത്രം ലോകപരിചയമുള്ളവരാണ് തങ്ങളെന്നു വിശ്വസിച്ചുകൊണ്ട് വിവരക്കേടുകള്‍ ആധികാരികമായി അവതരിപ്പിക്കുന്നത് മ്ലേച്ഛമാണ്.

മൊബൈല്‍ ഫോണ്‍ വാങ്ങിക്കൊടുത്താല്‍ പെണ്‍കുട്ടികള്‍ വഴി തെറ്റിപ്പോവും എന്ന പ്രസ്താവനയെ രാജ്യാന്തരനിലവാരത്തില്‍ വച്ചു വിലയിരുത്തതുകൊണ്ടാണ് പലര്‍ക്കും തെറ്റു പറ്റിപ്പോവുന്നത്. കേരളത്തില്‍ സംഭവിക്കുന്നത് എന്താണെന്നു പോലും അറിയാത്തവര്‍ അമേരിക്കയിലെയും ജപ്പാനിലെയും ദുബായ്‌ലിയെും പെണ്‍കുട്ടികളെപ്പോലെയാണ് കേരളത്തിലെ പെണ്‍കുട്ടികള്‍ എന്നു വിചാരിക്കുന്നത് വിഡ്ഡിത്തമാണ്. മൊബൈല്‍ ഫോണ്‍ വാങ്ങിക്കൊടുത്താലും എന്റെ മകള്‍ വഴി തെറ്റില്ല എന്ന് ഒരച്ഛന് ഉറച്ചു പറയാന്‍ കഴിയുമെങ്കില്‍ അത് നല്ലതാണ്. എന്നാല്‍, മൊബൈല്‍ ഫോണ്‍ വാങ്ങിക്കൊടുത്താല്‍ ഒരു പെണ്‍കുട്ടിയും വഴി തെറ്റില്ല എന്നു പറയാന്‍ അവര്‍ക്കാവില്ല. കേരളത്തില്‍ വഴി തെറ്റിപ്പോവുന്ന അഥവാ ചൂഷണങ്ങള്‍ക്കിരയായി ജീവിതം നശിച്ചുപോവുന്ന പെണ്‍കുട്ടികള്‍ 95 ശതമാനവും കുരുങ്ങുന്ന ചൂണ്ട മൊബൈല്‍ ഫോണ്‍ ആണെന്നത് കേരളാ പൊലീസിന്റെ കേസ് ഡയറികളില്‍ നിന്നു തന്നെ വ്യക്തമാണ്. ടീച്ചര്‍ പറയുന്നത് യാഥാര്‍ഥ്യങ്ങളുടെ അടിസ്ഥാനത്തിലാണ്. തിയറികളിലൂടെ വിപ്ലവം സൃഷ്ടിക്കാമെന്നു കരുതുന്നവര്‍ക്ക് അത് മനസ്സിലാകണം എന്നു നിര്‍ബന്ധമില്ല.

സ്ത്രീസ്വാതന്ത്ര്യം വലിയൊരു സംഭവം തന്നെയാണ്. എന്നാല്‍, അതിനെക്കാള്‍ പ്രധാനമാണ് സ്ത്രീസുരക്ഷ. ഫെമിനിസ്റ്റുകളെന്നു സ്വയം വിളിച്ച് വല്ലവരുടെയും പെണ്‍മക്കളെ പുകവലിക്കാനും തെറിവിളിക്കാനും പഠിപ്പിക്കുന്നത് സ്ത്രീപക്ഷ രാഷ്ട്രീയം ഉയര്‍പ്പിടിക്കലല്ല. മിസ്ഡ് കോളുകള്‍ വഴി പെണ്‍കുട്ടികളെ വളച്ചെടുത്തുകൊണ്ടുപോയി ദുരുപയോഗിക്കുന്ന മാഫിയകള്‍ കേരളത്തില്‍ സജീവമായി നില്‍ക്കുമ്പോള്‍ പെണ്‍കുട്ടികളുടെ മാതാപിതാക്കളെ സംബന്ധിച്ച് അവര്‍ പ്ലസ് ടു പാസ്സാകും വരെയെങ്കിലും മൊബൈല്‍ ഫോണ്‍ വാങ്ങി നല്‍കാതിരിക്കുക എന്നത് മാതൃകാപരമായ തീരുമാനമാണ്. മറ്റുള്ളവരുടെ പെണ്‍മക്കള്‍ അജ്ഞാതരായ ആളുകളോടൊപ്പം അപ്രത്യക്ഷരാകുന്ന വാര്‍ത്തകള്‍ വായിച്ച് നെടുവീര്‍പ്പിടാന്‍ നല്ല രസമാണ്. എട്ടാം ക്ലാസ്സിലും ഒന്‍പതാം ക്ലാസ്സിലും പഠിക്കുന്ന പെണ്‍കുട്ടികള്‍ ആത്മഹത്യ ചെയ്യുന്നത് എല്ലാവരും ആത്മഹത്യ അഭിനയിച്ചു കാണിക്കുന്നതുകൊണ്ടല്ല. പലരുടെയും മൊബൈല്‍ ഫോണ്‍ ഹിസ്റ്ററികള്‍ക്ക് ഞെട്ടിക്കുന്ന കഥകള്‍ പറയാനുണ്ട്. യാഥാര്‍ഥ്യം അംഗീകരിച്ചില്ലെങ്കിലും അതിനെ നിസ്സാരവല്‍ക്കരിക്കാന്‍ നോക്കരുത്.

കുറിപ്പ്: സ്വന്തമായി മൊബൈല്‍ ഫോണ്‍ ഉള്ള എല്ലാ കുട്ടികളും ഫോണില്‍ നിന്നു ടീച്ചറെ വിളിച്ച് ഡൗട്ട്‌സ് ക്ലിയര്‍ ചെയ്യുകയും സഹപഠികളെ വിളിച്ച് നോട്ടു ചോദിക്കുകയും സംശയമുള്ള പാഠഭാഗങ്ങള്‍ ഗൂഗിളില്‍ സേര്‍ച്ച് ചെയ്യുകയും മാത്രമാണ് ചെയ്യാറുള്ളത് എന്നു വിശ്വസിക്കുന്നവരേ- നിങ്ങളുടെ നിഷ്‌കളങ്കതയ്ക്ക് ഒരു പൂച്ചെണ്ട് !

ഫാ.ഗോവിന്ദച്ചാമി

വൈദികശ്രേഷ്ഠന്‍മാരുടെ ലൈംഗികവൈകൃതങ്ങളുടെ പേരില്‍ ചീത്തപ്പേരു കേട്ട കത്തോലിക്കാ സഭയ്ക്കു വേണ്ടി നാടുനീളെ നടന്നു മാപ്പു ചോദിക്കുന്ന മാര്‍പ്പാപ്പയോടു വെള്ളക്കുപ്പായമണിഞ്ഞ ഈ പരമനാറികള്‍ ചെയ്തുകൊണ്ടിരിക്കുന്നത് എന്താണെന്ന് ഇവര്‍ അറിയുന്നില്ല. കുട്ടികളെ പീഡിപ്പിക്കുന്ന കാമവെറിയന്‍മാരായ വൈദികര്‍ ദൈവത്തിന്റെ പ്രതിപുരുഷന്‍മാരാണെന്നു പഠിപ്പിക്കുന്നതിനെക്കാള്‍ വലിയൊരു ദൈവനിന്ദ വേറെയില്ല.

വിദ്യാഭ്യാസമില്ലാത്ത, ലഹരിക്കടിമയായ, മൃഗതൂല്യമായ ജീവിതം നയിക്കുന്നവര്‍ക്ക് മാനഭംഗക്കേസില്‍ വധശിക്ഷ നല്‍കുന്ന രാജ്യമാണിത്. പത്തുപതിനഞ്ചു വര്‍ഷം ദൈവശാസ്ത്രവും തത്വശാസ്ത്രവുമൊക്കെ പഠിച്ച് ദൈവശുശ്രൂഷയില്‍ മുഴുകിയിരിക്കുന്ന പള്ളീലച്ചന്‍മാര്‍ക്ക് അതിന്റെ ആയിരം ഇരട്ടി ശിക്ഷ നല്‍കിയാലും അധികമാവില്ല. എന്നിട്ടും കൊച്ചുപെണ്‍കുട്ടികളെ പീഡിപ്പിക്കുന്ന വികാരിയച്ചന്‍മാര്‍ക്ക് ഇവിടെ ഒന്നും സംഭവിക്കുന്നില്ല. ക്രിസ്തുവിന്റെ ശരീരവും രക്തവുമായി മാറി ദിവ്യരഹസ്യങ്ങള്‍ പരികര്‍മം ചെയ്യുന്ന വൈദികശ്രേഷ്ഠന്റെ മനസ്സില്‍ കൊച്ചുപെണ്‍പിള്ളേരുടെ നഗ്നശരീരമാണ് തെളിഞ്ഞു നില്‍ക്കുന്നതെങ്കില്‍ ഈ ഇനത്തില്‍പ്പെട്ട മൈരുകളെ പരസ്യമായി കല്ലെറിഞ്ഞു കൊല്ലാന്‍ തയ്യാറാവണമെന്ന് അരമനകളില്‍ വാഴുന്ന തിരുമേനിമാരോട് വളരെ വിനീതമായി അപേക്ഷിക്കുന്നു.

പറയുമ്പോള്‍ നമ്മള്‍ സിസ്റ്റര്‍ അഭയയുടെ കേസ് മുതല്‍ പറയണം. പുറത്തറിഞ്ഞതും അറിയാത്തതുമായ എത്രയോ നാറിയ കഥകള്‍ വേറെ. തൃശൂരിലെ തൈക്കാട്ടുശ്ശേരി സെന്റ് പോള്‍സ് പള്ളി വികാരി നിര്‍ധനയായ ഒന്‍പതു വയസ്സുകാരിയെ മാനഭംഗപ്പെടുത്തിയതാണ് ഇതില്‍ ഏറ്റവും പുതിയത്. സംഭവം കത്തോലിക്കാസഭയെ തകര്‍ക്കുന്നതിനു വേണ്ടിയുള്ള പൈശാചികശക്തികളുടെ ഗൂഢാലോചന ആയിക്കൂടെന്നില്ല. എങ്കിലും വികാരി ഫാ.രാജു കൊക്കനെതിരെ (നല്ല ബെസ്റ്റ് പേര്) പൊലീസ് കേസ് റജിസ്റ്റര്‍ ചെയ്യുകയും കൊക്കന്‍ ഒളിവില്‍ പോവുകയും ചെയ്ത സാഹചര്യത്തില്‍ ഇത് വളരെ ഗൗരവമുള്ള വിഷയമാണ്.

നിര്‍ധനയായ പെണ്‍കുട്ടിയെ ആദ്യകുര്‍ബാനയ്ക്കുള്ള വസ്ത്രം നല്‍കാമെന്നു പറഞ്ഞ് വിളിച്ചു വരുത്തി നഗ്നയാക്കി സ്വകാര്യഭാഗങ്ങളില്‍ സ്പര്‍ശിക്കുകയും മൊബൈല്‍ ഫോണില്‍ ഫോട്ടോ എടുക്കുകയും ചെയ്തു എന്നാണ് പരാതിയില്‍ പറയുന്നത്. വൈദികനെ ദൈവത്തിന്റെ പ്രതിപുരുഷനായി കണ്ട് ഭക്തിപൂര്‍വം മുന്നില്‍ വന്നു നിന്ന പാവം പെണ്‍കുട്ടിയോട് ഇതു ചെയ്തവന്‍ നികൃഷ്ടമായ മൃഗമാണെന്നതില്‍ സംശയമില്ല. എന്നാല്‍, ഈശ്വരനെ സംബന്ധിച്ചും മതത്തെ സംബന്ധിച്ചും ഒരു പെണ്‍കുട്ടിയുടെ മനസ്സിലുണ്ടായിരുന്ന പ്രകാശം തല്ലിക്കെടുത്തിയതിലൂടെ കൊക്കനും കൊക്കനെ ഒളിപ്പിച്ചുവച്ചിരിക്കുന്ന അഭ്യുദയകാംക്ഷികളും എന്തു നേടി എന്നു കൊക്കനെ ദൈവവേലയ്ക്കായി നിയോഗിച്ച തിരുമേനിമാര്‍ വിശ്വാസികളോട് വിശദീകരിക്കേണ്ടതുണ്ട്.

കൊക്കനെ കേരളാ പൊലീസ് അറസ്റ്റ് ചെയ്യുമെന്നോ മാനഭംഗക്കേസില്‍ കൊക്കന്‍ ശിക്ഷിക്കപ്പെടുമെന്നോ എനിക്കു പ്രതീക്ഷയില്ല. ഒന്നോ രണ്ടോ മാസത്തിനുള്ളില്‍ റോമിലോ ഇറ്റലിയിലോ ബെല്‍ജിയത്തിലോ പ്രത്യേക ദൈവികദൗത്യം നിര്‍വഹിക്കാന്‍ കൊക്കന്‍ പുല്ലുപോലെ പറക്കും. കൊക്കന്റെ കുത്തിക്കഴപ്പിന് ഇരയായ കുടുംബത്തിന് സ്വാഭാവികമായും തെമ്മാടിക്കുഴി ലഭിക്കുകയും ചെയ്യും. 2010 ഒക്ടോബറില്‍ ആലപ്പുഴയില്‍ സണ്‍ഡേ സ്‌കൂള്‍ ക്യാപില്‍ പങ്കെടുത്ത ശ്രേയ എന്ന 12 വയസ്സുകാരിലെ കുളത്തില്‍ മരിച്ച നിലയില്‍ കണ്ടെത്തിയതിന്റെ ദിവ്യരഹസ്യം വര്‍ഷം നാലായിട്ടും പുറത്തു വന്നിട്ടില്ല. കേസന്വേഷിച്ച ക്രൈംബ്രാഞ്ച് ക്യാംപ് ഡയറക്ടര്‍ ഫാ.മാത്തുക്കൂട്ടിയേല്ക്ക് വിരല്‍ ചൂണ്ടി അന്വേണം അവസാനിപ്പിച്ചിട്ട് മാസങ്ങളായി. ഈ കേസില്‍ സര്‍ക്കാര്‍ എന്താണ് ചെയ്യാനുദ്ദേശിക്കുന്നത് എന്നു രണ്ടാഴ്ചയ്ക്കുള്ളില്‍ ബോധിപ്പിക്കാന്‍ ഹൈക്കോടതി നിര്‍ദേശിച്ചിട്ട് രണ്ടു മാസം കഴിഞ്ഞു.

ഫാ.മാത്തുക്കുട്ടിയെയും ഫാ.കൊക്കനെയുമൊന്നും ആര്‍ക്കും ഒന്നും ചെയ്യാന്‍ കഴിയില്ല എന്ന് ഇത്ര കാലത്തെ അനുഭവത്തില്‍ നിന്നും മനസ്സിലാക്കാവുന്നതേയുള്ളൂ. സിസ്റ്റര്‍ അഭയയുടെ കൊലപാതകികളെ നിയമത്തിനു മുന്‍പില്‍ കൊണ്ടുവന്നു ശിക്ഷ വാങ്ങിക്കൊടുത്ത് രാജ്യത്തെ നിയമവ്യവസ്ഥിതിയോട് നീതിപുലര്‍ത്താന്‍ കഴിയാത്ത ഇടയശ്രേഷ്ഠന്‍മാര്‍ ക്രിസ്തുവിനെ പ്രതിപുരുഷന്‍മാരെന്ന് അവകാശപ്പെടുന്നതിലൂടെ ക്രിസ്തുവിനെ വീണ്ടും അവഹേളിക്കുകയാണ് ചെയ്യുന്നത്.

സത്യവും നീതിയും ധര്‍മവും എന്താണെന്നു നന്നായി മനസ്സിലാക്കിയിട്ടുള്ള, ഏറെ അറിവും പഠിപ്പുമുള്ള വൈദികന്‍മാര്‍ ഗോവിന്ദച്ചാമിയെപ്പോലെ പെരുമാറുമ്പോള്‍ എന്തുകൊണ്ട് വിശ്വാസികള്‍ പള്ളിയില്‍ നിന്നകലുന്നു എന്ന ചോദ്യം ചോദിക്കാതിരിക്കുന്നതാണ് നല്ലത്. പള്ളിയില്‍ നിന്നും പള്ളീലച്ചന്‍മാരില്‍ നിന്നും പരമാവധി അകന്നു നില്‍ക്കുന്നതാണ് നല്ലത് എന്നു ശരാശരി ക്രിസ്ത്യാനി വിചാരിക്കുന്നുണ്ടെങ്കില്‍ അത് മേല്‍പ്പറഞ്ഞ ഗഡികളുടെ കുഴപ്പം കൊണ്ടു തന്നെയാണ്. ലൈംഗികവികാരം ഒരു പാപമല്ല. ഈ അച്ചന്‍മാരെയെല്ലാം പെണ്ണുകെട്ടിച്ച് സാധാരണമനുഷ്യരെപ്പോലെ ജീവിക്കാന്‍ അവരെയും പ്രേരിപ്പിക്കണമെന്നു സഭാനേതൃത്വത്തോട് അപേക്ഷിക്കുന്നു. വിശ്വാസികള്‍ വൈദികരെ തല്ലിക്കൊല്ലുന്ന കാലം വരെ സ്വയംതിരുത്താന്‍ കാത്തിരിക്കരുത്.

കെജ്‌രിവാളിനെ കല്ലെറിയുമ്പോള്‍

ജനനന്മയ്ക്കു വേണ്ടി നിലകൊണ്ടിട്ടുള്ള ഒരു രാഷ്ട്രീയനേതാവിന്റെയും വഴികള്‍ പൂക്കള്‍ നിറഞ്ഞതായിരുന്നില്ല. കല്ലേറും മര്‍ദ്ദനവും പീഡനങ്ങളുമേറ്റാണ് ലോകത്ത് എല്ലാ ജനനേതാക്കന്‍മാരും ഉയര്‍ന്നു വന്നിട്ടുള്ളത്. ശത്രുക്കളുടെയും ഏകാധിപതികളുടെയും അക്രമങ്ങളെ അതിജീവിക്കുമ്പോള്‍ അവരുടെയൊക്കെ കരുത്ത് ഒപ്പമുള്ള ജനങ്ങളുടെ പിന്തുണയും വിശ്വാസവുമായിരുന്നു. ഇതില്‍ നിന്നും വളരെ വ്യത്യസ്തമാണ് ഒപ്പം നടക്കുന്നവര്‍ തന്നെ നേതാവിനെ കൈവയ്ക്കുന്നതും ആക്രമിക്കുന്നതും. അരവിന്ദ് കെജ്‌രിവാള്‍ ഈ ഗണത്തില്‍പ്പെട്ട ഒരു രാഷ്ട്രീയപ്രവര്‍ത്തകനും ജനനേതാവുമാണ്. കഴിഞ്ഞ ഒരു മാസത്തിനിടെ മാത്രം അഞ്ചിലേറെ തവണയാണ് കെജ്‌രിവാള്‍ ആക്രമിക്കപ്പെട്ടത്.

ഏപ്രില്‍ എട്ടിന് ഒരു ഓട്ടോറിക്ഷ ഡ്രൈവര്‍ കെജ്‌രിവാളിനെ ആക്രമിച്ചതാണ് അവസാനം നമ്മള്‍ കേട്ടത്. ഏപ്രില്‍ നാലിന് ദില്ലിയിലെ റോഡ് ഷോയ്ക്കിടെ ഒരാള്‍ കെജ്‌രിവാളിന്റെ കരണത്തടിച്ചു. മാര്‍ച്ച് 28ന് ഹരിയാനയില്‍ വച്ച് അണ്ണാ ഹസാരെയുടെ അനുയായി എന്നവകാശപ്പെട്ട് ഒരാള്‍ കെജ്‌രിവാളിനെ ആക്രമിച്ചു. മാര്‍ച്ച് 25ന് വാരണാസിയില്‍ അദ്ദേഹത്തിനു നേരെ മുട്ടയേറുണ്ടായി. അതിനു മുന്‍പ് അടിയും ഇടിയും മഷി കുടയലുമായി അനേകം സംഭവങ്ങള്‍.

കെജ്‌രിവാളിനെ ആക്രമിച്ചു എന്നത് മാധ്യമങ്ങള്‍ക്ക് ഒരു വാര്‍ത്തയല്ലാതായി. പലര്‍ക്കും അത് വളരെ പരിഹാസ്യമായ സംഭവമായി. മറ്റു രാഷ്ട്രീയ പാര്‍ട്ടികളുള്ളവര്‍ക്കും ഇതില്‍ ആശങ്കയുണ്ടായില്ലെന്നു മാത്രമല്ല അതെല്ലാം കെജ്‌രിവാള്‍ തന്നെ ആസൂത്രണം ചെയ്തതാണെന്ന് ആരോപിക്കുകയും ചെയ്തു. സീറ്റ് കിട്ടാത്തവരും പാര്‍ട്ടി നയങ്ങളില്‍ നിരാശ പൂണ്ടവരുമാണ് അക്രമികള്‍ എന്നാണ് റിപ്പോര്‍ട്ടുകള്‍. കോണ്‍ഗ്രസിലും ബിജെപിയിലും സിപിഎമ്മിലുമൊക്കെ സീറ്റു കിട്ടാത്തവരുടെ പത്തിലൊന്നു പോലും വരില്ല ആം ആദ്മിയില്‍ സീറ്റു കിട്ടാത്തവര്‍. പത്തറുപത് വര്‍ഷം രാജ്യം ഭരിച്ച പാര്‍ട്ടികളോടില്ലാത്ത രോഷം ഏതാനും മാസത്തെ ചരിത്രം മാത്രമുള്ള ആം ആദ്മി പാര്‍ട്ടിയോടുണ്ടായി എന്നതും വിചിത്രമാണ്. ഈ കാരണങ്ങളുടെ പേരില്‍ മന്‍മോഹന്‍ സിങ്ങോ നരേന്ദ്ര മോദിയോ ഒന്നും ആക്രമിക്കപ്പെട്ടില്ല എന്നത് മറന്നുകൂടാ. സോളാര്‍ കേസില്‍ പെട്ട് നാറിയ മുഖ്യമന്ത്രി ഉമ്മന്‍ ചാണ്ടിയെ കണ്ണൂരില്‍ കല്ലെറിഞ്ഞതിന്റെ പേരില്‍ ഇവിടൊഴുകിയ കണ്ണീരിനു കണക്കില്ല. എന്നിട്ടും കെജ്‌രിവാളിനെ ആക്രമിച്ചത് മാധ്യമങ്ങള്‍ക്ക് ഒരു തമാശയാണെന്നത് നമ്മുടെ അധപതനത്തിന്റെ ഏറ്റവും പ്രകടമായ ഉദാഹരണമാണ്.

എന്തുകൊണ്ട് കെജ്‌രിവാള്‍ തെരുവില്‍ ആക്രമിക്കപ്പെടുന്നു ? കോടികളുടെ അഴിമതിയും അക്രമങ്ങളും വര്‍ഗീയകലാപങ്ങളും അഴിച്ചു വിട്ട നേതാക്കന്‍മാര്‍ക്കു മുന്നില്‍ നട്ടെല്ലുവളച്ചു നില്‍ക്കുന്ന ഞാനും നിങ്ങളും അടങ്ങുന്ന പൊതുജനം കെജ്‌രിവാളിന്റെ മേല്‍ മഷി കുടയാനും അദ്ദേഹത്തെ കല്ലെറിയാനും മുഖത്തടിക്കാനും തയ്യാറാവുന്നതിന്റെ മനശാസ്ത്രം എന്താണ് ?

ബലാല്‍സംഗത്തിനിരയാവുന്ന പെണ്‍കുട്ടിയെ തൂക്കിക്കൊല്ലണം എന്നു പറയുന്നവരും ലക്ഷം കോടിയുടെ അഴിമതി നടത്തി വീണ്ടും വോട്ടുതേടി വരുന്നവരും കോര്‍പറേറ്റുകള്‍ക്കു വേണ്ടി കൂട്ടിക്കൊടുപ്പു നടത്തുന്നവരും അടങ്ങുന്ന മുഖ്യധാരാ രാഷ്ട്രീയ പാര്‍ട്ടികളില്‍ നിന്നുള്ള ഉന്നതരായ നേതാക്കന്‍മാരെ പൂവിട്ടു പൂജിക്കുകയും അവര്‍ക്കു ക്ഷേത്രങ്ങള്‍ പണിതീര്‍ക്കുകയും ചെയ്യുന്ന സമൂഹം അഴിമതി വിരുദ്ധ ഇന്ത്യയ്ക്കു വേണ്ടി ഏറെക്കുറെ എല്ലാം ഉപേക്ഷിച്ച് തെരുവിലിറങ്ങിയിരിക്കുന്ന നിരായുധനായ ഒരു മനുഷ്യനെ കല്ലെറിയുന്നത് എന്തിനാണ് ?

കെജ്‌രിവാള്‍ ഒരു മികച്ച ഭരണാധികാരിയോ രാഷ്ട്രതന്ത്രജ്ഞനോ ആസൂത്രകനോ അല്ലായിരിക്കാം. എന്നാല്‍ അദ്ദേഹം ജനങ്ങളെ വോട്ടുവാങ്കുകളായി കണ്ട് ഗൂഢപദ്ധതികള്‍ ആസൂത്രണം ചെയ്യുകയോ കോടികളുടെ അഴിമതികള്‍ നടത്തുകയോ ഒരു ഘട്ടത്തില്‍പ്പോലും ജനങ്ങളെ വെല്ലുവിളിക്കുകയോ സാധാരണക്കാരെ ഭീഷണിപ്പെടുത്തുകയോ ചെയ്തിട്ടില്ല. തന്റെ രാഷ്ട്രീയ ആശയം പരമാവധി ജനങ്ങളിലെത്തിക്കാനും അഭിപ്രായരൂപീകരണം നടത്താനും മറ്റെല്ലാവര്‍ക്കുമുള്ളതുപോലെ കെജ്‌രിവാളിനും അവകാശമുണ്ട്. പൊതുജനമധ്യത്തില്‍ കയ്യേറ്റം ചെയ്യപ്പെടാന്‍ യോഗ്യരായ ആയിരം നേതാക്കന്‍മാരെങ്കിലും നാട്ടിലുള്ളപ്പോള്‍ അവരെയൊക്കെ വെറുതെ വിട്ട് കെജ്‌രിവാളിനെ ആക്രമിക്കാന്‍ ജനം തയ്യാറാവുന്നതിന് ഒരേയൊരു കാരണമേയുള്ളൂ- കെജ്‌രിവാള്‍ അതര്‍ഹിക്കുന്നു.

വോട്ടെടുപ്പുകാലത്ത് മാത്രം കൂപ്പുകൈകളോടെ നമ്മെ സമീപിക്കുന്ന പിന്നെ ടിവി ചര്‍ച്ചകളില്‍ മാത്രം കാണുന്ന നേതാക്കന്‍മാരാണ് നമ്മുടെ സങ്കല്‍പത്തിലെ മാതൃകാജനപ്രതിനിധികള്‍. അവര്‍ നമുക്കു വേണ്ടി എന്തു ചെയ്തു എന്നതാലോചിക്കാതെ അവരെ ആരാധിക്കുന്നതാണ് നമ്മുടെ രാഷ്ട്രീയം. നേതാക്കന്‍മാരെ മഹത്വപ്പെടുത്തുന്നതിനു വേണ്ടി പരസ്പരം വെട്ടിക്കൊല്ലുന്നതാണ് ധീരതയെന്നു കരുതുന്ന നികൃഷ്ടജന്മങ്ങളാണ് നമ്മള്‍ സാധാരണക്കാരന്‍. അധികാരവും ആയുധവും കയ്യിലുള്ളവനെയേ നമ്മള്‍ ബഹുമാനിക്കൂ. ആരെയും ആദരിക്കാന്‍ നമുക്കറിയില്ല. പരമാവധി ഭയപ്പെടുത്തുന്നവരെ പൂജിക്കാനേ അറിയൂ. നമ്മളെ അടിമകളായി കാണുന്നവരാണ് നമ്മുടെ നേതാവ്. നമ്മളെ നമ്മളായി കണ്ട് അംഗീകരിക്കുന്നവരെ നമുക്ക് ഭയമാണ്, അവരെപ്പറ്റി ആശങ്കകളാണ്. ഇപ്പോഴും ജീനുകളിലുള്ള അടിമയുടെ അബോധമാണ് കെജ്‌രിവാളിനെതിരെ നമ്മുടെ കൈയുയര്‍ത്തുന്നത്. നമ്മെ ചവുട്ടിമെതിക്കാനും നമ്മുടെ ജീവിതം ദുരിതപൂര്‍ണമാക്കാനും കരുത്തുള്ളവരുടെ മുന്നില്‍ കൈ കൂപ്പി നില്‍ക്കുമ്പോഴാണ് നമ്മള്‍ ഭിതിയും ആശങ്കകളുമില്ലാതെ ജീവിക്കുന്നത്.

സാധാരണക്കാരന്റെ പാര്‍ട്ടിയാണ് ആം ആദ്മി. ഉന്നത നേതാക്കന്‍മാര്‍ക്ക് അനുകരിക്കാനാവാത്ത വിധം സാധാരണക്കാരനായി മുന്നോട്ടു പോകുന്ന നേതാവാണ് കെജ്‌രിവാള്‍. അദ്ദേഹത്തെ കല്ലെറിയുന്ന സമൂഹം സഹതാപമര്‍ഹിക്കുന്നില്ല. നിലവിലുള്ള രാഷ്ട്രീയസംസ്‌കാരത്തില്‍ നിന്നൊരു മാറ്റം അവര്‍ ആഗ്രഹിക്കുന്നില്ല. ജനാധിപത്യത്തിലെ രാഷ്ട്രീയ അടിമത്തം നമ്മുടെ ലഹരിയാണ്. അവിടെ ഒരു സാധാരണക്കാരന്‍ തികഞ്ഞ അശ്ലീലമാണ്. അവനെ തല്ലിക്കൊല്ലുക തന്നെ വേണം.

പൊടി പോലുമില്ല കണ്ടു പിടിക്കാന്‍

250 ടണ്‍ ഭാരവും 60 മീറ്ററിലേറെ നീളവുമുള്ള കൂറ്റന്‍ വിമാനം ഒരാഴ്ചയായി 12 രാജ്യങ്ങള്‍ എല്ലാ ആധുനികസംവിധാനങ്ങളും ഉപയോഗിച്ച് അരിച്ചുപെറുക്കിയിട്ടും പൊടിപോലുമില്ല കണ്ടുപിടിക്കാന്‍. ഭയാനകവും അങ്ങേയറ്റം ആശങ്കാജനകവുമായ ഒരു വിമാനറാഞ്ചലിലൂടെ ലോകം കടന്നുപോകുമ്പോള്‍ ആധുനികസാങ്കേതികവിദ്യയുടെ ഉപകരണങ്ങളെല്ലാം തന്ത്രശാലിയായ വിമാനറാഞ്ചിയുടെ കുശാഗ്രബുദ്ധിക്കു മുന്‍പില്‍ പരാജയപ്പെടുകയാണ്.

വ്യോമയാന ചരിത്രത്തിലെ ഏറ്റവും ദുരൂഹമായ സംഭവമായി മലേഷ്യന്‍ എയര്‍ലൈന്‍സ് എംഎച്ച് 370 എന്ന ബോയിങ് 777 യാത്രാവിമാനത്തിന്റെ തിരോധാനം ഊഹാപോഹങ്ങളും തെളിവുകളില്ലാത്ത സൂചനകളും മാത്രമായി രണ്ടാം വാരത്തിലേക്കു കടക്കുകയാണ്. 239 മനുഷ്യാത്മാക്കളുമായി വിമാനം ഒരദ്ഭുതമായി തിരികെ വരട്ടെ എന്നു പ്രത്യാശിക്കുമ്പോള്‍ തന്നെ ലഭ്യമായ സൂചനകളുടെ അടിസ്ഥാനത്തില്‍ അതിനുള്ള സാധ്യതകള്‍ വിരളമാണെന്നു പറയാം.

കഴിഞ്ഞ ശനിയാഴ്ച പുലര്‍ച്ചെ മലേഷ്യയിലെ ക്വാലലംപൂരില്‍ നിന്നു ബെയ്ജിങ്ങിലേക്കു പറന്നുയര്‍ന്ന വിമാനത്തിന് എന്തു സംഭവിച്ചു എന്ന ചോദ്യത്തിനുള്ള ഏറ്റവും ലളിതവും അസ്വാഭാവികതകളിലെ ഏറ്റവും സ്വാഭാവികവുമായ ഉത്തരങ്ങളെല്ലാം തെറ്റാണെന്നു വിലയിരുത്തപ്പെട്ടിരിക്കുന്നു. വാര്‍ത്താവിനിമയ ബന്ധം വിച്ഛേദിക്കപ്പെട്ട സമയത്തു തന്നെ വിമാനം അപകടത്തില്‍പ്പെട്ടു തകരുകയോ കത്തിയമരുകയോ കടലില്‍ പതിക്കുകയോ ചെയ്തിരിക്കാമെന്ന ആദ്യത്തെ സാധ്യത പുതിയ വഴിത്തിരിവുകളോടെ ഇല്ലാതായിരിക്കുന്നു.

വാര്‍ത്താവിനിമയ ബന്ധം വിച്ഛേദിച്ചതിനു ശേഷം റൂട്ടുമാറിപ്പിടിച്ച വമാനം നാലോ അഞ്ചോ മണിക്കൂര്‍ പറന്ന് എങ്ങോട്ടു പോയി എന്ന ചോദ്യമാണ് ഉത്തരം തേടുന്നത്. ഒപ്പം ആര് എന്തിന് തുടങ്ങി അനേകം ചോദ്യങ്ങളും. ചൈനയ്ക്കു പോകേണ്ട വിമാനം ഇന്ത്യയെ ലക്ഷ്യമാക്കി തിരിച്ചത് എന്തിന് ? ആരാണ് വിമാനം ആ സമയത്ത് നിയന്ത്രിച്ചിരുന്നത് ? വിമാനം എത്ര ദൂരം സഞ്ചരിച്ചിട്ടുണ്ടാവും ? ഇപ്പോള്‍ വിമാനം എവിടെയുണ്ടാവും ?

ഇതുവരെയുള്ള അന്വേഷണത്തില്‍ നിന്നും അധികൃതര്‍ മുന്നോട്ടു വയ്ക്കുന്ന സൂചനകളില്‍ നിന്നു മനസ്സിലാക്കാവുന്നത് വിമാനത്തിലെ വാര്‍ത്താവിനിമയ ബന്ധം വിഛേദിക്കുന്നതു മുതലുള്ള ഓരോ നീക്കവും വിമാനത്തിന്റെ ക്യാപ്റ്റന്‍ തന്നെയാണ് നടത്തിയിട്ടുള്ളത് എന്നാണ്. കാരണം, ഒരു സാധാരണ പൈലറ്റിന് അറിയാവുന്നതിനപ്പുറം ആഴത്തില്‍ കാര്യങ്ങളറിയാവുന്ന ഫ്‌ളൈറ്റ് എന്‍ജിനീയറിങ് വിദഗ്ധനു മാത്രം ആസൂത്രണം ചെയ്തു നടപ്പാക്കാന്‍ കഴിയുന്ന വിധം സങ്കീര്‍ണമായ കാര്യങ്ങളാണ് എംഎച്ച് 370 വിമാനത്തില്‍ നടന്നിട്ടുള്ളത്. 1981ല്‍ കരിയര്‍ ആരംഭിച്ച എംഎച്ച് 370ലെ 53കാരനായ ക്യാപ്റ്റന്‍ 18000 മണിക്കൂറിലധികം വിമാനം പറത്തിയിട്ടുണ്ട്. മികച്ച ഫ്്‌ളൈറ്റ് ഇന്‍സ്ട്രക്ടര്‍ കൂടിയായ അദ്ദേഹം ഒരു വൈമാനികന്‍ അറിയേണ്ടതിലേറെ വിവരം അറിയാവുന്ന ബുദ്ധിജീവിയുമാണ്. അദ്ദേഹം വിമാനം അറിഞ്ഞുകൊണ്ട് അപകടത്തില്‍പ്പെടുത്തുകയോ അതിനു കൂട്ടുനില്‍ക്കുകയോ ചെയ്തതാവാം, അല്ലെങ്കില്‍ അപകടം മുന്നില്‍ കണ്ട് അതൊഴിവാക്കുന്നതിനു വേണ്ടി വളരെ തന്ത്രപരമായി ഒരു നിലപാടെടുത്തതാവാം.

27കാരനായ സൈഹപൈലറ്റ് 2007ലാണ് മലേഷ്യന്‍ എയര്‍ലൈന്‍സില്‍ ജോലി ചെയ്തു തുടങ്ങുന്നത്. 2000 മണിക്കൂര്‍ വിമാനം പറത്തിയിട്ടുള്ള അദ്ദേഹം 2011ല്‍ രണ്ടു സ്ത്രീകളെ കോക്പിറ്റിലേക്കു ക്ഷണിച്ചു പഞ്ചാരയടിക്കുകയും പുകവലിക്കുകയും ചെയ്തു എന്ന വിവരം അന്നു പഞ്ചാരയടിക്കപ്പെട്ടവളിലൊരുവള്‍ ഇപ്പോള് വെളിപ്പെടുത്തിയിട്ടുണ്ട്. ബോര്‍ഡിങ് ക്യൂവില്‍ നിന്നു രണ്ടു പൈലറ്റുമാര്‍ ഈ സ്ത്രീകളെ കോക്പിറ്റില്‍ തങ്ങളോടൊപ്പം യാത്ര ചെയ്യാന്‍ ക്ഷണിക്കുകയും എല്ലാ നിബന്ധനകളും കാറ്റില്‍ പറത്തിക്കൊണ്ട് അവരോടൊപ്പം പറക്കുകയും ചെയ്തു എന്നതാണ് ഇപ്പോള്‍ കത്തിപ്പടരുന്ന വിവാദം. എന്നാല്‍, എംഎച്ച് 370 വളരെ നന്നായറിയാവുന്ന, സ്ഥിരം സഞ്ചാരപാതയറിയാവുന്ന അതിവദഗ്ധനായ ഒരു വൈമാനികന്റെ നിയന്ത്രണത്തില്‍ അരങ്ങേറിയ റാഞ്ചല്‍ ആണ് ഇപ്പോഴും അവസാനിക്കാത്ത ദുരൂഹതയ്ക്കു വഴിവച്ചിരിക്കുന്നത് എന്ന് അന്വേഷകര്‍ പറയുമ്പോള്‍ സംശയം നീളുന്നത് പ്രഗല്‍ഭനായ ക്യാപറ്റനു നേര്‍ക്കു തന്നെയാണ്. ഏതെങ്കിലും തരത്തില്‍ സംശയാസ്പദമായ പശ്ചാത്തലമുള്ള ഒരു യാത്രക്കാരന്‍ പോലും ആ വിമാനത്തിലുണ്ടായിരുന്നില്ല എന്ന് അധികൃതര്‍ പറയുമ്പോള്‍ ക്യാപ്റ്റന്‍ അല്ലാതെ ഇത്രയൊക്കെ കാര്യങ്ങള്‍ ചെയ്യാന്‍ കഴിയുന്ന മറ്റൊരാള്‍ ആ വിമാനത്തിലുണ്ടായിരുന്നില്ല എന്നാണ് അര്‍ഥമാക്കുന്നത്.

വാര്‍ത്താവിനിമയംബന്ധം വിച്ഛേദിക്കുന്നതുള്‍പ്പെടെ നിര്‍ണായകമായ വഴിത്തിരിവിനു തിരഞ്ഞെടുത്ത സ്ഥലം മുതല്‍ എല്ലാം അവിടേക്കു വിരല്‍ ചൂണ്ടുന്നതാണ്. മിലിട്ടറി, സിവിലിയന്‍ റെഡാറുകള്‍ക്ക് ഏറ്റവും റേഞ്ച് കുറവുള്ള സ്ഥലത്തുവച്ചാണ് എംഎച്ച് 370ലെ ട്രാന്‍സ്‌പോണ്ടര്‍ ഓഫ് ചെയ്തിരിക്കുന്നത്. വിമാനത്തിന്റെ ലൊക്കേഷനും ആള്‍റ്റിറ്റിയൂടുമെല്ലാം റിപ്പോര്‍ട്ട് ചെയ്യുന്ന ട്രാന്‍സ്‌പോണ്ടര്‍ ആദ്യം ഓഫ് ചെയ്യാനുള്ള തീരുമാനം ഈ ദുരൂഹതയിലെ ഏറ്റവും തന്ത്രപ്രധാനമായ നീക്കമാണ്. തുടര്‍ന്ന് വഴിതിരിയുന്ന വിമാനം ചൈനയ്ക്കു പകരം ഇന്ത്യന്‍ ഉപഭൂഖണ്ഡത്തെ ലക്ഷ്യമാക്കി നീങ്ങുന്നു. ആ യാത്രയും തന്ത്രപരമാണ്. അതുവരെ 35000 അടി ഉയരത്തില്‍ സഞ്ചരിച്ചിരുന്ന വിമാനം പിന്നീട് സഞ്ചരിച്ചത് അനുവദനീയമായ ഉയരത്തിനെക്കാള്‍ ഏറെ ഉയര്‍ന്ന് 45,000 അടി മുകളില്‍. പിന്നീട് 23,000 അടിവരെ താഴ്ന്നു പറന്ന വിമാനം ഇതെല്ലാം ചെയ്തത് റഡാറുകളെ കണ്ണില്‍പ്പെടാതെയും സ്ഥിരം സഞ്ചാരപാതകളില്‍ നിന്നു മാറി നില്‍ക്കുന്നതിനും വേണ്ടിയാണ്.

അതുകൊണ്ടു തന്നെയാണ് മലേഷ്യന്‍ മിലിട്ടറി റഡാറിലും മറ്റൊരു സിവിലിയന്‍ റഡാറിലും പതിഞ്ഞ തിരിച്ചറിയാന്‍ കഴിയാത്ത വിമാനം എംഎച്ച് 370 തന്നെയാണെന്ന നിഗമനത്തില്‍ എത്തിച്ചേരുന്നത്. ഓള്‍റൈറ്റ്, ഗുഡ്‌നൈറ്റ് എന്നാശംസിച്ചതിനു ശേഷം അജ്ഞാതമായ ഏതു ദൗത്യം നിറവേറ്റാനാണ് 239 മനുഷ്യരെയുമായി ആ വിമാനം പറന്നത് ?

വിമാനങ്ങള്‍ ട്രാക്ക് ചെയ്യുന്നതിനുള്ള ബോയിങ്ങിന്റെ ഉപഗ്രഹസേവനം മലേഷ്യന്‍ എയര്‍ലൈന്‍സ് സബ്‌സ്‌ക്രൈബ് ചെയ്തിരുന്നില്ലെങ്കിലും വിമാന എന്‍ജിന്‍ ഓരോ മണിക്കൂറിലും നല്‍കുന്ന ഡിജിറ്റല്‍ പള്‍സ് മനസ്സിലാക്കിയാണ് അപ്രത്യക്ഷമായതിനു ശേഷവും വിമാനം മണിക്കൂറുകളോളം പറന്നു എന്നത് തീര്‍ത്തു പറയുന്നത്. ഊഹാപോഹങ്ങള്‍ക്കിടയില്‍ തെളിവോടെ ചൂണ്ടിക്കാണിക്കാന്‍ കഴിയുന്ന അപൂര്‍വം ചില വിവരങ്ങളിലൊന്നാണ് ആദ്യം മലേഷ്യന്‍ അധികൃതര്‍ തള്ളിക്കളയുകയും ഇപ്പോള്‍ അംഗീകരിക്കുകയും ചെയ്തിരിക്കുന്ന ഈ രഹസ്യപ്പറക്കല്‍.

തുടര്‍ന്ന് വിമാനത്തിന് എന്തു സംഭവിച്ചു എന്നതാണ് ലോകം ആകാംക്ഷയോടെ ചോദിച്ചുകൊണ്ടിരിക്കുന്നത്. റൂട്ടുമാറി പറക്കുന്നതിലൂടെ സ്വാഭാവികമായും നേരിടേണ്ടി വരുന്ന പ്രതിസന്ധികളില്‍ പെട്ട് തകര്‍ന്നോ അതോ റാഞ്ചിയവര്‍ ലക്ഷ്യമിട്ട സ്ഥലത്തു തന്നെ അതിറക്കിയോ ? അതോ പലരും ആശങ്കപ്പെടുന്നതുപോലെ മറ്റേതോ അപകടകരമായ ലക്ഷ്യത്തിനു വേണ്ടി ഈ കൂറ്റന്‍ വിമാനം എവിടെയെങ്കിലും ഒളിപ്പിച്ചിരിക്കുകയാണോ ?

ഇന്ത്യ-പാകിസ്ഥാന്‍ അതിര്‍ത്തിയിലെവിടെയോ വിമാനം ഇറങ്ങിയിട്ടുണ്ടാവാം എന്നു വാദിക്കുന്നത് വിമാനത്തില്‍ നി്ന്നുള്ള പള്‍സിന്റെ ദിശവച്ചുള്ള ഊഹാപോഹം മാത്രമാണ്. മറ്റൊന്ന് ഇന്ത്യയ്ക്കു മുകളിലൂടെ ശ്രദ്ധയില്‍പ്പെടാതെ ഇത്തരമൊരു വിമാനത്തിന് പറന്നുപോകാന്‍ കഴിയില്ല എന്നതാണ്. പിന്നെ എവിടെ ? ആള്‍പ്പാര്‍പ്പില്ലാത്ത ആന്‍ഡമാന്‍ ദ്വീപുകളിലൊന്നില്‍ 239 ബന്ദികളുമായി വിമാനം ഇറങ്ങിയിട്ടുണ്ടാവുമോ ? സാധ്യത തള്ളിക്കളയാനാവില്ല. എംഎച്ച് 370 അടിസന്തരഘട്ടം വന്നാല്‍ നടുറോഡില്‍ പോലും ഇറക്കാന്‍ കഴിയുന്ന വിമാനമാണെന്നിരിക്കെ റണ്‍വേയില്ലാതെ ആന്‍ഡമാന്‍ ദ്വീപില്‍ ഇറക്കാന്‍ ഒരു പ്രയാസവുമില്ല. വിമാനത്തിലുള്ള ഇന്ധനം ഉപയോഗിച്ച് 30000 അടി ഉയരത്തില്‍ പരമാവധി പറക്കാന്‍ കഴിയുന്ന 3000 മൈല്‍ ദൂരം കണക്കിലെടുത്താണ് ആന്‍ഡമാനിലേക്കു വിലര്‍ ചൂണ്ടുന്നത്.

എന്നാല്‍ വിവിധ ഉയരങ്ങളില്‍ തന്ത്രപരമായി പറന്ന വിമാനം സാധാരണ യാത്രയിലെ വേഗത്തില്‍ പറക്കില്ല എന്നിരിക്കെ വിമാനം ഇന്ധനം തീര്‍ന്ന് കടലില്‍ പതിച്ചിരിക്കാനാണ് സാധ്യത. അല്ലെങ്കില്‍, അങ്ങനെ പതിക്കണം എന്നു തീരുമാനിച്ചുറച്ചു തന്നെയാവണം വിമാനം വഴിതിരിഞ്ഞത്. മറ്റൊരു വഴിക്കും പോകാതെ ഈ വഴി തന്നെ തിരഞ്ഞെടുത്ത് ബ്ലാക്ക് ബോക്‌സ് പോലും ഒരിക്കലും വീണ്ടു കിട്ടരുത് എന്നതുകൊണ്ടു തന്നെയാവണമെന്നും നിരീക്ഷിക്കപ്പെടുന്നു. ഇന്ത്യന്‍ മഹാസമുദ്രത്തില്‍ 250 ടണ്‍ ഭാരവും 60 മീറ്റര്‍ നീളവുമുള്ള കൂറ്റന്‍ മലേഷ്യന്‍ വിമാനം ഒരു ചെറുമീനാണ്.

അമ്മയും അബ്ദുല്ലക്കുട്ടിയും

ഒന്നാലോചിച്ചാല്‍ മാതാ അമൃതാനന്ദമയിയും എപി അബ്ദുല്ലക്കുട്ടി എംഎല്‍എയും ഒരേ തരം പരീക്ഷണങ്ങളിലൂടെയാണ് കടന്നുപോകുന്നത്. മാതാ അമൃതാനന്ദമയിയെയും അമ്മയുടെ ആത്മീയപ്രസ്ഥാനത്തെയും തദ്വാരാ ആര്‍ഷഭാരത സംസ്‌കാരത്തെയും രാജ്യത്തിന്റെ അഖണ്ഡതയെയും തകര്‍ക്കുകയും ചെയ്യുക എന്ന ലക്ഷ്യത്തോടെ ഗെയ്ല്‍ ട്രെഡ്മില്‍ എന്നോ മറ്റോ പേരുള്ള ഒരു വിദേശവനിത എഴുതിയ അശ്ലീലപുസ്തകത്തിന്റെ പേരില്‍ അമ്മയ്‌ക്കെതിരെ ആരോപണത്തിന്റെ കൂരമ്പുകള്‍ എയ്യുകയാണ് ഒരു വിഭാഗം പുരോഗമനവാദികള്‍.

സോളാര്‍ തട്ടിപ്പ് കേസില്‍ (സോറി, സോളാര്‍ ബിസിനസ് കള്ളക്കേസില്‍) കുടുങ്ങി ജയിലിനുള്ളില്‍ ഏറെക്കാലം മനോവേദന അനുഭവിച്ചു കഴിഞ്ഞ കേരളത്തിലെ എക്കാലത്തെയും മികച്ച എന്റര്‍പ്രന്യുര്‍മാരിലൊളായ സരിത നായര്‍ മാഡത്തിന്റെ സംരംഭക കാണ്ഡത്തിലെ ചില ഏടുകള്‍ തുറന്നു കാണിച്ചപ്പോള്‍ തന്നെ ദുഷ്ടന്‍മാര്‍ അബ്ദുല്ലക്കുട്ടിക്കെതിരെ കല്ലേറു തുടങ്ങി. ഇവിടെ ആര് തെറ്റു ചെയ്തു, എന്തു തെറ്റു ചെയ്‌തൊക്കെ തീരുമാനിക്കേണ്ടത് നമ്മള്‍ നാട്ടുകാരോ മാധ്യമങ്ങളോ പാവങ്ങളുടെ നെഞ്ചത്തു കയറി ശീലമുള്ള ലോക്കല്‍ പൊലീസോ അല്ല. എല്ലാം അറിയാവുന്നവന്‍ മുകളിലുണ്ട്.

അമ്മയ്‌ക്കെതിരെ ദുഷ്ടയായ മദാമ്മ പുസ്തകത്തിലൂടെ ഉന്നയിച്ചിരിക്കുന്ന ആരോപണങ്ങള്‍ എല്ലാവര്‍ക്കും അറിയാവുന്നതാണ്. പുസ്തകം വായിച്ചിട്ട് പൊലീസ് എന്തുകൊണ്ട് കേസെടുക്കുന്നില്ല എന്നാണ് പലരും ചോദിക്കുന്നത്. പുസ്തകം വായിച്ചിച്ചിട്ട് കേസെടുക്കുന്ന ഒരേര്‍പ്പാട് എവിടെയെങ്കിലും നിലവിലുണ്ടോ എന്നെനിക്കും അറിയില്ല. ട്രെഡ്മില്‍ ചേച്ചിക്ക് പരതിയുണ്ടെങ്കില്‍ തീര്‍ച്ചയായും ഇന്ത്യയിലെ നിയമവ്യവസ്ഥയെ മാനിച്ചുകൊണ്ട് നിയമപ്രകാരം തന്നെ ആ പരാതി കൊടുക്കുന്നതാണ് മര്യാദ എന്നാണെന്റെ അഭിപ്രായം. ഇത്ര ഗുരുതരമായ ആരോപണങ്ങള്‍ ഉന്നയിക്കുകയും ആ ആരോപണങ്ങളില്‍ ഉറച്ചുനില്‍ക്കുകയും ചെയ്യുന്ന സ്ത്രീക്ക് ഇവിടെ ഒരു പരാതി കൊടുക്കാന്‍ പേടിയാണെന്നു പറയുന്നതില്‍ കാര്യമില്ല.

അതുപോലെ തന്നെയാണ് അബ്ദുല്ലക്കുട്ടിയുടെയും കാര്യം. യുവസംരംഭക സരിതാ മാഡം പത്രസമ്മേളനത്തില്‍ പറഞ്ഞ കാര്യങ്ങളുടെ അടിസ്ഥാനത്തില്‍ (എ)കുട്ടിക്കെതിരെ കേസെടുക്കണമെന്നാണ് ബിജെപി നേതാവ് സുരേന്ദ്രനും മറ്റും പറയുന്നത്. പൊലീസിനെ കണ്ടാല്‍ മുട്ടുകൂട്ടിയിടിക്കുന്ന തരത്തില്‍ ലോകപരിചയമില്ലാത്ത ഒരു സ്ത്രീയല്ല എന്റര്‍പ്രന്യുര്‍ സരിത. അബ്ദുല്ലക്കുട്ടി സരിത മാഡത്തിന്റെ സ്ത്രീത്വത്തെ വേദനിപ്പിച്ചെങ്കില്‍ കട്ടിമേക്കപ്പിട്ടു വന്നു പത്രസമ്മേളനം നടത്താതെ സ്വന്തം നിലയ്ക്ക് ഒരു പരാതി കൊടുക്കുകയാണ് സരിതയും ചെയ്യേണ്ടത്. ഇറച്ചിക്കടയ്ക്കു ചുറ്റും നടക്കുന്ന തെരുവുപട്ടികളെപ്പോലെ ക്യാമറയും മൈക്കുമായി ഒരു ലോഡ് ചാനലുകാര്‍ ചുറ്റും ഉള്ളതുകെ ാണ്ട് യുവസംരംഭകയായ സരിത പറയുന്നതു കേട്ട് പൊതുജനം അബ്ദുല്ലക്കുട്ടിയെയും വരാനിരിക്കുന്ന കുട്ടികളെയും കല്ലെറിയണം എന്നു പറയുന്നതില്‍ കാര്യമില്ല.

ട്രെഡ്മില്‍ ചേച്ചിയെയും എന്റര്‍പ്രന്യുര്‍ ചേച്ചിയെയും ഒരേ പോലെ കാണാനുള്ള നിഷ്പക്ഷ മനസ്സ് എന്തുകൊണ്ട് കേരളാ പൊളിറ്റിക്കല്‍ റിയാലിറ്റിഷോയിലെ വിധികര്‍ത്താക്കള്‍ക്ക് ഉണ്ടാവുന്നില്ല എന്നത് വലിയൊരു ചോദ്യമാണ്. ട്രെഡ്മില്‍ ഒരുപാട് അനുവഭവിച്ചു എന്നാണ് പുസ്തകത്തില്‍ പറയുന്നത്. അതുപോലെ തന്നെ ഒരുപാട് അനുഭവിച്ച മറ്റൊരു സ്ത്രീയാണ് സരിതയും. നിയമം എല്ലാവര്‍ക്കും ഒരേപോലെയായിരിക്കണമെന്ന നിലപാടാണ് എന്തുകൊണ്ടും നല്ലത്. ലുലുമാളിനു വേണ്ടി വയല്‍നികത്തുമ്പോള്‍ സയലന്റ് വാലിയാകുന്നവര്‍ അമ്മയുടെ ജീവകാരുണ്യസ്ഥാപനങ്ങള്‍ക്കു വേണ്ടി വയല്‍നികത്തുമ്പോള്‍ പരിസ്ഥിതിയുടെ പച്ചത്തവളകളായി പുനര്‍ജനിക്കുന്നത് ശോഭനമല്ല. എന്തൊക്കെ നികത്തിയാലും ഇവിടെ ബോര്‍വെല്‍ ഉണ്ടല്ലോ എന്നു പറഞ്ഞതുപോലെ എന്തൊക്കെ സംഭവിച്ചാലും ഇവിടെ ജനാധിപത്യമുണ്ടല്ലോ എന്നു നമുക്കും സമാധാനിക്കാം.

അമ്മയും അബ്ദുല്ലക്കുട്ടിയും ഒരു തെറ്റും ചെയ്യാത്ത വിശുദ്ധരാണ് എന്നല്ല ഇതുകൊണ്ടുദ്ദേശിച്ചത്. മാര്‍പ്പാപ്പ വരെ ഫക്ക് എന്നു പറയുന്ന കാലമാണ്. പെര്‍ഫെക്ഷണനിസം കാലഹരണപ്പെട്ടുപോയ ഒന്നാണ്. അബ്ദുല്ലക്കുട്ടിയെ വേണോ വേണ്ടയോ എന്ന് അദ്ദേഹത്തിന്റെ വോട്ടര്‍മാരും അമ്മയെ വേണോ വേണ്ടയോ എന്ന് അമ്മയുടെ അനുയായികളും തീരുമാനിച്ചുകൊള്ളും.

കോട്ട് ഓഫ് ദി വീക്ക്:-

കേരളത്തില്‍ വനിതകള്‍ക്ക് ബിസിനസ് ചെയ്യാന്‍ കഴിയാത്ത സ്ഥിതിയാണ്. സ്ത്രീകളെ ചൂഷണം ചെയ്യാന്‍ നില്‍ക്കുന്നവരാണ് ചുറ്റിനും. ചിലര്‍ പണം ആവശ്യപ്പെടുന്നു. ചിലര്‍ മറ്റുചിലത് ചോദിക്കുന്നു. രണ്ടും കൊടുത്താലും പദ്ധതി അനുവദിച്ചു കിട്ടാത്ത സ്ഥിതിയാണ്. ഒടുവില്‍ ദുരിതം മുഴുവന്‍ സ്ത്രീ അനുഭവിക്കേണ്ടിവരുന്നു. രാഷ്ട്രീയക്കാര്‍ കുറച്ചുകൂടി മാന്യമായി പെരുമാറണം.

– യുവസംരംഭക സരിത നായര്‍